Ikugwasya Bamwi Kwiiya Zyeelelo zya Leza
“Milimo eyo nsikonzyi kwiikaka. Maawe kulindime nintakambauka Makani Mabotu.”—1 BA-KORINTO 9:16.
1, 2. (a) Muumulimo nzi uuli munzila zyobilo Jehova mwayanda kuti tutole lubazu? (b) Ino bantu babombe myoyo beelede kwiiya nzi kutegwa babe balelwa mu Bwami bwa Leza?
JEHOVA ubajisilidi makani mabotu bantu. Ujisi Bwami alimwi uyanda kuti bantu koonse-koonse bamvwe! Twaiya makani mabotu aya, Leza uyanda kuti twaambile bambi. Oyu mulimo uli munzila zyobilo. Kusaanguna tweelede kwaambilizya makani mabotu aa Bwami bwa Leza. Mubusinsimi bwakwe bujatikizya “mamanino aaciindi” Jesu wakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:3, 14.
2 Icibeela cabili mumulimo oyu cijatikizya kuyiisya baabo ibayanda kuswiilila kwaambilizya kwa Bwami oku. Naakamana kubusigwa Jesu wakaambila nkamu mpati yabasikwiiya bakwe kuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila. Amulange, ndaba anywe mazuba oonse nikuba kusikila kumamanino aaciindi.” (Matayo 28:19, 20) ‘Izintu nzyaakalailide Jesu’ teezyakali zyakwe pe; wakayiisya bamwi kubamba milao ya Leza naa zyeelelo. (Johane 14:23, 24; 15:10) Aboobo ikuyiisya bamwi ‘kubamba zintu Kristo nzyaakalailila’ cijatikizya kubagwasya kwiiya zyeelelo zya Leza. Ibantu babombe myoyo beelede kusika azyeelelo zya Leza kutegwa babe balelwa mu Bwami bwakwe.
3. Ino Bwami bwa Leza ninzi, alimwi buyooleta nzi calo cipa kuti mulumbe wa Bwami ube makani mabotu boobu?
3 Ino Bwami bwa Leza ninzi? Alimwi zintu nzi nzyobuyookonzya kucita calo cipa kuti mulumbe wa Bwami ube makani mabotu boobu? Bwami bwa Leza nimfulumende yakujulu. Ilayandwa kapati kuli Jehova nkaambo njayoobelesya ikusalazya zina lyakwe ikugusya busofwaazi boonse. Bwami ncibelesyo ncayoobelesya Jehova kupa kuti lukacitwe luyando lwakwe ansi ano mbubonya mbuli kujulu. Nkaakaambo kaako Jesu wakatuyiisya kupailila kuboola kwa Bwami bwa Leza alimwi wakatulailila kububikka ambele mubuumi bwesu. (Matayo 6:9, 10, 33) Sena mwabona ncocili cintu cipati kuli Jehova kuti tuyiisye bamwi kujatikizya Bwami bwakwe?
Icintu Ciyumu Pele Citaminyi
4. Inga capegwa buti cikonzyanyo kuti ceelelo cakukambauka makani mabotu tauli mukuli uuminya?
4 Sena mukuli uuminya ikukambauka makani mabotu aaya? Peepe! Mucikonzyanyo: Wisi bana uleelede kubamba mukwasyi wakwe munzila yakumubili. Ikwaalilwa kucita boobu kuleelene akukaka lusyomo lwa Bunakristo. Imwaapostolo Paulo wakalemba kuti: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumina.” (1 Timoteo 5:8) Pele sena ceelelo eco mmukuli uuminya kumwaalumi Munakristo? Inga tacibi boobo kuti kauyanda ncobeni mukwasyi wakwe nkaambo awo inga uyanda kubabamba.
5. Nokuba kuti mulimo wakukambauka alimwi awakucita bantu kuti babe basiciiya nceelelo, nkaambo nzi ncotweelede kukkomana kutola lubazu muli nguyo?
