Tuponena Bwasunu Naa Bwakumbele Bwabuumi Butamani?

“Obu bulangizi mbubonya mbutwakafutulilwa.”—BA-ROMA 8:24.

1. Ino bana Epicurus bakayiisya nzi, alimwi ino busongo bubyaabi obu bwakabajatikizya buti Banakristo bamwi?

IMWAAPOSTOLO Paulo wakalembela Banakristo bakali kukkala mu Korinto kuti: “Ino balaambilanzi bamwi akati kanu kuti taakwe bubuke bwabafu?” (1 Ba-Korinto 15:12) Kulangilwa kuti njiisyo yabusyaabusongo mbyaabi iyakayiisigwaa syaabusongo wa Cigiliki wazina lya Epicurus yakabanyonganya Banakristo bamwi mumwaanda wamyaka wakusaanguna. Aboobo Paulo mukuyiisya kwakwe wakaamba njiisyo ya Epicurus yakuti: “Atulye akunywa, kayi juunza tulafwa.” (1 Bakorinti 15:32, Ci) Kababukazya calunyansyo bulangizi bwakuti bafwu balakonzya kupona alimwi, basikutobela syaabusongo ooyu bakali kusyoma kuti cintu cilikke cigwasya mubuumi bwamuntu nkulikondelezya kwakumubili. (Incito 17:18, 32) Eeyi njiisyo yabusongo ya Epicurus yakali yakuliyanda, yakutasyoma muntu umbi uliwoonse alimwi iibbookezya kapati.

2. (a) Nkaambo nzi ncocakali cintu cantenda kutasyoma mububuke? (b) Mbuti Paulo mbwaakayumya-yumya lusyomo lwa Banakristo Banakorinto?

² Ooku kukaka bubuke kwakajatikizizye twaambo tunji. Mboobu Paulo mbwaakakanana: “Kuti naa bafu tababuki, nkokuti awalo Kilisito taakwe naakabusigwa pe. Kuti naa Kilisito taakabuka, nkokuti kukambauka kwesu nkwabuyo, anywebo mwasyoma cabuyo. . . . Naa lusyomo lwesu muli Kilisito kaluli buyo lwabuumi buno, tuleelede kufwidwa nsoni kwiinda bantu boonse.” (1 Bakorinti 15:13-19, Ci) Inzya, kuti kakunyina bulangizi bwa buumi butamani kumbele, Bunakristo inga bwaba ‘bwabuyo.’ Inga bwaba bwabuyo naa butakwe mulimo. Aboobo tacigambyi, kuti mukuyungwa akuyeeya kwabantu aba batakombi, imbungano ya Banakorinto yakaba busena muzyalilwa mapenzi alimwi abubi. (1 Ba-Korinto 1:11; 5:1; 6:1; 11:20-22) Aboobo Paulo wakayeeme aakuyumya lusyomo lwabo mububuke. Kwiinda mukubelesya bunkutwe mukwaambaula, ikuzubulula caamba Magwalo, alimwi akubelesya zikozyanyo, wakakonzya kucibikka antangalala kakunyina kudooneka kuti bulangizi bwabubuke tiicaali caano cakulengelezya buyo pe, pele bwakali bwakasimpe bwakali kulangilwa kuzuzikizigwa. Kayeeme waawa, wakakonzya kubakulwaizya basyominyina kuti: “Amukakatile, mutazungaani. Amupangike myoyo yanu lyoonse kumilimo ya-Mwami, nkaambo mulizi kuti milimo yanu yamu-Mwami tiikonzyi kuba yabuyo pe.”—1 Ba-Korinto 15:20-58.

“Amulangile”

3, 4. (a) Kweelana abwakaamba Petro, nciimo nzi cibyaabi cakali kuzikunyonganya bamwi mukati kamazuba aakumamanino? (b) Tweelede kuti katuliyeezya nzi lyoonse?

