Amubabikkile Maanu Ibamwi—Kwiinda Mukucinca Makani Kweelana Abukkale
1 Mwaapostolo Paulo wakapa cikozyanyo cibotu mukucinca mubandi wamakani mabotu lyoonse kweelana abukkale ambobakali kuzyibona zintu bakali kumuswiilila. (1 Kor. 9:19-23) Tweelede kusolekesya kucita mbubwenya. Ikuti twalibambila kabotu, bunji bwaziindi tulakonzya kucinca nzila zyacitondezyo zijanika mu Mulimo Wesu wa Bwami kutegwa zyeendelane anzyobayandika bantu bali mucilawo cesu. Notusika amunzi, tulakonzya kubona zintu zimwi zitondezya nzyobabikkila maano bali aŋanda akuzibikkilizya ezyo mumubandi wesu. Nokuba boobo, kuli nzila aimwi motukonzya kucinca makani mumulimo wesu.
2 Atucince Makani Kweelana Anzyobaamba Bali Aŋanda: Notukanana makani mabotu, bunji bwaziindi tulabuzya mubuzyo akulomba bali aŋanda kwiingula. Ino bwiinguzi mububona buti? Sena muzyibide kutabikkila maanu akuzumanana buyo amakani ngomwalibambila? Naa sena nzyomwaamba zitondezya kuti mulabikkila maanu kubwiinguzi bwabali aŋanda? Ikuti kamubikkila maanu kapati kuli zyeezyo nzyobaamba bamwi, mulakonzya kubelesya mibuzyo iiyungizyidwe yabupampu kutegwa muzyibe zini-zini zili mumizeezo yabo. (Tus. 20:5) Aboobo mulakonzya kubikkila maanu kumulumbe wa Bwami uugaminide zyeezyo nzyabikkila maano uumuswiilila.
3 Eeci ciyanda kuti katwaangulukide kwaambaula twaambo kunze lyatooto ntotwalibambilide kubandika. Ikuti twatalika kwiinda mukwaamba penzi lyaambwa mumuteende naa muli sikapepele pele uuli aŋanda waamba cakacitika kubusena ooko naa kaambo kamujatikizya, ikubikkila maanu kapati kukugwasya uuli aŋanda kuyootupa kugamika mubandi wamu Bbaibbele kukaambo nkayandika kapati.—Flp. 2:4.
4 Atucince Ntalisyo Yesu: Ciindi uuli aŋanda naabuzya mubuzyo ngotutakonzyi kwiingula mpoonya-mpoonya, cilainda kugwasya kuyakuzumanana amubandi ciindi cimbi twaakumana kulanga-langa twaambo atumwi tujatikizya kaambo aako. Tulakonzya alimwi kwaabila mabbuku aakapandulula cakulomya kaambo aako. Zyoonse eezi zitondezya kuti tulabikkila maanu kukugwasya bamwi kumuzyiba Jehova.—2 Kor. 2:17.