Ikupa Jehova Ziinda Kubota

¹ Mulawo wa Jehova kubana Israyeli wakatondezya kuti banyama bakali kutuulwa kulinguwe bakeelede kuba batakwe “kampenda.” Munyama wakajisi kampenda tiiwakali kutambulwa pe. (Lev. 22:18-20; Malk. 1:6-9) Kuyungizya waawo, eelyo nobakali kupa cipaizyo, mafwuta oonse—nkokuti cibeela ciinda kubota—akali a Jehova. (Lev. 3:14-16) Mbwaakali Usyi wabana Israyeli alimwi Imwami Mupati, Jehova wakali kuyandika ziinda kubota.

² Mbubonya mbocakabede mumazuba aansiku, Jehova ubikkila maano kapati kububotu bwazipaizyo nzyotumupa mazubaano. Milimo yesu yeelede kutondezya bulemu bwini-bwini kuli Jehova. Mmasimpe, ibukkale buliindene kumuntu aumwi. Pele, tulijisi kaambo kaya kwamoonga ncotweelede kulilanga-langa tobeni ikutegwa zintu nzyotumupa kazili zyeezyo ziinda kubota.—Ef. 5:10.

³ Mulimo Uucitwa Camoyo Woonse: Ikutegwa mulimo wesu umulemeke Jehova akubanjila mumyoyo baswiilizi besu, taweelede kuba wakwiinzya buyo mulawo. Nzyotwaamba kujatikizya Leza wesu alimwi anzyayanda zyeelede kuzwa mumyoyo iilumba. (Int. 145:7) Eeci citondezya mbokuyandika kuba aapulogilamu mbotu yesu tobeni yakubala akwiiya Bbaibbele.—Tus. 15:28.

⁴ Kupa Jehova ziinda kubota alimwi kulabikkilizya akwiiya luyando ndwajisi kubantu. (Ef. 5:1, 2) Luyando ndotujisi kubantu luyootukulwaizya kusoleka kusikila bantu banji mbotukonzya amulumbe wakasimpe uupa buumi. (Mk. 6:34) Lutukulwaizya kubabikkila maano cacigaminina aabo mbotukananina. Lutupa kunoobayeeya lyoonse notwazwa akubaswaya ciindi cakusaanguna akutukulwaizya kupilukila. Lutukulwaizya kucita mbotukonzya kubagwasya kuyaambele kumuuya.—Inc. 20:24; 26:28, 29.

⁵ “Cipaizyo Cakulumba”: Aimbi nzila njotupa Jehova ziinda kubota njakuba basungu mumulimo. Ikuti twalibambila kabotu alimwi akuubikkila maano imulimo, tulakonzya kuzuzikizya zinji muciindi ncotujisi. (1 Tim. 4:10) Ikulibambila kabotu kutugwasya kwaambaula kabotu acalusinizyo, calo cikonzya kupa kuti bantu bazyibikkile maano nzyotwaamba. (Tus. 16:21) Mbotuya bukambaukila bamwi makani mabotu, nzyotwaamba camoyo woonse cakweelela zilakonzya kwaambwa kuti “[n]cipaizyo cakulumba.”—Heb. 13:15.

Nobakubusi—Amubale Jwi lya Leza!

¹ Ibukubusi nciindi camapenzi acakusala kupati. Ibunji bwanu nobakubusi Banakristo mulayungwa abuzuba kutyola zyeelelo zya Leza zyakulilemeka. Kamutanasala kujatikizya makani aalwiiyo, mulimo alimwi alukwatano, mweelede kuti kamulibikkilide kale mbaakani zyakumuuya. Lilikke mwacita boobo nomunga mwazisala kabotu zyoonse iziyooyendelezya buumi bwanu munzila iigwasya. Imbaakani zyakumuuya zigaminide ziyoomugwasya kucita zintu cabusongo alimwi akumupa kuzwidilila. Kwiinda mukubala alimwi akuzinzibala kuyeeya Jwi lya Leza ciindi coonse, muyookulwaizyigwa kupona buumi bweendelana alulayo lwalyo lwakasololelwa amuuya, eelyo muyoozwidilila mukusoleka kwanu ooku kweelede.—Jos. 1:8; Int. 1:2, 3.

² Ino Kuyoomugwasya Buti? Inyika ya Saatani izwide zintu zyoongelezya kucita zintu zibyaabi. (1 Joh. 2:15, 16) Mulakonzya kamuzyi mbomwiiya limwi naa bambi bamusela wanu ibapenga akaambo kakuti bakayungwa abeenzinyina. Ikutobela lulayo lwa Bbaibbele kuyoomupa nguzu zyakulilemeka akumuuya izigwasya kukaka bukkale bubyaabi. Kunze lyaboobo, ilulayo lwamu Jwi lya Leza lulakonzya kumugwasya kweeleba tooze twa Saatani twabucenjezu. (2 Kor. 2:11; Heb. 5:14) Ikweenda munzila zya Leza kuyoomupa lukkomano lwini-lwini—ikukkutila abukkale mbomujisi mubuumi.—Int. 119:1, 9, 11.

³ Injiisyo zya Jwi lya Leza zitacinci zilagwasya kapati kwiinda busongo bwabantunsi. (Int. 119:98-100) Ikuzyiba njiisyo zyamu Bbaibbele alimwi akuzinzibala kuyeeya makanze aa Jehova aayubunudwe antoomwe akupaila kucitwa camoyo woonse, kulakonzya kumugwasya kuba acilongwe ciyumu a Sikwaanza Bbaibbele musongo kwiinda boonse, Jehova Leza. Usyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.”—Int. 32:8.

⁴ Amujane Ciindi Cakulibala: Imukubusi Munakristo umwi wakakanza kulibala Bbaibbele lyoonse, alimwi ncobeni wakalimanizya mumwaka omwe. Ino musimbi ooyu wakagwasyigwa buti? Waamba kuti: “Ndakaiya zinji kujatikizya Jehova—izintu zyakandipa kuba acilongwe ciyumu anguwe akundipa kumuyoowa lyoonse mubuumi bwangu.” (Jak. 4:8) Sena nywebo mwakalibala kale Bbaibbele lyoonse? Ikuti kamutana, ino mulekela nzi kwaacita kuba makanze aanu kulibala? Jehova mmasimpe uyookulongezya kusoleka kwanu, eelyo muyoojana bulumbu bupati.