• Mulakonzya Kuba Mulongwe wa Jehova
    Amupone Kukabe Kutamani!—Lwiiyo Lwamu Bbaibbele

    • Mulakonzya Kuba Mulongwe wa Jehova

      Jehova uyanda kuti mumuzyibe kabotu. Nkaambo nzi? Ulombozya kuti mwiiye zinji kujatikizya bube bwakwe, nzila zyakwe alimwi amakanze aakwe, muyooba aaluyandisisyo lwakuba mulongwe wakwe. Sena mulasyoma kuti cilakonzyeka kuba mulongwe wa Leza? (Amubale Intembauzyo 25:14.) Ncinzi ncomukonzya kucita kutegwa mube mulongwe wakwe? Bbaibbele lilayiingula mibuzyo eeyi alimwi lilakaamba kaambo kuba acilongwe a Jehova ncocili cintu ciyandika kapati kwiinda zintu zyoonse.

      1. Ino Jehova umutamba kucita nzi?

      “Amuswene kuli Leza, eelyo awalo ulaswena kulindinywe.” (Jakobo 4:8) Ino eeci caamba nzi? Caamba kuti Jehova ulamutamba kuti mube mulongwe wakwe. Bamwi cilabayumina kusyoma kuti balakonzya kuba balongwe ba Leza, nkaambo tabakonzyi kumubona. Nokuba boobo, mu Jwi lyakwe, Bbaibbele, Jehova ulatwaambila zyoonse nzyotuyandika kuzyiba kujatikizya bube bwakwe kutegwa tukonzye kuba acilongwe anguwe. Ciindi notubala mulumbe wa Leza mu Bbaibbele, cilongwe cesu anguwe cilayuma nokuba kuti tatunamubwene.

      2. Nkaambo nzi Jehova ncakonzya kuba mulongwe wanu mubotu kwiinda boonse?

      Jehova ulamuyanda kapati kwiinda muntu uumbi uuli woonse. Uyanda kuti kamukkomene alimwi akupaila kulinguwe kufwumbwa ciindi nomuyanda lugwasyo. ‘Mulakonzya kuwaala makatazyo aanu woonse kulinguwe, nkaambo ulamubikkila maano.’ (1 Petro 5:7) Jehova lyoonse ulilibambilide kubagwasya, kubaumbulizya alimwi akubaswiilila balongwe bakwe.—Amubale Intembauzyo 94:18, 19.

      3. Ino Jehova uyanda kuti tucite nzi kutegwa tube balongwe bakwe?

      Jehova ulabayanda bantu boonse, “pele balulami mbabajisi cilongwe ciyumu anguwe.” (Tusimpi 3:32) Jehova uyanda kuti balongwe bakwe kabasolekesya kucita zintu nzyabona kuti nzibotu alimwi akutantamuka zintu nzyabona kuti nzibi. Bamwi balimvwa kuti tabakonzyi kucita zintu zyoonse Jehova nzyayanda kuti kabacita alimwi akutantamuka zintu zyoonse zibyaabi. Nokuba boobo, Jehova ulamvwisya. Ulamutambula muntu uuli woonse uumuyanda ncobeni alimwi uubeleka canguzu kutegwa amukkomanisye.—Intembauzyo 147:11; Milimo 10:34, 35.

      AMWIIYE ZINJI

      Atwiiye zinji kujatikizya mbotukonzya kuba balongwe ba Jehova, alimwi akaambo ncakonzya kuba mulongwe wesu mubotu kapati kwiinda.

      4. Abrahamu wakali mulongwe wa Jehova

      Cibalo camu Bbaibbele icaamba Abrahamu (naa Abramu) cilatugwasya kumvwisya ncocaamba kuba mulongwe wa Leza. Amubale cibalo icaamba zya Abrahamu ku Matalikilo 12:1-4. Mpoonya tubandike mibuzyo eeyi:

      • Ncinzi Jehova ncaakaambila Abrahamu kuti acite?

      • Ino Jehova wakamusyomezya nzi Abrahamu?

      • Ino Abrahamu wakacita buti kumalailile ngaakamupa Jehova?

      5. Jehova ncayanda kuti balongwe bakwe kabacita

      Kuli zintu nzyotulangila kuti balongwe besu kabacita.

      • Nzintu nzi zimwi nzyomuyanda kuti balongwe banu kabamucitila?

