Ibapedwe Makani Mabotu
1 Elo kaka tulaacoolwe ikupegwa makani mabotu aa Leza! (1 Tes. 2:4) Nokuba kuti bamwi balakonzya kuukaka mulumbe ooyu uuyandika kapati, ibabombe myoyo balakwelelezyegwa kulinguwo mbubonya mbocicita cintu cinunkila kabotu. (2 Kor. 2:14-16) Eeci cibaletela lufwutuko aabo ibazumina akuswiilila makani mabotu. (Rom. 1:16) Ino ncinzi ncotweelede kucita kumakani mabotu ngotupedwe?
2 Jesu Abaapostolo: Jesu wakabikka mulimo wakukambauka makani mabotu mubusena butaanzi. (Lk. 4:18, 43) Noliba leelyo naakakatede akufwa nzala, iluyando ndwaakajisi kubantu akubikkila maano kumulumbe zyakamukulwaizya kwaambila bamwi. (Mk. 6:30-34) Kwiinda muzintu nzyaakali kwaamba akucita, wakabagwasya basikwiiya bakwe kumvwisya mbouyandika kapati mulimo wakukambauka Bwami.—Mt. 28:18-20; Mk. 13:10.
3 Mukwiiya Jesu, baapostolo bakaukambauka cabusungu mulumbe wa Bwami. Noliba leelyo nobakaumwa akulaililwa kuti baleke kukambauka, ‘tiibakaleka kuyiisya akukambauka makani mabotu.’ (Inc. 5:40-42) Imwaapostolo Paulo wakabeleka canguzu mumulimo ooyu. (1 Kor. 15:9, 10; Kol. 1:29) Wakabona mbuli kuti coolwe cakwaambila bantu makani mabotu, ncikwelete kubeenzinyina, alimwi wakalilisungwide kuliimya kutegwa auzuzikizye mulimo.—Inc. 20:24; Rom. 1:14-16.
4 Coolwe Ncotujisi Mazubaano: Ikulumba akaambo kamulimo uusetekene ngotupedwe, kuyootukulwaizya kujana nzila mbotukonzya kuyungizya ciindi ncotubeleka mumulimo wakukambauka. (Rom. 15:16) Edward, iwakali kweendela ancinga yabantu balema, wakali kukkala ambali amulyango wahotela akwaambaula abantu ibakali kunjila muhotela zyalusyomo lwakwe. Nokuba boobo, wakali kulombozya kubeleka kwiinda waawo. Wakabamba kaanda kalibedelede mumootokala wakwe, alimwi kwiinda mumootokala eeyi, wakacita bupainiya kwamyaka minji akweenda zyuulu zili mbozibede zyamakilomita mumulimo. Mbubwenya mbuli Edward, ibanji mazubaano bacinca bukkale bwabo kutegwa kababa aciindi cinji cakumwaya makani mabotu.
5 Kwiinda mukwiiya Jesu abaapostolo bakwe, atuubikke mubusena butaanzi mulimo wakukambauka mubuumi bwesu. Mukucita boobo, tutondezya luyando ndotujisi kubantu ambotwaabikkila maano makani mabotu ngotupedwe.