Ikukambauka Makani Mabotu Cakutadonaika Mumoyo
1 Kumatalikilo aamwaanda wamyaka wakusaanguna, Jesu Kristo wakalailila basikwiiya bakwe ikukambauka makani mabotu aa Bwami ‘akuyiisya bantu bamisyobo yoonse.’ (Mt. 24:14; 28:19, 20) Bakamboni ba Jehova baatobela malailile aaya cakusinizya cakuti kuzikusika kumamanino aamwaanda wamyaka wa 20, ibunyina bwesu bwa Bunakristo bwakomena kapati kusika kumweelwe wabasikwiiya ibali 5,900,000 mumasi aali 234. Takulikomeneni kulumba kuunka kuli Taateesu wakujulu!
2 Lino twanjila mumwaanda wamyaka wa 21. Sinkondoma cabucenjezu usola kunyonganya mulimo wesu mupati ngotujisi wakukambauka makani aa Bwami alimwi akucita bantu kuti babe basikwiiya. Ubelesya makatazyo aabweende obu bwazintu mukusola kutucitya kuti tutabikkili maanu kuzintu zyakumuuya, kutusowela ciindi cesu alimwi akutulemya kapati azyakucita-cita zinyina mpindu. Muciindi cakulekela zintu zyaansi ano kweendelezya buumi bwesu, tulizi kuzwa mu Jwi lya Leza zintu ziyandika kapati mubuumi bwesu—ikucita ncayanda Jehova. (Rom. 12:2) Eci caamba kutobela lulayo lwamu Magwalo ‘lwakukambauka makani lyoonse muciindi ceelede aciteelede alimwi akukondezesya mulimo ngotwakapegwa.’—2 Tim. 4:2, 5.
3 Mutadonaiki: Banakristo beelede ‘kwiima nji mbuli balondokede akutadonaika mbuzibede zintu zyoonse nzyayanda Leza.’ (Kol. 4:12) Ibbala lyakuti “kutadonaika” lipandulula kubaa “lusinizyo luyumu naa lusyomo; kuzuminizya naa kusinizya.” Mbotuli Banakristo, tweelede kwasinizya makani aakuti ijwi lya Leza lyabusinsimi liyoozuzikizigwa ncobeni akuti lino tukkede kumamanino kwini kwaciindi. Tweelede kubaa lusyomo luyumu mbuli lwakajisi mwaapostolo Paulo wakaamba kuti, imakani mabotu “ninguzu zya-Leza zyakufutula boonse basyoma.”—Rom. 1:16.
4 Diabolosi ubelesya bantu babi alimwi abasikulibeja bakeenwa kale kuti bayunge akweena bamwi. (2 Tim. 3:13) Akaambo kakuti twakacenjezyelwa limwi kujatikizya makani aya, tulilibambilide kuyumya lusyomo lwesu kusinizya kuti tuli mukasimpe. Muciindi cakulekela zintu zyakumubili kutulengaanya, tulazumanana kubikka zintu zya Bwami ambele. (Mt. 6:33, 34) Alimwi tatweelede kucibona kuti kucili ciindi cipati kuciindi ecino ncotukkede antela kubona mbuli kuti mamanino abweende bwazintu obu acili kule. Mamanino ali mukuswena afwaafwi lyoonse. (1 Pet. 4:7) Nokuba kuti tulakonzya kulimvwa kuti taakwe acicitika kumakani ngotukambauka mumasi ambi kweelana abumboni bwakacitwa kale, mulimo wakucenjezya weelede kuzumanana.—Ezk. 33:7-9.
5 Njeeyi mibuzyo mipati aciindi eci camamanino: ‘Sena ndilaubikkila maanu mulimo ngotwakapegwaa Jesu wakucita bantu kuti babe basikwiiya? Nondikambauka makani mabotu, sena ndilatondezya lusyomo lwakuti Bwami nkobuli ncobeni? Sena ndililibambilide kutola lubazu kweelana ambondikonzya mumulimo oyu wakufwutula bantu?’ Akaambo kakuziba mpotwasika muciindi eci camamanino, tweelede kulilanga-langa tobeni alimwi akubikkila maanu kumulimo wesu wakukambauka alimwi akucita bantu kuti babe basikwiiya. Twanoocita boobo inga twalifwutula tobeni abaabo batuswiilila. (1 Tim. 4:16) Ino mbuti mbotunga twayumya lusyomo lwesu mbotuli babelesi?
