AMUBE ACILONGWE A LEZA
“Amubone! Ndilabambulula Zyintu Zyoonse Kuti Zibe Zipya”
Sena nywebo amukwasyi wanu mulombozya kuba abuumi buli kabotu akupona kwaciindi cilamfwu? Sena mulombozya kupona munyika munyina kupenga, kucisa, alimwi alufwu? Nyika iili boobu taili yakuyeeyela buyo. Muciindi caboobo, nyika mpya yabululami iyoobako lino-lino, mbwaanga Jehova wakasyomezya oobo. Amubone kuzuzikizyigwa kwamakanze aakwe mbokutondezyedwe mulugwalo lwa Ciyubunuzyo 21:3-5.—Amubale.
“[Leza] uyoosindula misozi yoonse kumeso aabo.” (Ciyubunuzyo 21:4) Misozi iili buti Leza njayoosindula? Taili misozi yalukkomano naa eeyo iikwabilila meso eesu. Pele cisyomezyo ca Leza caamba misozi iiboola akaambo kakupenga alimwi akuusa. Leza takaisinduli buyo misozi; pele uyoozigwisya cakumaninina zyintu zipa bantu kulila, zyintu mbuli kupenga alimwi akuusa.
“Lufwu talukooyoobako limbi.” (Ciyubunuzyo 21:4) Ncinzi acimwi cipa bantu kulila kunze lyalufwu? Jehova uyoobafwutula bantu basyomeka kuzwa kubweendelezi bwalufwu. Munzila nzi? Kwiinda mukugwisya cintu cileta lufwu: icibi cakakonwa kuzwa kuli Adamu. (Baloma 5:12) Jehova uyoopa kuti aabo basyomeka babe bantu balondokede kwiinda mucituuzyo cacinunuzyo ca Jesu.a Mpoonya sinkondo wamamanino, ilufwu, “uyoonyonyoonwa.” (1 Bakolinto 15:26) Bantu basyomeka bayoocikonzya kupona mbubwenya mbwaakakanzide Leza, nkokuti kupona buumi bubotu alimwi butamani.
“Akwalo . . . kucisa takukooyoobako limbi.” (Ciyubunuzyo 21:4) Ino nkucisa nzi kuyoomana? Kucisa koonse, kubikkilizya akwamumizeezo ikwakaboola akaambo kacibi alimwi akutalondoka, kwalo kupa bantu banji kuusa kuyoomana.
Kupona buumi ibunyina kulila, kufwa, alimwi akucisa kuyoobako lino-lino. Mulakonzya kubuzya kuti ‘ino buyoobeda kuli?’ ‘Sena cisyomezyo ca Leza caamba kuyoopona kujulu?’ Peepe. Amulange-lange kaambo ncocili boobo. Cakusaanguna, cisyomezyo cilatalika amajwi aakuti “tente lya Leza lili aabantu,” alimwi bantu bakkala anyika. (Ciyubunuzyo 21:3) Cabili, cisyomezyo caamba nyika mwalo ‘lufwu molutakabi limbi,’ nkokuti, munyika imwakali lufwu, pele kumbele molutakabi limbi. Kunyina nokwali lufwu kujulu, pele muno munyika lwazumanana kwaciindi cilamfwu. Aboobo, cisyomezyo ca Leza cabuumi bubotu ciyoozuzikizyigwa aano anyika.
Jehova uyanda kuti tucisyome cisyomezyo cakwe canyika mpya iiluleme. Naamana kupandulula zilongezyo zilangilwa kumbele, wasinizya cisyomezyo cakwe akwaamba kuti: “Amubone! Ndilabambulula zyintu zyoonse kuti zibe zipya.” Mpoonya wayungizya kuti: “Majwi aaya alasyomeka alimwi ngamasimpe.” (Ciyubunuzyo 21:5) Sena nywebo abayandwa banu inga tiimwayanda kwiiya zinji kujatikizya mbomukonzya kuba akati kabakombi ba Leza ibakkomene, balo bayoobona cisyomezyo ca Leza nociyoozuzikizyigwa?
Magwalo Aamu Bbaibbele Aasalidwe Kubalwa mu December
1 Petulo 1-5; 2 Petro 1-3; 1 Johane 1-5; 2 Johane 1-13; 3 Johane 1-14–Ciyubunuzyo 1-22
[Bupanduluzi buyungizidwe]
a Kutegwa mwiiye zinji kujatikizya cituuzyo cacinunuzyo ca Kristo, amubone cibalo 5 mubbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova.
[Majwi aakwelelezya sikubala aali apeeji 11]
Leza uyoosindula misozi yoonse iiboola akaambo kakupenga alimwi akuusa