7. Bwami bwa Leza bujisi milawo iisumpukide

Mfwulumende zilabikka milawo iyeelede kugwasya alimwi akukwabilila balelwa banzizyo. Abwalo Bwami bwa Leza bulijisi milawo njobeelede kutobela balelwa bambubo. Amubale 1 Bakorinto 6:9-11, akubandika mibuzyo eeyi:

• Ino muyeeya kuti nyika iyooba buti ciindi boonse baakutalika kutobela milawo ya Leza yakulilemeka?a

• Sena muyeeya kuti Jehova ulijisi nguzu zyakubona kuti balelwa ba Bwami beelede kwiitobela milawo eeyi? Nkaambo nzi?

• Ncinzi citondezya kuti bantu ibatatobeli milawo eeyi balakonzya kucinca?—Amubone kapango 11.

Bantu banji tabaanguluki kubandika makani aakoonana. Nokuba boobo, ciindi Bbaibbele nolyaamba makani aakoonana, lilaamba cacigaminina pele munzila yabulemu. Nzyolyaamba zilatugwasya kapati. Alimwi eeci cilalimvwisya. Amana buya, Jehova Mulengi wesu. Aboobo ulizyi zintu zikonzya kutugwasya. Ulatwaambila ncotweelede kucita kutegwa tumukkomanisye alimwi acikonzya kutugwasya kutegwa tukapone kukabe kutamani.

1. Ino Jehova waabona buti makani aakoonana?

Koonana ncipego kuzwa kuli Jehova. Uyanda kuti mwaalumi amukaintu ibakwetene kabakukkomanina. Cipego eeci cipa coolwe kubanabukwetene cakutondezyanya luyando ikutali buyo nzila yakuzyala abana. Nkakaambo kaako Jwi lya Leza lyaamba kuti: “Kokkomana amukaintu wakubukubusi bwako.” (Tusimpi 5:18, 19) Jehova uyanda kuti Banakristo banabukwetene kabasyomeka kuli umwi amweenzinyina, kutegwa bataciti bumambe.—Amubale Bahebrayo 13:4.

2. Ino bwaamu ninzi?

Bbaibbele litwaambila kuti “basibwaamu . . . tabakanjili mu Bwami bwa Leza.” (1 Bakorinto 6:9, 10) Balembi ba Bbaibbele ibakalemba mumwaambo wa Chigiriki bakabelesya bbala lyakuti por·neiʹa kupandulula bwaamu. Ibbala eeli libikkilizya (1) koonanaa kwabantu batakwetene, (2) koonana kwabantu bakozyenye zizo, alimwi (3) akoonana abanyama. Tulamukkomanisya Jehova alimwi tulagwasyigwa swebo kutugama ciindi ‘notulilesya kubwaamu.’—1 Batesalonika 4:3.

AMWIIYE ZINJI

3. Amubutije bwaamu

Mwaalumi uusyomeka Josefa wakasolekesya kutegwa azumanane kusalala mukulilemeka. Amubale Matalikilo 39:1-12, akubandika mibuzyo eeyi:

• Ncinzi cakamukulwaizya Josefa kutija?​—Amubone kapango 9.

• Sena muyeeya kuti Josefa wakasala kabotu? Nkaambo nzi?

VIDIYO: Amutantamuke Micito Yakutalilemeka (5:06)

Jehova uyanda kuti toonse tubutantamuke bwaamu. Amubale 1 Bakorinto 6:18, akubandika mibuzyo eeyi:

• Mbukkale nzi ibukonzya kupa kuti umwi acite bwaamu?

• Mbuti mbomukonzya kubutija bwaamu?

4. Mulakonzya kulizunda sunko

VIDIYO: Amulwane Masunko Kwiinda Mukubala Bbaibbele (3:02)

• Ciindi mukwesu muvidiyo naakabona kuti mizeezo yakwe alimwi azintu nzyaakali kucita zilakonzya kumupa kutasyomeka kumukaintu wakwe, ncinzi ncaakacita?

Nobaba Banakristo basyomeka zimwi ziindi cilabakatazya kuzumanana kuba amizeezo iisalala. Mbuti mbomukonzya kukutantamuka kuzumanana kuyeeya zintu ziletela muzeezo wakoonana? Amubale Bafilipi 4:8, akubandika mibuzyo eeyi:

• Nzintu zili buti nzyotweelede kuyeeya?

• Mbuti kubala Bbaibbele alimwi akujata bubi mumulimo wa Jehova mbokukonzya kutugwasya kutantamuka sunko lyakucita cibi?