6 Amwiiye Bana Tesalonika: Mwaapostolo Paulo kaibaluka mulimo ngobakabeleka cabusungu bana Tesalonika, wakabaambila kuti: “Makani Mabotu ngotwakamuletela taali majwi buyo pe. Pele twakaakambauka anguzu amu Muuya Uusalala cakutadonaika mumoyo. Mulizi nobeni mbotwakabede akati kanu nitwakali kumugwasya. Lino mwakatobela ciyanza ca Mwami acesu. Mwakatambula makani eesu akati kamapenzi manji, nikuba boobo mwakaatambula alutangalo lupa Muuya Uusalala.” (1 Batesalonika 1:5, 6, BT) Inzya, Paulo wakalumbaizya mbungano yaba Tesalonika akaambo kakuti nokuba kuti bakalaa mapenzi manji-manji bakakambauka cabusungu alimwi acakutadonaika. Ncinzi cakabagwasya kucita boobo? Icakabagwasya, mbusungu alimwi akutadonaika nkobakabona kumwaapostolo Paulo ababelesinyina. Munzila nzi?
7 Ibuumi bwa Paulo abeenzinyina mbocakali kweenda limwi bwakatondezya kuti ncobeni bakalaa muuya wa Leza akuti bakazisyoma camoyo woonse zintu nzyobakali kukambauka. Kabatanasika ku Tesalonika, Paulo a Sila bakasampaulwa ku Filipi. Bakaumwa akubikkwa muntolongo kabaangidwe muziliba kakunyinaa kubabeteka. Pele musunko oyu taakwe anowakabapa kujoka munsi mukwaambilizya makani mabotu. Kwiinda munguzu zya Leza bakaangununwa, mpoonya sintolongo abamukwasyi wakwe bakasanduka calo cakayumya bakwesu aba kuzumanana mumulimo wabo.—Inc. 16:19-34.
8 Kwiinda munguzu zyamuuya wa Leza, Paulo wakasika ku Tesalonika. Oko wakabeleka canguzu kutegwa alijanine zintu zyakuligwasya alimwi wakalitakata mukuyiisya ba Tesalonika makani aakasimpe. Tanaakasaya kukambauka makani mabotu kuli koonse nkwaakabede. (1 Tes. 2:9) Ikukambauka cakutadonaika nkwaakacita Paulo kwakabagwasya kapati bantu cakuti bakacileka kukomba mituni nkobakali kucita kaindi akuba babelesi ba Leza wakasimpe Jehova.—1 Tes. 1:8-10.
9 Ikupenzyegwa teekwakalesya basikusyoma bapya kutalika kukambauka makani mabotu. Akaambo kalusyomo lupya ndobakajana alimwi akumvwisya nkobakajisi kujatikizya zilongezyo zitamani nzyobayoojana, bana Tesalonika bakakulwaizigwa kukambauka kasimpe nkobakatambula cabusungu. Yakasungwaala kapati mbungano eyo cakuti makani aalusyomo lwabo abusungu akabaa mpuwo koonse-koonse ku Makedoniya aku Akaya. Aboobo Paulo naakalemba lugwalo lwakwe lwakusaanguna kuba Tesalonika, imilimo yabo mibotu yakalaa mpuwo kale. (1 Tes. 1:7) Ncitondezyo cibotu kapati kaka eco!
10 Kukulwaizigwaa Luyando lwa Leza Alimwi Abantu: Ino mbuti swebo sunu mbotukonzya kubaa lusyomo luyumu notukambauka makani mabotu mbuli bwakacita ba Tesalonika? Paulo wakalemba boobu kujatikizya mbabo: “Mbotuyeeya cakutaleka milimo yanu yalusyomo akubeleka kwanu kwaluyando.” (1 Tes. 1:3) Cilisalede kuti bakalaa luyando mumoyo wabo kuli Jehova Leza akubantu mbobakali kukambaukila. Olu luyando ndweenya ndolwakapa kuti Paulo abeenzinyina baambile bana Tesalonika ‘ikutali makani mabotu aa Leza luzutu pele akwaaba myoyo yabo beni.’—1 Tes. 2:8.
