Bantu banji tabaanguluki kubandika makani aakoonana. Nokuba boobo, ciindi Bbaibbele nolyaamba makani aakoonana, lilaamba cacigaminina pele munzila yabulemu. Nzyolyaamba zilatugwasya kapati. Alimwi eeci cilalimvwisya. Amana buya, Jehova Mulengi wesu. Aboobo ulizyi zintu zikonzya kutugwasya. Ulatwaambila ncotweelede kucita kutegwa tumukkomanisye alimwi acikonzya kutugwasya kutegwa tukapone kukabe kutamani.

1. Ino Jehova waabona buti makani aakoonana?

Koonana ncipego kuzwa kuli Jehova. Uyanda kuti mwaalumi amukaintu ibakwetene kabakukkomanina. Cipego eeci cipa coolwe kubanabukwetene cakutondezyanya luyando ikutali buyo nzila yakuzyala abana. Nkakaambo kaako Jwi lya Leza lyaamba kuti: “Kokkomana amukaintu wakubukubusi bwako.” (Tusimpi 5:18, 19) Jehova uyanda kuti Banakristo banabukwetene kabasyomeka kuli umwi amweenzinyina, kutegwa bataciti bumambe.—Amubale Bahebrayo 13:4.

2. Ino bwaamu ninzi?

Bbaibbele litwaambila kuti “basibwaamu . . . tabakanjili mu Bwami bwa Leza.” (1 Bakorinto 6:9, 10) Balembi ba Bbaibbele ibakalemba mumwaambo wa Chigiriki bakabelesya bbala lyakuti por·neiʹa kupandulula bwaamu. Ibbala eeli libikkilizya (1) koonanaa kwabantu batakwetene, (2) koonana kwabantu bakozyenye zizo, alimwi (3) akoonana abanyama. Tulamukkomanisya Jehova alimwi tulagwasyigwa swebo kutugama ciindi ‘notulilesya kubwaamu.’—1 Batesalonika 4:3.

AMWIIYE ZINJI

3. Amubutije bwaamu

Mwaalumi uusyomeka Josefa wakasolekesya kutegwa azumanane kusalala mukulilemeka. Amubale Matalikilo 39:1-12, akubandika mibuzyo eeyi:

• Ncinzi cakamukulwaizya Josefa kutija?​—Amubone kapango 9.

• Sena muyeeya kuti Josefa wakasala kabotu? Nkaambo nzi?

VIDIYO: Amutantamuke Micito Yakutalilemeka (5:06)

Jehova uyanda kuti toonse tubutantamuke bwaamu. Amubale 1 Bakorinto 6:18, akubandika mibuzyo eeyi:

• Mbukkale nzi ibukonzya kupa kuti umwi acite bwaamu?

• Mbuti mbomukonzya kubutija bwaamu?

4. Mulakonzya kulizunda sunko

VIDIYO: Amulwane Masunko Kwiinda Mukubala Bbaibbele (3:02)

• Ciindi mukwesu muvidiyo naakabona kuti mizeezo yakwe alimwi azintu nzyaakali kucita zilakonzya kumupa kutasyomeka kumukaintu wakwe, ncinzi ncaakacita?

Nobaba Banakristo basyomeka zimwi ziindi cilabakatazya kuzumanana kuba amizeezo iisalala. Mbuti mbomukonzya kukutantamuka kuzumanana kuyeeya zintu ziletela muzeezo wakoonana? Amubale Bafilipi 4:8, akubandika mibuzyo eeyi:

• Nzintu zili buti nzyotweelede kuyeeya?

• Mbuti kubala Bbaibbele alimwi akujata bubi mumulimo wa Jehova mbokukonzya kutugwasya kutantamuka sunko lyakucita cibi?

5. Zyeelelo zya Jehova zilatugwasya

VIDIYO: Kubula Maano (9:31)

• Mbuti mulombwana umwi mbwaakalinjizya mubukkale busunka?​—Amubone Tusimpi 7:8, 9.

• Kweelana alugwalo lwa Tusimpi 7:23, 26, bwaamu bulakonzya kuleta mapenzi manji. Ikuti naa katusalala mukulilemeka, mapenzi nzi ngotukonzya kutantamuka?

• Mbuti kusalala mukulilemeka mbokukonzya kutugwasya kuyoopona kukabe kutamani?

Bantu bamwi bayeeya kuti ncolyaamba Bbaibbele kujatikizya makani aakoonana kwabantu bajisi zizo zikozyenye tacili kabotu. Pele Jehova, Leza siluyando, uyanda kuti bantu boonse bakapone kukabe kutamani. Kutegwa tweelele, tweelede kupona kweelana azyeelelo zyakwe. Amubale 1 Bakorinto 6:9-11, akubandika mubuzyo ooyu:

• Kweelana ambwazibona zintu Leza, sena kulombozya koonana amuntu ngomukozyenye limwi zizo nkokulombozya kulikke kutali kabotu?

