CIIYO 28
Amutondezye Kulumba Kuli Ceeco Jehova a Jesu Ncobakamucitila
Ino mulimvwa buti ciindi mulongwe wanu naamupa cipego cibotu? Cakutadooneka, mulakkomana kapati alimwi akuyanda kumutondezya mulongwe ooyo kuti mulalumba kucipego eeco. Jehova a Jesu bakatupa cipego cipati kwiinda zyoonse. Ino ncipego nzi eeco, alimwi mbuti mbotukonzya kutondezya kuti tulalumba akaambo kancico?
1. Muunzila nzi imwi motukonzya kutondezya kulumba kuli ceeco Leza a Kristo ncobakatucitila?
Bbaibbele lisyomezya kuti, ‘muntu uuli woonse uumusyoma Jesu’ ulakonzya kupona kukabe kutamani. (Johane 3:16) Ino caamba nzi kutondezya lusyomo? Takuli kwiile buyo kusyoma Jesu. Pele tweelede kulutondezya lusyomo lwesu muzyakusala zyesu alimwi azintu nzyotucita. (Jakobo 2:17) Ciindi notutondezya lusyomo lwesu muzintu nzyotucita alimwi akwaamba, tuyumya cilongwe cesu a Jehova alimwi a Jesu.—Amubale Johane 14:21.
2. Muswaangano nzi waalubazu uutugwasya kutondezya kulumba kuli ceeco Jehova a Jesu ncobakatucitila?
Mangolezya katanafwa, Jesu wakaambila basikumutobela nzila imwi yakutondezya kulumba kucipaizyo cakwe. Wakatalisya muswaangano waalubazu Bbaibbele ngoliita kuti “Mulalilo wa Mwami,” alimwi uuzyibidwe kuti Ciibalusyo calufwu lwa Kristo. (1 Bakorinto 11:20) Jesu wakali kuyanda kuti baapostolo bakwe alimwi a Banakristo bakasimpe boonse kumbele, kabayeeya kuti wakaaba buumi bwakwe akaambo kandiswe. Kujatikizya muswaangano ooyu, Jesu wakalailila kuti: “Kamucita oobu lyoonse kutegwa kamundiyeeya.” (Luka 22:19) Ciindi nomujanika ku Ciibalusyo, mutondezya kulumba kuluyando lupati Jehova a Jesu ndobajisi kulindiswe.
AMWIIYE ZINJI
Amwiiye nzila mbomukonzya kutondezya kulumba kuluyando lupati Jehova a Jesu ndobakatondezya. Amwiiye mbociyandika kapati Ciibalusyo calufwu lwa Kristo.
3. Ncinzi ncotukonzya kucita kutondezya kuti tulalumba?
Amweezyeezye buyo ikuti muntu umwi wakamufwutula kuntenda imwi. Sena inga mwaile kuciluba buyo eeco ncaakamucitila? Naa sena inga mwayandaula nzila zimwi mbomukonzya kutondezya kulumba kuliceeco ncaakamucitila?
Jehova ngosikutupa buumi. Amubale 1 Johane 4:8-10, akubandika mibuzyo eeyi:
Nkaambo nzi cipaizyo ca Jesu ncocili cipego cilibedelede?
Ino mulimvwa buti kujatikizya ceeco Jehova a Jesu ncobakamucitila?
Mbuti mbotukonzya kutondezya kulumba kuli ceeco Jehova a Jesu ncobakatucitila? Amubale 2 Bakorinto 5:15 a 1 Johane 4:11; 5:3. Mwamana kubala lugwalo lumwi alumwi, amubandike mubuzyo ooyu:
Kweelana alugwalo oolu, ncinzi ncomukonzya kucita kutondezya kulumba?
4. Amwiiye Jesu
Nzila aimbi mbotukonzya kutondezya kulumba nkwiinda mukwiiya Jesu. Amubale 1 Petro 2:21, akubandika mubuzyo ooyu:
Muunzila nzi momukonzya kwiitobelesya mikondo ya Jesu?
Jesu wakali kuliyanda Jwi lya Leza, kukambauka makani mabotu alimwi akugwasya bamwi
5. Amujanike ku Ciibalusyo calufwu lwa Kristo
Kutegwa mubone icakacitika ku Mulalilo wa Mwami wakusaanguna, amubale Luka 22:14, 19, 20. Mpoonya amubandike mibuzyo eeyi:
Ncinzi cakacitika ku Mulalilo wa Mwami?
Ino cinkwa awaini ziiminina nzi?—Amubone kapango 19 a 20.
Jesu wakali kuyanda kuti basikwiiya bakwe kabacita Mulalilo wa Mwami ciindi comwe amwaka mubuzuba mbwaakafwa. Nkakaambo kaako, Bakamboni ba Jehova balaswaangana mwaka amwaka kuyeeya lufwu lwa Kristo kweelana ambwaakalailila. Kutegwa mwiiye kujatikizya muswaangano ooyu uuyandika, atweebelele VIDIYO. Mpoonya amubandike mubuzyo ooyu.
Ncinzi cicitika ku Ciibalusyo?
Cinkwa alimwi awaini nzitondezyo. Cinkwa ciiminina mubili wa Jesu uulondokede ngwaakaaba akaambo kandiswe. Waini wiiminina bulowa bwakwe
BAMWI BAAMBA KUTI: “Ciyandika buyo kutegwa mukafwutuke nkusyoma muli Jesu.”
Mbuti mbomukonzya kulubelesya lugwalo lwa Johane 3:16 alimwi a Jakobo 2:17, kutondezya kuti nzinji ziyandika?
MUBUFWAAFWI
Tulatondezya kulumba kuli ceeco Jesu ncaakatucitila kwiinda mukutondezya lusyomo mulinguwe alimwi akujanika ku Ciibalusyo calufwu lwakwe.
Ncinzi Ncomwaiya?
Ino caamba nzi kutondezya lusyomo muli Jesu?
Ino inga mwatondezya buti kulumba kuli ceeco Jehova a Jesu ncobakamucitila?
Nkaambo nzi ncociyandika kapati kujanika ku Ciibalusyo calufwu lwa Kristo?
AMUZYIBE ZINJI
Ino lufwu lwa Kristo lutukulwaizya kucita nzi?
Amwiiye zinji kujatikizya lusyomo alimwi ambotukonzya kulutondezya.
“Amutondezye Lusyomo Muzisyomezyo zya Jehova” (Ngazi Yamulindizi, October 2016)
Mucakuluula cijisi mutwe wakuti “Ndilimvwa Kusalala, Alimwi Akupona Buumi Bukkomanisya Kapati,” amubone buumi bwamukaintu umwi mbobwakacinca ciindi naakamvwisya cipaizyo ca Kristo ncocaamba kulinguwe.
“Ibbaibbele Lilakonzya Kubacinca Bantu” (Ngazi Yamulindizi, August 1, 2011)
Amubone kaambo ncokuli basyoonto buyo ibalya cinkwa akunywa waini lya Ciibalusyo.