11 Mbubwenya buyo andiswe, luyando lwesu kuli Jehova alimwi akubantuma lulatukulwaizya kuyanda kutola lubazu mumulimo wakukambauka walo ngwaakatupa Leza kuti tuucite. Akaambo kaluyando olu, twazyiba kuti ikumwaya makani mabotu mmukuli Leza ngwaakatupa kuti tuuzuzikizye. Kwiinda mukuzinzibala kuyeeya akumvwisya zintu zyoonse Jehova nzyatucitila mukutweendelezya munzila ya “buumi bwinibwini,” cilatukulwaizya kwaambila bamwi makani aakasimpe aakondelezya ngitusyoma camoyo woonse.—1 Tim. 6:19.
12 Mbotuyaabuzumanana kujata bubi mumulimo wakukambauka, luyando lwesu kuli Jehova akubantu boonse lweelede kuzumanana kuyaambele. Ikuti naa twacita obo, ciyootukulwaizya kutola lubazu lyoonse mumulimo waŋanda aŋanda alimwi akusola kapati kubelesya mbazu zyoonse nzyotujisi kukambaukila bamwi. Tuyanda kucibelesya kabotu ciindi ncotunga twabaaco kwiinda mukupa bumboni bwamukwiizya kubasazima abasimukoboma kubikkilizya abaabo mbotuzibene limwi. Nokuba kuti banji balakonzya kwaakaka makani mabotu ngotubaambila alimwi akusola kunyonganya mulimo wesu wakwaambilizya Bwami, tulikkomene kapati mumoyo. Nkaambo nzi? Akaambo kakuti tulizi kuti twacita lubazu lwesu lwakucitila bumboni ku Bwami akugwasya bantu kuti bakafwutuke. Alimwi Jehova uyootulongezya mukusola nkotusola kuyandaula babombe myoyo. Nokuba kuti twanjila mumapenzi aataambiki eelyo Saatani nasola kutunyanzya lukkomano, tuyooyuma mulusyomo lwesu cakutadonaika antoomwe akuzumanana abusungu bwesu mukukambaukila bamwi. Ikuti toonse twazuzikizya mbazu zyesu ciyoopa kuti mbungano ziyume akusungwaala mbubwenya mbuli yeeyo yaku Tesalonika.
13 Mutatyompezyegwi Pe Amasukusyo: Ilusyomo lulayandika amuciindi camasukusyo. (1 Pet. 1:6, 7) Jesu waacisalazya kabotu-kabotu kuti basikwiiya bakwe ‘bakali kuzoosulwa kumisyobo yoonse.’ (Mt. 24:9) Paulo a Sila zyakabacitikila ezi nobakali ku Filipi. Makani amucaandano 16 cabbuku lya Incito atwaambila kuti Paulo a Sila bakanjizigwa muntolongo yaakati akwaangwa kumaulu muziliba. Intolongo mpati bwaali buyo busena buzingulukidwe aamaandaamwi antela mwaako kuzwa amulyango waanze kusika muŋanda yamukati yalo yakajisi twaanda tuniini-niini twakajisi mpulungwido mwakali kwiinda mumuni alimwi amuwo. Pele yalo ntolongo yamukati yakanyina mpulungwido aakali kwiinda mumuni alimwi tiikwakali muwo ukkwene. Paulo a Sila bakaliyumya kumudima, akupya alimwi akununka ikwaali muŋanda eyi yantolongo. Sena inga mweezeezya macise ngobakamvwa nobakali muntolongo kabaangidwe muziliba kwaciindi cilamfwu kabalaa zikwambu kumisana alimwi kabazwa abulowa omuya mobaali kukwibbaulwa?
14 Nokuba kuti bakali mumasukusyo ali boobo, Paulo a Sila bakazumanana kusyomeka. Teebakadonaika mumoyo calo cakabayumya kuzumanana kubelekela Jehova nokuba kuti bakali mumasukusyo. Ilusyomo lwabo lulalibonya mukapango ka 25 mucaandano ca 16 alo aambwa kuti ba Paulo a Sila bakali “kukomba akwiimbila Leza nyimbo.” Masimpe, nokuba kuti bakali muntolongo yaakati, bakalaa lusyomo lwakuti Leza wakalaambabo cakuti baalumi aba bakaimba cakoongolola akumvwigwa abasintolongo bambi! Aswebo tube bantu bali boobu batadonaiki mumoyo lusyomo lwesu noluli mukusunkwa.