Kutegwa tumukkomanisye Leza, toonse tweelede kucinca mumbazu zimwi. Sena cilagwasya kucita boobu? Amubale Intembauzyo 19:8, 11, akubandika mibuzyo eeyi:

• Sena muyeeya kuti zyeelelo zya Jehova zyakulilemeka zili kabotu? Nkaambo nzi?

MUBUFWAAFWI

Koonana ncipego kuzwa kuli Jehova kutegwa mulumi amukaintu wakwe kabakkomana.

Ncinzi Ncomwaiya?

• Ino bwaamu bubikkilizya micito nzi?

• Ncinzi cikonzya kutugwasya kubutantamuka bwaamu?

• Ino tugwasyigwa buti ciindi notutobela zyeelelo zya Jehova zyakulilemeka?

AMUZYIBE ZINJI

Amwiiye kaambo Leza ncayanda kuti mwaalumi amukaintu ibayanda kukkala antoomwe ncobeelede kukwatana mumulawo.

“Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?” (Cibalo caaintaneti)

Amubone ncolyaamba Bbaibbele kujatikizya koonana kwabantu bajisi zizo zikozyenye ncokutali kusumpula lusalululo.

“Sena Koonana Kwabantu Bajisi Zizo Zikozyenye Nkubi?” (Cibalo caaintaneti)

Amubone milawo ya Leza kujatikizya misyobo yoonse yakoonana ncoitukwabilila.

“Sena Kumyonta Cinswe Caumwi Nkoonana?” (Cibalo caaintaneti)

Mucakuluula cakuti “Bakandeendelezya Cabulemu,” amubone cakakulwaizya muntu umwi iwakali koonana abantu mbakozyenye limwi zizo mbwaakacinca bukkale bwakwe kutegwa akkomanisye Leza.

“Ibbaibbele Lilakonzya Kubacinca Bantu” (Ngazi Yamulindizi, April 1, 2011)

Mumasena amwi, bantu bayeeya kuti muntu takonzyi kukkomana ccita buyo kuti wakwata naa kukwatwa. Nokuba boobo, tabali boonse bali mucikwati bakkomene alimwi tabali boonse ibatakwete naa kukwatwa ibatakkomene. Masimpe ngakuti Bbaibbele lyaamba kutakwata naa kutakwatwa alimwi acikwati kuti nzipego.

1. Mbubotu nzi bujanika akaambo kakutakwata naa kutakwatwa?

Ibbaibbele lyaamba kuti: “Kufwumbwa uukwata ucita kabotu, pele kufwumbwa uutakwati ucita kabotu kwiinda.” (Amubale 1 Bakorinto 7:32, 33, 38.) Ino muunzila nzi muntu uutakwete naa kukwatwa ‘mwacita kabotu kwiinda’? Banakristo batakwete naa kukwatwa tabayandiki kulanganya nzyayandika ngobakwetene limwi. Aboobo balaangulukide kapati. Mucikozyanyo, ibamwi balakonzya kuyungizya mulimo wabo munzila zinji zikkomanisya, mbuli kuunka kucisi cimbi naa kubusena bumbi kuyookambauka makani mabotu. Kwiinda zyoonse, balakonzya kuba aciindi cinji cakuyumya cilongwe cabo a Jehova.

2. Mbubotu nzi bujanika mukuba mucikwati camumulawo?

Cikwati, mbubonya mbuli kutakwata alimwi akutakwatwa, cileta zilongezyo zilibedelede. Bbaibbele lyaamba kuti “bobilo bali kabotu kwiinda omwe.” (Mukambausi 4:9) Makani aaya ngamasimpe ikapati ku Banakristo bakasimpe ibatobela njiisyo zyamu Bbaibbele mucikwati cabo. Bantu ibakwatana mumulawo balasyomezyanya kuti banooyandana, kulemekana alimwi akubikkilana maano. Aboobo kanji-kanji balimvwa kukwabililwa kwiinda banabukwetene ibaile kukkala buyo antoomwe. Alimwi abana babo balimvwa kukwabililwa kapati.

3. Ino Jehova ucibona buti cikwati?

Ciindi Jehova naakatalisya cikwati cakusaanguna, wakaamba kuti: “Mwaalumi uyoosiya bausyi abanyina akukakatila kumukaintu wakwe.” (Matalikilo 2:24) Jehova uyanda kuti mulumi amukaintu kabayandana alimwi akukakatila kuli umwi amweenzinyina kufwumbwa buyo kuti kabacipona. Ulazumizya kulekana lilikke buyo ikuti naa umwi wacita bumambe. Mubukkale buli boobu, Jehova ulapa coolwe kuli yooyo uusyomeka cakusala naa ulayanda kuti balekane naa pe.a (Matayo 19:9) Jehova tazumizyi maali akati ka Banakristo.​—1 Timoteyo 3:2.

AMWIIYE ZINJI

4. Amucibelesye kabotu cipego cakutakwata naa kutakwatwa

Jesu wakali kubona kutakwata naa kutakwatwa kuti ncipego. (Matayo 19:11, 12) Amubale Matayo 4:23, akubandika mubuzyo ooyu:

• Mbuti Jesu mbwaakacibelesya cipego cakutakwata kutegwa abelekele Bausyi akugwasya bamwi?

