“Muleelede Kulibambila”

¹ Mubusinsimi bwakwe buzibidwe kapati ibujatikizya mamanino aabweende bwazintu oobu, Jesu wakacenjezya kumakani aakumaninina kulibilika zintu zyakunyika ziyandika mubuumi. (Mt. 24:36-39; Lk. 21:34, 35) Akaambo kakuti mapenzi mapati alakonzya kutalika ciindi cili coonse, kulayandika kapati kuti tutobele lulayo lwa Jesu lwakuti: “Muleelede kulibambila, nkaambo muciindi nciconya ncomutayeeyi nazoosika Mwanaa Muntu.” (Mate. 24:44, Ci) Ino ncinzi cikonzya kutugwasya mumakani aaya?

² Ikulwana Kulibilika Akunyonganizyigwa: Ntenda yakumuuya yomwe njotweelede kweeleba njakulibilika zintu ‘zyamubuumi buno.’ (Lk. 21:34) Mumasi ambi, bucete, kubula milimo, kudula kwazintu cipa kuti kujana zintu zyamubuumi ziyandika kacikatazya. Mumasi ambi, kujana zintu zyakumubili kulidumide kapati. Ikuti twatalika kubikkila buyo maano kuzintu zyakumubili, tulakonzya kwaalilwa kubikkila maano kuzintu zya Bwami izyancobeni. (Mt. 6:19-24, 31-33) Miswaangano ya Bunakristo ilatugwasya kuzumanana kuzibona kabotu zintu. Sena nimbaakani yanu ikujanika kumuswaangano uli woonse?—Heb. 10:24, 25.

³ Inyika mazubaano ilizwide azintu zinyonganya zyalo zikonzya kutumanina ciindi cesu ciyandika. Kubelesya kkompyuta inga kaba kakole ikuti muntu katola ciindi cilamfwu kulanga-langa Intaneti, kubala akutumina magwalo kwiinda mukubelesya kkompyuta naa kusobana zisobano zyaakkompyuta. Mawoola manji alakonzya kumanina kukulangilila cipekupeku, mabbasikopo, kukucita zintu nzyotuyandisya, ikubala mabbuku aakunyika alimwi azisobano zimwi, zyalo zikonzya kutusiila buyo ciindi cisyoonto naa nguzu zyakucita zintu zyakumuuya. Nokuba kuti kulikondelezya akulyookezya inga kulakatalusya kwaciindi buyo cisyoonto, ciiyo cesu tobeni alimwi aciiyo ca Bbaibbele camukwasyi cilagwasya lyoonse. (1 Tim. 4:7, 8) Sena mulaakujana ciindi cakuzinzibala kuyeeya zili mu Jwi lya Leza abuzuba?—Ef. 5:15-17.

⁴ Tweelede kulumba nkaambo kakuti mbunga ya Jehova yatubambila pulogilamu yamalailile akumuuya kutugwasya kuti tukonzye “kuyokoka kuzintu zyoonse ezi iziyoocitika, akwiima kumbele lya-Mwana a-Muntu.” (Lk. 21:36) Atuzibelesye zintu eezyi zyakumuuya ‘akulibambila’ kutegwa lusyomo lwesu lukakonzye “[kutuletela] lutembaulo abulemu alulemeko kuciindi cakuyubununwa kwa-Jesu Kristo.”—1 Pet. 1:7.

Kulumbaizyigwa Kulakatalusya

¹ Kumwi kamfwekula iciindi cakoona, imwana musimbi umwi wakati: “Sena tiindalilemeka kabotu sunu?” Imubuzyo ooyo wakabakatazya kapati banyina. Ibuzuba oobo, nokuba kuti bakabona kuti mwanaabo musimbi wakasoleka kapati kulilemeka, kunyina nobakamulumbaizya naaceya pe. Kulila kwamwana musimbi ooyo kweelede kutuyeezya kuti toonse—bana abapati tuyandika kulumbaizyigwa. Sena tulabakatalusya mbotuli limwi kwiinda mukubalumbaizya kuzintu zibotu nzyobacita?—Tus. 25:11.

² Banakristoma bacita zintu zinji nzyotweelede kubalumbaizya. Baalu, bakutausi alimwi abapainiya balabeleka canguzu kuzuzikizya mikuli yabo. (1 Tim. 4:10; 5:17) Bazyali bayoowa Leza balacita kusikila mpobagolela kukomezya bana babo munzila zya Jehova. (Ef. 6:4) Bakubusi Banakristo balabeleka canguzu kukazya “muuya waansi [a]ano.” (1 Kor. 2:12; Ef. 2:1-3) Bamwi cakusyomeka balamubelekela Jehova nokuba kuti bacembaala, balaciswa-ciswa naa kuba mumasukusyo aambi. (2 Kor. 12:7) Boonse aaba bayandika kulumbaizyigwa. Sena tulabalumba akaambo kakusoleka kwabo kubotu?

³ Ikulumbaizya Umwi Aumwi Alimwi Ikugaminide: Toonse tulakkomana kapati notulumbaizyigwa kucibumbili. Nokuba boobo, kulumbaizyigwa kulakatalusya nokugamikidwe kulindiswe buya. Mucikozyanyo, mucaandaano 16 mulugwalo ndwaakalembela bana Roma, Paulo wakaamba majwi aakulumbaizya aagaminide kuli bamwi ikujatikizya ba Febe, Priska a Akula, ba Trufena a Trufosa alimwi Persida. (Rom. 16:1-4, 12) Elo kaka akali kukatalusya majwi aaya kubantu aabo basyomeka! Kulumbaizya kuli boobo kusyomezya bakwesu abacizyi kuti balayandika alimwi kuyumya cilongwe ncotujisi ambabo. Sena kuli ngumwalumbaizya cacigaminina caino-ino aawa?—Ef. 4:29.

⁴ Camoyo Woonse: Kutegwa tube bantu bakatalusya, kulumbaizya kweelede kuba kwamoyo woonse. Bantu balakonzya kuzyiba naa twaamba camoyo woonse naa ‘tuupaika buya.’ (Tus. 28:23, BT) Notuliyiisya tobeni kubona bube bubotu buli muli bamwi, tuya kukulwaizyigwa kubalumbaizya. Atulisungule kuti tube basikulumbaizya beni-beni katuzyi kuti “ijwi [lya] ambwa kuciindi ceelede lyabota loko”!—Tus. 15:23.