Lugwalo Luzwa ku Kabunga Keendelezya
Elo taciliboteli kaka coolwe ncotujisi! Mbotuli Bakamboni ba Jehova, tulijisi coolwe ikutali buyo cakuziba Jehova Leza alikke wakasimpe alimwi muumi, Imulengi wakalenga julu anyika, pele akuba bantu baitwaa zina lyakwe alimwi akumubelekela. Ino ncilongezyo nzi cipati cikonzya kwiinda waawa!—Is. 43:12; Heb. 8:11.
Tujisi bulangizi bwakuyoofwutuka alimwi amulimo wakukambauka makani mabotu aa Bwami kutegwa abantu bambi batalike kukomba Jehova alimwi akuti abalo babe abulangizi mbotujisi. (Mt. 24:14; Rom. 10:13, 14; 1 Tes. 5:8) Alimwi tulikkomene abunyina bwaanyika yoonse bwabakombi ibayandana alimwi ibalisungula kugwasya umwi amweenzinyina. Elo kaka ziletela lukkomano zyoonse eezi!
Nkakaambo kaako Bbaibbele ncolitukulwaizya kuti: “Amukombe Jehova cakukondwa. . . . Amunjile kumilyango yakwe akulumba, amucikalilo cakwe akutembaula. Amumulumbe akulongezya izina lyakwe. Nkaambo Jehova mubotu! Luzyalo lwakwe talumani, alusyomo lwakwe lulakalilila mumazyalani oonse.” (Int. 100:2-5) Ikukomba Jehova cakukondwa kuliswaangene akubaa cilongwe ciyumu anguwe. Watutamba kubaa cilongwe anguwe alimwi tujisi coolwe cakuyumya cilongwe cesu. Ikuti katujisi cilongwe cili boobu, tulizi kwaamba kuti Jehova unooli andiswe lyoonse unakutugwasya alimwi akutuyumya ciindi notuyandika kuyumizigwa. Tujisi lusyomo lwakuti uyootupa nguzu zyakumuuya alimwi abusolozi buyandika kutegwa tuzunde mapenzi ngotujisi mumazubaano aakumamanino abweende bwazintu oobu. Taakwe makani amapenzi ngotukonzya kubaangayo, tulikkomene mumulimo wesu alimwi tulamulumba Jehova abuzuba akaambo kakuti ‘ulatucebuka lyoonse’ kweelanaa mbolitwaambila jwi lyakwe.—1 Pet. 5:7.
Mwaka wamana, Jehova ncobeni wakatulongezya loko. Amuswaangano Wacooko wa “Basikucita Zyaambwa mu Jwi lya Leza,” twakakkomana ikujanika akati kazyuulu zyabantu bajisi lusyomo lubotu mbuli lwesu, ikwiimba alimwi akulida antoomwe atafwule lyakumuuya lya Jehova. Aciiyo Cabbuku Cambungano twaali kwiiya makani aayumya lusyomo mubbuku lya Amububikkile Maanu Businsimi bwa Daniele! Kunze lyaboobo, cakali kukkomanisya kaka kutambula Volyumu 1 yabbuku lipya lyakuti Isaiah’s Prophecy—Light for All Mankind! ‘Nkomeki yesu yafwasuka.’—Int. 23:5.
Cilakkomanisya kaka ikuziba kuti tuulunzuma twabakwesu abacizi bakumuuya tuli mukukomba Jehova antoomwe! Cilakulwaizya kaka ikubala zyamyeelwe yaatala mipya iiliko lino kujatikizya mumulimo wamumuunda! Tulakkomana akaambo katuulunzuma tunji twabantu bakajanika ku Ciibalusyo calufwu lwa Mwami wesu—alimwi akuti bakacita oobo nokuba kuti bukkale bwamunyika tabuli kabotu. Twalanga muunda wanyika oonse, takudoonekwi buya kwaamba kuti “kutebula kwavula kapati.” (Luka 10:2, Ci) Mwaka wamana, imweelwe waakati-kati wa 5,555 wabasikwiiya Bbaibbele mvwiki amvwiki bakali kuyaambele akutondezya kulyaaba kwabo kwiinda mukubbapatizigwa mumeenda. Nokuba kuti kutebula kwavwula kapati muzibeela zimwi zyanyika kwiinda mumwi, toonse tulikkomene amulimo ngwabeleka Jehova. Tulibubwene bumboni businizizye bwakulongezya kwakwe mumulimo ngobacita babelesi bakwe cakukamantana.
