Amuyaambele—Mukomene
NOMWAKATALIKA kubelesya njiisyo zyamu Bbaibbele, ikuyeeya, ikwaambaula abukkale zyakatalika kucinca bucebuce. Mwakazileka eezyi kamutana kulilembya mu Cikolo Camulimo Weendelezyegwa a Leza. Cakutadooneka, mwayaambele lino kusikila mwalyaaba kuli Jehova. Sena eeci caamba kuti lino inga mwagola? Peepe. Ikubbapatizyigwa ngamatalikilo aamulimo wanu.
Sikwiiya Timoteo wakali kale mwaalu Munakristo eelyo Paulo naakamukulwaizya ‘kusungwaala’ kululayo amikuli njaakajisi—‘kulitakata’ kulinzizyo—ikutegwa ‘bantu boonse babone mbwaakali kuya bukomena mumilimo yakwe.’ (1 Tim. 4:12-15) Kunyina makani mwakatalika lino ikutobela kasimpe naa muli Banakristo bakaindi, muciyandika kuyaambele.
Luzibo Alimwi Akucinca
Kubbuku lya Ba-Efeso 3:14-19, tubala kuti mwaapostolo Paulo wakapailila basyominyina kuti bacikonzye ‘kumvwisya mbwaabede makani oonse’ aakasimpe. Mukubagwasya kucita boobo, Jesu wakabapa zipego zyabaalumi ikutegwa bayiisye, akululamika alimwi akuyumya mbungano. Ikuzinzibala kuyeeya lyoonse a Jwi lya Leza lyakasololelwa amuuya wakwe, kubikkilizya abusolozi bupegwa abamaiyi bacibwene, kuyootugwasya ‘kukomena’ kumuuya.—Ef. 4:11-15.
Kukomena ooko kulabikkilizya ‘akuba amiyeeyo mipya.’ Eeci caamba kuba amiyeeyo yeendelana aya Leza alimwi a Kristo. Ikutegwa ‘tulisamike buntu bupya,’ lyoonse tuyandika kubikkila maano kukuyeeya kwabo. (Ef. 4:23, 24) Nomubala mabbuku aa Makani Mabotu, sena zibalo eezyi zyaamba zyabuumi bwa Kristo zimubeda citondezyo cibotu ncomweelede kutobela? Sena mulombozya kuzyiba bube bumwi bugaminide mbwaakajisi Jesu akusoleka kubwiiya mubukkale bwanu?—1 Pet. 2:21.
Itwaambo ntomubandika mumibandi yanu tulakonzya kupa bumboni bwambuli mbomwayaambele mumakani aaya. Aabo ibakalisamika buntu bupya tababelesyi majwi aabumpelenge, aakutukila, aamvwisya nsoni naa aatyompya. Muciindi caboobo, imajwi aabo ‘alayaka kutegwa boonse baswiilila bagwasyigwe.’ (Ef. 4:25, 26, 29, 31; 5:3, 4; Jud. 16) Kwiingula kwabo alimwi anzyobaamba noliba leelyo nobali mumaanda aabo akumiswaangano yambungano zitondezya kuti bukkale
bwabo buya bucinca akaambo kakasimpe.
Abumbi bumboni butondezya kuyaambele, ‘nkutapepaulwa ooku akooku akupupululwa amyuuwo yanjiisyo zyamisyobo-misyobo.’ (Ef. 4:14) Mucikozyanyo, ino mulimvwa buti bantu munyika nobamupa mizeezo mipya minji kapati, nobamulomba kukamantana akakamu kabantu kamwi mukuzuzikizya mulimo umwi antela kutola lubazu mukulikondelezya kusiyene-siyene nkobacita? Sena kuli nomusunkwa ikubelesya ciindi canu mukucita zintu zili boobo muciindi cakuzuzikizya milimo yakumuuya? Ikucita boobo kulakonzya kumusinkila mukuyaambele kumuuya. Cilagwasya kaka ikujana ciindi cakuzuzikizya zintu zyakumuuya!—Ef. 5:15, 16.