³ Sunu, bunji bwabantu tabajisi bulangizi, aboobo baponena bwasunu, bwajuunza ategwa tabuzibwa. (Ba-Efeso 2:2) Cili buyo mbubwena mwaapostolo Petro mbwaakasinsima. Wakaamba zya “basabuzi beenda muzisusi zibi zyamyoyo yabo beni . . . cakwaamba kuti, Ino kuli kuli kuboola kwakwe ukwakasyomezegwa? Nkaambo kakuti kuzwa kuciindi nibakafwa mataateesu, zintu zyoonse zicili mbubonya mbozyakabede kuzwa kumalengelo.” (2 Petro 3:3, 4) Ikuti Banakristo bakasimpe abalo bayungwa akulanganya kwazintu kuli boobu, balakonzya “kuba batolo nanka kubula micelo.” (2 Petro 1:8) Mucoolwe, ooku takuli nkokulanganya kwabanamunji akati kabantu ba Leza mazubaano pe.

⁴ Tacili cintu cilubide pe kuyanda kuti bweende bwazintu oobu buliko lino bumane. Amuyeeye bamaapostolo bakwe mwini Jesu mbobakakutondezya kuyanda munzila eyo nobakati: “Omwami, sena ulabweedezya bwami ku-Israyeli kuliceecino ciindi?” Jesu wakaingula kuti: “Takuli kwanu kuziba ziindi, naaba mazuba ngaabika Taata kubwami bwakwe mwini.” (Incito 1:6, 7) Aaya majwi bunji bwangawo ajisi mulumbe ngwaakakambwauka ku Cilundu ca Elaioni kati: “Tamuzi buzuba mbwazoosika mwami wanu. . . . Kuciindi ncimutezi nciconya ncazoosika Mwana a-Muntu.” (Matayo 24:42, 44) Tweelede kuzumanana kunikuliibalusya lulayo luli boobo! Bamwi balakonzya kusunkwa akulanganya kwazintu kwakuti, ‘Ndiza ndeelede kulyookezya asyoonto akuliiba-iba buya ma ikutali kulijaya buya.’ Ooko inga kwaba kulubizya kaka! Amulange zikozyanyo zyaba Jakobo a Johane, bana “basimuzumo.”—Marko 3:17.

5, 6. Nziiyo nzi nzyotunga twaiya kuzikozyanyo zyaba Jakobo a Johane?

⁵ Tulizyi kuti Jakobo wakali mwaapostolo munkutwe kapati. (Luka 9:51-55) Weelede wakatalika kubelesegwa mboyakatalika buyo mbungano ya Bunakristo. Pele ciindi Jakobo kacili buyo mwana-mwana, Heroda Agrippa Wakusaanguna wakamujaya. (Incito 12:1-3) Sena tuyeeya kuti Jakobo, akaambo kakufwa nkwaakafwa katalibambilide, wakabijilwa nkaambo wakali munkutwe, akuti nkaambo wakalitonta cakutaleka mumulimo wamumuunda? Peepe! Masimpe wakalikkomene kuti wakaibelesya myaka yabuumi bwakwe bufwaafwi kapati mumulimo wa Jehova. Ono, kwiina omwe wandiswe uunga wazyiba naa tulafwa katutalibambilide. (Mukambausi 9:11; amweezyanisye a Luka 12:20, 21.) Eelyo ncamaanu kuti lyoonse katusungweede kapati mukubelekela Jehova. Kuti naa twacita boobo tunoojisi izina bbotu anguwe alimwi lyoonse tunoozumenene alulangilo lwesu lwabuumi bwakumbele butamani.—Mukambausi 7:1.

