Amubayiisye Bantu Kuti Bagwasigwe
1 Jehova uyanda kuti bantu boonse bagwasigwe. (Is. 48:17) Ulizi cinga catuletela lukkomano lwini-lwini. Ncayandisya nkuti bantu batanjili mumapenzi pele bakkale kabotu kwiinda mukutobela milawo yakwe. Tulagwasigwa kapati kuti twapona mbuli mbwayanda Leza. (Int. 34:8) Ino inga twabayiisya buti bamwi kuti abalo bagwasigwe mbuli ndiswe?
2 Ino Ncinzi Bantu Ncobayanda? Ino ncinzi ncobayanda bantu mumunzi momukkala? Sena takuli kuliiba muŋanda yabo, ikuyandana mulukwatano lwabo, alimwi akuti bana babo bakakkale kabotu kumbele alimwi azimwi-zimwi? Nobabaa mapenzi, ino nkuli nkobatijila? Balakonzya kabalikutaukila apenzi lyabo, naa kucita cimwi cintu cakuligwasya, naa kutobela malailile aabamwi. Nobasola kuyandaula lugwasyo, inga bakopana nkaambo bantu basikupa malailile aaindene-indene aatagwasyi inga bavwula. Atubagwasye basyome kuti Jwi lya Leza ndelipa malailile aagwasya kapati. (Int. 119:98) Inga twacita obo kwiinda mukubatondezya mbobanga bakkala kabotu noliba lino kufwumbwa kuti basola kwiiya Bbaibbele akutobela ncolyaamba.—2 Tim. 3:16, 17.
3 Ikukkala Kabotu Mumukwasyi: Mbasyoonto bantu bazi kuti ilulayo lwakasololelwaa muuya uusalala ilujanwa ku Ba-Efeso 5:22–6:4 lulagwasya kumana mapenzi aamumukwasyi. Ibanabukwetene bamwi bakali muciimo eci. Bakayeeya kuti inga balekana buyo nokwakainda myaka iili kkumi kabakwetene. Nokuba boobo, mukaintu wakatalika kwiiya Bbaibbele. Wakayiisigwa njiisyo zyamu Magwalo zijatikizya mbokukkalwa mulukwatano. Teelyakalampa, imulumi wakabona kuti mukaintu watalika kusanduka naakali kutobela njiisyo zyamu Bbaibbele, elyo awalo wakatalika kwiiya. Cimwi ciindi mulumi wakazooamba kuti: “Lino twaziba mbokukkalwa calukkomano mumukwasyi.”
4 Ikujana Mpindu Ini-Ini Mubuumi: Umwi mukubusi iwakali kubelesya misamu iikola naakalomba lugwasyo kuli Bakamboni, bakamuyiisya kuti Jehova ulamubikkila maanu walo lwakwe. Oyu mukubusi wakati: ‘Ndakayiya kuti Mulengi ulijisi kaambo ncaakalengela muntu alimwi usyomezya buumi butamani kuli baabo mbayanda. Ikaka ndakakkomana amakani aaya. Sunu ndipona kabotu, ndaliiba alimwi ndijisi cilongwe ciyumu nta a Leza.’
5 Taakwe muntu uutakonzyi kugwasyigwa alugwasyo lwini-lwini lujanwa mu Jwi lya Leza. Twasinizya kwiinda mukusololelwaa ndilyo kuti kupona munzila njayanda Jehova cilagwasya kwiinda kupona bukkale buli boonse bwanyika. (Int. 116:12) Tulijisi coolwe cakutola mulumbe oyu kubantu, tubayiisye kuti bagwasigwe. Twacita boobo, tulagwasya bantu banji.