Ino Ncinzi Ciyoomana Bwaakuboola Bwami bwa Leza?

1, 2. (a) Ino muunzila nzi bweende bwazintu oobu mbobukonzya kweezyanisyigwa acigwebenga ciyanda kujaigwa? (Amubone cifwanikiso icili kumatalikilo aacibalo.) (b) Ino zilenge zyakujulu alimwi azyaansi ziyoolimwa buti bweende oobu bubyaabi bwaakunyonyoonwa?

“NCUUMBWE CEENDA!” Balindizi baamba majwi aayo ciindi cigwebenga cimwi cisyupide nobacibweza kuzwa mukaseelo kamuntolongo. Ino nkaambo nzi balindizi aaba ncobaambila boobu? Cigwebenga eeco cilibonya kuti buumi buli buyo kabotu; alimwi tacilibonyi kuti cijisi penzi lyakuti inga caba muntenda yakufwa. Nokuba boobo, balindizi bacitola kubusena bantu nkobajailwa. Cigwebenga eeco, ncuumbwe ceenda.a

² Mbubwenya buyo, bweende bwazintu bwamazuba aano buli mbuli muntu uuyanda kujaigwa. Nyika eeyi mbyaabi yakabetekwa kaindi, alimwi kumana kwanjiyo kulaafwaafwi. Bbaibbele lyaamba kuti: “Inyika ilamana.” (1Joh. 2:17) Bweende bwazintu oobu buyoomana ncobeni. Pele kuli kwiindana kuliko akati kakumana kwanyika eeyi akujaigwa kwamwaange uulya. Ciindi mwaange nayanda kujaigwa, bamwi bantu balakonzya kutongooka akwaamba kuti mulandu tiiwakabetekwa kabotu naa ambweni inga balangila kuti alekelelwe. Pele kujatikizya lubeta lwanyika eeyi, iwakakosola makani Mwami wabubumbo boonse uulondokede alimwi uubeteka cabululami. (Dt. 32:4) Nolilampa buti, bweende oobu buyoonyonyoonwa ncobeni alimwi ciyoolibonya caantangalala kuti lubeta oolu luleelela. Lwaakwiinda lubeta, zilenge zyoonse izili kujulu alimwi aanyika ziyoobona kuti nyika yabetekwa cabululami. Eelo kaka ooko kuyooba kulemununwa kupati!

3. Ino nzibeela nzi zyone nzyotutiibandike iziyoomana bwakuboola Bwami bwa Leza?

³ Ino ncinzi acimbi cibikkilizyidwe ‘munyika’ eeyi ‘iiyanda kumana’? Bunji bwazintu bantu nzyobabona kuti zinooliko lyoonse munyika eeyi, ziyakumana. Sena makani aayo alausisya? Peepe! Mubwini, eeci ncecibeela cipati ca “Makani Mabotu aa Bwami.” (Mt. 24:14) Aboobo atulange zintu iziyoomana bwakuboola Bwami bwa Leza. Tulalanga-langa zibeela zyone zipati-pati: bantu babyaabi, mbunga zibyaabi, micito mibi iicitika, alimwi abukkale bubyaabi. Mucibeela cimwi acimwi tulalanga-langa (1) zintu eezyi mbozitujatikizya mazuba aano, (2) ncayoocita Jehova kujatikizya nzinzyo, alimwi (3) ambwayoozigusya zintu eezyi akuleta zintu zibotu ncobeni.

