‘Amukambauke Makani Cakubindaana Lyoonse’
1 Ikuti naa mwatambula cintu cimwi cilembedwe kuti “KUBINDAANA,” ino inga mulacilanganya buti? Ibbala lyakuti “kubindaana” lyaamba “kulanganya cintu cakufwambaana.” Akaambo kaceeci, mwaapostolo Paulo wakalailila Banakristo ‘ikukambauka makani cakubindaana lyoonse.’ (2 Tim. 4:2) Sena mulaatobela malailile aaya kwiinda mukuulanganya cakufwaambana mulimo ooyu?
2 Ciboneka mbuli kuti Paulo wakalaamvwide makani aakuti ibanyina bamwi Banakristo bakali “batolo kubusungu.” (Rom. 12:11) Eci cakapa kuti batazwidilili mukusola-sola kwabo alimwi teebakajisi lukkomano ndobakeelede kubaandulo kuzwa mumulimo wabo wakugwasya bamwi.
3 Jesu Mbwaakali Kuulanga Mulimo: Jesu wakabotelwa cini-cini kucita mulimo wakwe! Wakaamba kuti: “Icakulya cangu nkucita luyando lwayooyo uwakandituma, akulondola milimo yakwe.” Cikozyanyo Jesu ncaakatondezya cakabakulwaizya basikwiiya bakwe balo mbaakayumya-yumya kwiinda mukubaambila kuti ‘myuunda yayuma kale kuti itebulwe.’ (Joh. 4:34, 35) Kubindaana nkwaakajisi mumulimo wakwe woonse wakakutondezya mumajwi aakwe ngaakaambila basikwiiya bakwe aakuti, “amukumbile mwami uuli amuunda kuti atume batebuzi kukutebula kwakwe.” (Mt. 9:38) Jesu wakalizi kuti mulimo wakwe wakali wakukambauka, alimwi wakali kanzide kuti taakwe cakali kuyoomukasya kuucita mulimo oyu.
4 Ino Mbuti Swebo? Sunu nokuyandika kapati kubindaana kuyaambele mumulimo wakukambuka kwiinda lyoonse. Munyika yoonse mbwiizulwa kuli myuunda minji yayuma kale iiyandika kutebulwa. Nomuba mumasi oomo mwaakambaukwa kapati makani, zyuulu-zyuulu zyabantu balabbapatizigwa mwaka amwaka. Mbwaayabuswenena afwaafwi mamanino aabweende bwazintu obu, ‘atupangike myoyo yesu lyoonse kumilimo ya Mwami.’ (1 Kor. 15:58) Tuyandika kusungwaala lino kwiinda mbotwali kucita lyoonse mukwaambila bamwi mulumbe wa Bwami.
5 Camoyo woonse, atwaambile bamwi makani mabotu mumulimo waŋanda aŋanda akoonse nkotukonzya kujana bantu mucilawo cesu. Notutola lubazu lyoonse mumulimo wakukambauka, ncitondezyo cakuti tubikka Bwami mubusena bwakusaanguna mubuumi bwesu. (Mt. 6:33) Kusyomeka kwesu mukukambauka makani cakubindaana lyoonse kuyootupa lukkomano lunji.