5 Mbubwena buyo imulimo wakukambauka akucita kuti bantu babe basiciiya ncintu ceelede, nceelelo alo aayeeme buumi bwesu. Paulo wakacibikka munzila eeyi: “Milimo eyo nsikonzyi kwiikaka. Maawe kulindime nintakambauka Makani Mabotu.” (1 Ba-Korinto 9:16; Amweezyanisye Ezekiele 33:7-9.) Nokuba boobo icitupa kukambauka nduyando kutali kuti mmulimo buyo weelede kucitwa. Icakusaanguna tulamuyanda Leza pele abalo beenzuma tulabayanda alimwi tulizi mbociyandika kuti baamvwe makani mabotu. (Matayo 22:37-39) Alabapa bulangizi bwakumbele. Ino-ino Bwami bwa Leza buyoolulamika kutalulama koonse, bukagwisye kudyaaminina koonse akupilusya luumuno alukamantano, ikutegwa kukabe zileleko kusikila kutamani kuli baabo balibombya kubweendelezi bululeme. Sena tatukkomene, ikubotelwa kwaambila bamwi makani mabotu boobu?—Intembauzyo 110:3.
6. Nkaambo nzi mulimo wakukambauka alimwi awa kucita bantu kuti babe basiciiya ncouli muyumu?
6 Aciindi mpoonya imulimo wakukambauka alimwi awa kucita bantu kuti babe basiciiya muyumu kapati. Ibantu baliindene. Tazikonzyenye nzyobayanda naa nzyobakonzya kucita boonse. Bamwi baliyiide kapati kakuli bamwi balaa lwiiyo lusyoonto. Ikubala—icakali cintu cakali kukondelezya kucita—sunu kanjikanji cilangwa mbuli mulimo ukatanzya. Ikuciziba kubala pele muntu katayandi kucita obo ndipenzi liyabukomena nomuba mumanyika aalidunda kuti alaa bantu banji bacizyi kubala kapati. Mbuti ino mbotukonzya kubagwasya bantu balaa bukkale bwaandeene anzyobayanda ikwiiya nzyayanda Leza?—Amweezyanisye 1 Ba-Korinto 9:20-23.
Ibalibambilide Kabotu Ikugwasya Bamwi
7. Ino “muzike musyomesi uucenjede” watugwasya buti kuti tulibambile kugwasya bamwi kwiiya zyeelelo zya Leza?
7 Cilauba-uba ikucita mulimo muyumu kuti kamujisi zibelesyo ziluzi. Icibelesyo ceelede kumulimo umwi sunu cilakonzya kucincwa nokuba kuleta cimbi mubusena bwancico juunza akaambo kakucinca kwazintu. Cilikonzyenye amulimo ngotutumidwe wakwaambilizya mulumbe uujatikizya Bwami bwa Leza. Mumyaka yoonse eyi “muzike musyomesi uucenjede” watupa zibelesyo zinzyonya zyeelede, mabbuku alo aabambilidwe kapati kubelesya kweendelezya ziiyo zya Bbaibbele zyaaŋanda. (Matayo 24:45) Aboobo twalibambila ikugwasya bantu ba “kuzisi zyoonse akumisyobo yoonse . . . akumyaambo yoonse” ikwiiya zyeelelo zya Leza. (Ciyubunuzyo 7:9) Ciindi aciindi izibelesyo zipya zyali kupegwa kutegwa zyeendelane akucinca kwazintu mubelekelwa munyika. Atulange-lange zikonzyanyo zisyoonto.
8. (a) Ndubazu nzi ndolyakajisi bbuku lya “Let God Be True” mukutola aambele kuyiisya Bbaibbele? (b) Ncibelesyo nzi camulimo wakuyiisya Bbaibbele cakapegwa mu 1968 alimwi cakabambilidwe nzi cini-cini? (c) Ino bbuku lya Coonadi lyakagwasya buti mumulimo wakucita bantu kuti babe basiciiya?