15 Masukusyo Diabolosi ngatuletela manji kapati. Bamwi balakonzya kupenzegwa abamumukwasyi wabo. Bunji bwabakwesu balaa penzi akaambo kamilawo iibakasya kukambauka. Alimwi kuli kukazigwa abazangi basiluleyo. Kuli penzi lyamali alimwi akulibilika mbozinga zyajanwa zintu ziyandika mubuumi. Ibakubusi bajisi penzi lyakuyungwa abeenzinyina kucikolo. Ino mbuti mbotunga twaazunda masukusyo aaya? Ncinzi ciyandika ikutegwa tutadonaiki mumyoyo yesu?
16 Cakusaanguna, tweelede kubaa cilongwe cini-cini a Jehova. Ba Paulo a Sila nobakali muntolongo yaakati teebakabelesya ciindi cabo kutongauka akaambo kamapenzi ngobakajisi antela kulyeetezya. Ndilyona eelyo bakapaila kuli Leza akumutembaula munyimbo. Nkaambo nzi? Akaambo kakuti bakalaa cilongwe cini-cini a Wisaabo wakujulu. Bakalizi kuti bakali kupengela bululami akuti Jehova alikke ngowakali kunoobafwutula.—Int. 3:8.
17 Andiswe notusikilwa masukusyo sunu, tweelede kulanga kuli Jehova. Paulo ulatukulwaizya swebo to Banakristo ‘ikuzibisya nkumbizyo zyesu kuli Leza, elyo luumuno lwa Leza lwiinda miyeeyo yoonse yabantu luyooyaminina myoyo yesu amiyeeyo yesu.’ (Flp. 4:6, 7) Cilatuumbulizya kaka ikuziba kuti Jehova ulaandiswe, takoyootulekelela mumasukusyo! (Is. 41:10) Kufwumbwa kuti katumubelekela calusyomo unooli andiswe lyoonse.—Int. 46:7.
18 Acimwi ciyandika kapati cikonzya kutugwasya kubaa lusyomo nkujata bubi mumulimo wa Jehova. (1 Kor. 15:58) Ba Paulo a Sila bakabikkwa muntolongo akaambo kakujata bubi mukukambauka makani mabotu. Sena bakaleka kukambauka akaambo kamasukusyo ayo? Peepe, bakazumanana kukambauka nomuba muntolongo. Alimwi elyo nobakazwa muntolongo bakaunka ku Tesalonika kucikombelo caba Juda ‘akubandika ambabo makani aamu Magwalo.’ (Inc. 17:1-3) Ikuti katujisi lusinizyo luyumu naa lusyomo muli Jehova akusinizya kuti ndiswe tujisi kasimpe, taakwe cintu “cikonzya kutwaandaanya kuluyando lwa-Leza lwamuli-Kristo Jesu Mwami wesu.”—Rom. 8:35-39.
19 Zikozyanyo Zyasunu zya Kutadonaika: Tujisi zikozyanyo zinji kapati sunu zyabaabo bakatondezya kutadonaika mumyoyo yabo mbubwenya mbuli bwakali ba Paulo a Sila. Imucizi umwi wakafwutuka mucilabba cakupenzezya caku Auschwitz ulapandulula zyalusyomo lutazungaani alimwi akutadonaika nkobakajisi bakwesu abacizi mucilabba eco. Uluula kuti: “Cimwi ciindi musole umwi naakali kubuzya-buzya wakaboola kulindime kavwungide mfwaindi. Wakoompolola kati, ‘Ino tumucite buti buya nywebo nobantu? Twamwaanga, taku ambomulimvwa. Twamubikka muntolongo taku anomulibilika. Twamutola kucilabba cakupenzezya taku biya anomulibilika. Mwasinganizigwa kufwa tacikwe makani kulindinywe. Ino tulamutyani nobantu nywebo?’” Cilatuyumya kaka ikubona lusyomo ibakwesu ndobakajisi mubukkale obo bukatazya! Lyoonse bakasyoma muli Jehova kuti abagwasye kukakatila.