Mbomukkala abantu bamwi abwalo bulakonzya kutondezya kuyaambele kwanu kumuuya. Sena mwakaiya kuba bantu “batete moyo, akuba aluzyalo lwakulekelelana milandu” nobamubisyila banyoko abacizyi bakumuuya?—Ef. 4:32.
Ikuyaambele kwanu mukucita zintu munzila njayanda Jehova kweelede kubonwa mumbungano anomuli kuŋanda. Alimwi kweelede kubonwa nomuli kucikolo, mubuleya akumulimo nkomubelekela. (Ef. 5:21–6:9) Ikuti kamutondezya bube bwa Leza mumbazu zyoonse eezyi, ikuyaambele kwanu kuyoobonwa abamwi.
Amucibelesye Cipego Ncomujisi
Jehova wakapa aumwi wesu ibusongo azipego zisiyene-siyene. Uyanda kuti zintu eezyi tuzibelesye kugwasya bamwi kucita kuti kwiinda mulindiswe abatondezye luzyalo lwakwe. Kumakani aaya, imwaapostolo Petro wakalemba kuti: “Aumwi cipego ncaakatambula kuli Leza acibelesye mukugwasya beenzinyina. Mube mbuli babanzi babelesya kabotu zipego . . . zizwa kuli Leza.” (1 Pita 4:10) Ino muli mukuuzuzikizya buti mulimo wanu wabubanzi?
Petro ulazumanana kuti: “Naa umwi waamba, aambe majwi aazwa kuli Leza.” (1 Pita 4:11) Kapango aaka kakankaizya mbociyandika ikwaamba zintu zyeendelana abwaamba Jwi lya Leza ikutegwa Leza alemekwe. Ŋambawido yesu ayalo yeelede kuba yeeyo iipa kuti Jehova alemekwe. Ilwiiyo lujanwa mu Cikolo Camulimo Weendelezyegwa a Leza lulakonzya kumugwasya kubelesya cipego ncomujisi munzila eeyi—ikulemeka Leza kwiinda mukugwasya bamwi. Mbomujisi makanze aaya, ino inga mwazyiba buti mbomwayaambele mucikolo?
Muciindi cakulanga bunji bwatwaambo tuli afoomu yalulayo lwakukanana ntomwakabandika naa makani ngomwakapegwa kale aaindene-indene, amubone ilwiiyo mbolwamugwasya kuyaambele mucipaizyo cakulumba. Icikolo cilatugwasya ikuzwidilila mumulimo wesu wamumuunda. Aboobo amulibuzye kuti: ‘Sena ncobeni ndilalibambila nzyondiyanda kuyoobandika mumulimo wamumuunda? Sena ndilababikkila maano aabo mbondikambaukila? Sena ndilababuzya mubuzyo ikutegwa tukatalikile mpawo ndaakupilukila ciindi citobela? Ikuti kandiiya Bbaibbele amuntu umwi, sena ndili mwiiyi waamba twaambo tumunjila mumoyo?’
Mutayeeyi ikuti muyaambele akaambo kamikuli njomupedwe kubeleka. Ikuyaambele kwanu kulabonwa, ikutali mumukuli ngomujisi pele kweelana ambomuubeleka mukuli ooyo. Nomwapegwa mukuli uujatikizya kuyiisya, amulibuzye kuti: ‘Sena ndabelesya luzibo lwakuyiisya? Sena makani ndaamba munzila iikonzya kubagwasya kucinca bukkale bwabo aabo bali kuswiilila?’