8 Ikuzwa mu 1946 kusika mu 1968, ibbuku litegwa “Let God Be True” lyakali cibelesyo cibotu kumakani akuyiisya Bbaibbele elyo makkopi aali 19,246,710 akamwayigwa mumilaka iili 54. Mu 1968, ibbuku litegwa Coonadi Cimene Citsogolera Kumoyo Wamuyaya lyakamwaigwa, kumana kwamyaka minji lyakabelesyegwa cabusungu ikwiiya Bbaibbele abaabo bayanda. Ikaindi cakali cintu cinyenzi kubantu bamwi kwiiya a Bakamboni ba Jehova kwamyaka minji kabatabbapatizigwi pe. Pele eci cibelesyo cakabambilwa kuti sikwiiya ajatikizyigwe, kumukulwaizya kubelesya zintu zyaakali kwiiya. Ncinzi cacitika? Ibbuku litegwa Jehovah’s Witnesses—Proclaimers of God’s Kingdom lyaamba kuti: “Mumyaka yotatwe yamulimo kutalikila mu September 1, 1968, kuzikusika mu August 31, 1971, imweelwe wabantu basika ku 434,906 bakabbapatizigwa—ikuwiinda kuziindi ziinda kuzibili mweelwe wabaabo bakabbapatizigwa mumyaka yotatwe yamulimo yakainda!” Ikuzwa ciindi bbuku lya Coonadi nolyakamwaigwa lyakonzya kuzinguluka cigambya—ikwiinda ku 107,000,000 mumilaka iili 117.
9. Ninzila nzi yaalubazu iijisi bbuku lya Kupona Anyika alimwi ncizi cakacitika kuli basikwaambilizya ba Bwami mumbunga?
9 Mu 1982 ibbuku litegwa Mulakonzya Kupona Kukabe Kutamani mu-Paradaiso Anyika lyakaba ndebbuku libelesyegwa kweendelezya ziiyo zya Bbaibbele. Eci cibelesyo cilijisi zizekule ziinda ku 150 cimwi acimwi kacijisi majwi aasindikizya cifwanikiso alo aatondezya kabotu-kabotu kaambo kayiisigwa acifwanikiso. Mulimo Wesu Wabwami wamu October 1982 wakaamba kuti: “Mumyaka iitandila ku 20 notwakabelesya kapati bbuku litegwa ‘Let God Be True’ mukuyiisya (kuzwa 1946 kusika akati kamyaka yamuma 1960) basikwaambilizya Bwami bapya bayinda ku 1,000,000 bakayungizigwa kumbunga yesu. Mpoonya alimwi basikumwaya bali 1,000,000 bakayungizigwa ciindi notwakali kubelesya bbuku lya Coonadi Cimene Cimatsogolera Kumoyo Wamuyaya kwiiya nolyakamwaigwa mu 1968. Ikubelesya bbuku lipya mukuyiisya litegwa Mulakonzya Kupona Kukabe Kutamani mu-Paradaiso Anyika, sena tuyoobona kuyungizigwa kukonzyanya kwabasikumwaya ba Bwami kumbunga? Masimpe kuti oku kakuli kuyanda kwa Jehova!” Kulaboneka kuti kwakali kuyanda kwa Jehova nkaambo kuzwa mu 1982 kusika mu 1995 basikumwaya ba Bwami bayinda ku 2,700,000 bakayungizigwa kumbunga!
10. Ncibelesyo nzi cipya cakapegwa mu 1995 alimwi nkaambo nzi ncocikonzya kupa kuti basikwiiya Bbaibbele baye ambele cakufwambaana munzila ya kumuuya?
10 Jesu wakati: “Kutebula kwavula, batebuzi bacea.” (Matayo 9:37) Kutebula kwavula ncobeni. Nzinji ziciyandika kucita. Mumasi amwi bantu babikkwa amulongo buya wakulindilila ziiyo zya Bbaibbele. Akaambo kakubaa makanze aakumwaya luzibo lwa Leza kufwambaana mu 1995 ‘imuzike musyomesi uucenjede’ watupa cibelesyo cipya, ibbuku lyamapeeji aali 192 lilaa mutwe wakuti, Luzibo Lutola Kubuumi Butamani. Eci cibelesyo ciyandisi tacigami ziyiisyo zyakubeja pe. Cipa kasimpe kamu Bbaibbele munzila iikulwaizya. Tusyoma kuti ciyoopa kuti basikwiiya Bbaibbele baye ambele cakufwambaana munzila ya kumuuya. Ibbuku lya Luzibo liliyandidwe kale munyika imakkopi aali 45,500,000 ngaasimbidwe mumilaka iili 125 alimwi kuli basanduluzi bucitwa mumilaka iimbi iili 21.
