Muswaangano Wacooko Wamu 2005 wa “Atumumvwide Leza” wa Bakamboni ba Jehova
1 Mbwali Mwiiyi wesu Mupati, Jehova Leza ulabikka bubambe bwakuti katuswaangana kutegwa tulaililwe nzila zyakwe. (Is. 30:20, 21; 54:13) Ulacita oobu kwiinda muciinga camuzike musyomesi uucenjede, icibikka bubambe bwamiswaangano mbuli miswaangano yesu yacooko njotucita amwaka. (Mt. 24:45-47) Swebo tulimvwa mbuli sintembauzyo Davida walo wakaimba kuti: “Ndatembaula Jehova akati kambungano.” (Int. 26:12) Davida wakalizyi kabotu-kabotu mbociyandika ikuyiisyigwa a Jehova alimwi wakali kanzide ikuba akati kabantu Bakwe kufwumbwa nobakabungene.
2 Sena muyooba “akati kambungano” iyoojanika ku Muswaangano Wacooko mwaka uno wakuti “Atumumvwide Leza”? Ikuti kacili boobo, makani aaya aatobela ayoomugwasya nomulibambila kuyoojanika.
3 Amutalike Lino Kulibambila Kuyoojanika Mazuba Oonse: “Makanze aabasungu alaleta zilyo zinji.” (Tus. 21:5) Sena aaya majwi tatondezyi mbociyandika kapati kutalikila limwi lino kuba amakanze aakujanika kumuswaangano wacooko? Kutegwa Mutakaindwi cibeela nociba comwe cikatalusya kumuuya, amutalikile limwi lino kubikka bubambe buli boonse buyandika kutegwa mukajanike mazuba oonse otatwe. Ikuti kamuyanda kulomba ciindi cakuya kumuswaangano kuli sikumulemba mulimo, amucite oobo lino. Ikuti kamuyandika kubandika angomukwetene limwi uutasyomi kujatikizya makanze aanu, mutalindili mane ciindi camana. Kufwumbwa buyumu-yumu mbomukonzya kujana, amupaile kuli Jehova kamusyomede kuti uyoomugwasya ‘kuzuzikizya makanze aamumoyo wanu.’ (Tus. 16:3) Kuyungizya waawo, inga cabota kugwasya mbomwiiya limwi Bbaibbele kulibambila kuti bakajanike kucibeela cimwi acimwi.
4 Kwakoona: Kanji-kanji bakwesu balacita bubambe bwabo beni bwakuyookkala kubasazinyina naa kubeenzinyina bali mumadolopo mucitilwa miswaangano. Muminzi, ibakwesu balayaka zivwuka naa koona muzilabba zipati iziyakwa abakwesu balisungula kumuswaangano. Amiswaangano imwi kubelesyegwa maanda aawona basicikolo kutegwa aabo baboola kaboona mumo. Nobapegwa akoona kubakwesu naa basazinyina, tacili kabotu pe kuti basimuswaangano bakutolele mumbi kusamausya kwabakwesu kwiinda mukuzumanana kukkala kwamazuba aayindilila wamana muswaangano kutegwa balyookezye. Aaya maanda ngaciindi buyo camuswaangano. Aabo ibapegwa aakoona munzila eeyi, beelede kubona kuti balo abana babo balilemeka kuli balaaŋanda alimwi akutanyonyoona cili coonse naa kujata-jata mpasya naa kunjila mumasena aamuŋanda mobateelede. Ikuti naa uulaaŋanda waba abuyumuyumu kumakani aaya, ulakonzya kubazyibya cakufwambaana baku Cibeela Cilanga Aakoona kumuswaangano, eelyo ibakwesu aaba banoolibambide kugwasya.
5 Lugwasyo Lwaalubazu: Mwaapostolo Paulo wakaamba babunyina bamwi kuti ‘bakamuyumya-yumya.’ (Bako. 4:7-11 Ci) Nzila imwi mubakamugwasya Paulo yakali kumukutaukila milimo. Mbuti mbomukonzya ‘kuyumya-yumya’ bamwi kujatikizya muswaangano wacooko? Basikumwaya bacembeede, ibakompeme, aabo bali mumulimo waciindi coonse abambi inga bayandika kugwasyigwa acakweendela naa kwakoona. Ikusaanguna, basazinyina mbabajisi mukuli wakulanganya bantu bali boobo. (1 Tim. 5:4) Pele, ikuti kabatacikonzyi kucita oobo, basyomima inga bagwasya. (Jak. 1:27) Balangizi baciiyo cabbuku beelede kubonana abaabo ibali mukakamu kabo ikubona bayandika lugwasyo lwaalubazu kutegwa basinizye kuti bubambe bwacitwa muswaangano wacooko kautanasika.
6 Mafoomu Aakulomba Kwakoona: Ikuti foomu Yakulomba Kwakoona yatuminwa asikumwaya, Kkomiti Yamulimo Yambungano iyooyilanga-langa, kwiinda mukubelesya malailile aali afoomu. Beelede kulanga-langa naa penzi eelyo lilakonzya kulanganizyigwa ambungano. Ibubambe buli boobu mbwabaabo buyo ibajisi mpuwo mbotu, antoomwe abana babo ibalilemeka kabotu. Ikuti ba Cibeela Cilanga Aakoona kabajisi mibuzyo iili yoonse kumakani aaya, bayoozibya mulembi wambungano.