20 Toonse tulayeeya zyalusyomo ndobakatondezya bakwesu banji mukutatola lubazu mumazwanga aakati kamisyobo alo avwulide kapati mazubaano. Nokuba kuti bali mubukkale bukatazya, bakwesu basimide babikkilide maanu aakubona kuti bakwesu abacizi balasaninwa munzila yakumuuya. Boonse balazumanana kusyomeka cakutadonaika kabazi kuti ‘taakwe cilwisyo cibumbwa kukulwisya mbabo cikonzya kujana coolwe.’—Is. 54:17.
21 Ibunji bwabakwesu abacizi bakwete naa bakwetwe kumuntu uutasyomi abalo balayuma mulusyomo akukakatila. Umwi mukwesu kucisi ca Guadeloupe wakakazigwa kapati amukaintu wakwe uutasyomi. Mukusola kumutyompya akumusinkilila kutegwa katainki kumiswaangano ya Bunakristo, taakali kumujikila cakulya nokuba kumucapila zisani, wakaleka kumuccisila akumusumina zisani ziyaukide. Bakali kukkala kwaciindi cilamfwu katamwaambauzyi mulumaakwe. Pele akaambo kalusyomo ndwaakajisi mukubelekela Jehova akupaila kuti amugwasye, ooyu mukwesu wakalizunda penzi eli. Kwaciindi cilamfwu buti? Kwamyaka iitandila ku 20—eelyo mukaintu wakwe naakatalika kubaa moyo mubotu. Mukuya kwaciindi wakakkomana kapati nkaambo mukaintu wakwe wakabutambula bulangizi bwa Bwami bwa Leza.
22 Camamanino, tutalubi lusyomo lwabakwesu abacizi bakubusi baunka kucikolo kwalo nkobeelede kuliyumya kukuyungwa abeenzinyina alimwi abuyumuyumu bumbi. Kweelanaa zicita bamwi kucikolo, musimbi mukubusi umwi Kamboni waamba kuti: “Noli kucikolo bantu boonse balakukulwaizya kuti ube amuuya umwi wakuzanga. Ibana balaindila kukulemeka naa wacita cintu cimwi cabuzangi.” Taalikomeneni kaka mapenzi bakubusi besu ngobayanaangawo! Beelede kusinizya amoyo woonse amizeezo yabo ikukazya kuyungwa kuli koonse.
23 Ibunji bwabakubusi akati kesu bacita kabotu mukuzumanana kusyomeka nokuba kuti balasunkwa. Cikozyanyo comwe ncamucizi mukubusi umwi uukkala kucisi ca France. Buzuba bumwi nobakamana kulya cakulya camasikati kucikolo, basankwa bamwi bakaboola kumusimbi oyu kuti bamulye nkwela pele walo wakapaila camumoyo akubakasya canguzu, mpoonya aabo basankwa bakamuleka. Nokwainda ciindi umwi akati kabasankwaabo wakaboola akumwaambila kuti wakamulombozya akaambo kabusicamba bwakwe. Wakamukambaukila makani aa Bwami akumupandulwida zyeelelo zisumpukide Jehova nzyabikkide kuli baabo boonse bayanda kuyookkomana azilongezyo zya Bwami obo. Lyoonse nobali kucikolo wakali kubapandulwida nzyasyoma basicikolonyina boonse mbociiya limwi mukkilasi.
24 Taciliboteli kaka coolwe ncotujisi cakuba akati kabaabo Jehova mbabotelwa kubelesya mukwaambaula cakutadonaika zintu nzyayanda! (Kol. 4:12) Kunze lyaboobo, tujisi coolwe cibotu cakusinizya lusyomo lwesu notuli mukupenzegwaa Sinkondoma uuli mbuli syuumbwa Saatani Diabolosi. (1 Pet. 5:8, 9) Tutalubi kuti Jehova ubelesya mulumbe wa Bwami kutufwutula swebo notukambauka abaabo mbotukambaukila ibautobela. Ikusala koonse nkotucita alimwi abukkale bwesu bwabuzuba abuzuba azitondezye kuti tubikka Bwami mubusena bwakusaanguna. Atuzumanane kukambauka makani mabotu cakutadonaika mumoyo!