      Amubale 1 Johane 5:3, akubandika mubuzyo ooyu:

      • Nzintu nzi Jehova nzyayanda kuti balongwe bakwe kabacita?

      Kutegwa tumumvwide Jehova, inga twayandika kucinca mbotulilemeka naa bube bumwi. Amubale Isaya 48:17, 18, akubandika mubuzyo ooyu:

      • Nkaambo nzi Jehova ncaambila balongwe bakwe kuti bacince bukkale bwabo?

      Mubelesi uubeleka mulimo wakuyaka upa mubelesinyina cimpoompo.

      Mulongwe uuli kabotu ulatwaambila zintu zikonzya kutukwabilila alimwi akutugwasya. Awalo Jehova mbwacita kubalongwe bakwe

      6. Jehova ncacita kutegwa agwasye balongwe bakwe

      Jehova ulabagwasya balongwe bakwe kuliyumya mumapenzi. Atweebelele VIDIYO, akubandika mubuzyo uutobela.

      VIDIYO: Jehova Wandicitila Zintu Zinji (3:20)

      • Mbuti Jehova mbwaakagwasya mukaintu uuli muvidiyo kuzunda penzi lyakutyompwa?

      Amubale Isaya 41:10, 13, akubandika mibuzyo eeyi:

      • Ino Jehova usyomezya kuyoobacitila nzi balongwe bakwe boonse?

      • Nkaambo nzi ncomuyeeya kuti Jehova inga waba mulongwe mubotu?

      Zifwanikiso: Balongwe balagwasyanya. 1. Mwaalumi umwi ugwasya mwaalumi uumbi kunyamuna tebule pati. 2. Mukaintu umwi waambila mukaintu uumbi zili kumoyo. 3. Mwaalumi umwi ugwasya mwaalumi uumbi kweenda kubelesya madoombe.

      Balongwe beni-beni balamugwasya ciindi nomuyandika lugwasyo. Awalo Jehova uyoomugwasya

      7. Kuba mulongwe wa Jehova kubikkilizya kubandika anguwe akumuswiilila

      Kubandisyanya kuyumya cilongwe. Amubale Intembauzyo 86:6, 11, akubandika mibuzyo eeyi:

      • Mbuti mbotukonzya kubandika a Jehova?

      • Mbuti Jehova mbwabandika andiswe?

      Zifwanikiso: 1. Mukaintu ulapaila. Atala amutwe wakwe kuli katondezyo katondeka kujulu. 2. Mukaintu ubala Bbaibbele. Atala amutwe wakwe kuli katondezyo katondeka ansi.

      Tulabandika a Jehova kwiinda mumupailo; walo ulabandika andiswe kwiinda mu Bbaibbele

      BAMWI BAAMBA KUTI: “Tacikonzyeki kuba acilongwe a Leza.”

      • Ndugwalo nzi ndomukonzya kubelesya kutondezya kuti tulakonzya kuba acilongwe a Jehova?

      MUBUFWAAFWI

      Jehova uyanda kuti abe mulongwe wanu, alimwi uyoomugwasya kuba acilongwe anguwe.

      Ncinzi Ncomwaiya?

      • Mbuti Jehova mbwabagwasya balongwe bakwe?

      • Nkaambo nzi Jehova ncaambila balongwe bakwe kuti beelede kucinca bukkale bwabo?

      • Sena muyeeya kuti nciyumu kuba mulongwe wa Jehova? Nkaambo nzi?

      Mbaakani

      AMUZYIBE ZINJI

      Mbuti kuba acilongwe a Leza mbokukonzya kumugwasya?

      “Jehova​—Leza Iweelede Kuzyibwa” (Ngazi Yamulindizi, February 15, 2003)

      Amwiiye mbomukonzya kuba mulongwe wa Leza.

      “Ncinzi Ncondeelede Kucita Kutegwa Ndibe Mulongwe wa Leza?” (Mibuzyo Njobabuzya Bakubusi​—Bwiinguzi Bugwasya, Volyumu 2, cibalo 35)

      Amubone kaambo mukaintu umwi ncalimvwa kuti kuba acilongwe a Jehova kwakapa kuti buumi bwakwe bubote.

      “Tiindakali Kuyanda Kufwa!” (Ngazi Yamulindizi No. 1 2017)

      Amumvwe nzyobaamba bakubusi kujatikizya Jehova.

      Ino Caamba nzi Kuba Mulongwe wa Leza? (1:46)