5. Nkaambo nzi kapati kajatikizya kulekelela bamwi katondezyedwe kubbuku lya Baefeso 5:1?

⁵ Ikaambo kapati ncotweelede kulekelela bamwi kalitondezyedwe kubbuku lya Baefeso 5:1 kuti: “Lino amube basikwiiya Leza, mbuli mbomuli bana bayandwa.” (BT) Muunzila nzi motweelede ‘kuba basikwiiya Leza’? Ibbala lyakuti “lino” lijatikanya makani aali mukapango kali munsi ikaamba kuti: “Amuusilane buuya, mukabe batete moyo, akuba aluzyalo lwakulekelelana milandu, mbubonya mbuli Leza mbwaakalekelela ndinywe muli-Kristo.” (Ba-Efeso 4:32) Inzya, casika kukulekelela, tweelede kumwiiya Leza. Mbubwenya mbuli mwana musankwa mbwasoleka kuba mbuli bausyi, aswebo, mbotuli bana mbayandisya Jehova tweelede kuyandisya kuba mbuli Taateesu wakujulu uulekelela. Inga camukonda kaka Jehova ikulanga ansi kuzwa kujulu akubona bana bakwe baansi kabasoleka kuba mbuli nguwe kwiinda mukulekelelana!—Luka 6:35, 36; amweezyanisye Matayo 5:44-48.

6. Muunzila nzi mokuli kwaandaana kupati akati kakulekelela nkwacita Jehova alimwi ankotucita?

⁶ Kunyina notukonzya kulekelela munzila iilondokede mbuli bucita Jehova. Pele akalo nkaambo ncotweelede kulekelela bamwi. Amulange: Kuli kwiindana kupati akati kakulekelela nkwacita Jehova akooko nkotucita. (Isaya 55:7-9) Notubalekelela abo batubisizya, kanjikanji tulacita obo mukuyeeya kuti aswebo tuyooyanda kucitilwa mbubonya kwiinda mukulekelelwa. Kulekelela kwabantu kujatikizya sizibi kulekelela sizibinyina. Caboola kuli Jehova, walo nguulekelela lyoonse. Ulatulekela, pele walo kunyina nokuyooyandika kuti tumulekelele. Ikuti naa Jehova uutabisyi ulakonzya kulekelela caluyando alimwi cakumaninina, sena tatweelede kusola kulekelelana swebo tobantu basizibi?—Matayo 6:12.

11. Ciindi bamwi nobatubisizya, ncinzi cinga catugwasya kubalekelela?

¹¹ Nokuba boobo, ino kuti bamwi batubisizya, batucisa kapati? Ikuti cibi ncobatubisizya kacitali cipati kapati, inga tacikatazyi ikutobela lulayo lwa Bbaibbele ‘lwakuba aluzyalo lwakulekelelana.’ (Ba-Efeso 4:32) Ikufwamba kujatila kuli boobu kuleendelana amajwi Petro ngaakalemba kwiinda mumuuya uusalala aakuti: “Kwiinda zyoonse amusungwaale kuyandana, nkaambo luyando ndoluvumba zibi zinjizinji.” (1 Petro 4:8) Ikuyeeya kuti aswebo tuli basizibi kulatugwasya kukonzya kulekelela kulubizya kwabamwi. Aboobo twalekelela, tulaleka kubikkilila muciindi cakubaa cikoto kumoyo. Aboobo cilongwe cesu asikutubisizya tacikanyonganizigwi pe alimwi tulapa kuti kakuli luumuno luyandika mumbungano. (Ba-Roma 14:19) Muciindi, tacicinooyeeyegwi pe eco ncaakacita.