Kukombelezya Kuli Kabotu

BAALU Banakristo beelede “kukombelezya beenzinyina kulwiisyo lwinilwini.” (Tit. 1:9) Zimwi ziindi eeci ceelede kucitwa mubukkale bukatazya. Cilayandika kupa lulayo lweendelana amalailile aamu Magwalo. Aboobo, baalu beelede kulutobela lulayo lwakuti: “Sungwaala . . . kukufundisya.” (1 Tim. 4:13) Nokuba kuti mubandi wesu ooyu ikapati ugamikidwe kubaalu naa aabo balangilwa kubweza mukuli ooyu, kuli ziindi ibazyali nobeelede kukombelezya bana babo naa aabo beendelezya ziiyo zya Bbaibbele nobeelede kukombelezya mbobaiya limwi Bbaibbele. Mubukkale buli boobu, malailile ngeena aaya alabeleka.

Nokuyandika Kukombelezya. Ikutegwa kuzyibwe kukombelezya nokuyandika, cilagwasya kulanga-langa bukkale bulembedwe mu Bbaibbele ikukombelezya nokwakacitwa. Mwaapostolo Petro wakakombelezya baalu ikubikkila maano kumukuli wabo mbobali beembezi babutanga bwa Leza. (1 Pet. 5:1, 2) Paulo wakaambila Tito kuti abakombelezye baalumi bacili bana kuti “basitikile muziyanza zyoonse.” (Tit. 2:6) Paulo wakakulwaizya Banakristonyina kuti ‘bazuminane cintu comwe’ akubatantamuka aabo ibayandisya kuleta manyongwe akati kabakwesu. (1 Kor. 1:10; Rom. 16:17; Flp. 4:2) Nokuba kuti Paulo wakabalumbaizya basimbungano yaku Tesalonika kuzintu zibotu nzyobakali kucita, wakabakombelezya ikuzumanana kutobela malailile ngobakatambula. (1 Tes. 4:1, 10) Petro wakakombelezya Banakristonyina kuti ‘balilesye kuzisusi zyabunyama.’ (1 Pet. 2:11) Juda wakakombelezya ibanyina kuti ‘balwanine lusyomo’ akaambo kakoongelezya kwabantu batakombi Leza aabo batakali kulilemeka. (Jud. 3, 4) Banakristo boonse bakakulwaizyigwa kukombelezyanya kucita kuti kutabi muntu uuyumya moyo kukucengwa acibi. (Heb. 3:13) Petro wakakombelezya bama Juda batakaningaba alusyomo muli Kristo kuti: “Amulivune kucisubulo ceelede bantu babi basunu.”—Mili. 2:40.

Mbube nzi buyandika ikutegwa mukombelezye bantu mubukkale buli boobu? Mbuti ooyo uukombelezya mbwakonzya kutondezya kuti kulayandika cakufwambaana kakunyina kucita oobo cabukali?

“Caluyando.” Ikuti kukombelezya kwesu tiikwacitwa “caluyando,” kulakonzya kumvwugwa cabukali. (Flm. 9) Masimpe, nokuyandika kucita cintu calubinda, mbwakanana mwaambi bweelede kumvwika kuti cilayandika kucitwa lino aawa. Kukanana ajwi libombede kulakonzya kulimvwisya kuti muntu uluuside. Pele kukombelezya kweelede kucitwa cakusinizya acalweetelelo. Kukombelezya kwaluyando cakutadooneka kuyoobakulwaizya baswiilizi. Kaliiminina lwakwe alimwi abeenzyinyina, Paulo wakaambila ba Tesalonika kuti: “Mulizi kuti twakamucitila umwi aumwi mbuli wisi mbwacitila bana bakwe. Twakali kumukombelezya.” (1 Tes. 2:11) Aabo balangizi Banakristo bakabakombelezya ibanyina caluyando. Nzyomwaamba azitondezye kuti mulababikkila maano ncobeni bamuswiilila.

Amusongwaale. Mutabanyemyi aabo mbomuyanda kukulwaizya kubweza ntaamu. Pele mutawayiwayi kubaambila bamuswiilila “luyando loonse lwa-Leza.” (Inc. 20:27) Aabo ibalumba kunyina nobaya kunyema naa kumusula akaambo kakubakulwaizya ikucita ciluzi.—Int. 141:5.

