“Milimo Yanu . . . Tiikonzyi Kuba Yabuyo pe”
1 Elo kalakulwaizya kaka kaambo aka! Kusola-sola kwanu nkomucita mumulimo wa Jehova takuli kwabuyo pe. (1 Kor. 15:58) Mukwiimpana, amuyeeye buyo bantu mbobabeleka canguzu ikusola kusumpula ibuvwubi bwabo. Balakonzya ikutola lwiiyo lwaatala kwamyaka minji naa ikubeleka canguzu kapati kutegwa bajane zintu zyakumubili. Pele akaambo ka “ziindi zyalufwu azyamapenzi,” balakonzya kukakilwa kujana bulemu mbobali kuyanda naa balakonzya kusinikizigwa kukkutilaa zintu kufwumbwa nzyobajisi. Milimo yabo njabuyo nkaambo ‘tiikutyi moyo.’ (Muk. 1:14; 9:11) Aboobo, ncintu ciyandika kapati ikuti tupangike myoyo akucita mulimo uutali wabuyo akaambo kakuti ulaampindu iitamani!
2 Imulimo Ulaampindu Ncobeni: Ikukambauka makani mabotu aa Bwami bwa Leza ngomulimo uuyandika kapati anyika. Ngomulimo weelede kucitwa takwe makani naa bantu balaswiilila naa pe. Tuyanda kuti andiswe tukaambe bwakaamba Paulo kuti: “Ndasalala kubulowa bwabantu boonse, nkaambo nsikasiside cintu pe, ndakamwaambila luyando loonse lwa-Leza.”—Inc. 20:26, 27.
3 Cilakkomanisya kaka eelyo bantu nobaswiilila akutambula mulumbe wa Bwami! Mwanakazi umwi mwana-mwana wakafwidwa banyina bamwi. Cakamupa kuyeeya nkobakaunka banyina—naa kwakali kujulu naa nkuuhelo? Wakapaila kuli Leza kulomba lugwasyo kabelesya zina lya Jehova mbuli mbwaakamuyiisya mupati wakwe mukaintu. Tiikwakaindaa ciindi wakatalika kwiiya Bbaibbele alimwi akujanika kumiswaangano ya Bunakristo. Wakabaa bulangizi bupya bwabuumi alimwi wakaleka kweendaa zigwebenga zyamumigwagwa. Mwanakazi ooyu wakaleka kufweba, kunywa misamu iikola alimwi akubba. Wakazumina kati: “Lulikke luyando ndondijisi kuli Jehova ndolwakapa kuti ndisiye buumi bubi oobo. Jehova alikke akaambo kaluzyalo lunji ndwajisi, nguwakali kukonzya kundipa bulangizi bwabuumi butamani.” Taciponi buumi bwakutobela zintu zyabuyo.
4 Nokuba leelyo bantu nobakaka kuswiilila, mubeleka mulimo ulaampindu. Balizi kuti Bakamboni ba Jehova bakali baswaide. Lusyomo lwenu nobeni akusyomeka alimwi aluyando zilasinizigwa. Aboobo, sena kusola-sola nkomucita mumulimo wa Leza nkwabuyo? Peepe!