⁶ Kuli ciiyo cikozyanya aceeci icijatikizya mwaapostolo Johane, walo wakaliko ciindi Jesu naakakulwaizya cakusinizya kuti, “Amulangile.” (Matayo 25:13; Marko 13:37; Luka 21:34-36) Johane majwi aaya wakaatobela, wakabeleka cabunkutwe kwamakumi aamyaka manji. Alimwi cilangika kuti, ngowakasyaalizya kufwa akati kabaapostolo bamwi boonse. Ciindi Johane naakacembaala kapati, anaakalanga makumi-makumi aamyaka musule mbwaakabeleka cakusyomeka, sena wakabona kuti wakalubizya, wakali kupona buumi butaluzi alimwi wakaciindizya? Taaku, peepe! Wakaci sungweede kulangila zyakumbele. Iciindi Jesu wakabusigwa naakati, “Mbukubede! Ndafwambaana kuboola,” Johane cakufwambaana wakaingula kuti, “Ameni! Koboola ncobeni, Mwami Jesu.” (Ciyubunuzyo 22:20) Johane mukasimpe tanaakali kuponena bwasunu, kayanda buumi bwakulikwaya buyo akuliiba ‘mbuli lyoonse.’ Wakali sinizizye kuzumanana kubeleka abuumi bwakwe boonse anguzu, mane do ciindi eco Mwami naakali kuya kuboola. Ino ono swebo cili buti?

Izintu Zipa Kusyoma mu Buumi Butamani

7. (a) Mbuti bulangizi bwabuumi butamani ‘mbobwakasyomezegwa kalekale kakutana kuba ciindi’? (b) Mbuti Jesu mbwaakazibya bulangizi bwabuumi butamani?

⁷ Amusyomezegwe kuti ibulangizi bwabuumi butamani tacili ciloto cakalotwaa muntu naa kaano kakulengelezya buyo pe. Kuli Taitasi 1:2, Ci kwaambwa kuti, ibukombi bwesu bwabunaleza busimpide aa “lulangilo lwabuumi butamani mbwaakasyomezya kale-kale Leza uutabeji.” Akali makanze aa Leza aakumatalikilo kuti banamaleya boonse basyomeka bapone kukabe kutamani. (Matalikilo 1:28) Taakwe, nokuba kuzanga kwaba Adamu a Eva, cinga cacinca makanze aakwe. Mbubwena mbuli mbokulembedwe ku Matalikilo 3:15, Leza mpoona-mpoona wakasyomezya “lunyungu” lwakali kuzyi kugusya kucisa koonse kubanamaleya. Iciindi “lunyungu” naa Mesiya, Jesu, naakasika, wakacitya bulangizi bwabuumi butamani kuba akati kanjiisyo zyantalisyo naa zipati-pati mukuyiisya kwakwe. (Johane 3:16; 6:47, 51; 10:28; 17:3) Kwiinda mukwaaba buumi bwakwe bulondokede kuba cinunuzyo, Kristo wakajana ceelelo cizumizidwe cakupa banamaleya ibuumi butamani. (Matayo 20:28) Bamwi babasiciiya bakwe, ibali 144,000 antoomwe, bayakupona abuumi butamani kujulu. (Ciyubunuzyo 14:1-4) Aboobo ibantu bakajisi mibili iifwa, baya “kusamikwa butafwiki”!—1 Ba-Korinto 15:53.

8. (a) Ino buumi “butafwiki,” ncinzi, alimwi ino nkaambo nzi Jehova ncabupa kuli ba 144,000? (b) Mbulangizi nzi Jesu mbwaakasyomezya ku “mbelele zimwi”?

