Mutaleki Luyando Lwanu Lwakusaanguna
1 Jesu iwakasumpulwa wakalaya mbungano yamumwaanda wamyaka wakusaanguna yaku Efeso kuti: “Mulandu umwi ngunjisi kulinduwe ngooyu, wakuti wakaleka luyando lwako lwakusaanguna.” (Ciy. 2:4) Cilibonya kuti, bunji bwabo luyando lwakusaanguna ndobakajisi kuli Jehova lwakalimanide. Notwakali kwiiya kasimpe, twakaba aluyando lupati kuli Leza akuli basimukoboma, alimwi eeci cakatupa kwaambilizya cabusungu bulangizi bwesu bupya mbotwakajana. Ino ncinzi ciyootugwasya kutegwa luyando lwesu lwakusaanguna lutamani alimwi akuti tutatolwaali mumulimo?
2 Ciiyo Cesu Tobeni Alimwi Akujanika Kumiswaangano: Ino ncinzi cakatupa kuba aluyando kuli Leza akuli basimukoboma ciindi notwakatalika kwiiya kasimpe? Sena tiizyakali zyeezyo nzyotwakaiya kujatikizya Jehova kuzwa mukwiiya kwesu kwa Magwalo? (1 Joh. 4:16, 19) Aboobo, kutegwa luyando lwesu “kaluciya buvula,” tweelede kuzumanana kuba aluzibo lwini-lwini, kuvwuntauzya mu “makani malamfu aabulondo bwa-Leza.”—Flp. 1:9-11; 1 Kor. 2:10.
3 Kuzumanana kuba abubambe bubotu bwaciiyo cesu tobeni kulakonzya kuba cintu cikatazya kapati mumazuba aano aakumamanino aazwide kulibilika alimwi azintu zinji zinyonganya. (2 Tim. 3:1) Tweelede kuzandula ciindi icakulya cakulya cakumuuya. Kujanika lyoonse kumiswaangano yambungano ncintu ciyandika kapati, ikwaambisya ‘mbotukubwene kuti buzuba bwa-Kristo buli afwaafwi.’—Heb. 10:24, 25.
4 Mulimo: Kutola lubazu cabusungu mumulimo wakukambauka kulatugwasya kuzumanana kuba aluyando lwesu lwakusaanguna kuli Leza. Notukambauka makani mabotu, tuliyeezya zisyomezyo zya Leza zyaluyando, alimwi eeci cilatugwasya kuyumya bulangizi bwesu aluyando ndotujisi. Kuyiisya kasimpe kamu Bbaibbele kuyandika kuti twavwuntauzya kutegwa tumvwisye, alimwi eeci ciyumya lusyomo lwesu.—1 Tim. 4:15, 16.
5 Jehova uleelela kupegwa zintu zyoonse, kubikkilizya aluyando lwesu. (Ciy. 4:11) Mutalekeli luyando lwanu kuti luceye pe. Amuzumanane kuyumya luyando lwanu lwakusaanguna kwiinda mukucita cabunkutwe ciiyo canu ca Bbaibbele alimwi akwaambilizya cabusungu kuli bamwi zintu nzyomuyandisya.—Rom. 10:10.