Christopher, Hannah alimwi aba Gina tabali balikke ibalimvwa boobo. Bantu banji munyika yoonse balisinizyide kuti Leza ubabona kuti mbalongwe bakwe. Ino nywebo mulimvwa buti? Sena mulimvwa kuti muli balongwe ba Leza? Sena inga mwayanda kuba acilongwe ciyumu a Leza? Ndiza inga mwalibuzya kuti, ‘Sena masimpe cilakonzyeka kuti muntu buyo abe acilongwe ciyumu a Leza Singuzuzyoonse? Ikuti naa cilakonzyeka, ino inga cakonzyeka buti?

CILAKONZYEKA KUBA ACILONGWE A LEZA

Kweelana ancolyaamba Bbaibbele, cilakonzyeka kuba acilongwe ciyumu a Leza nywebo kumugama. Bbaibbele lyaamba kuti Leza wakaita syaanene muna Hebrayo, Abrahamu kuti “mulongwe wangu.” (Isaya 41:8) Kuyungizya waawo, amubone kutamba kujanika mulugwalo lwa Jakobo 4:8, lwaamba kuti: “Amuswene kuli Leza, eelyo awalo ulaswena kulindinywe.” Aboobo cilasalala kuti cilakonzyeka kuba acilongwe, nkokuti cilongwe ciyumu a Leza. Pele mbwaanga Leza talibonyi, mbuti mbomukonzya ‘kuswena’ kuli Leza alimwi akukkomana kuba acilongwe cibotu anguwe?

Kutegwa twiingule mubuzyo ooyu, amubone cicitika muzilongwe zyabantu. Cakusaanguna, cilongwe cilatalika abantu bobilo kwiinda mukuzyibana mazina. Mpoonya mbobayaabuzumanana kubandika lyoonse, kwaambilana zili kumoyo alimwi ambobalimvwa, cilongwe cabo cilayuma. Alimwi ikuti kabalisungwide kucitilana zintu, cilongwe cabo cilayuma. Mbubonya buyo andiswe tulakonzya kutalika kumvwana a Leza munzila iili boobu. Atubone mbocikonzyeka kucita oobo.

Sena kuli mweenzinyoko ngomuyandisya kapati ngomutazyi zina? Kweelede kuti taakwe. Mukaintu waku Bulgaria wazina lya Irina wakaamba kuti: “Tacikonzyeki kuba acilongwe a Leza ikuti naa tamulizyi zina lyakwe.” Cikkomanisya ncakuti, kweelana ambotwabandika mucibalo cainda, Leza uyanda kuti tuswene kulinguwe. Aboobo kwiinda mu Bbaibbele, lwakwe mwini walizyibya kulindinywe kwiinda mukwaamba kuti: “Ndime Jehova. Eeli ndezina lyangu.”—Isaya 42:8.

Sena Jehova kuli mbwalimvwa ikuti mwalizyiba alimwi akulibelesya zina lyakwe naa pe? Atulange-lange makani aaya: Izina lya Leza ililembedwe amabala one aaci Hebrayo aitwa kuti Tetragrammaton, lilajanika mumalembe aakusaanguna aaci Hebrayo ziindi zitandila ku 7,000. Lilajanika ziindi zinji kwiinda mazina aamwi ngotukonzya kuyeeya aambwa mu Bbaibbele. Masimpe eeci ncitondezyo cakuti Jehova uyanda kuti tulizyibe alimwi akulibelesya zina lyakwe.a

Bamwi balakonzya kulimvwa kuti nkubula bulemu kubelesya zina lyakwe akaambo kakuti Leza ulasalala alimwi ngusinguzuzyoonse. Masimpe inga calubila kubelesya zina lya Leza munzila mbyaabi, mbubonya mbomutakonzyi kubelesya zina lyamweenzinyoko ngomuyandisya kapati munzila iitali kabotu. Aboobo makanze aa Leza ngakuti aabo ibamuyanda kabalilemeka zina lyakwe alimwi akulizyibya kuli bamwi. (Intembauzyo 69:30, 31; 96:2, 8) Amuyeeye kuti Jesu wakaambila basikwiiya bakwe kupaila kuti: “Taateesu ooli kujulu, alisalazyigwe zina lyako.” Tulakonzya kutola lubazu mukusalazya zina lya Leza kwiinda mukulizibya. Kucita boobo kutupa kuswena kulinguwe.—Matayo 6:9.