11. Ncibelesyo nzi cibotu cakapegwa ikugwasya kuyiisya baabo batacizi kubala naa batabali kabotu alimwi cagwasya buti kuprogilamu yakuyiisya yanyika yoonse mbwiizulwa?
11 Ciindi aciindi “muzike musyomesi” watupa zibelesyo zibambilidwe baswiilizi bagaminide naa bansaizi buyo. Mucikonzyanyo, mbuti kumakani aabantu banga bayandika lugwasyo lwaalubazu akaambo kazilengwa zyabo naa bukombi? Mbuti mbotunga twabagwasya kwiiya zyeelelo zya Leza? Mu 1982 twakatambula nciconya ncotwakali kuyanda—ibroshuwa yamapeeji aali 32 litegwa Amutangale Abuumi Anyika Lyoonse! Eli bbuku lizekaudwe kabotu-kabotu yali cibelesyo cibotu mukuyiisya baabo batacizi kubala naa batalomyi kabotu kubala. Ijisi nzila nguba-uba alimwi iitakatazi kuteelela yakuyiisya Magwalo aantalisyo. Kuzwa ciindi noyakamwaigwa, eyi broshuwa ya Buumi Anyika yagwasya kapati kuprogilamu yakuyiisya yanyika yoonse mbwiizulwa. Imakkopi ainda ku 105,100,000 ngaasimbidwe mumilaka iili 239 calo cipa kuti libe bbuku lyamwaigwa kapati kwiinda oonse ba Watch Tower Society ngobakamwaya kale!
12, 13. (a) Ikuzwa mu 1990, “muzike musyomesi uucenjede” wapa nzila nzi mpya yakusikila baswiilizi koonse-koonse? (b) Mbuti mbotunga twabelesya mavidiyo aa Sosaiti mumulimo wesu wamumuunda? (c) Ncibelesyo nzi cipya cakapegwa ino-ino cakutugwasya mumulimo wakucita bantu kuti babe basiciiya?
12 Kunze lyamabbuku aasimbidwe, kutalikila mu 1990 “muzike musyomesi” watupa nzila yamalailile mpya yalo yakusikila baswiilizi koonse-koonse—mavidiyo. Mu October mwaka nguwena oyo ividiyo yamaminiti aali 55 yamutwe wakuti Jehovah’s Witnesses—The Organization Behind the Name yakamwaigwa—iyakusaanguna kumwaigwa aba Watch Tower Society. Inzila mbotu yabupanduluzi yalo iijanika mumilaka iili 35 itondezya mbunga yanyika yoonse mbwiizulwa yabantu ba Jehova balyaabide kabazuzikizya malailile aa Jesu aakwaambilizya makani mabotu nyika yoonse. Ividiyo yakabambilwa kapati kugwasya mumulimo wesu wakucita bantu kuti babe basiciiya. Mpoonya-mpoonya basikumwaya ba Bwami bakacibelesya cibelesyo eci cipya mumulimo wamumuunda. Ibamwi bakali kucinyamuna mumabbeeke aamabbuku kabali bambilide lyoonse ikucitondezya naa kubasiila kwaciindi cisyoonto bantu bayanda kwiiya. Nokwakainda buyo ciindi cisyoonto kuzwa ciindi noyakamwaigwa, umwi mulangizi wabbazu wakalemba kuti: “Imavidiyo aba nzila imwi yakukulwaizya mizeezo amyoyo yamamiliyoni aabantu mumwaanda wamyaka wa 21, elyo tusyoma kuti eeyi vidiyo njakusaanguna mumulongo mulamfu wamavidiyo iba Sosaiti ngobayoobelesya ikutola aambele mulimo wa Bwami wanyika yoonse.” Masimpe, aambi mavidiyo apegwa kubikkilizya ayeeyi iili muzibeela zyotatwe ya The Bible—A Book of Fact and Prophecy alimwi ayakuti Jehovah’s Witnesses Stand Firm Against Nazi Assault. Kuti naa mavidiyo aa Sosaiti nkwaali mumulaka wanu, sena mwaakabelesya kale mumulimo wanu wamumuunda?a
13 Ino-ino icibelesyo cipya, ibroshuwa iitegwa Ncinzi Leza Ncayanda Kulindiswe? yakapegwa kuti iitugwasye mumulimo wakucita kuti bantu babe basikwiiya. Mulimo nzi ngoyakamwailwa? Ino inga yabelesyegwa buti?
