Amwaakake ‘Makani Aakubeja’

8. (a) Ino mbuti Saatani mbwasola kunyonganya lusyomo lwesu mazubaano? (b) Ino nkucenjezya kuli buti kwa Paulo kujanika kulugwalo lwa 2 Timoteo 4:3, 4?

⁸ Saatani ulasola kunyonyoona lusyomo lwesu kwiinda mukupa kuti tutalike kudooneka zintu nzyotwakayiisyigwa. Mbubwenya mbuli mbokwakabede mumwaanda wamyaka wakusaanguna, basiluleyo alimwi abantu bamwi buyo balasola kunyonganya lusyomo lwabantu batakwe mulandu. (Ba-Galatiya 2:4; 5:7, 8) Ziindi zimwi babelesya sikapepele ikumwaya makani mabyaabi naaba aakubeja buya kujatikizya nzila zyibabelesya alimwi amakanze ngibajisi bantu ba Jehova. Paulo wakacenjezya kuti bantu bamwi bayooleka kutobela kasimpe. Wakalemba kuti: “Ciindi cilasika ncobati kaleke kuzumina kufundisya kwinikwini, eno bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa. Bayoosinka matwi aabo kumakani menimeni, bakagame kuswiilila [makani aakubeja].”—2 Timoteo 4:3, 4.

9. Ino kweelede kuti ncinzi Paulo ncaakali kuyeeya ciindi naakaamba kujatikizya ‘makani aakubeja’?

⁹ Muciindi cakuzumanana kubwaanze bwamajwi meni-meni, bantu bamwi bakayungwa ‘amakani aakubeja.’ Ino makani aaya aakubeja akali kujatikizya nzi? Ambweni Paulo wakali kuyeeya twaano twakuyeeyela buya tuli mbuli twaano tujanika mubbuku lya Tobit.a Makani aakubeja ambweni akali kubikkilizya amakani aakondelezya alimwi aamavwambukila aakuyeeyela buya. Alimwi ibamwi “mbuli kuyanda kwamyoyo yabo,” beelede kuti bakeenwa abaabo ibakali kuubya-ubya zyeelelo zya Leza naa aabo ibakali kuvwiya baabo bakali kusololela mumbungano. (3 Johane 9, 10; Juda 4) Kufwumbwa naa kwakali zilebyo zili buti, kuboneka kuti bamwi bantu bakabukkomanina bubeji kwiinda kasimpe ka Jwi lya Leza. Mukaindi kasyoonto buyo, bakaleka kucita zintu nzyobakayiide, eelyo bakanyongana munzila yakumuuya.—2 Petro 3:15, 16.

10. Ino mmakani aakubeja aali buti aaliko mazubaano, alimwi ino mbuti Johane mbwaakatondezya mbokuyandika kucenjela?

¹⁰ Mazubaano, tulakonzya kwaatantamuka makani aakubeja ikuti naa tulalilingula alimwi akusala makani ngotuswiilila alimwi akubala. Mucikozyanyo, muli sikapepele balakulwaizya bukkale bwakutalilemeka. Bantu banji bakulwaizya muzeezo wakuti Leza tako. Basikukazya balaakazya makani aali mu Bbaibbele aakuti lyakasololelwa amuuya wa Leza. Alimwi basiluleyo bamazubaano balasola kuyunga bantu kuti batalike kudooneka kutegwa Banakristo baleke kusyoma. Kujatikizya ntenda iikozyenyi yakaletwa abasinsimi babeji bamumwaanda wamyaka wakusaanguna, mwaapostolo Johane wakacenjezya kuti: “Nobayandwa, mutazuminini myuuya yoonse, pele amusoleke myuuya na njiya-Leza, nkaambo basinsimi banji babeji mobali kale munyika.” (1 Johane 4:1) Aboobo tweelede kucenjela.

11. Ino ninzila nzi njotukonzya kubelesya kutegwa tuzyibe naa tucijisi lusyomo?

¹¹ Kujatikizya makani aaya, Paulo wakalemba kuti: “Amulisukusye nubeni na muliimvwi mulusyomo.” (2 Ba-Korinto 13:5) Imwaapostolo utukulwaizya kuzumanana kulisunka kutegwa tubone naa tulaa lusyomo lwa Bunakristo ciindi coonse. Ikuti naa katuyandisya kuswiilila bantu basikutongooka, tuleelede kulilanga-langa kwiinda mukwaapailila makani aaya. (Intembauzyo 139:23, 24) Sena tuli bantu bayandisya kujanina milandu bantu ba Jehova? Ikuti naa mbotucita oobo, ino nkaambo nzi ncotucitila boobo? Sena kuli ciindi notwakacimwa akaambo kamajwi naa micito yamuntu umwi? Ikuti kakuli boobo, sena tulazumanana kuzilanga zintu mbozyeelede kuba twazyeelanya amakani aamwi? Kufwumbwa mapenzi ngotujana mubweende oobu bwazintu, ngakaindi buyo kasyoonto. (2 Ba-Korinto 4:17) Ikuti twasikilwa musunko mumbungano, sena eeci ceelede kutupa kuleka kubelekela Leza? Ikuti naa twakopana akaambo kacintu cimwi, sena tacigwasyi kusolekesya kutegwa tumane penzi eeli akulibikka mumaanza aa Jehova?—Intembauzyo 4:4; Tusimpi 3:5, 6; Ba-Efeso 4:26.

12. Ino mbuti bana Bereya mbobakatubikkila cikozyanyo cibotu?

¹² Muciindi cakucimwa, atuzumanane kwaabona munzila mbotu makani ngotwiiya muciiyo cesu tobeni alimwi akumiswaangano yambungano. (1 Ba-Korinto 2:14, 15) Muciindi cakudooneka Jwi lya Leza, elo kaka inga cagwasya ikuba aciimo cabana Bereya bamumwaanda wamyaka wakusaanguna balo ibakaalingaula Magwalo kabotu-kabotu! (Incito 17:10, 11) Aboobo, atubweze ntaamo kweelana azintu nzyotwiiya, ikukaka makani aakubeja alimwi akuzumanana mukasimpe.

13. Ino mmuunzila nzi mbotukonzya kutalika kumwaya makani akubeja cakutazyiba?

¹³ Alimwi kuli makani aambi aakubeja ngotweelede kucenjelela. Makani manji aakondelezya alamwaigwa, ikanjikanji alatuminwa mbuli lugwalo kwiinda mukubelesya muncini wakkompyuta. Cilagwasya kwaacenjelela makani aali boobo, ikapati ikuti naa tatuzyi makani aayo nkwaakazwida. Nokuba kuti makani aakacitika naa kaano kakatuminwa a Munakristo uusyomeka, imuntu ooyu ulakonzya kuti katatuzyi twaambo twancobeni tujatikizya makani aayo. Nkakaambo kaako cilayandika kapati kucenjela caboola kukwiinduluka kwambila bamwi makani aaya naa kutumina makani aatasinizyidwe kuti naa ali masimpe. Masimpe tatukonzyi kuyanda kunooyinduluka ‘twaano twabuyo itunyonganya makani aasalala.’ (1 Timoti 4:7, Ci) Alimwi mbwaanga tulijisi mukuli wakwaambilana kasimpe, inga cagwasya ikuti naa twacitantamuka cintu cili coonse cikonzya kutupa kutalika kumwaya makani aakubeja ambweni kwiinda mukutazyiba.—Ba-Efeso 4:25.