⁸ ‘Ibuumi butafwiki’ tacaambi buyo kutafwa. Cijatikizya “nguzu zyabuumi butakwe nobumana.” (Ba-Hebrayo 7:16; amweezyanisye Ciyubunuzyo 20:6.) Pele, ino ncinzi Leza ncamaninizya mukwaabila cipego cilibedelede cili boobu? Amuyeeye, kaambo Saatani nkaakaamba kakuti kwiina nociba comwi cazilenge zya Leza cinga cilasyomeka. (Jobu 1:9-11; 2:4, 5) Kwiinda mukubapa buumi butafwiki aaba ibali 144,000, Leza utondezya lusyomo lwini-lwini ndwajisi munkamu eeyi yalo yaingula cakumaninina kaambo nkaakabusya Saatani. Pele, ino mbuti kubanamaleya boonse aba? Jesu wakabaambila boobu basikutalisya ba “katanga kaniini” kabasikukona Bwami kuti bakali “[k]uyookala azyuuno zyabwami akubeteka misyobo iili kumi ayobile ya-Israyeli.” (Luka 12:32; 22:30) Eeci caamba kuti bamwi bayakutambula buumi butamani anyika bakabe balelwa ba Bwami bwakwe. Nokuba kuti aaba ba “mbelele zimwi” tabapegwi buumi butafwiki, balatambula “buumi butamani.” (Johane 10:16; Matayo 25:46) Ibuumi butamani aboobo, mbobulangizi bwa Banakristo boonse. Tacili caano buyo cakulengelezya pele cintu cisinizidwe cakasyomezegwa a “Leza, uutabeji,” akubbadelelwa abulowa bwa Jesu buyandisi alimwi busetekene.—Tito 1:2.

Sena Kuzuzikizigwa Kucili Kule?

9, 10. Nzitondezyo nzi zitadoonekwi ziliko zitutondezya kuti mamanino alaafwaafwi?

⁹ Mwaapostolo Paulo wakasinsima kuti “ziindi zikataazya” zyakali kuyootondezya kuti twasika cini-cini “kumazuba aakumamanino.” Iziinga zyabuntunsi zituzungulukide mboziyaa bwiindila kuba muciimo cinyina luyando, cabulyato, kulikkomanisya lwabo beni, akutakomba, sena tatwiibaluki mumizeezo kuti ibuzuba bwa Jehova bwakucita imbeta zyakwe kubweendelezi bwanyika butaluleme oobu bulimukuswena aafwiifwi eni? Eelyo kulwana akusulaika nokuyabuvwula, sena tatukuboni kufwumbwa nkotwalanga kuzuzikizigwa kwamajwi aa Paulo ngaakazumanana kwaamba kuti: “Bantu babi banooyoobija akubijila limwi”? (2 Timoti 3:1-5, 13, Ci) Bamwi balakonzya kuti kabaamba cakusinizya kuti “Kwatontola, kwaliiba,” pele kulangila kwabo koonse kwa luumuno kuya kwiile kuyangala, nkaambo “elyo muciindi eco nciconya lunyonyooko luzoofwambaana kubasikila mbuli insungo mbozisikila uumisi, nkabela tabakooyooloboka pe.” Kwiina notuli mumudima kumakani aabupanduluzi bwaciindi cesu. Eelyo, ‘atulinde akupakamana.’—1 Ba-Tesalonika 5:1-6.

¹⁰ Kuyungizya waawa, Ibbaibbele litondezya kuti mazuba aakumamanino ‘nciindi ciniini buyo.’ (Ciyubunuzyo 12:12; amweezyanisye 17:10.) Ibunji bwaciindi “ciniini buyo” eco kulangika kuti cainda kale. Ibusinsimi bwa Daniele, mucikozyanyo, bulapandulula kabotu-kabotu ikuzwangana akati ka “mwami wakunyika” alimwi “amwami wakumusanza” ikwazumanana mane do mumwaanda wamyaka uno. (Daniele 11:5, 6) Cilikke cisyeede kuzuzikizigwa nkulwana kwamamanino kwa “mwami wakunyika,” kupanduludwe kuli Daniele 11:44, 45.—Amubone Ngazi Yamulindizi yamu Cingisi ya July 1, 1987, aya November 1, 1993, kubupanduluzi bwa businsimi obu.

11. (a) Matayo 24:14 yazuzikizigwa kusika aciimo nzi? (b) Ino majwi aa Jesu alembedwe kuli Matayo 10:23 atondezya nzi?

