Cibalo 48
Nyika Ya Leza Mpya Yaluumuno—Ulakonzya Kuyoopona Munyika Eeyo
LEZA wakabikka Adamu a Eva mumuunda wa Edeni. Nokuba kuti bakamuzangila akufwa, Leza wakabikka bubambe bwakuti ibana babo, kubikkilizya andiswe sunu, bakapone kukabe kutamani mu Paradaiso. Ibbaibbele lisyomezya kuti: “Balulami bayookona nyika, bayookala alinjiyo lyoonse.”—Intembauzyo 37:29.
Ibbaibbele lyaamba zya “ijulu ipya” alimwi “anyika impya.” (Isaya 65:17; 2 Petro 3:13) “Ijulu” liliko lino lipangwaa mfwulumende zyabantu zyasunu, pele Jesu Kristo alimwi abaabo mbayooyendelezya limwi kujulu mbebaambwa kuti “ijulu ipya.” Elo cinooli cibotu kaka eelyo ijulu ipya eeli, nkokuti imfwulumende ya Leza iiluleme alimwi iiyooleta luumuno yaakweendelezya nyika yoonse mbwiizulwa!
Aboobo, ino “nyika mpya” ninzi?— Inyika mpya mbantu babotu ibamuyanda Jehova. Weelede kuteelela kuti, eelyo Bbaibbele nolyaamba kuti “nyika,” zimwi ziindi inga lyaamba bantu ibapona anyika, ikutali nyika yini pe. (Matalikilo 11:1; Intembauzyo 66:4; 96:1) Aboobo ibantu bacibeela canyika impya bayookkala anyika eeyi.
Inyika eeyi iiliko yabantu babi taicinooliko pe. Koyeeya kuti, Zambangulwe lyakuciindi ca Nowa lyakanyonyoona nyika yabantu babyaabi. Alimwi mbubwenya mbotwaiya, eeyi nyika iiliko mbyaabi iyoonyonyoonwa lya Harmagedoni. Lino atulange-lange mbobunoobede buumi munyika ya Leza mpya yaakwiinda Harmagedoni.
Sena ulayanda kuyoopona kukabe kutamani mu Paradaiso munyika ya Leza mpya yaluumuno?— Kunyina musilisi uunga wapa kuti katupona kukabe kutamani. Kunyina musamu uunga watukwabilila kulufwu. Cilikke cinga catugwasya kupona kukabe kutamani nkubaa cilongwe a Leza. Alimwi Mwiiyi Mupati ulatwaambila mbotunga twabaa cilongwe a Leza.
Atubweze ma Bbaibbele eesu akujalula kuli Johane caandaano 17, kapango ka 3. Kubbuku eeli tujana majwi aa Mwiiyi Mupati aakuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”
Aboobo ino ncinzi Jesu ncaakaamba kuti tweelede kucita kutegwa tupone kukabe kutamani?— Cakusaanguna, tweelede kujana luzibo lwa Taateesu wakujulu, Jehova, alimwi aluzibo lwa Mwanaakwe ooyo wakaaba buumi bwakwe akaambo kandiswe. Eeci caamba kuti tweelede kuliiya Bbaibbele. Ibbuku eeli lyakuti Amwiiye ku Mwiiyi Mupati, litugwasya kwiiya Bbaibbele.
Pele ino mbuti ikwiiya nzyayanda Jehova mbokuyootugwasya kupona kukabe kutamani?— Mbubwenya mbotuyandika cakulya abuzuba, tuyandika kwiiya nzyayanda Jehova abuzuba. Ibbaibbele lyaamba kuti: ‘Muntu taponi ansima ilikke, pele ulapona amajwi oonse aazwa kumulomo wa Jehova.’—Matayo 4:4.
Alimwi tweelede kujana luzibo lujatikizya Jesu Kristo akaambo kakuti Leza wakatuma Mwanaakwe kuti azoomanizye cibi cesu. Ibbaibbele lyaamba kuti: “Takukwe lufutuko kuluumbi naba omwe pe.” Alimwi Bbaibbele ndilyonya lyaamba kuti: “Ooyo uusyoma Mwana nguuli abuumi ubutamani.” (Incito 4:12; Johane 3:36) Ino caamba nzi ‘kusyoma’ Jesu?— Caamba kuti tulamusyoma ncobeni Jesu akuti tatukonzyi kupona kukabe kutamani kakunyina nguwe. Sena tulamusyoma ncobeni Jesu akuti tatukonzyi kupona kakunyina nguwe?— Ikuti katusyoma oobo, tulazumanana kwiiya ku Mwiiyi Mupati buzuba abuzuba, alimwi tunoocita ncatwaambila.