Bbaibbele litondezya kuti Leza ulababikkila maano aabo “bazinzibala kuyeeya [naa ambweni, “bayandisya”] zina lyakwe.” (Malaki 3:16; majwi aamunsi) Kujatikizya muntu uuli boobo, Jehova usyomezya kuti: “Ndiyoomukwabilila akaambo kakuti ulilizyi zina lyangu. Walo uyoondiita, eelyo ndiyoomuvwiila. Ndinooli anguwe mumapenzi aakwe.” (Intembauzyo 91:14, 15) Ikuti katuyanda kuba acilongwe ciyumu a Jehova, cilayandika kulizyiba alimwi akulibelesya zina lyakwe.

Balongwe beni-beni balabandika lyoonse mulomo mpande, kubelesya fooni, email, vidiyo naa lugwalo ikuti bukkale bwabo kabuzumizya. Aboobo kutegwa tube acilongwe a Leza, tweelede kubandika anguwe lyoonse. Pele ino inga mwacita buti oobo?

Tulakonzya kubandika a Jehova kwiinda mumupailo. Nokuba boobo, kupaila kuli Leza takukozyenye ambotukonzya kubandika amulongwe wesu. Tweelede kuyeeya kuti ciindi notupaila, tubandika a Mulengi wesu, Mupatikampatila mububumbo boonse. Eeci ceelede kutukulwaizya kupaila cabulemu. Kutegwa mipailo yesu itambulwe kuli Leza, kuli zyeelelo zimwi nzyotweelede kutobela. Atulange-lange zyeelelo zyotatwe.

Cakusaanguna, mipailo yeelede kugamikwa kuli Jehova Leza—kutali kuli Jesu, “kubasaante” naa kuzibumbwa. (Kulonga 20:4, 5) Cakusalazya Bbaibbele lyaamba kuti: “Muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.” (Bafilipi 4:6) Cabili, mipailo yeelede kupailwa kwiinda mumwana wa Leza, Jesu Kristo. Jesu lwakwe kumugama wakaamba kuti: “Kunyina uuboola kuli Taata ccita kuti wainda mulindime.” (Johane 14:6) Catatu, mipailo yesu yeelede kweendelana akuyanda kwa Leza. Bbaibbele lyaamba kuti: “Kufwumbwa cintu ncotumulomba ceendelana akuyanda kwakwe, ulatumvwa.”a—1 Johane 5:14.

Nokuba boobo, cilongwe ciyumu tacikonzyi kuzumanana ikuti naa muntu omwe nguukanana lyoonse. Mbubonya mbuli balongwe mbobakkomana kubandika, tweelede kumulekela Leza kuti aambaule andiswe alimwi tweelede kumuswiilila ikuti wacita oobo. Sena mulizyi Leza mbwaambaula andiswe?

Mazuba aano, Jehova Leza “ulabandika” andiswe kwiinda mu Jwi lyakwe, Bbaibbele. (2 Timoteyo 3: 16, 17) Nkaambo nzi ncotwaambila boobo? Mucikozyanyo, amweezyeezye kuti mwatambula lugwalo luzwa kumulongwe wanu wini-wini. Nomwamana kulubala, calukkomano mulakonzya kwaambila bamwi kuti, “Mweenzuma wandaambila boobu!” Nokuba boobo, mubandi tiiwali wakubandika mulomo mpande, pele wali wamulugwalo buyo. Mbubonya buyo, kwiinda mukubala Bbaibbele, muzumizya Jehova kwaambaula andinywe. Aboobo Gina iwaambwa mucibalo cakusaanguna, waamba kuti: “Ndiyeeya kuti, kutegwa Leza andibone kuba mulongwe wakwe, ndeelede kulingaula ‘lugwalo’ ndwaakatupa, nkokuti Ibbaibbele.” Alimwi wayungizya kwaamba kuti, “Kubala Bbaibbele abuzuba kwandipa kuswena kuli Leza.” Sena mulamuzumizya Jehova kubandika andinywe abuzuba kwiinda mukubala Jwi lyakwe, Bbaibbele buzuba abuzuba. Kucita boobo kuyoomugwasya kulimvwa kuba mulongwe wa Leza.

“Kamundaambila buyo kufwumbwa ncomuyanda, ndilamupa.” Ambweni inga mwawayawaya kwaamba boobu kuli simweenda nzila naa kumuntu ngomutazyibene kabotu. Nokuba boobo, tacikonzyi kumukatazya kwaamba majwi aaya kumweenzinyoko ngomuyanda kapati. Balongwe beni-beni balilibambilide kucitilana zintu nzyobalombana.