¹¹ Alimwi kuli abusinsimi bwa Jesu bwakuti “aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Sunu, Bakamboni ba Jehova balimukuucita mulimo wabo mumanyika aali 233, mutubunga twansumbu, alimwi amumabbazu. Masimpe, mabbazu aatanasikwa nkwaacili, alimwi antela muciindi ncabambide Jehova, icoolwe ciyakuba akwalo. (1 Ba-Korinto 16:9) Pele, imajwi aa Jesu aalembedwe kuli Mateyo 10:23, Ci alatilimuna akupempenuna naakati: “Kamutana kwiimana minzi yoonse ya Isilayeli Mwanaa Muntu unoosikide kale.” Nokuba kuti masimpe ngakuti makani mabotu anikwaambilizidwe munyika yoonse mboizulwa, takuli kumabazu aanyika oonse nkotuyakusika lwesu amulumbe wa Bwami katana ‘kusika’ Jesu Sikujaya mumulawo.

12. (a) ‘Nkugwalwa’ nzi kwaambwa ku Ciyubunuzyo 7:3? (b) Ino kuceya kwamweelwe wabananike anyika kujisi bupanduluzi nzi?

¹² Amulingule cibalo cili ku Ciyubunuzyo 7:1, 3, caamba kuti “myuuwo yone” yalunyonyooko ilijiswi kuti itawungi “mane tubagwale bazike ba-Leza wesu kunkumu zyabo.” Eeci tacaambi kugwalwa kwakutaanguna pe, kucitika ciindi aabo bali akati kabantu bali 144,000 nobatambula bwiite bwabuumi bwakujulu. (Ba-Efeso 1:13) Eci caamba kugwalwa kwamamanino, ciindi nobazibisigwa kakunyina bucince kuba “bazike ba-Leza wesu,” basunkidwe alimwi basyomeka. Imweelwe wabana ba Leza bananike bancobeni bacipona anyika waceya kapati. Kuyungizya waawa, Ibbaibbele mukusalazya lyaamba kuti “nkaambo kabasale” cibeela citaanzi camapenzi mapati ncociya “k[u]fwiinsigwa.” (Matayo 24:21, 22) Bunji bwabaabo bazibidwe kuba bamwi babananike balicembeede kapati. Alimwi, sena eci tacaambi kuti mamanino aciindi ali aafwaafwi kapati?

Mulindizi Uusyomeka

13, 14. Mmukuli nzi ngocijisi ciinga camulindizi?

¹³ Pele kwaciindi cino, tweelede kutobela malailile aapegwa a “muzike musyomesi.” (Matayo 24:45) Kwamyaka yiinda kumwaanda omwe, “[i]muzike” wasunu wabeleka mubusyomesi kali “mulindizi.” (Ezekiele 3:17-21) Ngazi Yamulindizi ya January 1, 1984, yamu Cingisi, yakapandulula kuti: “Ooyu mulindizi ulimukulangilila zintu anyika mbozili mukucitika mukuzuzikizya businsimi bwa Bbaibbele, uli mukucenjezya bantu zya ‘mapenzi mapati aatana kubonwa kuzwa kumalengelo aanyika’ alimwi uli mukumwaya ‘makani mabotu loko.’”—Matayo 24:21; Isaya 52:7.

¹⁴ Amuyeeye kuti: Mmulimo wa mulindizi kwiita akwaamba “kufumbwa ncabona.” (Isaya 21:6-8) Mumazubaa ciindi camu Bbaibbele, mulindizi wakali kunga wacenjezya nokuba kuti ncaabona kuti inga caleta mapenzi cicili kule cakuti tacikonzyi kuzyibwa kabotu. (2 Bami 9:17, 18) Elyo milumbe yakucenjezya yakubeja ayalo yakacitika mumazuba ayo. Pele mulindizi mubotu kwiina naakali kuumuna buyo akaambo kakuyoowa kugunisigwa. Ikuti naa ŋanda yanu ili mukupya amulilo, inga mulalimvwa buti ikuti naa basikuzima mulilo tabasiki akaambo kakuyeeya kuti ndiza inga caba cizibyo cakubeja ncomwabapa? Maccu kaka! Lyoonse tulangila kuti bantu aaba cakufwambaana babalikile kubusena obo, mbobazibisigwa buyo zyamakani aantenda. Muciimo ncicona eci, ciinga camulindizi caita naa kuzyibya ciindi bukkale naa ciimo nozyatondezya kuti kuleelede kucita boobo.

