“Amubelekele Jehova Cakukondwa”

1. Ino ncinzi cikonzya kubakkomanisya kapati babelesi ba Jehova?

¹ Mwaapostolo Paulo wakalemba kuti: “Amusekelele mu-Mwami lyoonse. Ee, ndaamba lwabili eli ijwi lyakuti, Amusekelele.” (Flp. 4:4) Coolwe cakukambauka makani mabotu alimwi akugwasya bantu bali mbuli mbelele kukomba Jehova cilatukkomanisya kapati. (Lk. 10:17; Inc. 15:3; 1 Tes. 2:19) Nokuba boobo, ikuti katutakkomani ziindi zimwi mumulimo wesu, ino ncinzi ncotunga twacita?

2. Ino mbuti kubikkila maano kuli yooyo wakatupa mulimo mbokukonzya kutukkomanisya?

² Mulimo Wakapegwa a Leza: Kamuyeeya kuti mulimo wesu wakukambauka wakapegwa a Jehova. Elo tulaa coolwe kaka kuba “basimilimonyina Leza” mukwaambilizya mulumbe wa Bwami alimwi akugwasya bantu kuba basikwiiya! (1 Kor. 3:9) Kristo Jesu uli andiswe mumulimo ooyu uutakaindulukwi. (Mt. 28:18-20) Bangelo abalo balijatikizidwe kapati alimwi balabeleka andiswe mumulimo mupati uucitika lino wakutebula kwakumuuya. (Inc. 8:26; Ciy. 14:6) Imagwalo kubikkilizya azintu zicitikila bantu ba Leza, zipa bumboni butakazyigwi bwakuti Jehova nguuli mukusololela mulimo ooyu. Aboobo, ciindi notukambauka, tulacita oobo ‘katutumidwe aa Leza, katulangililwa a Leza antoomwe a Kristo.’ (2 Kor. 2:17, NW) Elo kaka tulaa kaambo kapati ncotweelede kukondwa!

3. Ino mupailo utugwasya buti kuti katuukkomanina mulimo wa Leza lyoonse?

³ Mupailo ulayandika kutegwa katukkomene lyoonse mumulimo wa Leza. (Gal. 5:22) Mbwaanga inga twacikonzya kubeleka mulimo wa Leza kwiinda munguzu zyakwe, tweelede kumulomba kuti atupe muuya wakwe ooyo ngwapa cabuuya kuli baabo bamulomba. (Lk. 11:13; 2 Kor. 4:1, 7; Ef. 6:18-20) Kupailila mulimo wesu kulakonzya kutugwasya kunooulanga munzila yeelede lyoonse ciindi bantu mbotukambaukila nobatabikkili maanu. Kuya kutupa kuzumanana kukambauka cabusicamba alimwi katukkomenyi.—Inc. 4:29-31; 5:40-42; 13:50-52.

4. Ino kulibambila kabotu kutugwasya buti kuyungizya lukondo ndotujisi mukukambauka, alimwi ninzila nzi zimwi zigwasya nzyotunga twalibambila?

⁴ Amulibambile Kabotu: Inzila iigwasya kuyungizya lukkomano lwesu notucita mulimo nkulibambila kabotu. (1 Pet. 3:15) Kulibambila ooko takweelede kutola ciindi cilamfwu. Citola buyo maminiti masyoonto ikwiinduluka nzila zipedwe zyambomweelede kumwaya mamagazini mapya naa nzila yeelede yakumwaya bbuku ndyomulibambide kumwaya. Kutegwa mujane ntalisyo yeelela, inga mwalanga mubbuku lya Kukambitsirana naa mu Mulimo Wesu Wabwami wamusyule uujisi ntalisyo yeelede. Basikumwaya ba Bwami bamwi bajana kuti cilagwasya kwiilemba mubufwaafwi nzila njobayanda kubelesya aakapepa. Eelyo kwakaindi kasyoonto balazilanga nzibalemba kutegwa kabaziyeeya. Eeci cibagwasya kutayoowa alimwi cibapa kwaanguluka kukambauka cabusicamba.

5. Ino kukondwa kutugwasya buti swebo alimwi abambi?

⁵ Kukondwa kuletela mpindu zinji. Ikuti katukondedwe, imulumbe ngotujisi ulabikkilwa maanu kapati abantu. Kukondwa kulatuyumya kuti tuzumanane. (Neh. 8:10; Heb. 12:2) Icipati ncakuti mulimo ngotucita cakukondwa utembaula Jehova. Aboobo, ‘atubelekele Jehova cakukondwa.’—Int. 100:2, NW.

Nzyomweelede Kwaamba Kujatikizya Mamagazini

Ngazi Yamulindizi Nov. 1

“Toonse kuli notwakatyompezyedwe amuntu umwi ngotusyoma. Sena kuli nomwakalibuzide kuti, ‘Sena kuli muntu ngondinga ndasyoma?’ [Amulindile bwiinguzi. Mpoonya amubale Tusimpi 3:5.] Eeyi magazini ipandulula ncotweelede kumusyoma Leza cakumaninina. Alimwi ilapandulula mbotukonzya kuziba bantu mbotweelede kusyoma.”

Ngazi Yamulindizi Nov. 1

“Sena kuli nomwakalibuzide kale ncecitukatazyila ikusala akati kakumukkomanisya Leza kwiinda mukupona kweelana azyeelelo zyakwe alimwi akucita nzyuuyanda mubili wesu uutalondokede? [Amulindile bwiinguzi, mpoonya amubale Ba-Galatiya 5:22, 23.] Mumagazini eeyi, kuli cibalo cibandika kulyeendelezya mbokutugwasya kulikasya kucita zintu zyanyika.”

Ngazi Yamulindizi Nov. 1

“Leza wakalenga mukaintu abube bubotu bwalo mbwakonzya kubelesya kuti buyungizye lukkomano mumukwasyi. Bantu banji babikkila kapati maano kumuntu mbwalibonya, ikapati kuli bamakaintu. Ino nkaambo nzi ncecili boobu? [Amulindile bwiinguzi.] Pele Jehova ubikkila kapati maano kumuntu wamukati walo uukonzya kubota kwiinda. [Amubale Tusimpi 31:30.] Eeyi magazini ilabandika bube bumwi bupa kuti mukaintu kali mubotu ncobeni.”

Ngazi Yamulindizi Nov. 1

“Ibakubusi nibaya bukomena, ilugwasyo lwabazyali babo tabalutobeli. Imuzeezo wakuduma alimwi akuyandwa abeenzinyina ulakomena. Balakonzya kutalika kusama, kwaambaula alimwi akucita bucita beenzinyina. Ino mbuti mbobakonzya kukuzunda kuyungwa abeenzinyina? [Bamana kwiingula, amubale Tusimpi 27:11.] Eeyi magazini ilijisi zikozyanyo zibotu zyabakubusi bakacikonzya kuzunda kuyungwa kutegwa bakkomanisye mulengi wabo.”