• Mbuti Bbaibbele Mbolikonzya Kumugwasya?
    Amupone Kukabe Kutamani!—Lwiiyo Lwamu Bbaibbele
    • Ciiyo 1. Bbaibbele lijalukide.

      CIIYO 01

      Mbuti Bbaibbele Mbolikonzya Kumugwasya?

      Toonse tulijisi mibuzyo kujatikizya buumi, mapenzi, lufwu alimwi aziyoocitika kumbele. Alimwi tulalibilika kujatikizya zintu zyabuzuba abuzuba, mbuli kujana mali aakuula nzyotuyandika naa mbotukonzya kuba amukwasyi uukkomene. Bantu banji bajana kuti Bbaibbele lilabagwasya kwiingula mibuzyo iibakatazya kapati, alimwi lilabapa lulayo lugwasya mubuumi bwabuzuba abuzuba. Sena kuli muntu ngomuzyi uukonzya kugwasyigwa a Bbaibbele?

      1. Mibuzyo nzi imwi njoliingula Bbaibbele?

      Bbaibbele lilaingula mibuzyo iiyandika kapati mbuli yakuti: Ino buumi bwakatalika buti? Nkaambo nzi ncotuli waano? Nkaambo nzi bantu ibanyina mulandu ncobapenga? Ncinzi cicitika muntu afwa? Ikuti bantu boonse bayanda luumuno, nkaambo nzi ncokuvwulide nkondo? Sena nyika iyoomana naa pe? Bbaibbele litukulwaizya kuyandaula bwiinguzi kumibuzyo iili boobu, alimwi bantu banji babujana bwiinguzi bukkazika moyo.

      2. Mbuti Bbaibbele mbolikonzya kutugwasya kukkomana mubuumi?

      Bbaibbele lilatupa lulayo lubotu. Mucikozyanyo, lilayiisya mikwasyi mboikonzya kujana lukkomano lwini-lwini. Lilatwaambila ncotukonzya kucita ciindi notukopene mumizeezo, alimwi ambotukonzya kuukkomanina mulimo wesu. Mulabona Bbaibbele ncoliyiisya kujatikizya twaambo ootu alimwi atumbi tuyungizyidwe twanoobandika makani aali mubbuku eeli antoomwe. Mpoonya muyoozumina kuti ‘Magwalo oonse naa makani oonse aali mu Bbaibbele alagwasya.’​—2 Timoteyo 3:16.

      Bbuku eeli talinjili mubusena bwa Bbaibbele. Muciindi caboobo, limukulwaizya kulilanga-langa Bbaibbele. Aboobo tumukulwaizya kwaabala magwalo aali muziiyo eezyi alimwi akwaayezyanisya anzyomwiiya.

      AMWIIYE ZINJI

      Amubone Bbaibbele mbolyabagwasya bantu, mbomukonzya kulikkomanina ciindi nomulibala alimwi akaambo ncociyandika kuti mugwasyigwe kutegwa mulimvwisye.

      3. Bbaibbele lilakonzya kutusololela

      Bbaibbele lili mbuli mumuni uumunika kapati. Lilakonzya kutugwasya kusala kabotu alimwi akutwaambila ziyoocitika kumbele.

      Amubale Intembauzyo 119:105, akubandika mibuzyo eeyi:

      • Ino mulembi wantembauzyo eeyi wakali kulibona buti Bbaibbele?

      • Ino nywebo mulibona buti Bbaibbele?

      Mwaalumi uyabweenda amwala kumbali aamulonga kayaabumunika tocci.

      4. Bbaibbele lilakonzya kuyiingula mibuzyo yesu

      Mukaintu umwi wakajana kuti Bbaibbele lyakayiingula mibuzyo iyakali kumukatazya kapati kwamyaka minji. Atweebelele VIDIYO, akubandika mibuzyo iitobela.

      VIDIYO: Amuzumanane Abulangizi Mbomujisi! (1:48)

      • Muvidiyo, mibuzyo nzi njaakajisi mukaintu ooyu?

      • Ino kwiiya Bbaibbele kwakamugwasya buti?

      Bbaibbele litukulwaizya kubuzya mibuzyo. Amubale Matayo 7:7, akubandika mubuzyo uutobela:

      • Mibuzyo nzi njomujisi iikonzya kwiingulwa mu Bbaibbele?

      5. Mulakonzya kukkomana kubala Bbaibbele

      Bantu balakkomana kubala Bbaibbele alimwi lyabagwasya. Atweebelele VIDIYO, akubandika mibuzyo iitobela.