15, 16. (a) Nkaambo nzi ncokuli kucinca mukumvwa kwesu kwabusinsimi? (b) Nciiyo nzi ncotunga twaiya kuzwa kubabelesi basyomeka ba Leza ibakajisi luzibo lwabusinsimi lumwi lulubide?

¹⁵ Izicitika mboziya bwiindila kuvwula, ikumvwisya kwesu kwabusinsimi akwalo kuyaa busalazigwa. Izyacitika ciindi cainda zyatondezya kuti, kanjikanji, businsimi bwabuleza tabuteelelwi kabotu kabutana kuzuzikizigwa. Leza wakaambila Abramu bulamfwu bwaciindi bwini-bwini ilunyungu lwakwe nobakali “[ku]yooba beenzu mucisi cimbi,” kaamba calusinizyo kuti myaka iili, 400. (Matalikilo 15:13) Pele, Musa wakalyaaba kuba sikunununa kacitanasika ciindi.—Incito 7:23-30.

¹⁶ Amulange alimwi businsimi bwabu Mesiya. Kuti twalanga zintu zyakacitika zyamusule cilisinizidwe kuti lufwu lwa Mesiya abubuke zyakasinsimwa. (Isaya 53:8-10) Pele, basiciiya bakwe mwini Jesu bakakakilwa kukamvwisya kabotu kaambo aaka. (Matayo 16:21-23) Tiibakabona kuti Daniele 7:13, 14 yakali kuzoozuzikizigwa muciindi cakumbele kwa pa·rou·siʹa, naa “kubako” kwa Kristo. (Matayo 24:3, NW) Aboobo bakalubizya amyaka iitandila ku 2,000 mukubala ciindi, nobakabuzya Jesu kuti: “Omwami, sena ulabweedezya bwami ku-Israyeli kuliceecino ciindi?” (Incito 1:6) Alimwi aciindi imbungano ya Bunakristo kaikkalikene kale, kuyeeya kulubide akulangila kwakubeja kwakazumanana kulibonya. (2 Ba-Tesalonika 2:1, 2) Nokuba kuti bamwi babaabo zimwi ziindi bakalilubide mukuyeeya, Jehova cakusinisya wakaulongezya mulimo wabasyomi aabo bamumwaanda wamyaka wakusaanguna!

17. Ino tweelede kukulanga buti kucinca kwakumvwa kwesu kwa Magwalo?

¹⁷ Iciinga camulindizi casunu acalo capa bupanduluzi bumvwika ciindi aciindi. Sena kuli unga uladonaika, kuti Jehova wamulongezya “muzike musyomesi”? Kunze lyaboobo, naa twalanga zibeela zyabwini, sena tamuzumini kuti kubambulula kunjikunji kwacitwa nkusyoonto kapati? Ikuteelela kwesu kwa Bbaibbele kwini-kwini kwiina mpokwacinca pe. We! Ede ono lusyomo lwesu lwakuti tukkede mumazuba aakumamanino lwaindila buya kukomena kwiinda lyoonse!

