‘Kamuswiililisya Kapati’

‘Tuleelede kuswiililisya kapati kuli zeezyo nzyotwakamvwa, kuti ambweni inga twasweeka.’—BAHIBULU 2:1, Ci.

1. Amupandulule mbuli kunyonganyizyigwa mbokukonzya kuleta mapenzi.

INTENDA zyamumugwagwa zilajaya bantu batandila ku 37,000 amwaka mucisi ca United States cilikke. Basyaazibwene baamba kuti lufwu luli boobo lulakonzya kutantamukwa ikuti naa banamutekenya kababikkila maano nobali mukweenzya myootokala. Banamutekenya bamwi balanyonganyizyigwa azikwankwani zibikidwe mumbali lyamigwangwa zyitondezya makwebo naa akaambo kakubelesya mafooni aamunkomwe. Alimwi kuli bamwi balaacilengwa cakubikka zyakulya afwaafwi amubalo kutegwa kabalya nobeenzya mootokala. Kunyonganyizyigwa abukkale buli boobu kulakonzya kuleta mapenzi.

2, 3. Ino ndulayo nzi Paulo ndwaakapa Banakristo ba Hebrayo, alimwi nkaambo nzi lulayo oolu ncolwakali kuyandika?

² Kwamyaka iitandila ku 2,000 yainda myootokala kaitanabambwa, imwaapostolo Paulo wakazyiba kunyonganya kwakali kukonzya kuleta mapenzi ku Banakristo ba Hebrayo. Paulo wakakankaizya kuti Jesu Kristo wakabusyigwa wakapegwa cuuno ciinda ali zyabangelo boonse, nkaambo walo wakalikkede kujanza lyalulyo lya Leza. Eelyo mwaapostolo wakati: “Nkakaambo aako ncotweelede kuswiililisya kapati kuli zeezyo nzyotwakamvwa, kuti ambweni inga twasweeka.”—Bahibulu 2:1, Ci.

³ Ino nkaambo nzi Banakristo ba Hebrayo ncobakeelede ‘kuswiililisya kapati kuli zeezyo nzyobakamvwa’ kujatikizya Jesu? Nkaambo kakuti Jesu wakalizwide kale anyika kwamyaka iitandila ku 30. Akaambo kakuti Simalelo wabo tanaakaliko, Banakristo bamwi ba Hebrayo bakalitalikide kale kubula lusyomo mukasimpe. Bakalinyonganyizyidwe kale abukombi bwaci Juda, ikukomba kwabo kwakaindi.

Bakali Kuyandika Kuswiililisya kapati

4. Ino nkaambo nzi keelede kuti nkakakapa kuti Banakristo ba Hebrayo bapilukile kubukombi bwaci Juda?

⁴ Ino nkaambo nzi Munakristo ncaakali kukonzya kupilukila kubukombi bwaci Juda? Ibubambe bwabukombi bwakutobela Mulawo bwakali kubelesya zintu zilibonya ameso. Bantu bakali kukonzya kubabona bapaizi alimwi bakali kukonzya kumvwa kununkila kwazipaizyo zyakali kuumpwa. Nokuba boobo, mumbazu zimwi Bunakristo bwakaliindene kapati. Banakristo bakalijisi Mupaizi Mupati uutegwa Jesu Kristo, pele tanaakaliko anyika kwamakumi aamyaka otatwe. (Ba-Hebrayo 4:14) Bakalijisi tempele, pele busena busalalisya lyakali julu buya kuligama. (Ba-Hebrayo 9:24) Kwiindana akupalulwa kwakali kucitwa kweelanaa Mulawo, kupalulwa kwa Banakristo kwakali ‘kwamumoyo alimwi akumuuya.’ (Ba-Roma 2:29) Aboobo, ku Banakristo ba Hebrayo, Bunakristo kubaanga bwakatalikide kulibonya mbuli kuti caba cintu citalimvwisyi kabotu pe.

5. Ino mbuti Paulo mbwaakatondezya kuti bubambe bwabukombi bwakatalisyigwaa Jesu bwakalisumpukide kapati kwiinda bwa Mulawo?

