Amulibatamike Mamanino Mbwaayaabuswena Afwaafwi
1 Ijwi lya Leza cakwiinduluka-induluka lilaamba kusika kwabuzuba bwa Jehova “mbubonya mbwasika mubbi” aciindi citayeeyelwi alimwi cakaumu-umu. (1 Tes. 5:2; Mt. 24:43; 2 Pet. 3:10; Ciy. 3:3; 16:15) Jesu wakaamba kuti: “Mbubonya obo . . . amulibambe, nkaambo kuciindi ncimutezi nciconya ncazoosika Mwana a-Muntu.” (Mt. 24:44) Ino mbuti mbotunga twazumanana kupakamana kumuuya mamanino mbwaayaabuswena afwaafwi? Inzila imwi iikonzya kutugwasya kuzwidilila ilajanika mululayo lwakasololelwa amuuya lwakuti: “Amulibatamike.”—1 Pet. 4:7.
2 Kulibatamika kulabikkilizya akulanga zintu mbuli Jehova mbwazilanga. (Ef. 5:17) Kulatugwasya ikulibona kuti tuli “beenzu buyo” mubweende bwazintu oobu. (1 Pet. 2:11) Kulatugwasya kubona zintu ziyandika kapati, izyeelede kubikkwa mubusena butaanzi alimwi akusala nzila iigwasya.—Flp. 1:10.
3 Amulibikkile Mbaakani Zyakumuuya: Ikulibikkila mbaakani zyakumuuya alimwi akuzizuzikizya kulatugwasya kuba bantu balibatamika. Sena kuli mbaakani zyakumuuya lino nzyomucita? Sena mulasoleka canguzu kubala Bbaibbele buzubaa buzuba, kujanika kumiswaangano yoonse ya Bunakristo, kubala magazini imwi aimwi ya Ngazi Yamulindizi alimwi a Galamukani! naa kuyungizya ciindi cakubeleka mumulimo? Ikuti naa mwalibikkila mbaakani zyeelede, amuzumanane cabusungu kuzizuzikizya alimwi akumulomba Jehova kuti alongezye milimo yanu, eelyo muyoogambwa kapati zilongezyo nzyomuyoojana.
4 Mwaalu umwi wakabuzya banabukwetene ibacili bana-bana mbaakani zyakumuuya nzyobakajisi. Mubuzyo ooyu wakabapa kuyeeya akubona kuti bakali kukonzya kubeleka bupainiya ikuti naa baubya-ubya buumi bwabo alimwi akubbadela cikwelete ncobakajisi. Bakasala kuti eeyi ibe nembaakani yabo. Bakabeleka canguzu akubbadela cikwelete ncobakajisi akujana nzila yakucesya ciindi ncobakali kusowa kumilimo iitagwasyi iyakali kubamanina ciindi alimwi anguzu zyabo. Nokwakainda buyo mwaka omwe, bakaizuzikizya mbaakani yabo. Ino mbubotu nzi mbobakajana? Mulumi waamba kuti: “Nozyatakali mbaakani nzyotwakalibikkila, notwatali mubukkale mbotupona lino. Tulikkomene kapati. Tuli muluumuno alimwi tupona kabotu. Buumi bwesu bujisi mpindu.”
5 Mbotuya bulangila buzuba bwa Jehova, atuzumanane kuba balibambide kumuuya kwiinda mukulibatamika, katubikkide mizeezo yesu mukucita kuyanda kwa Leza.—Tit. 2:11-13.