Amugwasyigwe Amakani Aabuleya
1 Makani aamazubaano aajatikizya Bakamboni ba Jehova alapandululwa kabotu mumajwi aajanika mu Tusimpi 4:18 aakuti: “Pele inzila yabaluleme ili mbuli mumuni uumweka, uuya bungwengwemuka mane bwaca buzuba.”
2 Kweelana akaambo aaka, imbungano ya Banakristo ilazumanana kutambula makani asalazyigwa atwaambo twamazubaano kujatikizya njiisyo zyamu Bbaibbele. (Mt. 24:45-47) Mulakonzya kwaamba zikozyanyo zyazintu zimwakabona kuzwa ciindi nomwakatalika kuswaangana a Bakamboni ba Jehova. Miswaangano yambungano, ikubikkilizya amakani aabuleya, zilatugwasya kweendela antoomwe amumuni wabwini uuya bumwekesya.
3 Makani Mapya Aakacincululwa: Iba ofesi lyamutabi batuma makani mapya manji aabuleya. Mumakani aamwi aabuleya babikkilizya makani mapya alimwi atwaambo tuyandika kapati twasalazyigwa. Ikutegwa mbungano ijane mpindu kumakani aakacincululwa, bakwesu bapa makani beelede kubelesya buyo mapepa amakani aakacincululwa.
4 Ikutegwa tukagwasyigwe kapati kumakani aabuleya, atukkale ansi kuyeeya mitwe yamakani iinoopegwa ciindi aciindi. Kamutana janika ku Makani Aabuleya, amusole kuyeeya makani aakapegwa ino-ino ngomwakaiya kuzwa kubusolozi bwabweende bwa Leza kujatikizya makani atiikananwe. Mpoonya, nomuswiilila amulangile mbwaatiikananwe makani aaya. Amubone nzila zipya zyambomukonzya kuyoobelesya kasimpe kumbele. Ikwiinda mukucita boobo, musyomezyegwa kuti muyoojana mpindu mpati kumakani aabuleya aakacincululwa.
5 Makani Aabuleya Ayelede Kusalazya Akukulwaizya Baswiilizi: Jesu naakali kwaambaula, wakali kwaamba makani aakali kubanjila mumyoyo baswiilizi. Kumamanino aa Mulumbe wa Jesu waa Cilundu, kwiinda makani oonse aabuleya aakapedwe kweelana a Matayo 7:28 aamba kuti: “Makamu aabantu akakankamana kukwiisya kwakwe.”
6 Kabayeeya cikozyanyo ca Jesu, tubunga twabaalu beelede kubelesya bupampu nobazumizya baambi bamakani aabuleya bapya, beelede kupa buyo bakwesu bacizyi kuyiisya, aabo bayootobela buyo zili mupepa lyamakani, alimwi aabo bakonzya kupa baswiilizi kubikkila maano kumakani. Bakwesu bapegwa coolwe cakwaamba makani aabuleya beelede kusumpula luzibo lwabo akutambula lulayo amalailile kuzwa kubaalu. Ikuti mwaalu kataceeleli kupa makani aabuleya, weelede kwaambilwa munzila yaluzyalo.
7 Mbuli mbokwakasinsimwa kuli Isaya 65:13, 14, ikuzwidilila kwakumuuya kwabantu ba Leza kulazumanana kuboneka. Ibubambe bwamakani aabuleya nenzila imwi ‘Jehova mwatuyiisyila.’—Is. 54:13.