Kanji-kanji cilagwasya kumulumba muntu kamutanatalika kumupa lulayo. Amuyeeye zintu zibotu nzyobacita ibanyoko—zintu eezyo Jehova nzyakkomanina: lusyomo ndobatondezya mumilimo yabo, iluyando lubakulwaizya kubeleka canguzu alimwi akuliyumya kwabo nobali mumapenzi. (1 Tes. 1:2-8; 2 Tes. 1:3-5) Eeci ciyoobagwasya ibanyoko kubona kuti balayandwa akubikkilwa maano alimwi ciyoobagwasya kulutobela lulayo ndobapegwa.

‘Cakukkazyika moyo.’ Kukombelezya kweelede kucitwa ‘cakukkazyika moyo.’ (2 Tim. 4:2) Ino eeci cibikkilizya nzi? Kukkazyika moyo kubikkilizya kuliyumya cabusicamba muntu nakubisyila naa kukukalazya. Muntu uukkazyika moyo ulijisi lusyomo lwakuti bamuswiilila bayoozyitobela nzyaamba. Ikupa lulayo munzila eeyi kuyoobagwasya bamuswiilila kutamubona kuti mubayeeyela zintu zibi. Lusyomo ndomujisi lwakuti ibanyoko abacizyi bayanda kumubelekela Jehova kusika mpobakonzya kuyoobakulwaizya ikucita ciluleme.—Heb. 6:9.

“Kulwiisyo Lwinilwini.” Mbuti mwaalu mbwakonzya “kukombelezya beenzinyina kulwiisyo lwinilwini”? Nkwiinda ‘mukujatisya makani aasyomeka mulwiisyo lwakwe.’ (Tit. 1:9) Muciindi cakwaamba nzyomuyeeya, amulekele Jwi lya Leza libe ncecibelesyo mukukombelezya kwanu. Amuleke Bbaibbele limugwasye kuzyiba ziyandika kwaambwa. Amulembe bubotu bwakubelesya ncolyaamba Bbaibbele kukaambo nkomulanga-langa. Amuzyibe zikonzya kucitika—lino akumbele—ikuti lyatatobelwa Jwi lya Leza, alimwi amuzibelesye eezyi kukulwaizya bamuswiilila kubona mbociyandika ikubweza ntaamu yeelede.

Amubone kuti mwabapanduluda kabotu-kabotu ibamuswiilila ncobeelede kucita ambobeelede kucicita. Amutondezye kuti nzyomwaamba nzyamu Magwalo. Ikuti Magwalo kaapa lwaanguluko lwakulisalila, amutondezye kabotu-kabotu mpolujinkila lwaanguluko oolo. Mpoonya mukumanizya, amwaambe majwi aamamanino ayookulwaizya bamuswiilila kuzumanana akusala kwabo mukubweza ntaamu.

‘Kakunyina Ncomuyoowa.’ Ikutegwa umwi akombelezye bamwi munzila iili kabotu, uyandika kuba muntu ‘uunyina ncayoowa mukusyoma.’ (1 Tim. 3:13) Ncinzi cipa muntu kwaambaula cakutayoowa? Ikuti ‘citondezyo cakwe cakoonda milimo mibotu’ kaceendelana anzyakulwaizya ibanyina kuti bacite. (Tit. 2:6, 7; 1 Pet. 5:3) Ooko nkocili boobo, aabo bakulwaizyigwa kubweza ntaamu bayoobona kuti ooyo uubakulwaizya kucita boobo talangili kuti bacite eezyo walo nzyataciti. Bayoobona kuti balakonzya kumwiiya mulusyomo lwakwe mbubonya mbuli mbwasoleka kwiiya Kristo.—1 Kor. 11:1; Flp. 3:17.

Lulayo luzwa mu Jwi lya Leza alimwi lupegwa caluyando lulakonzya kugwasya kapati. Aabo ibapedwe mukuli wakupa lulayo luli boobu beelede kusungwaala ikucita oobo munzila mbotu.—Rom. 12:8.