Sena Muli Banakristo “Basimide”?
“NINDAKACILI mucece, ndakali kwaamba macece akuyeeya macece akubuzyanya macece.” Mbwaakalemba obo mwaapostolo Paulo. Masimpe, toonse cimwi ciindi twakali bana batakwe ncobazi. Nokuba boobo, tiitwakazumanana kuba bana pe. Paulo wakati: “Sunu mbuli mbundaba mwaalumi, ndisowede macece.”—1 Ba-Korinto 13:11.
Munzila iikozyenye, boonse Banakristo kumatalikilo inga mbacece munzila yakumuuya. Pele mukuya kwaciindi, boonse balakonzya ‘kuba abujatane bomwe bwabuzumini abwaluzibo lwa-Mwana a-Leza, akuba abuntu bulondokede abwiime buzulide bwa-Kristo.’ (Ba-Efeso 4:13) Mubbuku lya Ba-Korinto 14:20 tulaililwa kuti: “Nubakwesu, mutabi mbuli bana kumakani aabusongo. . . . Kumakani aabusongo amube bazonokede.”
Ikuba Banakristo basimide ncilongezyo kapati kubantu ba Leza sunu, ikapati nkaambo kuvwulide bapya. Ibanakristo basimide balagwasya ikutegwa mbungano iyume. Bapa kuti mbungano ooko nkobaswaanganina ibe aamuuya mubotu uukulwaizya.
Nokuba kuti kukomena kwakumubili kulaboola kulikke, ikukomena kwakumuuya kuboola buyo kwainda ciindi alimwi amukusolekesya. Tacigambyi pe kuti mumazubaa akali kupona Paulo, Banakristo bamwi bakaalilwa ‘kuyaambele kumakani aabupati’ nokuba kuti bakamubelekela Leza kwamyaka minji. (Ba-Hebrayo 5: 12; 6:1) Ino cili buti kuli ndinywe? Nokuba kuti mwamubelekela Leza kwamyaka minji naa antela mwamubelekela buyo ciindi cifwaafwi, cilagwasya kulilingula nobamukamwini cakusyomeka. (2 Ba-Korinto 13:5) Sena muli akati kabaabo Banakristo ibanga baambwa kuti balisimide mukuyeeya? Ikuti kamutali akati kambabo, mbuti mbomukonzya kuba umwi wambabo?
‘Ikusima Mukuyeeya’
Muntu mucece munzila yakumuuya ulakonzya “kupepaulwa koonse koonse akupupululwa amyuuwo yanjiisyo zyamisyobo misyobo iizwa kukweena-ena kwabantu bapyungi bajisi macenjela aakucita bubeji.” Aboobo Paulo wakakulwaizya kuti: “Tuleelede kujatisya lusinizyo cakuyandana, aboobo tulakonzya kukula muziyanza zyoonse akujatana ayooyo uuli mutwe wesu, nkukuti Kristo.” (Ba-Efeso 4:14, 15) Ino muntu inga wacita buti obo? Lugwalo lwa Ba-Hebrayo 5:14 lwaamba kuti: “Zilyo ziyumu nzyabantu bakakomena, nkokuti nzyabaabo abali amiyeeyo iyakaiisigwa kusala cibotu ecibi.”
Amubone ikuti bantu basimide balijisi miyeeyo yakayiisigwa kwiinda mukwiibelesya antela mukubaa luzibo mukubelesya njiisyo zya Bbaibbele. Cilalibonya kuti kusima takubooli buyo muntu mbwaabuka pe; kulatola ciindi kuti muntu asime munzila yakumuuya. Pele nzinji nzyomukonzya kucita kutegwa mufwambaane kusima kwanu munzila yakumuuya mbuli kwiinda mukubaa ciiyo canu nobeni—ikapati kuzintu zikatazya izili mu Jwi lya Leza. Caino-ino aawa, Ngazi Yamulindizi yakabandika mitwe minji yamakani iikatazya. Aabo ibasimide tabazyeelebi zibalo eezi pe akaambo kakuti zijisi “amakani amwi mayumu kukumvwigwa.” (2 Petro 3:16) Muciindi caboobo, balacilya cakuyandisisya icakulya eeci ciyumu!
Bakambausi Abamayi Basungu
Jesu wakalailila basikwiiya bakwe kuti: “Kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Kutola lubazu cabusungu mumulimo wakukambauka akwalo kulakonzya kupa kuti mufwambaane kusima munzila yakumuuya. Ikuti bukkale kabumuzumizya, ino nkaambo nzi ncomutazumanani ikutola lubazu ciindi coonse mumulimo oyu?—Matayo 13:23.