Ikulanga-langa Cibelesyo Cipya
14, 15. Mbaani mboyakabambilwa broshuwa ya Ncayanda, alimwi ijisi nzi?
14 Ibroshuwa mpya ya Ncinzi Leza Ncayanda Kulindiswe? yakabambilwa bantu balaa lusyomo kale muli Leza alimwi balemeka Bbaibbele. Ibalangizi beendeenda antoomwe abamisyinali bakayiila ku Gilead ibalaa myaka minji mumulimo mumasi aacisumpuka bakagwasya mububambe bwa broshuwa eeyi. Ijisi kkosi ibambidwe kabotu iijisi ziyiisyo zya Bbaibbele zyantalisyo. Ilembedwe munzila iinoneezya ngubau-uba alimwi iigaminina. Aciindi mpoonya malembe aayo taali mauba-uba kwiindilila. Tayijisi buyo “mukupa” pele kuli a “zilyo ziyumu” kuzwa ku Jwi lya Leza munzila yalo bantu banji njobakonzya kuti inga bateelela.—Ba-Hebrayo 5:12-14.
15 Mumyaka eeyi yazwaa kwiinda basikumwaya ba Bwami mumasena manji balikulomba bbuku lili mbubonya oobu. Mucikonzyanyo, imutabi wa Watch Tower Society ku Papua New Guinea wakalemba kuti: “Ibantu banyongana akaambo kaziyiisyo zya bukombi zikazyanya. Bayandika twaambo twakasimpe tugaminide, tugwasilizigwa azibalo zinji zya Bbaibbele zyalo nzyobakonzya kulanga muma Bbaibbele aabo beni. Bayandika nzila iisalala alimwi iitaindi ambali kwaamba nzyayanda Leza ku Banakristo beni-beni alimwi azilengwa antoomwe amicito iitatambuliki kuli nguwe.” Ibroshuwa ya Ncayanda njenjiyo buya njotuyandika kugwasya bali boobu kwiiya zyeelelo zya Leza.
16. (a) Mbaani buya kubagama bakonzya kugwasigwa abupanduluzi buuba-uba bwamu broshuwa eeyi mpya? (b) Mbuti mbobanga bagwasigwa aabo bali mubusena momubelekela kuzwa mubroshuwa ya Ncayanda?
16 Ino inga mwacibelesya buti cibelesyo eeci cipya? Kusaanguna cilakonzya kubelesyegwa kwiiya abantu balaa buyumuyumu mukubala naa abo banga tabasungweede kubala.b Ibali boobu balakonzya kugwasigwa abupanduluzi buuba-uba buli mu broshuwa. Nobakamana kulanga-langa broshuwa njobakatambula kusaanguna, mitabi ya Watch Tower yakalemba makani aatobela: “Ibroshuwa iyoogwasya kapati mumasena manji aacisi kwalo bantu nkobatabali kapati.” (Brazil) “Kuli bantu banji bazwa kuzisi zimbi batakonzyi kubala mulaka uubelesyegwa mucisi alimwi bacijisi penzi kubala ci French. Eyi broshuwa ilakonzya kubelesyegwa mukwiiya abantu bali boobu.” (France) Sena mulakonzya kuyeeya bantu bamwi mulubazu ndomubelekela bakonzya kugwasigwa abroshuwa ya Ncayanda?
