Jehova ngu Leza uutali wamanyongwe. (1 Bakorinto 14:33) Nkokuti abalo bantu bakwe beelede kuti kabacita zintu munzila iitali yamanyongwe. Ino mbungano ya Bunakristo ibambidwe buti? Mbuti mbotukonzya kupa kuti izwidilile?

1. Ino nguni mutwe wambungano?

“Kristo ngomutwe wambungano.” (Baefeso 5:23) Kali kujulu, ulasololela milimo yabantu ba Jehova munyika yoonse. Jesu wakasala “muzike uusyomeka alimwi uucenjede,” nkokuti kabunga kasyoonto kabaalu basimide alimwi kaitwa kuti Kabunga Keendelezya. (Amubale Matayo 24:45-47.) Mbubwenya mbuli baapostolo alimwi abaalu mumwaanda wamyaka wakusaanguna mu Jerusalemu, Kabunga Keendelezya kalapa malailile kumbungano munyika yoonse. (Milimo 15:2) Pele baalumi aaba tabali basololi bambunga yesu. Batobela busolozi bwa Jehova a Jwi lyakwe, alimwi balalibombya kubusilutwe bakwe.

2. Ino baalu bajisi mulimo nzi?

Baalu mbaalumi Banakristo basimide ibayiisya kuzwa mu Magwalo alimwi akweembela bantu ba Jehova kwiinda mukubagwasya alimwi akubakulwaizya. Baalu tabavwoli kumulimo ngobabeleka. Pele balabeleka “cakuliyandila kumbele lya Leza; ikutali akaambo kakuyanda kujana mpindu cabumpelenge, pele caluyandisisyo.” (1 Petro 5:1, 2) Baalu balagwasyigwa abakutausi, balo mukuya kwaciindi ibakonzya kweelela kuba baalu.

Bamu Kabunga Keendelezya balasala baalu bamwi kuba balangizi bamabazu. Balaswaya mbungano ziindene-indene kupa busolozi alimwi akubakulwaizya. Balasala baalu abakutausi ibeelede kusika azyeelelo zyamu Magwalo.—1 Timoteyo 3:1-10, 12; Tito 1:5-9.

3. Ino mulimo nzi ngwajisi Kamboni umwi aumwi?

Boonse mumbungano ‘balatembaula zina lya Jehova’ kwiinda mukupa bwiinguzi lyamiswaangano yambungano alimwi akutola lubazu mumulimo wakukambauka kweelana abukkale bwabo.—Amubale Intembauzyo 148:12, 13.

AMWIIYE ZINJI

4. Jesu musololi uukatalusya

Jesu ulatutamba. Amubale Matayo 11:28-30, akubandika mubuzyo ooyu:

• Ino Jesu uyanda kuti katulimvwa buti kujatikizya busolozi bwakwe?

VIDIYO: Baalu Bakabweza Ntaamu Nokwakacitika Muzuzumo Wanyika ku Nepal (4:56)

Cakusalazya Bbaibbele lilaamba baalu mbobeelede kuubeleka mulimo wabo.

Amubale Isaya 32:2 a 1 Petro 5:1-3, akubandika mibuzyo eeyi:

• Ino mulimvwa buti kuzyiba kuti, mbubwenya mbuli Jesu abalo baalu balasolekesya kukatalusya bamwi?

• Muunzila nzi zimwi baalu mobamwiiya Jesu?

5. Baalu balayiisya kwiinda mucikozyanyo

VIDIYO: Nobaalu Amusololele! (7:39)

Jesu wakatondezya bube mbobeelede kuba ambubo aabo basololela mumbungano. Amubale Matayo 23:8-12, akubandika mubuzyo ooyu:

• Ncinzi cimukkomanisya kujatikizya kwiindana kuliko akati kazyeelelo zyamu Bbaibbele zyabaalu alimwi ancomwakabona kubasololi bazikombelo?