Bbaibbele litondezya kuti lyoonse Jehova ucita zintu nzyazi kuti zilabakkomanisya babelesi bakwe. Mucikozyanyo, Mwami Davida, walo iwakakkomana acilongwe ciyumu a Leza, wakaamba kuti: “Nzinji kapati zintu nzyoocita, O Jehova Leza wangu, Milimo yako iigambya amakanze ngojisi kulindiswe. . . . Nzinji kapati cakuti tandikonzyi kuzibandauka zyoonse!” (Intembauzyo 40:5) Kuyungizya waawo, Jehova ulabacitila zintu zibakkomanisya aabo ibatana kumuzyiba, ‘ulabapa zyakulya zinji akuzuzya myoyo yabo akubotelwa.’—Milimo14:17.

Mbwaanga Jehova ulakkomana kucita zintu zibakkomanisya bamwi, cileelela kulangila kuti aabo bayanda kuba balongwe ba Leza beelede kucita zintu zikonzya kupa kuti ‘moyo wakwe ukkomane.’ (Tusimpi 27:11) Pele ino ncinzi cini ncomukonzya kucita kutegwa mumukkomanisye Leza? Ibbaibbele liingula kuti: “Mutalubi kucita zibotu akwaabana zintu nzyomujisi abamwi, nkaambo Leza ulabotelwa azipaizyo zili boobo.” (Bahebrayo 13:16) Sena eeci caamba kuti kucita zibotu alimwi akwaabana abamwi ncecintu ciyandika cilikke kutegwa tumukkomanisye Jehova?

Ibbaibbele lyaamba kuti: “Ikuti kakunyina lusyomo tacikonzyeki pe kumukkomanisya Leza.” (Bahebrayo 11:6) Cikkomanisya ncakuti, “Abrahamu wakasyoma Jehova,” cakuti “wakaitwa kuti mulongwe wa Jehova.” (Jakobo 2:23) Alimwi Jesu wakakankaizya kaambo ncociyandika ‘kusyoma Leza’ ikuti katuyanda kutambula zilongezyo kuzwa kulinguwe. (Johane 14:1) Aboobo ino mbuti mbomukonzya kuba alusyomo oolo Leza ndwayanda muli baabo mbayanda kuti baswene kulinguwe? Inga mwatalika kwiinda mukwiiya Jwi lya Leza, Bbaibbele abuzuba. Ikuti mwacita oobo, muyooba ‘aluzyibo lwini-lwini lwamakanze aakwe’ alimwi muyakwiiya mbomukonzya “kumukkomanisya cakumaninina.” Mpoonya mbomuyaabuyungizya luzyibo lwa Jehova alimwi akucita kweelana anzyomwiiya kujatikizya zyeelelo zyakwe ziluleme, lusyomo lwanu mulinguwe luyooyuma alimwi uyooswena kapati kulindinywe.—Bakolose 1:9, 10.

Ncinzi ncomukonzya kucita kutegwa mube acilongwe a Leza? Nzila zitobela zilakonzya kumugwasya kutegwa mube acilongwe ciyumu anguwe:

1. Amulizyibe alimwi akulibelesya zina lya Leza, lyakuti Jehova.

2. Amubandike anguwe lyoonse kwiinda mumupailo alimwi akubala Jwi lyakwe, Bbaibbele.

3. Lyoonse amucite zimukkomanisya Jehova.

Kweelana atwaambo ootu, sena inga mwaamba kuti mulacita zyoonse ziyandika kutegwa mube acilongwe a Leza? Sena kuli mbazu zimwi nzyomuyeeya kuti inga mwabambulula? Masimpe, muyandika kubeleka canguzu, nokuba boobo amubone bubotu buliko.

Ba Jennifer, bakucisi ca United States bakaamba kuti: “Kusolekesya kuli koonse nkomukonzya kucita kutegwa mube acilongwe ciyumu a Leza kulagwasya kapati. Cilongwe eeci ciletela zilongezyo zinji, mbuli: kumusyoma kapati Leza, kumvwisya kapati kujatikizya bube bwakwe, pele kwiinda zyoonse kuba aluyando kapati. Kunyina buumi bubotu bwiinda boobu!”

Kuti kamuyanda kukkomana kuba acilongwe ciyumu a Leza, Bakamboni ba Jehova bayookkomana kumugwasya. Balakonzya kupanga bubambe bwakwiiya Bbaibbele andinywe kakunyina kubbadela. Alimwi mwatambwa kujanika kumiswaangano yabo yakwiiya Bbaibbele ku Ŋanda ya Bwami iili afwaafwi ankomukkala, ooko nkomuyookkomana kuyanzana abaabo babikkila maano kucilongwe cabo a Leza.a Mwacita oobo, andinywe muyoolimvwa mbuli mbwaakalimvwa sintembauzyo walo iwakaamba kuti: “Pele mebo, cilandibotela kuswena kuli Leza”—Intembauzyo. 73:28.