Inzila yomwe mbotunga twaiya ku Mwiiyi Mupati nkwiinda mukubala bbuku eeli lyoonse, ikuzilanga alimwi akuziyeeyela zifwanikiso zyoonse. Soleka kwiingula mibuzyo iisindikizya zifwanikiso eezyi zyoonse. Alimwi kolibala bbuku eeli abanyoko naa bauso. Ikuti kabatako bazyali bako, kolibala abambi bapati alimwi abana bambi. Sena inga tiicakkomanisya kapati ikuti wakonzya kugwasya bamwi kwiiya ku Mwiiyi Mupati kujatikizya eezyo nzyobeelede kucita kutegwa bakapone kukabe kutamani munyika mpya ya Leza?—
Ibbaibbele litwaambila kuti: “Nyika ilamana.” Pele Bbaibbele ndilyonya lilapandulula ambotunga twapona kukabe kutamani munyika mpya ya Leza. Lyaamba kuti: “Muntu uucita ziyanda Leza unoopona lyoonse.” (1 Joni 2:17, Ci) Aboobo ino mbuti mbotunga twaakupona kukabe kutamani munyika mpya ya Leza?— Tulakonzya kucita oobo kwiinda mukubaa luzibo lwa Jehova alimwi a Mwanaakwe ngwayandisya, Jesu. Pele alimwi tweelede kuzicita eezyo nzyotwiiya. Ikwiiya bbuku eeli nkotwacita akukugwasye kuzicita zintu zyoonse eezyi.
[Kabbokesi/Cifwanikiso icili apeeji 251]
Nobala Isaya 11:6-9 alimwi a Isaya 65:25, ulamvwa mbuli banyama mbobanoopona muluumuno. Kozilangisya zifwanikiso eezyi. Kobona mwanaa mbelele, kapongo, siluwe, moombe, syuumbwa mupati alimwi abana mbocili limwi. Sena inga wabaamba mazina banyama bambi bali mucifwanikiso aabo mbolyaamba Bbaibbele?— Kobona musankwa ooyu uusobanya nkombola! Kunyina cinoobayoosya bantu bayoopona munyika mpya. (Hosea 2:18) Ino waayeeya buti makani aayo?—
[Kabbokesi/Zifwanikiso izili apeeji 252, 253]
Lino kobona kuti kuli luumuno akati kabantu bamisyobo yoonse. Boonse balayandana mbubwenya Jesu mbwaakaamba kuti basikumutobela banooyandana. (Johane 13:34, 35) Zilwanyo zyankondo zyasandulwa kuba zibelesyo zyakulimina nyika. Ibbaibbele lilaamba kujatikizya luumuno lunji alimwi akuliiba nkobayoobaankuko bantu munyika mpya ya Leza. Tulakonzya kwaabala makani aaya mumagwalo mbuli aa Intembauzyo 72:7; Isaya 2:4; 32:16-18; alimwi a Ezekieli 34:25.
Kobona bantu ibali apeeji eeli. Bali mukulimina nyika, ikwiicita kuti ibe busena bubotu. Kobona ŋanda mbotu njobali mukuyaka alimwi amicelo minono yoonse alimwi azisyumani zitondezyedwe aawa. Ibantu baliliibide kapati munyika, yaba paradaiso mbuli muunda wa Edeni. Tulakonzya kuzibala zisyomezyo eezi zitaliboteli ku Intembauzyo 67:6; 72:16; Isaya 25:6; 65:21-24; alimwi a Ezekieli 36:35.
[Kabbokesi/Cifwanikiso icili apeeji 254]
Mbubwenya mbobona aawa, bantu boonse mbayumu alimwi balikkomene. Balakonzya kusotauka mbuli mbabala. Kunyina pe imuntu mulema, moofwu naa uuciswa. Alimwi kobona bantu aabaya ibabusyigwa kuzwa kubafwu! Ibbaibbele lilaamba makani aaya kuli Isaya 25:8; 33:24; 35:5, 6; Incito 24:15; alimwi a Ciyubunuzyo 21:3, 4.