BANTU BABYAABI

4. Ino muunzila nzi bantu babyaabi mobatujatikizya mazuba aano?

⁴ Ino bantu babyaabi batujatikizya buti? Naakamana kusinsima kuti bweende bwazintu oobu buyakubikkilizya “ziindi zikatazya,” mwaapostolo Paulo wakasololelwa amuuya kulemba kuti: “Bantu babyaabi abasilweeno bayoobija akubijila limwi.” (2Tim. 3:1-5, 13) Sena mulaabona majwi aaya kaazuzikizyigwa? Bunji bwesu twakapenzyegwa kale abantu babi mbuli basikupenzya, basikusulaika, alimwi azigwebenga. Bamwi akati kabantu aaba balabutondezya caantangalala bubi bwabo; bamwi mbaasilweeno, balo ibasisa nzyobacita kwiinda mukulitondezya kululama. Nokuba kuti swebo kutugama tatunapenzyedwe cacigaminina, bantu bali boobo balatujatikizya. Cilatucisa kapati ciindi notumvwa zintu zibi nzyobacita mbuli kupenzya bana, bacembeede, alimwi abaabo batakonzyi kulikwabilila. Bantu babyaabi aaba bacita zintu mbuli kuti mbanyama bamusyokwe naa mbuli madaimona. (Jak. 3:15) Cikkomanisya ncakuti, Jwi lya Jehova lilatupa bulangizi kujatikizya makani aaya.

5. (a) Ino ncoolwe nzi ncobacijisi bantu babi? (b) Ino kumamanino ncinzi ciyoobacitikila bantu babi ibatayandi kucinca?

⁵ Ino ncinzi ncayoocita Jehova? Lino Jehova wabapa ciindi cakuti bantu babi bacince. (Is. 55:7) Umwi aumwi wabo tanabetekwa akupegwa mulandu. Bweende bwazintu oobu mbobwakabetekwa kale. Pele ino mbuti kujatikizya baabo batayandi kucinca, balo ibazumanana kusumpula bweende bwazintu oobu kuti buzumanane kusikila kumatalikilo aamapenzi mapati? Jehova wakasyomezya kunyonyoona bantu babi anyika. (Amubale Intembauzyo 37:10.) Bantu babi balakonzya kuyeeya kuti tabakanyonyoonwi. Bantu banji balasisa nzyobacita, aboobo munyika eeyi balibonya mbuli kuti balicenjede nkaambo balazyeeleba zisubulo. (Job. 21:7, 9) Nokuba boobo, Bbaibbele litwaambila kuti: “Meso aa Leza alalanga nzila zyamuntu, alimwi ulazibona ntaamu zyakwe zyoonse. Kunyina mudima nouba musinze uusiya mbi nkobakonzya kuyuba basimucita zibi.” (Job. 34:21, 22) Tatukonzyi kumuyuba Jehova Leza pe. Kunyina silweeno uukonzya kumufwubaazya; kunyina mudima uusiya naa usiiyisya uukonzya kulesya meso aa Leza alo aabona kuli koonse kutegwa ataboni bwini twaambo mbotubede. Mpoonya yaakumana Amagedoni tuyoolanga nkobakabede babi, pele tatukababoni pe. Tabanooliko kukabe kutamani!—Int. 37:12-15.

6. Ino mbaani bayoosyaala mubusena bwabantu babi, alimwi nkaambo nzi aayo ncaali makani mabotu?

⁶ Ino mbaani bayoosyaala mubusena bwabantu babi? Jehova wapa cisyomezyo eeci cikkomanisya cakuti: “Babombe myoyo bayookona nyika, eelyo bayoobotelwa kapati muluumuno lunji.” Mutupango tuli kumbele muntembauzyo njomunya eeyi, tubala kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:11, 29) Ino “babombe myoyo” alimwi ‘abalulami’ mbaani? Babombe myoyo mbabaabo cakulicesya ibazumina kuyiisyigwa alimwi akusololelwa aa Jehova; balulami mbabaabo ibayanda kucita zintu ziluzi mumeso aa Jehova Leza. Mazuba aano, bantu balulami mbasyoonto kapati kwiinda bantu babi. Pele munyika mpya, kunooli buyo bantu babombe myoyo abalulami; balikke mbabanoopona anyika. Masimpe, bantu bali boobo bayoopanga nyika kuba paradaiso!