Ikukulwaizyigwa kubelesya cipego ncomujisi caamba kulisungula kucita zintu. Sena mulalisungula kubeleka abamwi mumulimo wamumuunda kamutalindili kuti bamulombe buya? Sena mulilisungude kugwasya bapya, bana basyoonto naa ibaciswa mbomuli limwi mumbungano? Sena mulalyaaba kukukula Ŋanda ya Bwami naa ikugwasyilizya munzila zisiyene-siyene amiswaangano yacooko, yaalubazu ayabbazu? Sena inga mulalilembya ciindi aciindi mumulimo wabupainiya bwakugwasyilizya? Sena inga mulabeleka mulimo wabupainiya bwaciindi coonse naa ikugwasyilizya mumbungano eeyo iibulide? Ikuti kamuli bakwesu, sena muli mukubelekela kuzuzikizya zyeelelo zyamu Magwalo iziyandika kubakutausi alimwi abaalu? Ikugwasyilizya mutulimo-limo camoyo woonse alimwi akuzumina mukuli ngomukonzya kupegwa ncitondezyo cakuti muyaambele.—Int. 110:3.
Iluzibo Mbolukonzya Kumugwasya
Ikuti kamulimvwa kulezya akaambo kakubula busongo mubukkale bwa Bunakristo, amukkazyike moyo. Ijwi lya Leza lilakonzya ‘kusongwaazya batazyi.’ (Int. 19:7; 119:130; Tus. 1:1-4) Ikubelesya lulayo lwamu Bbaibbele kuyoopa kuti tugwasyigwe abusongo bwa Jehova bulondokede, bwalo buyandika kapati kwiinda luzibo luli loonse lujanwa abantu bapona kwamyaka minji. Pele mbotuya buyaambele mumulimo wa Jehova, tujana luzibo luyandika kapati. Ino mbuti mbotukonzya kulubelesya munzila iigwasya?
Mbwaanga muntu inga wakainda kale mubukkale busiyene-siyene, cimwi ciindi ulakonzya kuyeeya kuti: ‘Bukkale oobu tabuli bweenzu kulindime pe. Ndilizyi cakucita.’ Sena eeci inga categwa mbusongo? Ibbuku lya Tusimpi 3:7 litucenjezya kuti: “Utalisongwaazyi mumeso aako omwini.” Iluzibo lweelede kutugwasya kuteelela twaambo toonse tujatikizyidwe notujanika mubukkale busiyene-siyene. Pele ikuti katuyaambele kumuuya, iluzibo ndotujisi lweelede kutugwasya kuzyiba kuti tuyandika kulongezyegwa a Jehova ikutegwa tuzwidilile. Aboobo, kuyaambele kwesu kulabonwa ikutali mbotumana mapenzi aasiyene-siyene cakulisyoma, pele kwiinda mukulisungula kulomba Jehova kuti atusololele mubuumi bwesu. Kulabonwa kwiinda mukuba alusyomo lwakuti kunyina cikonzya kucitika ikuti tanaacizumizya. Alimwi akwiinda mukuzumanana acilongwe aluyando ndotujisi kuli Taateesu wakujulu.
Amuzumanane Kuyaambele
Nokuba kuti imwaapostolo Paulo wakali Munakristo munanike uusimide kumuuya, wakalizyi kuti wakeelede kuzumanana ‘kuyaambele’ kutegwa akajane buumi. (Flp. 3:13-16) Sena andinywe muli abulangizi buli boobu?
Ino kuyaambele kwanu kwasika aali? Amulilingule mubone mbomwakomena ambomwalisamika buntu bupya, mbomwalibombya cakumaninina kubulelo bwa Jehova ambomusungweede kubelesya zipego zyanu lyoonse mukulemeka Jehova. Mbomuya bugwasyigwa alwiiyo lujanwa mu Cikolo Camulimo Weendelezyegwa a Leza, ibube mbolikankaizya Jwi lya Leza bweelede kubonwa muŋambawido amukuyiisya kwanu. Amutubikkile maano twaambo ootu mukukomena kwanu. Amutukkomanine twaambo ootu, eelyo bantu boonse bayoobona mbomwayaambele.