Ziindi zimwi, mapenzi alakonzya kupa kuti kube buyumuyumu kujana ciindi cakukambauka. Nokuba boobo, kwiinda ‘mukusolekesya’ kamuli bakambausi, mulatondezya mbuli mbomwaabikkila maanu kapati “makani mabotu.” (Luka 13:24; Ba-Roma 1:16) Aboobo, mulakonzya kubonwa kuba “citondezyo kubasyomi boonse.”—1 Timoti 4:12, Ci.
Balulami
Kusima kulabikkilizyaa kusoleka canguzu mubululami. Kweelanaa mbokulembedwe ku Intembauzyo 26:1, Davida wakati: “Undilulamike, O Jehova, nkaambo ndeenda cakululama.” Bululami nkukakatila kuzintu zili kabotu, ikulitakata kuzintu ziluzi. Nokuba boobo, tabwaambi kulondoka pe. Davida lwakwe wakacita zinyonyoono zipati ncobeni zili mbozibede. Pele akaambo kakuti wakaluzumina lulayo alimwi wakazilulamika nzila zyakwe, wakatondezya kuti moyo wakwe wakacili kumuyanda kapati Jehova Leza. (Intembauzyo 26:2, 3, 6, 8, 11) Bululami caamba kukomba camoyo woonse. Davida wakaambila mwanaakwe Solomoni ikuti: “Koziba Leza wauso, akumumanina milimo camoyo woonse.”—1 Makani 28:9.
Ikuba mululami caamba “kutaba banyika” kwiinda mukutatola lubazu mumapolitikisi aazisi alimwi amunkondo. (Johane 17:16) Alimwi muleelede kulikasya kumicito isofweede mbuli bwaamu, bumambi kubikkilizyaa kubelesya misamu iikola. (Ba-Galatiya 5:19-21) Pele kuba mululami tacaambi buyo kulikasya kumicito eeyo pe. Solomoni wakacenjezya kuti: “Inzi zifwide zilanunsya mafuta aasimuunde; mbubonya obo bufubafuba buniini bulabisya busongo abulemu.” (Mukambausi 10:1) Ee, “bufubafuba buniini” mbuli kusobana naa kucita masesya aatali kabotu kumusimbi naa kumusankwa kulakonzya kunyonyoona mpuwo yaumwi “[ya]busongo.” (Jobu 31:1) Aboobo, amutondezye kusima kwanu kwiinda mukuba citondezyo cili kabotu mumicito yanu yoonse “akulilesya kuzibi zyamisyobo yoonse.”—1 Ba-Tesalonika 5:22.
Ibantu Basyomeka
Imunakristo uusimide ulasyomeka. Mbubwenya mbuli mbotubala ku Ba-Efeso 4:24, imwaapostolo Paulo ukulwaizya Banakristo kuti: ‘Amulisamike buntu bupya bulengulwidwe mucinkozya ca-Leza cabululami acabusalali bwini-bwini.’ Ibbala lyakuti “kusyomeka” mu Magwalo aamumwaambo wakusaanguana wa Cigiliki, lipandulula busalali, bululami alimwi akulemeka. Imuntu usyomeka ulilyaabide akulemeka alimwi uleendelezya kabotu-kabotu milimo yakwe kuli Leza.
Ino ninzila nzi zimwi zikonzya kumugwasya kutegwa mukomezye lusyomo luli boobo? Inzila imwi nkwiinda mukubelekelaamwi abaalu bamumbungano yanu. (Ba-Hebrayo 13:17) Kwiinda mukuziba kuti Kristo ngo Silutwe uubikkidwe, Banakristo basimide balasyomeka kuli baabo babikkidwe kuti ‘beembele bambungano ya Leza.’ (Milimo 20:28, Ci) Elo kaka inga tiicalulama kudooneka naa kuubya-ubya bweendelezi bwabaalu babikkidwe! Alimwi muleelede kusyomeka “[ku]muzike musyomesi uucenjede” alimwi ambunga zyabwiiminizi zibelesegwa ‘mukwaabila zilyo zyakumuuya kuciindi ceelede.’ (Matayo 24:45) Kamufwambaana kubala akwaabelesya makani aajanika mu Ngazi Yamulindizi amumabbuku aambi.
