MUMYAAMBO yandilyo yakusaanguna, Ibbaibbele libelesya bbala lya Cihebrayo lyakuti Sheʼohlʹ alimwi alya Cigiliki lyeelene andilyo lyakuti Haiʹdes iziindi ziinda ku 70. Imabala aaya obile oonse aliswaangene alufwu. Ima Bbaibbele amwi asandulula mabala aaya kuti “cuumbwe,” “helo” naa “cilindi.” Nokuba boobo, mumyaambo inabunji, kunyina mabala aacaamba kabotu cini caambwa amabala aaya aa Cihebrayo a Cigiliki. Ino mabala aaya ncinzi cini ncaamba? Atubone mbwaabelesyegwa muzibalo zyamu Bbaibbele ziindene-indene.

Ibbuku lya Mukambausi 9:10 lyaamba kuti: “Taakwe milimo niiba miyeeyo neluba luzibo nebuba busongo mukabanda [Sheʼohlʹ] moyoonjila.” Sena eeci caamba kuti Sheʼohlʹ caamba kabanda keni naa namaumbwe nkotwakazikka muyandwa wesu? Peepe. Ibbaibbele nolyaamba namaumbwe wini naa kabanda, libelesya mabala aa Cihebrayo a Cigiliki aambi ikutali Sheʼohlʹ alimwi a Haiʹdes. Alimwi Bbaibbele talibelesyi bbala lyakuti Sheʼohlʹ ikwaamba namaumbwe naa cilindi muzikkwa bantu banji antoomwe.—Matalikilo 49:30, 31.

Aboobo ino Sheʼohlʹ mbusena buli buti? Ijwi lya Leza litondezya kuti mabala aakuti Sheʼohlʹ alimwi a Haiʹdes aamba cintu ciinda naaba acilindi muzikkwa bantu banji. Mucikozyanyo, ibbuku lya Isaya 5:14 lyaamba kuti “cikalilo cabafwa [Sheʼohlʹ] calikomezya, caasamuna mulomo waco cakuteelekeka.” Nokuba kuti eeco citegwa Sheʼohlʹ munzila imwi inga twaamba kuti camena kale bantu bafwide batabaliki, cilibonya kuti ciciyanda abambi. (Tusimpi 30:15, 16) Mukwiimpana anamaumbwe wini uunga wazikkwa bantu bafwide bali mbobabede amane wazula, “lufu [Sheʼohlʹ] alunyonyooko tazikkuti.” (Tusimpi 27:20, BT) Busena butegwa Sheʼohlʹ kunyina nobuzula pe. Tabweelekeki pe. Aboobo Sheʼohlʹ a Haiʹdes tabuli busena bwini ibuli kubusena bumwi pe. Muciindi caboobo, ngunamaumbwe muya bantu bafwa, ibusena bwacikozyanyo imoona banamaleya banabunji mulufwu.

Injiisyo ya Bbaibbele yabubuke itugwasya kuyungizya kuteelela ncaamba mabala aakuti Sheʼohlʹ alimwi a Haiʹdes. Ijwi lya Leza lyaamba kuti mabala aakuti Sheʼohlʹ alimwi a Haiʹdes aswaangene alufwu imulangilwa kuyooba bubuke.a (Jobu 14:13; Incito 2:31; Ciyubunuzyo 20:13) Alimwi Jwi lya Leza litondezya kuti mu Sheʼohlʹ naa Haiʹdes tamuunki buyo bantu bali kubelekela Jehova, pele alimwi abanji akati kabaabo batali kumubelekela. (Matalikilo 37:35; Intembauzyo 55:15) Aboobo Bbaibbele liyiisya kuti kuyooba ‘kubuka kwabafwide baluleme abataluleme.’—Incito 24:15.

INO Buzuba Bwalubeta mubuyeeyela buti? Bamwi bayeeya kuti bantu batabaliki banooli mumulongo eelyo umwi aumwi uyooletwa kumbele lyacuuno cabwami ca Leza. Mulubeta oolo aumwi uyoowambilwa ciyoomucitikila. Ibamwi bayoolumbulwa abuumi bwamu paradaiso kujulu, pele bamwi bayoosinganizyilwa kukupenzyegwa kutamani. Pele icaamba Bbaibbele kujatikizya ciindi eeci ciliindene kapati. Jwi lya Leza lyaamba buzuba oobo kuti nciindi cabulangizi akubukulusyigwa, ikutali ciindi ciyoosya pe.

Kubbuku lya Ciyubunuzyo 20:11, 12 tubala bupanduluzi bwa Buzuba Bwalubeta mbwaakalemba mwaapostolo Johane kuti: “Ndakabona cuuno cipati cituba ayooyo uukede alincico. Kuzwa kubusyu bwakwe nyika ajulu zyoonse zyakacija, nkabela masena aazyo taakakajanwa limbi pe. Mpawo ndakabona bafu boonse, bapati abaniini, baliimvwi kunembo lya-Leza, elyo mabuku akavununwa, alimwi kwakavununwa ibbuku limwi, ndebbuku lyabuumi. Nkabela bafu bakabetekwa mbuli makani aalembedwe mumabuku, mbuli milimo yabo.” Ino Mubetesi waambwa aawa nguni?

