‘Kusaninwa Amajwi Aalusyomo Lwesu’

¹ Ikupona buumi bwakulyaaba kuli Leza kuyandika kusoleka canguzu. (1 Tim. 4:7-10) Ikuti twasola kupona buumi buli boobo munguzu zyesu, inga twawizuka alimwi akulebwa muciindi cisyoonto buyo. (Isa. 40:29-31) Imwi nzila motukonzya kujana nguzu kuli Jehova, nkwiinda ‘mukusaninwa amajwi aalusyomo lwesu.’—1 Timo. 4:6, Ci.

² Cakulya Cakumuuya Cili Abusani: Kwiinda mu Jwi lyakwe alimwi a “muzike musyomesi uucenjede,” Jehova ulatupa cakulya cakumuuya cili abusani. (Mt. 24:45) Sena tulacita cibeela cesu kutegwa tugwasyigwe ancico? Sena tulabala Bbaibbele abuzuba? Sena tulijisi ciindi cibikkidwe caciiyo cesu alimwi akuzinzibala kuyeeya? (Int. 1:2, 3) Cakulya cakumuuya cili boobo cili abusani cilatuyumya alimwi akutukwabilila kukutyompyezyegwa anyika ya Saatani. (1 Joh. 5:19) Ikuti miyeeyo yesu twaizuzya zintu zibotu alimwi akuzibelesya mubuumi bwesu, Jehova unooli andiswe.—Flp. 4:8, 9.

³ Alimwi Jehova ulatuyumya kwiinda mumiswaangano yambungano. (Heb. 10:24, 25) Imalailile aakumuuya alimwi akuyanzana kubotu nkotujana amiswaangano eeyi kulatuyumya kutegwa tutazungaani notusikilwa masukusyo. (1 Pet. 5:9, 10) Mukubusi umwi Munakristo wakaamba kuti: “Abuzuba nduunka kucikolo, elyo eci cilandityompya kapati akaambo kakuti ndeelede kukazya ziyanza zibi lyoonse. Pele miswaangano ili mbuli kasensa kamaanzi mucimpayuma kwalo nkondikatalusyigwa kutegwa ndicikonzye kuliyumya kucikolo buzuba butobela.” Elo kaka tulalongezyegwa akaambo kakusoleka nkotucita kuti katujanika kumiswaangano!

⁴ Kwaambilizya Kasimpe: Kukambaukila bamwi cakali mbuli cakulya kuli Jesu. Cakamupa nguzu. (Joh. 4:32-34) Mbubwenya buyo, ciindi notwaambila bamwi kujatikizya zisyomezyo zibotu zya Leza, tulabukulusyigwa. Alimwi ikujata bubi mumulimo kutupa kugamika moyo amiyeeyo yesu ku Bwami akuzilongezyo ziboola ino-ino. Masimpe kulatupa kukatalukwa.—Mt. 11:28-30.

⁵ Elo kaka tuli acoolwe cakugwasigwa abusani bwakumuuya bwalo Jehova mbwali mukupa bantu bakwe mazubaano! Atuzumanane kumutembaula cakukondwa.—Is. 65:13, 14.

Cibeela 5—Ikweendelezya Ziiyo zya Bbaibbele Ziyaambele

Ikuzyiba Mmakani Manji Buti Ayoobandikwa

¹ Ciindi naakali kuyiisya, Jesu wakabikkila maano kukulezya kwabasiciiya bakwe, kakanana kuli mbabo “mbuli mbubakakonzya kumvwa.” (Marko 4:33; Johane 16:12) Ncimwi buyo, bamayi ba Jwi lya Leza mazubaano beelede kulanga-langa bunji bwamakani ngobabandika aciiyo ca Bbaibbele. Iluzyibo alimwi abukkale bwa boonse bobile mwiiyi asikwiiya mpayeeme ibunji bwamakani akonzya kubandikwa.

² Amubagwasye Kuba Alusyomo Luyumu: Basikwiiya bamwi inga bayandika kukkala ziindi zyobile naa zyotatwe ikwiiya kutegwa bamvwisye makani amwi alo ibamwi basikwiiya ngobanga bamvwisya aciiyo comwe buyo. Cilayandika kapati kuti tugwasye sikwiiya kumvwisya makani, muciindi cakwiile kubindaana kubandika makani manji ngatakonzyi kumvwisya. Sikwiiya woonse uyandika ntalisyo njumu yalusyomo ndwajana mu Jwi lya Leza.—Tus. 4:7; Rom. 12:2.

³ Nomweendelezya ciiyo nsondo ansondo, amubelesye ciindi coonse ncomujisi kugwasya sikwiiya kumvwisya alimwi akuzumina nzyali mukwiiya mu Jwi lya Leza. Mutabindaanyi ciiyo cakuti sikwiiya tagwasyigwi akasimpe nkali mukuyiisyigwa. Amutole ciindi ceelede cakubikkila maano kutwaambo tupati-pati alimwi akulanga-langa magwalo ajisi twaambo tupati-pati motujana zintu zyili mukuyiisyigwa.—2 Tim. 3:16, 17.

⁴ Amubikkile Maano Kumutwe Wamakani Ngomubandika: Kunze lyakutayanda kubindaanya ciiyo, alimwi tatuyandi kunyonganizyigwa. Ikuti sikwiiya kajisi cilengwa cakwaambaula kapati kujatikizya makani aamugeme, inga twabikka bubambe bwakuti twaabandike camana ciiyo.—Muk. 3:1.

⁵ Kulubazu lumwi, busungu bwesu kukasimpe bulakonzya kupa kuti cituyumine ikuleka kwaambaula kapati ciindi caciiyo. (Int. 145:6, 7) Muziindi zimwi, kwaamba twaambo tumwi naa zyakatucitikila, kulakonzya kugwasya aciiyo, pele tatuyandi kuti eezyi kazivwula naa kazyili zilamfwu cakuti zyasinkila sikwiiya kujana luzibo lwini-lwini lwa njiisyo zyamu Bbaibbele zyantalisyo.

⁶ Kwiinda mukubandika cibeela ceelede aciiyo cimwi acimwi, tugwasya basikwiiya Bbaibbele kuti ‘beende mumumuni wa Jehova.’—Is. 2:5.