      VIDIYO: Kubala Bbaibbele (2:05)

      • Muvidiyo, ino bakubusi bakali kulimvwa buti kujatikizya kubala?

      • Nokuba kuti tabakukkomanini kubala, nkaambo nzi ncobakukkomanina kubala Bbaibbele?

      Bbaibbele lyaamba kuti lilakonzya kutupa lulayo lukonzya kutuumbulizya alimwi akutupa bulangizi. Amubale Baroma 15:4, akubandika mubuzyo ooyu:

      • Sena cisyomezyo camu Bbaibbele kujatikizya luumbulizyo alimwi abulangizi cilamukkomanisya?

      6. Bamwi balakonzya kutugwasya kulimvwisya Bbaibbele

      Kunze buyo lyakulibalila lwabo beni, bamwi bajana kuti cilagwasya kuba amibandi iijatikizya Bbaibbele. Amubale Milimo 8:26-31, akubandika mubuzyo ooyu:

      Zifwanikiso: 1. Filipo mukambausi upandulula Magwalo kumwaalumi muna Etiopiya. 2. Umwi wa Bakamboni ba Jehova ubandika zyamu Bbaibbele amukaintu alimwi abana bakwe bobilo.

      Mwaalumi muna Etiopiya wakali kuyandika lugwasyo kutegwa aamvwisye Magwalo. Bantu banji mazuba aano bajana kuti cilagwasya kubandika zyamu Bbaibbele abamwi

      BAMWI BAAMBA KUTI: “Kwiiya Bbaibbele nkusowa buyo ciindi.”

      • Ino nywebo mwaamba buti? Nkaambo nzi?

      MUBUFWAAFWI

      Bbaibbele lilapa lulayo lugwasya mubuumi bwabuzuba abuzuba, lilaingula mibuzyo iibakatazya kapati bantu, alimwi lilapa luumbulizyo abulangizi.

      Ncinzi Ncomwaiya?

      • Ino ndulayo luli buti ndotujana mu Bbaibbele?

      • Mibuzyo nzi imwi njoliingula Bbaibbele?

      • Ncinzi ncomunga mwayanda kwiiya kuzwa mu Bbaibbele?

      Mbaakani

      AMUZYIBE ZINJI

      Amubone lulayo lwamu Bbaibbele mbolugwasya mazuba aano.

      “Njiisyo Zyamu Bbaibbele​—Mbusongo Bugwasya Lyoonse” (Ngazi Yamulindizi No. 1 2018)

      Amubone Bbaibbele mbolyakamugwasya mwaalumi iwakali apenzi lyakunyema-nyema.

      Mbondakatalika Kupona Buumi Bukkomanisya (2:53)

      Amulange-lange lulayo lwamu Bbaibbele mbolugwasya mukwasyi.

      “Nzila Izili 12 Zikonzya Kupa Kuti Mukwasyi Uzwidilile” (Sinsimuka! No. 2 2018)

      Amwiiye Bbaibbele akubona mbolilulamika muzeezo uutaluzi, uudumide kujatikizya iweendelezya nyika.

      Nkaambo Nzi Ncomweelede Kwiiya Bbaibbele?​—Kavidiyo Kalamfwu (3:14)

  • Bbaibbele Mulumbe Ngwaakatupa Leza
    Amupone Kukabe Kutamani!—Lwiiyo Lwamu Bbaibbele

    • 1. Kuti naa mbantu bakalemba Bbaibbele, mbuti Leza mbwali Sikulyaanza?

      Bbaibbele lyakalembwa abaalumi baindene-indene babalilwa ku 40, lyakatola myaka iibalilwa ku 1,600 kuzwa mu 1513 B.C.E. kusikila kuma 98 C.E. Nokuba kuti bakalilemba bakaliindene kapati, nzyobakalemba zileendelana. Ino eeci cakakonzyeka buti? Nkaambo Leza ngo Sikwaanza Bbaibbele. (Amubale 1 Batesalonika 2:13.) Bakalilemba, tiibakalemba mizeezo yabo. Muciindi caboobo, “bakaambaula zyakazwa kuli Leza kwiinda mukusololelwa amuuya uusalala.”a (2 Petro 1:21) Leza wakabelesya muuya wakwe uusalala kusololela naa kukulwaizya baalumi kulemba mizeezo yakwe.—2 Timoteyo 3:16.