Amwiimbe Nyimbo Zyakutembaula Jehova
1 Cimwi cazipego zya Leza muntu mwakonzya kutembaula alimwi akulumba ku Mulengi wakwe kulabikkilizyaa kutondezya kukondwa kwiinda munyimbo. Lyoonse ikwiimba kwakalidumide mukukomba Jehova Leza. Mu Bbaibbele, kulaambwa kapati kujatikizya kwiimba amajwi alimwi akubelesya ziimbyo ikuti kwakali kucitwa mubukombi bwakasimpe.—Matl. 4:21; 31:27; 1 Mak. 25:1; Ciy. 18:22.
2 Mutempele lyaku Jerusalemu, ikwiimba cakali cibeela cipati cabukombi cakuti iba Levi bali 4,000 bakabikkidwe ambali kumulimo wakwiimba. (1 Mak. 23:4, 5) Aaba bakeelede kubasangana baimbi. Inyimbo, kwaambisya ibaimbi bakajisi lubazu lupati mubukombi kutali buyo kusindamizya twaambo tupati twamu Mulawo, pele akupa muuya mubotu mubukombi. Kulibambila kabotu alimwi akubikkila maanu kapati kwakalaabidwe kucibeela eeci cabukombi. (Amubale 1 Mak. 25:7) Amubone buyo mbuli mbobakali bankutwe kukwiimba intembauzyo kuli Jehova. Bakaliyiisyidwe nyimbo alimwi boonse bakalijisi luzyibo kumakani aakwiimba!
3 Mbotuli Bakamboni ba Jehova, tulizyi kuti Jehova weelede kutembaulwa. Mmwami Wakujulu Aansi, Mupatikampatila, Mwami waciindi coonse, Mulengi wesu alimwi Mugwasyi wesu, Ikasensa alimwi Matalikilo abuumi boonse. Ncobeni uleelede kutembaulwaa ndiswe. Sena tulimvwa kuti kwiimba nyimbo zya Bwami takuyandiki kapati kulindiswe kutegwa tukubikkile maanu camoyo woonse? Nokuba kuti tulazibisyigwa kakucili ciindi kujatikizya nyimbo ziyoobelesyegwa, ikwiimba kuciyandika kapati ikutegwa kakukkomanisya kumiswaangano mipati minji. Ibaalu bakulwaizigwa kubamba bubambe bubotu kumbungano kutegwa zitalike kulibambila nyimbo ziyoobelesyegwa lyamuswaangano. Amugwasye umwi aumwi kujana bbuku lyanyimbo limugeme. Ibbaibbele litondezya kuti tweelede kwiimba nyimbo zyantembauzyo kuli Jehova.—Ef. 5:18, 19; Kul. 15:1.
4 Ikutugwasya kulibambila alimwi akutola lubazu cakumaninina mukwiimba uno mwaka Kumuswaangano Wacooko wa “Bamayi ba Jwi lya Leza,” iba Sosaiti basala nyimbo eezi zitobela kuti zikabelesyegwe: 12, 21, 15, 4, 9, 11, 8, 28, 25, 18, 23, 7, 16, 5, 1, 17, 6, 26. Toonse atulibambile kabotu nyimbo kakucili ciindi kutegwa tukaimbe cakwaanguluka alimwi cakusangalizya eezi inyimbo zyantembauzyo kuli Jehova.