Banakristo balakonzya kukkomana kubelesya cipego eeci mbubonya mbwaakacita Jesu. Atweebelele VIDIYO, akubandika mubuzyo uutobela.

VIDIYO: Bakwesu Abacizyi Batakwete Abatakwetwe Basyomeka (3:11)

• Ino muunzila nzi zigwasya Banakristo mobakonzya kucibelesya cipego cabo cakutakwata naa kutakwatwa?

Sena Mulizyi?

Bbaibbele talyaambi ciimo cini muntu nayelede kukwata naa kukwatwa. Nokuba boobo, likulwaizya muntu kulindila kusikila ‘wainda aciimo cakukubuka,’ iciindi luunyaunya lwabukubusi nolukonzya kunyonganya mukubusi kusala cabusongo.​—1 Bakorinto 7:36.

5. Amusale kabotu muntu wakukwatana limwi

Kusala muntu wakukwatana limwi ncimwi cazyakusala ziyandika kapati ncomweelede kucita. Amubale Matayo 19:4-6, 9, akubandika mubuzyo ooyu:

• Nkaambo nzi Munakristo ncateelede kufwambaana kunjila mucikwati?

Bbaibbele lilakonzya kumugwasya kuzyiba nzyomweelede kulanga kumuntu ngomuyanda kukwatana limwi. Kwiinda zyoonse, amuyandaule muntu uumuyanda kapati Jehova.b Amubale 1 Bakorinto 7:39 alimwi a 2 Bakorinto 6:14. Mpoonya mubandike mibuzyo iitobela:

• Nkaambo nzi ncotweelede kukwatana buyo a Munakristoma?

• Ino muyeeya kuti Jehova inga walimvwa buti ikuti twasala kukwatana amuntu uutamuyandi?

6. Cikwati amucibone mbwacibona Jehova

Mu Israyeli yansiku, bamaalumi bamwi bakali kuleka bamakaintu babo akaambo katwaambo tutayi koomoonga. Amubale Malaki 2:13, 14, 16, akubandika mubuzyo ooyu:

• Nkaambo nzi Jehova ncakusulide kulekana?

Atweebelele Vidiyo, akubandika mubuzyo uutobela.

VIDIYO: Cikwati​—Taceelede Kumana (4:30)

• Ikuti kamukwetene amuntu uutasyomi, ncinzi ncomukonzya kucita kutegwa cikwati canu cizwidilile?

7. Amutobele zyeelelo zya Jehova kujatikizya cikwati

VIDIYO: Mulakonzya Kusika Azyeelelo zya Jehova Izijatikizya Cikwati (4:14)

Amubale Bahebrayo 13:4, akubandika mibuzyo eeyi:

• Sena muyeeya kuti zyeelelo zya Jehova kujatikizya cikwati zilaminya? Nkaambo nzi?

Jehova uyanda kuti Banakristo kabalembya zikwati zyabo alimwi akucita oobo kuti naa balekana, mbwaanga mumasi manji makani aaya ayendelezyegwa amfwulumende. Amubale Tito 3:1, akubandika mubuzyo ooyu:

• Kuti naa mulikwete naa kukwatwa, sena muli masimpe kuti cikwati canu cakalembesyegwa mumulawo kumfwulumende?

MUBUFWAAFWI

Kutakwata naa kutakwatwa alimwi acikwati nzipego kuzwa kuli Jehova. Aabo ibali mubukkale boonse bobilo oobu, balakonzya kukkomana akukkutila ikuti kabapona kweelana akuyanda kwa Jehova.

Ncinzi Ncomwaiya?

• Mbuti muntu mbwakonzya kucibelesya kabotu cipego cakutakwata naa kutakwatwa?

• Nkaambo nzi Bbaibbele ncolyaamba kuti tweelede kukwatana buyo a Munakristoma?

• Nkaambo nzi kalikke kamu Magwalo ikazumizya kulekana?

AMUZYIBE ZINJI

Ino kukwata naa kukwatwa “buyo mu Mwami” caamba nzi?

“Mibuzyo Yabasikubala” (Ngazi Yamulindizi, July 1, 2004)

Amweebelele mavidiyo obilo aakonzya kumugwasya kusala kabotu muntu wakweebana limwi alimwi akukwatana limwi.

Kulibambila Cikwati (11:53)

Amubone cakapa mukwesu umwi kulimvwa kuti zintu nzyaamucitila Jehova zilainda kapati aali zyeezyo nzyaakasiya walo.

Ndakali Kulombozya Kuti Kubota Waiya Kasimpe (1:56)

Ino nzintu nzi muntu nzyayelede kulanga-langa katanasala kuti balekane naa kwaandaana amuntu ngobakwetene limwi?

“Amubulemeke Bubambe Bwa Leza Bwalukwatano” (Ngazi Yamulindizi, December 2018)