Kutondezya Luyando Kwiinda Mumicito Yanu
Paulo wakalembela bana Tesalonika kuti: “Luyandano lwanu nyoonse ndomuyandana umwi aumwi lwavula.” (2 Ba-Tesalonika 1:3) Kubaa luyando lunji ncibeela ciyandika kapati mukusima munzila yakumuuya. Kweelanaa mbokulembedwe kuli Johane 13:35, Jesu wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” Oolu luyando lwabunyina taluboneki buyo kwiinda mukwaambaula naa kulimvwa kwamuntu. Ibbuku litegwa Vine’s Expository Dictionary of Old and New Testament Words lyaamba kuti: “Luyando lulakonzya kuzibwa kwiinda mumicito njolupa kucita.” Ee, mulakonzya kusima kwiinda mukutondezya luyando mumicito!
Mucikozyanyo, ku Ba-Roma 15:7 tubala kuti, “Amusamausyanye.” Inzila imwi yakutondezya luyando nkwiinda mukwaanzya basyominyoko alimwi abeenzu kumiswaangano yambungano—cakusangalizya alimwi cabusungu! Amumuzibe kabotu-kabotu umwi aumwi wambabo. ‘Amwiingasile kugwasya’ bamwi. (Ba-Filipi 2:4) Ambweni mulakonzya kutondezya kusamausya kwanu kwiinda mukutamba bamwi kuŋanda yanu. (Incito 16:14, 15) Ikutalondoka kwabamwi ziindi zimwi kulakonzya kusunka luyando lwanu, pele mbomwiiya ‘kubakkazikila moyo muluyando,’ munootondezya kuti muyaabusima.—Ba-Efeso 4:2.
Kubelesya Lubono Lwesu Mukusumpula Bukombi Busalala
Ilyansiku, tabali boonse akati kabantu ba Leza ibakazuzikizya mukuli wabo wakugwasilizya kuyaka tempele ya Jehova pe. Aboobo Leza wakatuma basinsimi mbuli Hagai a Malaki kutegwa bakulwaizye bantu Bakwe kujatikizya makani aya. (Hagai 1:2-6; Malaki 3:10) Cakukkomana, Banakristo basimide mazubaano balalubelesya lubono lwabo kugwasilizya bukombi bwa Jehova. Amutobele mbabo kwiinda mukutobela njiisyo iili ku 1 Ba-Korinto 16: 1, 2, lyoonse ‘kamuliyobweda cimwi cintu’ cakusanga kumbungano naa kumulimo wanyika yoonse wa Bakamboni ba Jehova. Ijwi lya Leza litusyomezya kuti: “Oyo uubyala cakuvuzya ulatebula cakuvuzya.”—2 Ba-Korinto 9:6.
Mutalubi lubono lumbi ndomujisi mbuli ciindi canu alimwi anguzu. Amusoleke ‘kujana ciindi’ kuzintu zitakwe mulimo mupati. (Ba-Efeso 5:15, 16; Ba-Filipi 1:10) Amwiiye kucibelesya kabotu ciindi canu. Kucita boobo kuyoomugwasya kuti mutole lubazu mumilimo mbuli yakubambulula Maandaa Bwami alimwi amilimo imwi isumpula bukombi bwa Jehova. Kwiinda mukulubelesya lubono lwanu munzila eeyi, kuyootondezya kuti muyaabuba Munakristo uusimide.
Amuyaambele Kumakani Aabupati!
Ibaalumi abanakazi ibasungu kukubala alimwi balaa luzibo, ibasungweede mukukambauka, bazumanana mubululami alimwi basiluyando alimwi ibalibambilide kubelesya nguzu zyabo alimwi azintu zyabo zyakumubili kumulimo wa Bwami, nzileleko zilibedelede. Anu imwaapostolo Paulo ncaakakulwaizya kuti: “Aboobo atuleke kwaamba makani aakusaanguna aa-Kristo, atuye kumbele kumakani aabupati”!—Ba-Hebrayo 6:1.
Sena muli Banakristo bazonokede naa basimide? Antela munzila zimwi mucili mbuli mwana munzila yakumuuya? (Ba-Hebrayo 5:13) Kufwumbwa kulubazu nkomubede, amuzumanane kucita ciiyo ca Bbaibbele canu nobeni, kukambauka alimwi akutondezya luyando kubanyoko. Amulutambule lulayo loonse lupegwaa basimide. (Tusimpi 8:33) Amuubweze mukuli wanu woonse wa Bunakristo. Mukuya kwaciindi alimwi akusolekesya, andinywe mulakonzya ‘kuba abujatane bomwe bwabuzumini abwaluzibo lwa-Mwana a-Leza, kuba abuntu bulondokede abwiime buzulide bwa-Kristo.’—Ba-Efeso 4:13.
[Zifwanikiso izili apeeji 5]
Ibasimide bayumya-yumya muuya wambungano kwiinda mukubikkila bamwi maanu