5. Zyeelelo zya Jehova zilatugwasya

VIDIYO: Kubula Maano (9:31)

• Mbuti mulombwana umwi mbwaakalinjizya mubukkale busunka?​—Amubone Tusimpi 7:8, 9.

• Kweelana alugwalo lwa Tusimpi 7:23, 26, bwaamu bulakonzya kuleta mapenzi manji. Ikuti naa katusalala mukulilemeka, mapenzi nzi ngotukonzya kutantamuka?

• Mbuti kusalala mukulilemeka mbokukonzya kutugwasya kuyoopona kukabe kutamani?

Bantu bamwi bayeeya kuti ncolyaamba Bbaibbele kujatikizya makani aakoonana kwabantu bajisi zizo zikozyenye tacili kabotu. Pele Jehova, Leza siluyando, uyanda kuti bantu boonse bakapone kukabe kutamani. Kutegwa tweelele, tweelede kupona kweelana azyeelelo zyakwe. Amubale 1 Bakorinto 6:9-11, akubandika mubuzyo ooyu:

• Kweelana ambwazibona zintu Leza, sena kulombozya koonana amuntu ngomukozyenye limwi zizo nkokulombozya kulikke kutali kabotu?

Kutegwa tumukkomanisye Leza, toonse tweelede kucinca mumbazu zimwi. Sena cilagwasya kucita boobu? Amubale Intembauzyo 19:8, 11, akubandika mibuzyo eeyi:

• Sena muyeeya kuti zyeelelo zya Jehova zyakulilemeka zili kabotu? Nkaambo nzi?

MUBUFWAAFWI

Koonana ncipego kuzwa kuli Jehova kutegwa mulumi amukaintu wakwe kabakkomana.

Ncinzi Ncomwaiya?

• Ino bwaamu bubikkilizya micito nzi?

• Ncinzi cikonzya kutugwasya kubutantamuka bwaamu?

• Ino tugwasyigwa buti ciindi notutobela zyeelelo zya Jehova zyakulilemeka?

AMUZYIBE ZINJI

Amwiiye kaambo Leza ncayanda kuti mwaalumi amukaintu ibayanda kukkala antoomwe ncobeelede kukwatana mumulawo.

“Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?” (Cibalo caaintaneti)

Amubone ncolyaamba Bbaibbele kujatikizya koonana kwabantu bajisi zizo zikozyenye ncokutali kusumpula lusalululo.

“Sena Koonana Kwabantu Bajisi Zizo Zikozyenye Nkubi?” (Cibalo caaintaneti)

Amubone milawo ya Leza kujatikizya misyobo yoonse yakoonana ncoitukwabilila.

“Sena Kumyonta Cinswe Caumwi Nkoonana?” (Cibalo caaintaneti)

Mucakuluula cakuti “Bakandeendelezya Cabulemu,” amubone cakakulwaizya muntu umwi iwakali koonana abantu mbakozyenye limwi zizo mbwaakacinca bukkale bwakwe kutegwa akkomanisye Leza.

“Ibbaibbele Lilakonzya Kubacinca Bantu” (Ngazi Yamulindizi, April 1, 2011)

Nokuba kuti mulamuyanda kapati Jehova alimwi akusolekesya kapati kutantamuka kucita zintu zikonzya kumunyemya, zimwi ziindi mulakonzya kulubizya. Nokuba boobo, zibi zimwi nzipati kwiinda zimwi. (1 Bakorinto 6:9, 10) Kuti mwacita cibi cipati, amuyeeye kuti Jehova kunyina naleka kumuyanda; ulilibambilide kumulekelela alimwi akumugwasya.

1. Ncinzi ncotweelede kucita kutegwa Jehova atulekelele?

Aabo bamuyanda Jehova inga balimvwa kuusa kapati ciindi nobazyiba kuti bacita cibi cipati. Pele balaumbulizyigwa acisyomezyo Jehova ncaakasyomezya bantu bakwe cakuti: “Nokuba kuti zibi zyanu zilasalala pyu, zilatubisyigwa buu mbuli caanda.” (Isaya 1:18) Kuti tweempwa kuzwa ansi aamoyo, Jehova uyootulekelela cakumaninina. Ino tutondezya buti kuti tweempwa? Tulausa kapati akaambo kacibi ncotwakacita, tulaleka kucita cibi alimwi akulomba Jehova kuti atulekelele. Mpoonya tulabeleka canguzu kucinca mizeezo iitaluzi naa kutantamuka zintu izyakapa kuti tucite cibi, alimwi tulasoleka kupona kweelana azyeelelo zya Jehova ziluleme.—Amubale Isaya 55:6, 7.

