3. (a) Ino Timoteyo wakaba buti Munakristo, alimwi ino mbuti mbwaakazitambula njiisyo zya Bunakristo? (b) Ino nimbazu nzi zyotatwe zyakwiiya Paulo nzyaakaambila Timoteyo kubikkila maano?

³ Kulibonya kuti Timoteyo wakabuzyiba Bunakristo mu 47 C.E., ciindi mwaapostolo Paulo naakali kuswaya Lustro ciindi cakusaanguna. Nokuba kuti Timoteyo aciindi eeco kulibonya kuti wakacili mukubusi, weelede kuti wakali kuzibelesya nzyaakali kwiiya. Myaka yobilo yakatobela wakatalika kweenda a Paulo. Nokwakainda myaka iili 16, Paulo wakalembela Timoteyo kuti: “Kozumanana kuzitobela zintu nzyookayiisyigwa alimwi nzyookagwasyigwa kusyoma camoyo woonse, nkaambo ulibazyi aabo ibakakuyiisya nzizyo akuti kuzwa kubuvwanda ulaazyi malembe aasalala [Magwalo aa Chihebrayo], aayo aakonzya kukupa kuti ube musongo kutegwa ukafwutuke kwiinda mulusyomo muli Kristo Jesu.” (2Tim. 3:14, 15) Amubone kuti Paulo wakaamba kujatikizya (1) kuzyiba malembe aasalala, (2) kugwasyigwa kusyoma zintu nzyaakaiya, alimwi (3) kuba musongo kutegwa akafwutuke kwiinda mulusyomo muli Kristo Jesu.

“NZYOOKAGWASYIGWA KUSYOMA”

5. (a) Ino ‘kugwasyigwa kusyoma’ caamba nzi? (b) Ino tuzyiba buti kuti Timoteyo wakagwasyigwa kusyoma makani mabotu kujatikizya Jesu?

⁵ Luzyibo lwamalembe aasalala lulayandika kapati. Nokuba boobo, nzinji zijatikizyidwe mukuyiisya bana zintu zyakumuuya kwiinda kwiile kubayiisya kuzyiba bantu azintu izyakacitika izyaambidwe mu Bbaibbele. Timoteyo alimwi ‘wakagwasyigwa kusyoma.’ Mumwaambo wakusaanguna, majwi aayo aamba “kuba masimpe kujatikizya cintu cimwi” naa “kusinizya kuti cintu cimwi ncamasimpe.” Timoteyo wakayiisyigwa Magwalo aa Chihebrayo kuzwa kubuvwanda. Pele aciindi cimwi wakasinizya kwiinda mubumboni bulimvwisya bwakuti Jesu wakali Mesiya. Munzila imwi, luzyibo lwakwe lwakakomena kwiinda mukusinizya. Mubwini, lusyomo lwa Timoteyo kujatikizya makani mabotu lwakali luyumu kapati cakuti wakaba sikwiiya uubbapatizyidwe akusangana Paulo mumulimo wabumisyinali.

6. Ino mbuti mbomukonzya kugwasya bana banu kugwasyigwa kusyoma nzyobaiya kuzwa mu Jwi lya Leza?

⁶ Ino mbuti mbomukonzya kugwasya kuti bana banu babe alusinizyo kutegwa bagwasyigwe kusyoma mbubwenya mbuli Timoteyo? Cakusaanguna, amukkazike moyo. Lusyomo talubooli-booli buyo; talukonzyi kuzwa kulindinywe akuunka kubana banu akaambo kakuti nywebo mwakagwasyigwa kusyoma. Mwana umwi aumwi weelede “kubelesya maano” kutegwa abe alusyomo kujatikizya kasimpe kamu Bbaibbele. (Amubale Baroma 12:1.) Nywebo mbuli bazyali mulijisi mukuli mupati mumbazu eeyi, kwaambisya ciindi bana banu nobabuzya mibuzyo. Atulange-lange cikozyanyo.