1. Baalu balaciyumya cilongwe cabo a Jehova alimwi akugwasya mikwasyi yabo kucita mbubwenya

2. Baalu balababikkila maano boonse mumbungano

3. Baalu balakambauka lyoonse

4. Baalu mbaamayi. Alimwi balagwasyilizya mumilimo yakusalazya amilimo imwi

6. Tulakonzya kubelekela antoomwe abaalu

Bbaibbele lilaamba kaambo kayandika ncotweelede kubelekela antoomwe abaalu. Amubale Bahebrayo 13:17, akubandika mibuzyo eeyi:

• Nkaambo nzi Bbaibbele ncolyaamba kuti tweelede kulibombya alimwi akubamvwida aabo basololela? Ino mulimvwa buti kujatikizya makani aaya?

Amubale Luka 16:10, akubandika mubuzyo ooyu:

• Nkaambo nzi ncociyandika kubamvwida baalu nomuba mutuntu tusyoonto-syoonto?

MUBUFWAAFWI

Jesu ngomutwe wambungano. Tulakkomana kubelekela antoomwe abaalu ibatobela busolozi bwakwe nkaambo balatukatalusya akutuyiisya kwiinda mucikozyanyo cabo.

Ncinzi Ncomwaiya?

• Ino nguni mutwe wambungano?

• Mbuti baalu mbobaigwasyilizya mbungano?

• Ino mulimo nzi ngwajisi mukombi wa Jehova umwi aumwi?

AMUZYIBE ZINJI

Amubone bumboni ibutondezya kuti bamu Kabunga Keendelezya alimwi abaalu bamwi balababikkila maano kapati Banakristonyina mazuba aano.

Kuyumyayumya Bakwesu Nowakalesyedwe Mulimo (4:22)

Amubone mulimo ngobajisi balangizi bamabazu.

Buumi bwa Mulangizi Wabbazu Uubelekela Kuminzi (4:51)

Amubone mulimo ngobajisi bamakaintu mumbungano.

“Sena Bakamboni ba Jehova balijisi bamakaintu bayiisya?” (Ngazi Yamulindizi, September 1, 2012)

Amubone baalu mbobabeleka canguzu kugwasya basyominyina.

“Baalu Banakristo​—‘Mbaasimilimo Kutegwa Tukondwe’” (Ngazi Yamulindizi, January 15, 2013)

1. Ndulayo nzi Bbaibbele ndolipa balumi?

Jehova wakasala mulumi kuba silutwe wamukwasyi. (Amubale Baefeso 5:23.) Jehova ulangila kuti mulumi unoosala zintu zikonzya kuugwasya mukwasyi. Bbaibbele likulwaizya balumi kuti: “Amuzumanane kubayanda bakaintu banu.” (Baefeso 5:25) Ino eeci caamba nzi? Mulumi siluyando ulamweendelezya caluzyalo mukaintu wakwe, nobali aŋanda alimwi amubuleya. Ulamukwabilila kuzintu zikonzya kumucisa, kubikkila maano kujatikizya mbwalimvwa alimwi akumupa nzyayandika kumubili. (1 Timoteyo 5:8) Kwiinda zyoonse, ulasololela mukulanganya zintu nzyayandika kumuuya. (Matayo 4:4) Mucikozyanyo, ulakonzya kupaila alimwi akubala Bbaibbele antoomwe amukaintu wakwe. Ciindi mulumi namulanganya caluyando mukaintu wakwe, ulazumanana kuba acilongwe cibotu a Jehova.—Amubale 1 Petro 3:7.

Jesu ngo Mutwe wambungano ya Bunakristo. (Baefeso 5:23) Mazuba aano, Jesu, kuzwa kujulu ulabasololela basikumutobela anyika kwiinda mukubelesya “muzike uusyomeka alimwi uucenjede.” (Amubale Matayo 24:45.) Jesu lwakwe kumugama ngonguwe wakamusala “muzike” ooyo alimwi akumupa nguzu zyakupanga zyakusala zimwi. Nokuba boobo, muzike ooyo weelede kumumvwida Kristo alimwi akubelekela banabokwabo Kristo. Ino muzike ooyo nguni? Ino utulanganya buti?