MBUNGA ZIBYAABI

7. Ino mbuti mbunga zibyaabi mbozitujatikizya mazuba aano?

⁷ Ino mbunga zibyaabi zitujatikizya buti mazuba aano? Bunji bwazintu zibi izicitwa munyika eeyi, zicitwa ambunga zibyaabi ikutali bantu kubagama. Mucikozyanyo, amuyeeye kujatikizya mbunga zyacikombelo izyeena mamiliyoni aabantu kujatikizya mbwabede Leza, kusyomeka kwa Bbaibbele, buumi bwakumbele bwabantu alimwi anyika—alimwi amakani buyo aambi manji. Naa mbuti kujatikizya mfwulumende izikulwaizya nkondo alimwi akulwana akati kamisyobo yamucisi mweena, izidyaaminina bantu bapengede ibatakonzyi kulikwabilila, izijana mpindu kwiinda mumakulo alimwi akusalulula? Ino mbuti kujatikizya mbunga zitababikkili maano bantu zyalo izisofwaazya nyika, kunyonyoona zilengwaleza, alimwi akudyaaminina bantu banji kutegwa bantu basyoonto bavwube? Masimpe, mbunga zibyaabi eezyi nzezileta mapenzi manji munyika mazuba aano.

8. Kweelana ambolyaamba Bbaibbele, ino ncinzi ciyoocitika kumbunga bantu nzyobabona kuti zinooliko lyoonse?

⁸ Ino ncinzi ncayoocita Jehova? Mapenzi mapati ayootalika ciindi mbunga zyatwaambo twacisi noziyoobukila zikombelo zyoonse zyakubeja zyalo ziimininwa amukaintu muvwuule wiitwa kuti Babuloni Mupati. (Ciy. 17:1, 2, 16; 18:1-4) Mbunga eezyo zyabukombi ziyoonyonyoonwa cakumaninina. Ino mbuti kujatikizya mbunga zimbi zyoonse zibyaabi? Bbaibbele libelesya malundu alimwi ansumbu ikwiiminina mbunga zyalo bantu nzyobabona mbuli kuti zinooliko lyoonse. (Amubale Ciyubunuzyo 6:14.) Ijwi lya Leza lyakasinsima kuti mfwulumende alimwi ambunga zyoonse izigwasyilizya mfwulumende eezyo ziyakunyonyoonwa. Kumamanino aamapenzi mapati, mfwulumende zyoonse zyanyika eeyi alimwi abaabo bali mulinzizyo ibakazya Bwami bwa Leza bayoonyonyoonwa. (Jer. 25:31-33) Mpoonya kunyina nokuyooba mbunga mbyaabi pe!

9. Ino inga twaba buti masimpe kuti munyika mpya munooli lukamantano?

⁹ Ino ncinzi ciyoonjila mubusena bwambunga zibyaabi? Yaakwiinda Amagedoni, sena kuyooba mbunga anyika? Bbaibbele litwaambila kuti: “Kuli majulu mapya anyika mpya nzyotulindila swebo kweelana acisyomezyo cakwe, alimwi muli zyeezyi muyooba bululami.” (2Pet. 3:13) Majulu alimwi anyika zyakaindi, mfwulumende zibyaabi, alimwi abantu bazigwasyilizya zyoonse ziyoomana. Ino ziyoonjililwa mubusena anzi? Majwi aakuti “majulu mapya anyika mpya” aamba kuti kuyooba mfwulumende mpya alimwi abantu baluleme ibayoolelwa amfwulumende eeyo. Bwami ibunakweendelezyegwa a Jesu Kristo buyootondezya bube bwa Jehova Leza, walo uutali Leza wamanyongwe. (1Kor. 14:33) Aboobo “nyika mpya” inookamantene. Kunooli baalumi baluleme ibanoolanganya twaambo. (Int. 45:16) Bayakweendelezyegwa a Kristo alimwi abalelinyina ibali 144,000. Kamuyeeya buyo ciindi eelyo mbunga zibi zyoonse noziyoonjililwa busena a Bwami bwa Leza, ibukamantene alimwi ibuli kabotu!