⁵ Banakristo ba Hebrayo bakeelede kuyeeya cintu comwe cipati cijatikizya bubambe bwabukombi bwakatalisyigwa a Kristo. Bwakayeeme akuba alusyomo kutali bwakubona ameso pe, pele bwakalisumpukide kapati kwiinda Mulawo wakapegwa kumusinsimi Musa. Paulo wakalemba kuti: “Na bulowa bwampongo abwabasune etwe lyampwizi, nezisansailwa kubantu abadiinkene, inga zilabasalazya mumubili, sena inga bwalo bulowa bwa-Kristo, uwakalituula mwini kuli-Leza mu-Muuya Uutamani mbuli cipaizyo citakwe kampenda, tabukooinda kusalazya meezeezyo aanu akumugwisizya milimo mifu, kuti mumumanine milimo Leza muumi?” (Ba-Hebrayo 9:13, 14) Masimpe, ikulekelelwa zibi kucitwa kwiinda mukusyoma mucipaizyo cacinunuzyo ca Jesu Kristo kulisumpukide kapati kwiinda nzila zinji zyakali kucitwa mububambe bwa Mulawo.—Ba-Hebrayo 7:26-28.

6, 7. (a) Ino mbukkale buli buti bwakapa kuti kuyandike kubinda ku Banakristo ba Hebrayo ‘kuswiililisya kapati kuli zeezyo nzyobakamvwa’? (b) Ciindi Paulo naakalemba lugwalo kuba Hebrayo, ino kwakaceede ciindi cili buti kuti Jerusalemu unyonyoonwe? (Amubone bupanduluzi buyungizyidwe.)

⁶ Nkukali kaambo akambi Banakristo ba Hebrayo ncobakali kuyandika kubikkila maano kapati kuzintu nzyobakamvwa zijatikizya Jesu. Wakalisinsimide kuti Jerusalemu uyoonyonyoonwa. Jesu wakati: “Nkaambo ciindi ciyookusikila, awo basinkondonyoko ncobayookuyakila bwaanda, bakuzingane, bakusinkile kumabazu oonse, bakumwaile ansi antoomwe abana bako abali mulinduwe, tabakooyoosi[y]a kulinduwe ibbwe neliba lyomwe ilili atala alimwi, nkaambo tokali kucizi ciindi ncookaswayidwe Leza.”—Luka 19:43, 44.

⁷ Ino eeci cakali kuzoocitika lili? Jesu kunyina naakaamba buzuba naa woola pe. Muciindi caboobo, wakapa buyo malailile aaya aakuti: “[M]wabona kuti Jerusalemu wazinganwa mukati kempi, amukazibe kuti kusaalwa kwawo kuli afwaafwi. Ndilyonya abo abali mu-Judaya abacijile mumalundu, abali mukati kawo abazwe, abali kumyuunda batanjili mumunzi.” (Luka 21:20, 21) Mumyaka iili 30 kuzwa ciindi Jesu naakaamba majwi aayo, Banakristo bamwi mu Jerusalemu bakacileka kubikkila maano kujatikizya kubindaana kwabuzuba oobo alimwi bakanyonganyizyigwa. Cili mbuli kuti bakanyonganyizyigwa kumwi kabeenzya mootokala. Ikuti naa tabalomyi, imapenzi akali kulangilwa kubasikila. Kufwumbwa naa mbobakali kuyeeya oobo naa pe, lunyonyooko lwa Jerusalemu lwakali aafwaafwi kapati.a Aboobo, lulayo lwa Paulo lwakali lwakubusya Banakristo ibakali mu Jerusalemu balo bakali muŋonzi munzila yakumuuya.

‘Ikuswiililisya Kapati’ Mazubaano

8. Ino nkaambo nzi ncotweelede “kuswiililisya kapati” kukasimpe kali mu Jwi lya Leza?

⁸ Mbubwenya mbuli Banakristo bamumwaanda wamyaka wakusaanguna, tuyandika “kuswiililisya kapati” kujatikizya kasimpe kali mu Jwi lya Leza. Nkaambo nzi? Nkaambo kakuti andiswe tulangila lunyonyooko, ikutali lwacisi cimwi buyo pe, pele lwabweende boonse bwazintu. (Ciyubunuzyo 11:18; 16:14, 16) Pele, tatubuzi buzuba naa woola kuligama Jehova nayoobweza ntaamo pe. (Matayo 24:36) Pele, tuli mukulibonena buya ameso ikuzuzikizyigwa kwabusinsimi bwamu Bbaibbele bwalo butondezya cakusalazya kuti tukkede “kumazuba aakumamanino.” (2 Timoteo 3:1-5) Aboobo, tuleelede kucicenjelela cintu cili coonse cikonzya kutunyonganya. Tweelede kulibikkila maano Ijwi lya Leza alimwi akuzumanana kubona buzuba oobo kuti bulibindeene kapati. Ccita kuti twacita oobu, notukonzya “kuyokoka kuzintu zyoonse ezi iziyoocitika.”—Luka 21:36.