Baswiilizi Bakulwaizyigwa Akuyumizyigwa

KUNYINA makani amapenzi ngobajisi, babelesi ba Leza beelede kujana luumbulizyo mumbungano ya Bunakristo. Kutegwa eeco cikonzyeke, ikapati baalu beelede kubona kuti makani alimwi alulayo lwabo zilakulwaizya. Ibaalu beelede kuba “macijilo aakulivuna kumuuwo aciyubilo cakucijila ciindi cakuwidwa imvula yamuyoba . . . mbuli tulongalonga twamaanzi munkanda injumu, mbuli cenzule campangala impati munyika iikataazya.”—Is. 32:2.

Ikuti kamuli baalu, sena makani aanu alakatalusya akuumbulizya? Sena alabayumya aabo ibasoleka canguzu kubelekela Jehova cakusyomeka? Sena alapa camba cakukakatila kucita kuyanda kwa Leza nokuba leelyo bantu banji nobatabikkili maano nikuba kubakazya? Ino mbuti kuti bamwi akati kabaswiilizi balityompedwe, balapenga akaambo kakubula mali, naa baciswa bulwazi bumwi butasilikiki? Mulakonzya ‘kubayumya banyoko amajwi aanu’—Job. 16:5.

Amubelesye coolwe ncomujisi mbomuli baambi ikugwasya banyoko kujana bulangizi akuyumizyigwa kwiinda muli Jehova abubambe mbwacitide.—Rom. 15:13; Ef. 6:10.

Amubayeekezye Baswiilizi Jehova Nzyaacita. Nzila iiyandika kapati mukuyumya-yumya nkwiinda mukutondezya Jehova mbwaakagwasya bantu bakwe mubuyumu-yumu kaindi.—Rom. 15:4.

Jehova wakaambila Musa kuti ‘amuyumye-yumye’ ‘akumupa camba’ Joshua ibana Israyeli kabatananjila munyika Yakasyomezyegwa yalo aciindi eeco yakakkedwe abasinkondonyina. Ino Musa wakacicita buti eeco? Kaliko Joshua, Musa wakayeekezya cisi coonse Jehova nzyaakabacitila nobakali kuzwa mu Egepita. (Dt. 3:28; 7:18) Musa alimwi wakabandauka ziindi Jehova naakabagwasya kuzunda bana Amori. Mpoonya Musa wakakulwaizya Joshua kuti: “Koyuma ube sicamba.” (Ciibalusyo 31:1-8) Nomuyanda kukulwaizya banyoko, sena mulabayumya kwiinda mukubayeekezya nzyaabacitila kale Jehova?

Zimwi ziindi bantu balatyompwa kapati amapenzi aabakatazya cakuti baladooneka naa kuli nobaya kutambula zilongezyo zya Bwami. Amubayeekezye kusyomeka kwazisyomezyo zya Jehova.—Jos. 23:14.

Mumasi amwi ibakwesu balijisi buyumu-yumu akaambo kamilawo yamfwulumende iikasya kukambauka makani mabotu. Mubukkale buli boobu, baalu basiluyando balakonzya kubagwasya basyominyina ikuyumizyigwa azintu zyakacitikila baapostolo ba Jesu Kristo. (Inc. 4:1–5:42) Alimwi kukankaizya nzila Leza mbwaakeenzya zintu kweelana ambokulembedwe mubbuku lya Esita, cakutadooneka kuyoobagwasya bakwesu ikuba acamba.

Zimwi ziindi bamwi bantu balajanika kumiswaangano yambungano pele kunyina nobayaambele. Balakonzya kabayeeya kuti Leza takonzyi kubalekelela nkaambo buumi bwabo musyule bwakali bubi kapati. Ambweni inga mwabaambila Jehova mbwaakacita ku Mwami Manase. (2 Mak. 33:1-16) Antela inga mwaamba zyabantu bamu Korinto wansiku bakacinca bukkale bwabo, ibakaba Banakristo aabo Leza mbaakaamba kuti bali luleme.—1 Kor. 6:9-11.

Sena bamwi bayeeya kuti imapenzi ngobajisi caamba kuti Leza tabayandi? Mulakonzya kubayeekezya zyakamucitikila Jobu ambwaakamupa bulumbu akaambo kakuti wakaima nji kulusyomo lwakwe muli Jehova. (Job. 1:1-22; 10:1; 42:12, 13; Int. 34:19) Basikuumbulizya Jobu basikubeja bakakazya ategwa Jobu weelede kuti kuli cibi ncaakacita. (Job. 4:7, 8; 8:5, 6) Mukwiimpana, nobakali kuyumya basikwiiya “akubasimya kuti batasiyi lusyomo,” Paulo a Barnaba bakati: “Tweelede kwiinda mumasukusyo manji-manji kutegwa tukanjile mubwami bwa Leza.” (Mili. 14:21, 22) Ncimwi buyo amazuba aano, mulakonzya kubayumya aabo ibali mumasunko kwiinda mukubatondezya kuti ikuliyumya mumapenzi cilayandika ku Banakristo boonse alimwi cilayandika kapati kuli Leza.—Tus. 27:11; Mt. 24:13; Rom. 5:3, 4; 2 Tim. 3:12.