ZINTU ZIBYAABI ZICITIKA

10. Ino nzintu nzi zicitika zidumide kapati nkomukkala, alimwi ino nywebo amukwasyi wanu zimujatikizya buti?

¹⁰ Ino zintu zibyaabi zicitika zitujatikizya buti mazuba aano? Tupona munyika iizwide zintu zibyaabi. Kutalilemeka, kutasyomeka, alimwi amicito iimwi yalunya zilibonya kuti zilidumide mubweende bwazintu oobu. Ikapati bazyali kubagama kanji-kanji cilabayumina kukwabilila bana babo kumicito iili boobo. Basikubamba zyakulikondelezya abalo bazumanana kusoleka kubotya zintu zibyaabi kumwi kabasampaula zyeelelo zya Jehova zijatikizya cibi acibotu. (Is. 5:20) Banakristo bakasimpe tabazikkomanini zintu zili boobo. Balasolekesya kuzumanana kusyomeka kutobela zyeelelo zya Jehova munyika eeyi iisumpula muuya wabuzangi.

11. Ino ncinzi ncotwiiya kujatikizya Jehova mbwaakabeteka Sodoma a Gomora?

¹¹ Ino ncinzi ncayoocita Jehova kujatikizya zintu zibyaabi zicitika? Amubone ncaakacita kujatikizya bubi ibwakadumide mu Sodoma a Gomora. (Amubale 2 Petro 2:6-8.) Mwaalumi mululami Loti alimwi amukwasyi wakwe bakapenga kapati akaambo kazintu zibi izyakali kucitika. Ciindi Jehova naakainyonyoona minzi eeyo yoonse yobilo, kuli cintu cimwi ncaakali kucita ikutali buyo kumanizya bubi bwakaliko muminzi eeyo. Wakali kupa “citondezyo cazintu ziyoobacitikila bantu basampaula Leza.” Mbubwenya Jehova mbwaakamanizya bukkale bwakutalilemeka kaindi, uyakwiimanizya amicito iicitika mazuba aano aakubeteka bweende bwazintu oobuno.

12. Ino nzintu nzi zimwi nzyomulangila kuyoocita ciindi bweende bwazintu oobu bwaakumana?

¹² Ino ncinzi ciyoonjila mubusena bwazintu zibyaabi zicitika? Nyika ya Paradaiso inakuzwide zintu zibotu zikkomanisya. Amuyeeye kujatikizya kubamba nyika eeyi kuba paradaiso naa kuyaka minzi yesu alimwi ayabayandwa besu. Amuyeeye buyo kujatikizya coolwe cakutambula mamiliyoni aabantu ibayoobusyigwa akubayiisya kujatikizya nzila zya Jehova alimwi akubaambila mbwaakali kubeendelezya bantu mumazuba aamamanino. (Is. 65:21, 22; Mil. 24:15) Buumi bwesu bunakuzwide zintu zikkomanisya alimwi zitembaula Jehova!

BUKKALE BUBYAABI

13. Ino buzangi bwa Saatani, Adamu, alimwi a Eva bwapa buti kuti kube bukkale bubyaabi mazuba aano?

¹³ Ino mbuti bukkale bubyaabi mbobutujatikizya mazuba aano? Bantu babyaabi, mbunga zibyaabi, alimwi amicito mibi zicitika zyoonse antoomwe nzyezipa kuti bukkale bwiindile kubija munyika eeyi. Ino nguni unga waamba kuti tajatikizyidwe ankondo, bucete, naa kusalululana mubala? Alimwi ino mbuti kujatikizya kuciswa alimwi alufwu? Bukkale oobu bulatujatikizya toonse. Zintu eezyi zilacitika akaambo kabantu botatwe ibakazangila Jehova—Saatani, Adamu, alimwi a Eva. Kunyina uukonzya kweeleba lupyopyongano luliko akaambo kabuzangi bwabo.

