Cibeela 3: Kwaabelesya Kabotu Magwalo

Ikweendelezya Ziiyo zya Bbaibbele Ziyaambele

1. Nkaambo nzi ncotweelede kukankainzya Magwalo notweendelezya ziiyo zya Bbaibbele?

¹ Ncotuyanda notweendelezya ziiyo zya Bbaibbele ncakuti tugwasye ‘bantu kuba basikwiiya’ kwiinda mukubagwasya kumvwisya akuzumina njiisyo zya Jwi lya Leza akuzyibelesya mubuumi bwabo. (Mt. 28:19, 20; 1 Tes. 2:13) Aboobo, ciiyo ceelede kuyaama ku Magwalo. Ikusaanguna cilakonzya kugwasya kubatondezya basikwiiya mbokujanwa lugwalo lumwi mu Bbaibbele lyabo. Aboobo, ino mbuti mbotukonzya kubelesya Magwalo kugwasya bantu bali boobu kuyaambele kumuuya?

2. Mbuti mbotukonzya kusala Magwalo mu Bbaibbele aayandika kubala akubandika?

² Amusale Magwalo Aakubala: Nomulibambila, amubone lugwalo alumwi lubikkidwe muciiyo mbolweendelana akaambo kali mukulangwa-langwa alimwi amusale ngomuyoobala akubandika nokucitwa ciiyo. Kanji-kanji kulayandika kwaabala Magwalo aayo atondezya nzyotusyoma. Imagwalo aatajisi kaambo kayandika tayeelede kubalwa. Amuzyilanganye zyiyandika alimwi abukkale bwasikwiiya aumwi.

3. Ino nkugwasyigwa kuli buti kuliko kwakubelesya mibuzyo, alimwi mbuti mbotunga twacita boobu?

³ Amubelesye Mibuzyo: Muciindi cakupandulula magwalo amu Bbaibbele kuli sikwiiya, amumuleke sikwiiya amupandulude. Mulakonzya kumukulwaizya kucita boobu kwiinda mukubelesya mibuzyo cabusongo. Ikuti mbolubelesyegwa lugwalo kakuzyibidwe, mulakonzya kubuzya mbuli lugwalo mbolugwasyilizya zili mumuncali. Muziindi zimwi, mubuzyo ugaminide naa mibuzyo iili mbwiibede ilakonzya kuyandika kugamika sikwiiya kukukosola makani munzila iili kabotu. Ikuti kakuyandika bupanduluzi bwatwaambo tumwi, ootu tulakonzya kwaambwa sikwiiya amana kwiingula.

4. Ino mbupanduluzi buli buti buyandika bwamagwalo ngotubala?

⁴ Amucuubye-Ubye: Muwezi uucizyi kuwezezya buta, inga wabelesya buyo munkwengwe omwe kuyasa munyama. Mbubwenya buyo, imwiiyi uucizyi tayandiki majwi manji kukankainzya kaambo. Ulakonzya kwaamba makani munzila nguba-uba alimwi iiluzi. Ziindi zimwi muyandika kumvwuntauzya mumabbuku aa Bunakristo kumvwisya lugwalo alimwi akulupandulula mbukweelede. (2 Tim. 2:15) Pele mutani kupandululi mbazu ili lyoonse yalugwalo nokucitwa ciiyo. Amubikkilizye buyo mbazu iiyandika kumvwisya kaambo kali mukulangwa-langwa.

5, 6. Mbuti mbotukonzya kubagwasya basikwiiya kubelesya Jwi lya Leza mubuumi bwabo, pele ncinzi ncotweelede kweeleba?

⁵ Acibagwasye: Ikuti kakuyandika, amumugwasye sikwiiya kubona mbuli magwalo amu Bbaibbele mbwakonzya kwaabelesya mwini. Mucikonzyanyo, nomulanga-langa Ba-Hebrayo 10:24, 25 asikwiiya uutana talika kujanika kumiswaangano ya Bunakristo, mulakonzya kubandika omwe muswaangano akumulomba kuti akajanike. Pele tamweelede kumusinikizya buya pe. Amulekele Jwi lya Leza limukulwaizye kubwezya ntaamu zyiyandika kukkomanisya Jehova.—Heb. 4:12.

⁶ Notucita mulimo wakugwasya basikwiiya ngotwakalaililwa, toonse ‘atuswiilile alusyomo’ kwiinda mukwaabelesya kabotu Magwalo.—Rom. 16:26.

Nzyomweelede Kwaamba Kujatikizya Mamagazini

Ngazi Yamulindizi Dec. 1

“Ncamasimpe kuti Buzuba bwa Leza bwa Lubeta bunooyoosya, sena muyeeya kuti kuli cisyomezyo citondezya kuti bamwi bantu baya kufwutuka? [Amulindile bwiinguzi.] Magwalo atusyomezya kuti lubeta lwa Leza talukabi lwacijaye-jaye pe.” [Mpoonya amubale 2 Tesalonika 1:6-8.]

Ngazi Yamulindizi Dec. 1

Munyika iino kuli bantu baliyanda alimwi kuli zintu zinji zinyonganya myoyo yesu. Sena kuli ncotunga twacita kutegwa tulibombye kukuyanda lwa Leza? [Amulindile bwiinguzi.] Eeyi magazini ilatondezya mbotunga twayiisya myoyo yesu kwiinda mukutaba acilongwe cikonzya kutunyonganya.” [Amubale 2 Ba-Korinto 6:14-16.]

Ngazi Yamulindizi Dec. 1

“Cintu comwe cipa bantu kwaandaana abanyama ncakuti bantu balizyi cintu cibotu acibi. Cuusisya ncakuti bantu banji balacita zintu zibi. Ino muyeeya kuti nkaambo nzi cibapa kucita cibi? [Amulindile bwiinguzi. Mpoonya amubale Jeremiya 17:9 naa Ciyubunuzyo 12:9.] Eeyi magazini yaamba cinga catugwasya kuzyiba alimwi akucita cili kabotu.”

Ngazi Yamulindizi Dec. 1

Kubona mapenzi aajanika akaambo kakunywa bukoko, bamwi bantu baleezyeezya naa nkubotu kunywa. Ino mwaabona buti makani aakunywa bukoko? [Amulindile bwiinguzi. Mpoonya amubale Tusimpi 23:31-33.] Eeyi magazini yaamba mpindu yakunywa cakutaindilizya.”