Kuponena Buumi Bwakumbele Butamani

18. Nkaambo nzi ncotweelede kuceeleba ciimo cakuponena bwasunu buyo?

¹⁸ Ibunji bwabantu munyika balakonzya kabaamba kuti, ‘Atulye akunywa, nkaambo juunza tulafwa,’ pele eci taceelede kuba ciimo cesu pe. Nkaambo nzi kwiile kulijaya kuti mujane kulikondelezya nkomunga mwajana mubuumi lino kakuli mulakonzya kukubelekela kumbele aamazuba notuyakukkala kutamani? Ibulangizi obo, naa mbwabuumi butafwiki kujulu naa mbwabuumi butamani anyika, tacili ciloto, naa kaano kakulengelezya buyo pe. Mmasimpe aakasyomezegwa a Leza “uutabeji.” (Tito 1:2) Izitondezyo nzinji izitondezya kuti kuzuzikizigwa kwa bulangizi bwesu kulaafwaafwi kapati! “Ciindi [cisyeede, NW] caceya.”—1 Bakolinti 7:29, Ci.

19, 20. (a) Mbuti Jehova mbwakubona kulyaaba nkotwakacita akaambo ka Bwami? (b) Nkaambo nzi ncotweelede kupona kumwi katuyeeya kumbele kwakupona kukabe kutamani?

¹⁹ Masimpe bweende bwazintu obu bwabako kwaciindi cilamfwu kwiinda bunji bwabantu mbobakali kuyeeya. Ibantu basyoonto ono balakonzya kutalika kuyeeya kuti nobakalizi, kwiina nobakali kunga balyaaba mbuli mbobakacita. Pele tacili cintu ncotweelede kulimvwa bubi kuti twakacita. Kayi, kulyaaba ncecintu cipati kapati Kumunakristo oonse. Banakristo ‘balaliimya.’ (Matayo 16:24) Tatweelede kulimvwa kuti kusoleka kwesu kwakuyanda kumukkomanisya Leza nkwabuyo. Jesu wakasyomezya kuti: “Taakwe muntu iwakaleka iŋanda nibaba banabakwabo nibaba bacizi nibaba banyina naba wisi nibaba bana bakwe niiba myuunda nkaambo kandime aka-Makani Mabotu, anu ulijene kale kuciindi ecino . . . elyo muciindi ciboola uyoojana buumi butamani.” (Marko 10:29, 30) Myaka iili cuulu kuzwa lino, zinikuli aampindu buti zintu zili mbuli zeezi, mulimo wanu wakumubili, iŋanda naa mali anu aali kubbanga naa ibuvwubi? Pele kulyaaba kwanu nkomwakacitila Jehova kunikuli ampindu kwazyuulu-zyuulu zyamyaka kuzwa lino—mane buya tuulunzuma twamyaka kuzwa lino! “Nkaambo Leza tali sikampenda, takonzya kuluba milimo yanu.”—Ba-Hebrayo 6:10.

²⁰ Aboobo, mbwaanga makani ali boobu, atupone kumwi katujisi makanze aakumbele akupona kukabe kutamani, katudunamikide meso kutali, “[a]zintu zibonwa pele zintu zitabonwa, nkaambo zintu zibonwa nzyakaindi buyo anukuti zintu zitabonwa nzeziteeli.” (2 Ba-Korinto 4:18) Imusinsimi Habakuku wakalemba kuti: “Nkaambo cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” (Habakuku 2:3) Ino ‘kulindila’ mamanino kuijatikizya buti mikuli yesu tobeni alimwi ayamikwasyi? Icibalo citobela cilatusalazya twaambo otu.

Twaambo Twakwiindulula

◻ Mbuti ibantu basyoonto sunu mbobajatikizigwa akaambo kakuyeeya kuti mamanino aabweende bwazintu obu abamukila?

◻ Ibulangizi bwesu bwa buumi butamani buyeeme anzi?

◻ Mbuti mbotweelede kukubona kulyaaba kwesu nkotwakacita akaambo ka Bwami?

[Cifwanikiso icili apeeji 7]

Imulimo wabukambausi wamunyika yoonse mboizulwa weelede kumanisigwa mamanino kaatanasika