“Muleelede Kubosya Moyo”
TULELEEDE “kubosya moyo” kutegwa “[tu]kajane ceeco icakasyomezyegwa.” (Ba-Hebrayo 10:36) Sikwiiya Bbaibbele umwi wakapandulula kuti, ibbala lya Cigiliki ilyaamba “kubosya moyo” elyo mwaapostolo Paulo ndyaakabelesya mucibalo eeci, muzimwi ziindi lyakali kupandulula “inguzu zyacisyango izyakukonzya kupona mubuyumuyumu alimwi amuziindi zikatazya.”
Icisyango cili boobu cilakomena mumalundu aaku Europe. Icinyandya ncakuti cisyango eeci ciitwa kuti kupona kukabe kutamani. Mmasimpe eeci cisyango tacikonzyi kupona kukabe kutamani pesi cilazumanana kupona mwaka amwaka akuzyala malubaluba aayebeka ciindi cacilimo. The New Encyclopædia Britanica ipandulula kuti izina lyakuti kupona kukabe kutamani lyakapegwa kucisyango eeci akaambo ka “buyumu bwaco alimwi akukkala ciindi cilamfu.” (Izina lyasayaansi lyakapegwa kumusyobo wa zisyango ezi lya Sempervivum alyalo lyaamba “kupona kukabe kutamani.”)
Icigambya loko amakani aacisyango eeci citafwi ino ncakuti cikomena mumasena imukatazya ncobeni. Cilakonzya kujanwa mujulu mulamfu mumabali amulundu imwiinda luwo lunji, mwalo imukonzya kutontola kusika ku 35°C mumawoola ali buyo 24. Cilakonzya kubikka miyanda mulwaanzi mwalo imuli bulongo busyoonto kapati. Ninzila nzi zimwi izicigwasya kuzumanana kupona mubuyumuyumu buliboobu?
Eci cisyango ca kupona kukabe kutamani cilaa mateu mateteete malemulemu alo aakonzya kuyobola maanzi. Eci cigwasya cisyango kuti cikonzye kubelesya mudumu oonse ukonzeka wamvula naa wacaanda cinyenguluka. Kunze lyaboobo, cisyango eeci cikomena muzikata calo icipa kuti kazigwasyanya kukakatila kapati awo abbwe mpozijisilidi. Kwiinda mukubikka miyanda mulwaanzi cilakwabililwa kuzwa kuzintu zinga zyacinyonyoona nakuba kuti inga kamuli bulongo busyoonto. Atwaambe cilakonzya kukomena kabotu kwiinda mukubelesya buyumuyumu munzila mbotu iinga yakonzeka.
Munzila yakumuuya, tulakonzya kujanika muciimo cikonzya kusunka mbotubede mukuliyumya kwesu. Ncinzi ciyootugwasya kuliyumya notuli mumasunko? Mbubwena mbuli cisyango ca kupona kukabe kutamani, aswebo tulakonzya kuyobola maanzi abuumi Aajwi lya-Leza alimwi akuswaangana-swaangana abana Kristo beni-beni kutegwa tujane lugwasyo abukwabilizi. Icipati kwiinda, mbuli cisyango eeci, tweelede kukakatila canguzu ku ‘ndomba’ yesu Jehova aku Jwi lyakwe alimwi akumbunga yakwe.—2 Samuele 22:3.
Mmasimpe, icisyango ca kupona kukabe kutamani nciibalusyo cibotu cakuti tulakonzya kuzumanana mane nomuba mubusena bubyaabi kuti twabelesya bubotu boonse mbotukozya kujana. Jehova ulatusyomezya kuti, ikubosya moyo kuliboobu kulakonzya kupa kuti ‘tukajane ceeco icakasyomezyegwa’ calo ciyakuba kupona kukabe kutamani.—Ba-Hebrayo 6:12; Matayo 25:46.