Acimwi cikkomanisya nkuyakwa kwa Maandaa Bwami mapya! Tulikkomene kapati ikubona bakwesu abacizi muzisi zicisumpuka kababeleka antoomwe cakulisungula mumulimo ooyu. Myaanda-myaanda ya Maandaa Bwami yakayakwa kale kwiinda mukugwasigwaa Nkamu Ziyaka Maandaa Bwami izyakayiisyigwa kabotu. Bakwesu aaba baleenda kuzwa kumbungano imwi kuya kuli imwi mucisi cakwabo mweena ikuyoosololela mumulimo wakuyaka Maandaa Bwami. Mbwaanga kucili zyuulu zya Maandaa Bwami aaciyandika kuyakwa, basikulisungula banji balayandika muzisi zicisumpuka ikutegwa bagwasilizye mumulimo ooyu uuyandika kapati. Ikuti kamukkala mucisi muciyandika lugwasyo, sena inga mwalisungula kuyoogwasilizya? Ma! Elo kaka bakwesu alimwi abacizi balalumba ikubaa Ŋanda ya Bwami mobakonzya kuswaangana kutegwa kabakombela mumo! Alimwi balalumba kapati kaka kubunyina bwaanyika yoonse akaambo kamali aapegwa kutegwa bacikonzye kuyaka!
Makani akuzumizigwaa mulawo alatukkomanisya. Pele mumasena manji kuli bantu bajisi nguzu kapati balo ibayanda kuzimaazya bukombi bwa Jehova. Notweendelezya bukkale buli boobu, tujisi lusyomo lwakuti caboola kukugwasigwa, tacikwe makani kuli Jehova naa mbanji buti basikutukazya antela mapenzi ngobakonzya kusikilwa babelesi bakwe. (2 Mak. 14:11) Tulamulumba kapati nobakwesu abacizi nomuzumanana kwiima nji mubukombi bwakasimpe.
Amuzumanane kuyumya lusyomo lwanu alimwi akusyoma muli Jehova amoyo woonse kuti amweendelezye eelyo nomuzuzikizya mikuli yanu ya Bunakristo cakukondwa. (Tus. 3:5, 6) Taakwe ceelede kumutyompya, kufwumbwa zintu eezyo sinkondoma nzyakonzya kuzumizigwa kucita. Amuyeeye lugwasyo Elisha ndwaakapa mubelesi wakwe wakalibilikide: “Utayoowi pe, nkaambo abo mbetuli abo mbanji kwiinda mbabo.” (2 Bam. 6:15-17) Sunu, makamu-makamu aakujulu aa Jehova alilibambilide kukwabilila bukombi busalala mbubwenya mbocakabede akumazubaa Elisha. Tulangila kumbele katujisi lusyomo. Jehova nguuyendelezya zintu zyoonse. Ibamasi tabakonzyi kulwana anguwe. Wabikka Mwanaakwe acuuno akumupa nguzu zyoonse zyabweendelezi. “Bali acoolwe boonse bamusyoma.”—Int. 2:1-6, 12.
Mutalubi kuti nyoonse nobakwesu abacizi tulamuyeeyela lyoonse caluyando. Tulamupailila nyoonse cakusinizya kuti “mwiime nji, mutabi bateteete mukucita zyoonse nzyayanda Leza.”—Bako. 4:12, Ci.
Tobanyoko,
Kabunga Keendelezya ka Bakamboni ba Jehova