7, 8. (a) Ino mbuti usyi umwi Munakristo mbwatondezya kukkazika moyo ciindi nayiisya mwanaakwe musimbi? (b) Ino mbuti andinywe mbomwajana kuti cilayandika kutondezya kukkazika moyo kuli boobo?

⁷ Ba Thomas, ibajisi mwana musimbi uujisi myaka iili 11 bakaamba kuti: “Mwanaangu inga ulandibuzya kuti, ‘Sena Jehova wakabelesya nzila yakusanduka kwazintu ikutalisya buumi aanyika?’ naa, ‘Ino nkaambo nzi ncotutatoli lubazu mumakani aacitika mucilawo, mucikozyanyo mukusala beendelezi bamfwulumende, kutegwa tusoleke kupa kuti zintu zibote?’ Zimwi ziindi inga ndiyandika kulilesya buya kutegwa nditamwaambili nzyayelede kusyoma. Kayi, icipa kuti muntu asyome takali kasimpe komwe buyo pe. Pele ntubeela-beela tunji itupa bumboni.”

⁸ Kweelana ambobazyi ba Thomas, kuyiisya kuyandika kukkazika moyo. Alimwi buya, kukkazika moyo kulayandika ku Banakristo boonse. (Kol. 3:12) Ba Thomas balizyi kuti inga kwayandika mibandi minji kwaciindi cili mbocibede. Beelede kumugwasya kwaamvwisya Magwalo kutegwa mwanaabo musimbi asinizye kujatikizya nzyaiya. Ba Thomas bakaamba kuti: “Mebo abakaintu bangu tulayanda kuzyiba naa mwaneesu musimbi ulazisyoma ncobeni nzyaiya alimwi akuti naa zilalimvwisya kulinguwe. Ikuti kajisi mibuzyo, cili buyo kabotu. Ikwaamba masimpe, nondali kulibilika ikuti naali kuzumina cintu cimwi kakunyina kubuzya mibuzyo.”

9. Ino mbuti mbomukonzya kuyiisya bana banu Jwi lya Leza?

⁹ Kwiinda mukuyiisya cakukkazika moyo kwabazyali babo, bana asyoonto-syoonto bayootalika kumvwisya “bwamba, bulamfwu, bulamfwu bwakuya mujulu alimwi abulamfwu bwakuyaansi” bwalusyomo. (Ef. 3:18) Tulakonzya kulanga-langa ceeco iceelela kweelana amyaka yabo alimwi anzyobakonzya kwiiya. Mbobayaabusinizya zintu nzyobaiya, bayoozumanana kwiiminina nzyobasyoma kuli bamwi, kubikkilizya abasicikolonyina. (1Pet. 3:15) Mucikozyanyo, sena bana banu balakonzya kupandulula ncolyaamba Bbaibbele kujatikizya icicitika kuti muntu wafwa? Sena bupanduluzi mbolipa Bbaibbele bulalimvwisya kulimbabo?a Masimpe, kuyiisya bana banu Jwi lya Leza kuyandika kukkazika moyo, pele cilagwasya kusolekesya.—Dt. 6:6, 7.

10. Ino ncinzi ceelede kuba cintu ciyandika kapati mukuyiisya kwanu?

¹⁰ Pele, cikozyanyo canu acalo cilayandika kapati caboola kukupa kuti babe alusyomo. Ba Stephanie, ibajisi bana basimbi botatwe, baamba boobu: “Kuzwa ciindi bana bangu nobakacili baniini, ndakali kulibuzya kuti, ‘Sena ndilabaambila bana bangu kujatikizya kaambo mebo ncondisinizyide kujatikizya kubako kwa Jehova, luyando lwakwe, alimwi anzila zyakwe ziluzi? Sena cakutadooneka bana bangu balakonzya kubona kuti mebo ndilamuyanda ncobeni Jehova?’ Tandikonzyi kulangila kuti bana bangu balagwasyigwa ccita kuti mebo ndakagwasyigwa.”