17. Munzila ili buti broshuwa mpya moikonzya kugwasya mumanyika manji alimwi nkaambo nzi?
17 Cabili, mumasena manji ibroshuwa ilakonzya kubelesyegwa kutalisya ziiyo zya Bbaibbele kubantu bayoowa Leza kufumbwa mpobasikide kulwiiyo. Aino tweelede kusoleka kutalika ciiyo mubbuku lya Luzibo Lutola Kubuumi Butamani. Pele mumasena amwi cilakonzya kacili cuuba-uba kutalisya ciiyo mubroshuwa. Mpoonya aciindi ceelede, iciiyo cilakonzya kucincwa kuya mubbuku lya Luzibo lili ndyotubelesya mukwiiya kwesu. Kujatikizya kubelesyegwa kwa broshuwa ya Ncayanda munzila eyi, mitabi ya Watch Tower yakalemba kuti: “Ikutalisya ziiyo zya Bbaibbele cilakatazya elyo kuboneka kuti bulangizi bwakutalisya ciiyo bulavwula ciindi basikumwaya nobatalisya broshuwa.” (Germany) “Ibroshuwa iili boobu iyoogwasya kapati kutalisya ziiyo zya Bbaibbele zipya, zyalo zikonzya kuzumanana mubbuku lya Luzibo.” (Italy) “Nokuba kuti bana Japan baliyiide kapati, banji balaa luzibo lusyoonto kapati lwa Bbaibbele alimwi anjiisyo zyantalisyo. Ibroshuwa eyi yeelede kuba nzila yakusaanguna kutegwa muntu ayiye mubbuku lya Luzibo.”—Japan.
18. Ncinzi ncotweelede kuyeeya kumakani aakusika azyeelelo zya Leza?
18 Imitabi ya Sosaiti nyika yoonse mbwiizulwa yakiilomba broshuwa eeyi, elyo yakazumizigwa kale kuti isandululwe mumilaka iili 221. Eeyi broshuwa mpya aikatubede cintu cipati mukugwasya bambi kwiiya ncayanda Jehova Leza kulimbabo. Swebo lwesu, katuyeeyede kuti kusika azyeelelo zya Leza ikubikkilizya amalailile aakukambauka alimwi akucita bantu kuti babe basiciiya kutupa ciindi cibotu cakutondezya Jehova mbuli mbutumuyandisya. Ee, ncayanda Leza kulindiswe tacili ciyumu pe. Nenzila yabuumi yiinda!—Intembauzyo 19:7-11.
Bupanduluzi buyungizidwe
a Ibbuku litegwa Jehovah’s Witnesses—Proclaimers of God’s Kingdom lyaamba kuti: “Imavidiyo taabwezi busena bwamabbuku aasimbidwe naa bukambausi bwanu. Imabbuku aa Sosaiti acizumanana kuba cintu citasyaali mukumwaya makani mabotu. Imulimo wakuŋanda aŋanda wa Bakamboni ba Jehova ulazumanana kuba nzila ini-ini yamu Magwalo yamulimo wabo. Nokuba boobo imavidiyo lino agwasilizya zyeezi kuba zibelesyo ziyandika zyakujana lusyomo muzisyomezyo zibotu zya Jehova alimwi akukulwaizya kulumba kuzintu zyatucitila anyika sunu.”
b Kutegwa mujane bupanduluzi kujatikizya mbomukonzya kweendelezya ciiyo mu broshuwa eeyi ya Ncayanda amubone cibalo cakuti, “Cibelesyo Cipya Cakugwasya Bantu Kwiiya Zyeelelo zya Leza,” amapeeji 16-17.
Sena Mulakonzya Kupandulula?
◻ Muumulimo nzi uuli munzila zyobilo Jehova ngwayanda kuti babelesi bakwe batole lubazu?
◻ Nkaambo nzi ceelelo cesu cakukambauka alimwi akucita kuti bantu babe basiciiya ncocitali mukuli uuminya kulindiswe?
◻ Nzibelesyo nzi nzyaapa “muzike musyomesi uucenjede” kuti tubelesye mumulimo wesu wakukambauka akucita bantu kuti babe basiciiya?
◻ Mbaani mboyakabambilwa broshuwa ya Ncayanda alimwi inga twayibelesya buti mumulimo wesu?
[Cifwanikiso icili apeeji 17]
Imulimo wesu wakukambauka alimwi akucita bantu kuti babe basiciiya tauli mukuli uuminya pe
[Zifwanikiso izili apeeji 18]
“Let God Be True” (1946, revised 1952): 19,250,000 mumilaka iili 54
“Coonadi Cimene Cimatsogolera Kumoyo Wamuyaya” (1968): 107,000,000 mumilaka iili 117 (itondezyedwe muci French)
“Mulakonzya Kupona Kukabe Kutamani mu-Paradaiso Anyika” (1982): 80,900,000 mumilaka iili 130 (itondezyedwe muci Russia)
“Luzibo Lutola Kubuumi Butamani” (1995): 45,500,000 mumilaka iili 125 (itondezyedwe muci Jelemani)