Jehova Leza ngomubetesi wabanamaleya mupati. Nokuba boobo, mukuli wini wakubeteka waupa kuli umbi. Ikweelana abbuku lya Incito 17:31, imwaapostolo Paulo wakaamba kuti Leza “wabika buzuba mbwati kabeteke nyika mubululami, kumwaalumi oyo ngwasungwide.” Ooyu Mubetesi uusungwidwe naa uubikkidwe ngu Jesu Kristo wakabusyigwa. (Johane 5:22) Pele ino Buzuba Bwalubeta buyootalika lili? Ino butola ciindi cilamfwu buti?

Ibbuku lya Ciyubunuzyo litondezya kuti Buzuba Bwalubeta buyootalika yaakwiinda nkondo ya Harmagedoni, iciindi bukkale bwa Saatani anyika bwaakunyonyoonwa.a (Ciyubunuzyo 16:14, 16; 19:19–20:3) Yaakwiinda Harmagedoni, Saatani amadaimona aakwe bayoowangwa mumulindi uutagoli kwamyaka iili cuulu. Iciindi eeco, ibalelinyina kujulu ibali 144,000 bayooba babetesi alimwi bayooyendelezya kabali bami “antoomwe a-Kristo myaaka iili cuulu.” (Ciyubunuzyo 14:1-3; 20:1-4; Ba-Roma 8:17) Buzuba Bwalubeta tacili cintu cicitwa cakufwambaana mumawoola aali 24 pe. Buyootola myaka iili cuulu.

Lyaciindi eeco cilampa myaka iili cuulu, Jesu Kristo ‘uyoobeteka baumi abakafwa.’ (2 Timoteo 4:1) “Baumi” banooli “inkamu impati” yabantu bayoofwutuka Harmagedoni. (Ciyubunuzyo 7:9-17) Imwaapostolo Johane alimwi wakabona “bafu boonse . . . baliimvwi kunembo lya-Leza” mulubeta. Mbubwenya Jesu mbwaakasyomezya, ‘ibali muzyuumbwe mbayeeya Leza bayoomvwa jwi lya Kristo akuzwa mulinzizyo’ kwiinda mububuke. (Johane 5:28, 29; Incito 24:15) Pele ino lubeta lwabantu boonse lunooyeeme anzi?

Ikweelana acilengaano camwaapostolo Johane, “mabuku akavununwa” alimwi “bafu bakabetekwa mbuli makani aalembedwe mumabuku, mbuli milimo yabo.” Sena mabbuku aayo alembedwe milimo yabantu yamusyule? Peepe, lubeta talunooyeeme azintu nzyobakacita bantu kabatanafwa. Ino tuzyi buti oobo? Ibbaibbele lyaamba kuti: “Mufu waangunwidwa mulandu wazibi.” (Ba-Roma 6:7) Aboobo aabo babusyigwa balabuka kabanyina mulandu wazibi nzyobakacita kabatanafwa. Aboobo mabbuku ayelede kwaamba milazyo ya Leza iimbi njayoopa. Ikutegwa bakapone kukabe kutamani, basikufwutuka Harmagedoni alimwi abaabo bayoobusyigwa bayooyandika kutobela milawo ya Leza, ikubikkilizya amilazyo iimbi mipya njayoopa Jehova lyamyaka iili cuulu. Aboobo bantu bayoobetekwa kweelana azintu nzyobayoocita lya Buzuba Bwalubeta.

Lya Buzuba Bwalubeta bantu batabaliki bayoopegwa coolwe cakusaanguna cakwiiya zyaluyando lwa Leza alimwi akulutobela. Eeci caamba kuti kunooli mulimo wakuyiisya mupati. Mmasimpe, “bantu baluwa balaiya bululami.” (Isaya 26:9) Nokuba boobo, tabali boonse banoolisungwide kucita kuyanda kwa Leza. Ibbuku lya Isaya 26:10 lyaamba kuti: “Muntu sizibi afwidwa buuya, taiyi bululami pe. Munyika yabulome uyoopilinganya milimo yakwe. Takoobona bulemu bwa-Jehova pe.” Ibantu aaba babi bayoojaigwa kukabe kutamani lya Buzuba Bwalubeta.—Isaya 65:20.

Buzuba Bwalubeta bwaakugola, bantunsi ibanoocipona banooli ‘babuka’ ncobeni kubuumi kabali bantunsi balondokede. (Ciyubunuzyo 20:5) Aboobo lya Buzuba Bwalubeta banamaleya bayoobukulusyigwa akuba muciimo cakumatalikilo cakulondoka. (1 Ba-Korinto 15:24-28) Mpoonya musunko wamamanino uyootobela. Saatani uyoowangununwa muntolongo akuzumizyigwa kweena banamaleya alimwi kaindi kamamanino. (Ciyubunuzyo 20:3, 7-10) Kuli baabo ibayoomukazya, ciyoozuzikizyigwa cakumaninina icisyomezyo cili mu Bbaibbele cakuti: “Balulami bayookona nyika, bayookala alinjiyo lyoonse.” (Intembauzyo 37:29) Inzya, Buzuba Bwalubeta buyooleta zilongezyo kubanamaleya boonse basyomeka!