14. Ino ncinzi ncayoocita Jehova kujatikizya bukkale bubyaabi? Amupe cikozyanyo.

¹⁴ Ino ncinzi ncayoocita Jehova kujatikizya bukkale bubyaabi? Amuyeeye buyo kujatikizya nkondo. Jehova usyomezya kwiimana nkondo kukabe kutamani. (Amubale Intembauzyo 46:8, 9.) Ino mbuti kujatikizya malwazi? Uyakwaamana malwazi oonse. (Is. 33:24) Ino mbuti lufwu? Jehova uyoolumena kukabe kutamani! (Is. 25:8) Bucete uyoobumana. (Int. 72:12-16) Uyoocita mbubwenya oobo akubukkale boonse bubyaabi bwalo bunyonganya buumi mazuba aano. Alimwi uyakuugwisya “muuya” mubi wabweende bwanyika eeyi, nkaambo muuya mubi wa Saatani amadaimona aakwe uyoomana.—Ef. 2:2.

15. Ino nzintu nzi zimwi iziyoomana kukabe kutamani yaakwiinda Amagedoni?

¹⁵ Amuciyeeyele buyo mbociyooba kupona munyika mutakwe nkondo, malwazi, naa lufwu! Takukabi basikalumamba balwanina ansi, balwanina mumaanzi, naa ibalwanina mundeke. Takukabi zilwanyo naa mazuba aakuyeeya bantu bakajaigwa munkondo. Takukabi zibbadela, bamadokota, bamanasi, masaini, naa zyuumbwe. Takukabi zigwebenga, makkampani aabasikugadela, maalaamu aakuzyibya kuti kwaboola mubbi, bamapulisa naaba maloko naa makkii! Boonse bukkale bubyaabi oobu ibupa kuti kube kulibilika buyakumana kukabe kutamani.

16, 17. (a) Ino bantu ibayakufwutuka nkondo ya Amagedoni bayoolemunukwa buti? Amupandulule. (b) Ino inga twaba buti masimpe kuti tuyakuzumanana kupona yaakunyonyoonwa nyika eeyi?

¹⁶ Ino buumi buyooba buti ciindi bukkale bunyonganya bwaakumana? Tacili cuuba-uba kubuyeeyela. Twakkala munyika eeyi kwaciindi cilamfwu cakuti inga twacileka kukopana kujatikizya bukkale buli munyika. Mbubwenya buyo, bantu ibakkala munsi-munsi acitisyini cacitima inga bacileka kumvwa coongo, alimwi abaabo ibakkala munsi-munsi abusena busowelwa tombe inga bacileka kumvwa kununka. Ma! Eelo kaka inga kwaba kulemunukwa kutaambiki ikuti zintu eezyo zibi zyagwisyigwa!

¹⁷ Ino ncinzi ciyoonjila mubusena bwakukopana nkotumvwa lino? Lugwalo lwa Intembauzyo 37:11 lwiingula kuti: “Bayoobotelwa kapati muluumuno lunji.” Sena majwi aayo taakkaziki moyo? Eeco ncencico ncakanzide kumucitila Jehova. Amusolekesye kusikila mpomugolela kucita zyoonse nzyomukonzya kutegwa mukkale munsi-munsi a Jehova Leza alimwi ambunga yakwe muziindi eezyi zyakumamanino izitupa kukopana! Amubukkomanine bulangizi bwanu, amuzinzibale kuyeeya kujatikizya mbubo, amusinizye mumyoyo amumizeezo yanu kuti mbwamasimpe—alimwi amwaambile bamwi kujatikizya mbubo! (1Tim. 4:15, 16; 1Pet. 3:15) Ikuti mwacita oobo, mulakonzya kuba masimpe kuti tamukanyonyoonwi antoomwe anyika eeyi mbyaabi iilaafwaafwi kumana. Muciindi caboobo, muyoozumanana kupona lyoonse kamukkomene, inzya, mane kukabe kutamani!