7 Kujanika Kumuswaangano Wacooko Uumbi: Kutegwa kakujanika busena bwakukkala, mabbuku, kwakoona, azimbi zili boobo zikkwene, basikumwaya balakulwaizyigwa kujanika kumuswaangano wacooko imbungano yabo nkoyibalilwa. Ikuti bukkale bwanu bwapa kuti mukajanike kumuswaangano wacooko uumbi, mwalombwa kubona mulongo wamwaka uno apeeji 5 kujatikizya miswaangano yamu Zambia kweelana amadeeti noiyoocitwa. Amwiitumine foomu ya Kulomba Kwakoona kubusena bwamuswaangano bweelede. Ikuti naa mudolopo eelyo kuyoocitwa miswaangano minji, amubone kuti afoomu yanu mwalemba madeeti alimwi amwaambo uuyoobelesyegwa kumuswaangano nkomuyoojanika.
8 Kulikwabilila Kuntenda: Imbunga ya Jehova caluyando ilapa malailile aagwasya kujatikizya miswaangano. Cilausisya kuti mumiswaangano iili mboibede mumyaka yainda, basimiswaangano bamwi bakasinyikilwa mpasya amulilo ooyo wakali kukonzya kweelebwa. Ntenda zijatikizya myootokala azyalo zyakajaya bantu banji. Bakwesu bapedwe nguzu alimwi abazyali, balombwa kuti kababikkila maano kutwaambo ootu tuyandika kapati kutegwa kuyanzana kwesu kumiswaangano kakukkomanisya ikutali kwamause akaambo kantenda zicitika akaambo kabuyamba.
9 Cakutadooneka, icipa kuti kakuba ntenda yamulilo kumiswaangano takuli kuti nkujikila munsi-munsi azivwuka pe, pele mbana ibateendelezyegwi basobana naa basosela nkuni. Aboobo, ikutegwa mukwabilile bakwesu akulikwabilila lwanu, mutalekeli bana banu kweendeenda kakunyina uubalanga; mutalekeli bana baniini kulanga meenda aawalauka nokuba ikubalekela kuti kabasosela nkuni. Balakonzya kuzicita kabotu eezyi kumunzi, pele busena bwamuswaangano mbumbi alimwi tweelede kucenjela kapati kutegwa kutabi ntenda iicitika. Bantu banji nobakkala antoomwe, ibana balayanda kusobana banooli abananyina. Balafwambaana kunyonganizyigwa, eelyo tabakonzyi kubona kuti inga kwaba ntenda, aboobo tatweelede kubasiila nkendulu, mancisi naa malambe. Penzi limwi ndyakuti ibazyali balasiya bana basyoonto muzivwuka kakunyina uubalanganya ciindi camasikati nobaunka kukuswiilila makani. Ibana beelede kukkala antoomwe abazyali babo ciindi makani naali mukupegwa. Iciindi basikugwasyilizya nobabona kuti kuli bana baile kweendeenda abusena aacitilwa muswaangano kakunyina ubalanganya, balakonzya kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano, eelyo munzila eeyi muyootondezya kuti ‘mulabayanda babunyina.’—1 Pet. 2:17.
10 Imbungano zimwi zibbadalila myootokala iibatola kumiswaangano. Kufwumbwa mootokala uubelesyegwa kutola basimuswaangano, weelede kuti kauzumizyidwe amulawo kweenda mumigwagwa alimwi kuuli kabotu. Mweelwe wabantu taweelede kwiindilila aawo mpounyamuda mootokala. Cilayandika kapati kuti mukwesu uusimide apegwe mukuli wakulanga-langa bubambe oobu. Uya kwiizyibya nkamu kujatikizya bubambe oobu, iciindi cakunyamuka alimwi abusena bwakukkwelela. Kufwumbwa buyumuyumu bukonzya kuba kunkamu eeyi buyoozibisyigwa kumukwesu ooyu walo uuyoopa malailile. Muciindi nokuyandika lugwasyo, lulayo naa kubamba kaambo, ibakwesu bapakamenyi bayoolilanganya penzi eeli.
11 Kuyandika Basikugwasyilizya: Jesu wakapa cikozyanyo cibotu cakubikkila maano cakulicesya kuzintu zyobayandika bamwi. (Lk. 9:12-17; Joh. 13:5, 14-16) Aabo balisungula kubeleka amiswaangano balatondezya muuya uuli boobo. Kutegwa zibeela zyamuswaangano zikalanganizyigwe, Makkomiti Amuswaangano wacooko ooko nkomubalilwa balatalika lino kutamba bakwesu kuti bakabeleke limwi. Ikapati cilayandika kuti baalu balisungule alimwi akuzumina kupegwa milimo. Ikulyaaba kwabo kuyoopa cikozyanyo cibotu cakuti boonse mumbungano batobele.—1 Pet. 5:2, 3.
12 Kwiinda mu “mubanzi uuzi uusyomekede,” Jehova Leza wabikka bubambe bwakuti bantu bakwe baswaangane kutegwa bapegwe malailile aakumuuya. (Lk. 12:42) Kubikka bubambe bwakuyoojanika mazuba oonse otatwe kuyandika kusolekesya pele kuletela mpindu. Masimpe Muswaangano Wacooko wamwaka uno wakuti “Atumumvwide Leza” uyooyumya makanze ngotujisi aakubelekela Jehova lino mane kukabe kutamani. Atube amakanze aakutobela lulayo lwasintembauzyo lwakuti: “Amulumbe Leza mumbungano.”—Int. 68:26.
Kabbokesi kali apeeji 3]
Ziindi Zyakutalika Akumanizya
Buzuba Bwakusaanguna a Bwabili
8:45 hrs. - 16:05 hrs.
Bwatatu
8:45 hrs. - 15:30 hrs.