Amubakulwaizye bamuswiilila ikuyeeya nzila oomo Jehova mwazuzikizya zisyomezyo zyakwe mubuumi bwabo. Kwiinda mukubayeekezya, balakonzya kubona Jehova mbwaabagwasya kale kubagama kweelana ambwaakasyomezya. Ku Intembauzyo 32:8, tubala kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.” Kwiinda mukubagwasya bamuswiilila kuyeeya Jehova mbwaabasololela akubayumya, muyoobagwasya ikubona kuti Jehova ulababikkila maano akuti uyoobagwasya ncobeni mumasunko aali oonse ngobajisi.—Is. 41:10, 13; 1 Pet. 5:7.

Amuzyikkomanine Leza Nzyacita Lino. Nomuyanda kuyumya-yumya banyoko, amubatondezye Jehova nzyacita lino aawa. Kuzikanana munzila iitondezya kuti zilamukkomanisya, kuyoopa kuti abalo bamuswiilila balimvwe mbubwenya.

Amulange-lange Jehova mbwatugwasya kuliyumya mumapenzi aamubuumi. Ulatutondezya nzila mbotu mbotweelede kupona. (Is. 30:21) Ulaamba ncokuli manyongwe, kutalulama, bucete, malwazi alufwu akutwaambila mbwayoogusya zintu zyoonse eezyi. Watupa nkamu yabunyina iijisi luyando. Ulatupa coolwe cilibedelede cakupaila. Ulatupa coolwe cakuba Bakamboni bakwe. Ulatuyubunuda kuti Kristo wakabikkwa kale acuuno cabwami kujulu akuti mazuba aakumamanino aabukkale oobu alaafwaafwi kumana.—Ciy. 12:1-12.

Kuyungizya kuzilongezyo eezyo, kuli miswaangano yambungano amiswaangano mipati. Mwanookanana zyazipego eezyi munzila iitondezya kulumba nkomujisi, muyoobayumya kuzumanana amakanze aakutaleka kubungana abanyina.—Heb. 10:23-25.

Makani aapa bumboni bwazilongezyo zya Jehova mukusoleka kwesu mumulimo wamumuunda aalo alayumya-yumya. Mumwaanda wamyaka wakusaanguna Paulo a Barnaba nobakali kuya ku Jerusalemu, ‘bakakkomanisya babunyina boonse’ kwiinda mukwaamba makani akusanduka kwabantu bamasi. (Inc. 15:3) Andinywe mulakonzya kubakkomanisya bakwesu kwiinda mukubaambila zyakuluula zikulwaizya.

Ibantu bayooyumizyigwa kapati nobagwasyigwa kubona mboziyandika eezyo nzyobacita. Amubalumbaizye kulubazu ndobajisi mumulimo wa Bunakristo. Amubalumbaizye aabo ibabeleka asyoonto akaambo kakucembaala akuciswa pele ibaliyumya cakusyomeka. Amubayeekezye kuti Jehova talubi luyando ndobatondezya akaambo kazina lyakwe. (Heb. 6:10) Lusyomo lusunkidwe lulayandika kapati. (1 Pet. 1:6, 7) Ibakwesu bayandika kuyeekezyegwa makani aaya.

Amukanane Cakusinizya Kujatikizya Bulangizi Bwakumbele. Zisyomezyo zyakasololelwa amuuya zyazintu ziboola zilakulwaizya kapati kuli boonse ibamuyanda Leza. Ambweni banji akati kabaswiilizi ziindi zinji bali kwaamvwa makani aaya. Pele kwiinda mukulumba nkomutondezya nomukanana zyazisyomezyo eezyi, mulakonzya kuzyaamba buyandika, kukulwaizya bantu kuba alusyomo mukuzuzikizyigwa kwazyo akupa kuti abalo batondezye kulumba kapati. Kubelesya nzyomwaiya mu Cikolo Camulimo Weendelezyegwa a Leza kulakonzya kumugwasya kucita boobo.

Jehova lwakwe mwini ngu Sikuyumya-yumya Mupati alimwi a Sikupa nguzu kubantu bakwe. Nokuba boobo, mulakonzya kubelekela antoomwe anguwe mukwaambilizya zilongezyo zili boobu. Nomukanana kumbungano, amucibelesye kabotu coolwe kucita boobo.