2. Mbuti Jehova mbwabelesya baalu kutugwasya ciindi notwacita cibi?

Kuti twacita cibi cipati, Jehova utwaambila kuti ‘twiite baalu bambungano.’ (Amubale Jakobo 5:14, 15.) Baalumi aaba basalidwe balamuyanda Jehova alimwi ambelele zyakwe. Baleelela kutugwasya kubambulula cilongwe cesu a Jehova.​—Bagalatiya 6:1.

Mbuti baalu mbobatugwasya ikuti twacita cibi cipati? Baalu bobilo naa botatwe bayootululamika, kubelesya Magwalo. Alimwi bayootupa malailile aagwasya.

AMWIIYE ZINJI

3. Kulyaambilila zibi kulatugwasya kubambulula cilongwe cesu a Jehova

Kufwumbwa cibi ncotwacita cilamucisa Jehova, aboobo tweelede kulyaambilila kulinguwe. Amubale Intembauzyo 32:1-5, akubandika mubuzyo ooyu:

• Nkaambo nzi ncocili kabotu kulyaambilila zibi zyesu kuli Jehova muciindi cakusola kuzisisa?

VIDIYO: “Aabo Mbayanda Jehova Ulabalaya” (3:01)

• Muvidiyo, mbuti baalu mbobakabagwasya ba Canon kupilukila kuli Jehova?

Tweelede kwaanguluka alimwi akubaambila masimpe baalu; bakabikkwa kutegwa kabatugwasya. Amubale Jakobo 5:16, akubandika mubuzyo ooyu:

• Mbuti mbocikonzya kubaubila baalu kutugwasya kuti twabaambila masimpe?

4. Jehova ulabatondezya luse basizibi

Kuti muntu iwakacita cibi cipati wakaka kutobela zyeelelo zya Jehova, ulagusyigwa mumbungano alimwi tatuyanzani anguwe. Amubale 1 Bakorinto 5:6, 11, akubandika mubuzyo ooyu:

• Mbubwenya bumena mbobupa kuti fulaulu ufwufwumuke, mbuti kuyanzana asizibi uuteempwi mbokukonzya kwiijatikizya mbungano?

Ncinzi citondezya kuti Jehova ulanyoneka, ngusiluse alimwi ngisiluyando, twalanga mbwabeendelezya basizibi?

5. Jehova ulatulekelela ciindi notweempwa

Jesu wakabelesya cikozyanyo icitugwasya kumvwisya mbwalimvwa Jehova ciindi muntu naayempwa. Amubale Luka 15:1-7, akubandika mubuzyo ooyu:

• Ino eeci citwaambila nzi kujatikizya Jehova?

Amubale Ezekieli 33:11, akubandika mubuzyo ooyu:

• Ino kweempwa kubikkilizya ntaamu nzi iiyandika kapati?

MUBUFWAAFWI

Kuti twacita cibi cipati pele tweempwa kuzwa ansi aamoyo alimwi akuba amakanze akuleka kucita cibi eeco, Jehova uyootulekelela.

Ncinzi Ncomwaiya?

• Nkaambo nzi ncocili kabotu kulyaambilila zibi zyesu kuli Jehova?

• Ncinzi ncotweelede kucita kutegwa Jehova atulekelele zibi zyesu?

• Kuti twacita cibi cipati, nkaambo nzi ncotweelede kulomba lugwasyo kubaalu?

AMUZYIBE ZINJI

Amubone mwaalumi umwi mbwaakalubona luse lwa Jehova ilwaambidwe kulugwalo lwa Isaya 1:18.

Mutaludooneki Luse lwa Jehova (5:02)

Mbuti baalu mbobakonzya kumugwasya iwacita cibi cipati?

“Baalu Mbobatondezya Luyando Aluse Kuli Basizibi” (Ngazi Yamulindizi yamu August 2024)

Amubone luyando aluse mbolutondezyegwa kuli basizibi ibateempwi.

“Baalu Mbobakonzya Kubagwasya Aabo Ibagusyidwe Mumbungano” (Ngazi Yamulindizi yamu August 2024)

Mucakuluula cakuti “Ndakeelede Kupiluka Kuli Jehova,” amubone mwaalumi iwakazwide mukasimpe mbwaakalimvwa kuti Jehova wakamukwela alimwi mukasimpe.

“Ibbaibbele Lilakonzya Kubacinca Bantu” (Ngazi Yamulindizi yamu April 1, 2012)