Mbomukonzya Kuzwidilila Mumulimo Wabupainiya
1, 2. Ino ncinzi ciyandika kutegwa muzwidilile mumulimo wabupainiya bwaciindi coonse?
1 Sena bupainiya ngomulimo wanu waciindi coonse? Ikuti kamuli mupainiya naa mukambausi wa Bwami waciindi coonse, kakunyina kuzumbauzya muyanda kuti muzwidilile. Pele kuzwidilila takwaambi buyo kucikonzya kutola ciindi cinji mumulimo umwi. Muntu uuyanda kuzwidilila weelede kuzumina kuyiisyigwa alimwi akuyungizya luzibo lwakwe cakutaleka.
2 Aboobo, ino mbuti mbomukonzya kuzumanana kamuli bapainiya kumwi kamuya ambele mumulimo wanu? Kuli mibuzyo iiyandika kapati njomunga mwalanga-langa.
3, 4. Ino nciiyo nzi ncotukonzya kwiiya kuzwa ku Mwami Davida?
3 Ino Cilongwe Cangu a Leza Nciyumu Buti?: Cimwi cazintu ziyandika kapati mukuzwidilila kamuli bapainiya, nkuba acilongwe ciyumu a Jehova Leza. Mumakani aaya, tulakonzya kwiiya ciiyo kuzwa kuli sintembauzyo Davida. Wakakombelezya kuti: “Kondizibya inzila zyako, O Jehova; kondiiyisya myeendelo yako. Kondeenzya mulusinizyo lwako, undiiyisye, nkaambo nduwe Leza walufutuko lwangu; buzuba boonse ndakulangila.”—Int. 25:4, 5.
4 Davida wakali kusyoma cakumaninina muli ‘Leza walufwutuko lwakwe.’ Wakali kuyanda kuti Jehova amuyiisye alimwi ‘akumuzibya inzila Zyakwe.’ Sena mwalubona luyandisisyo ndwaakajisi Davida lwakuyanda kukkomanisya Leza? Ooku tiikwakali kulombozya kwakwiinzya buyo mulawo pe, nkaambo Davida wakati: “Buzuba boonse ndakulangila.”
5. Ino ncinzi ciyandika kapati mukuyumya cilongwe cesu a Leza?
5 Pele ino mbuti mbomukonzya kuyumya cilongwe camusyobo ooyu a Jehova? Amubone kuti majwi aambwa aaya, mmajwi ngaakaamba Davida mumupailo. Masimpe, kubandika kwiinda mumupailo nentalisyo yakuba acilongwe cibotu a Leza. Alimwi tulakonzya kuumbulizyigwa kuziba kuti takuyandiki buya kuti mane tupangane ciindi naa buzuba bwakubandika a Taata wesu wakujulu. Tulakonzya kupaila kuli nguwe ciindi cili coonse kweelana abwakaamba Davida kuti: “Ndikwiilila nduwe buzuba boonse.” (Int. 86:3) Naaba Mwana wa Leza walo wakapona anyika kali muntu uulondokede, wakalizi kuti kunyina naakali kukonzya kuzwidilila kakunyina lugwasyo kuzwa kuli Wisi. Jesu wakali kupaila kulinguwe buzuba boonse—mafwumo-fwumo, masikati alimwi amasiku oonse.—Mk. 1:35; Lk. 11:1; 6:12.
6, 7. Ino ncinzi ncaakaamba umwi mupainiya uusimide alimwi sena inga mwauzumina muzeezo ooyo?
6 Mbotuli Banakristo, tuyandika kutobela cikozyanyo ca Jesu ikuti katuyanda kuzwidilila mumulimo wesu. (Heb. 5:7) Kujatikizya mupailo, umwi Munakristo mukaintu walo wazwidilila kali mupainiya kwamyaka iili 30 wakaamba boobu: “Mupailo nduubona kuti ulayandika kapati kulindime ikuti kandiyanda kuzwidilila mubupainiya. Wandigwasya kusyoma Jehova cakumaninina kandizi kuti nsikonzyi kubucita munguzu zyangu. Ndilalomba lyoonse kuli Jehova kuti andigwasye kutegwa ndizumanane.”
7 Masimpe, kutegwa muzwidilile mumulimo wabupainiya, mweelede kuba acilongwe ciyumu a Jehova lyoonse, kumusyoma cakumaninina kwiinda mumupailo. Nokuba boobo, ngooyu mubuzyo aumwi uuyandika ngomweelede kulibuzya.
8. Ino nkaambo nzi bupainiya ncobukonzya kwaambwa kuti ncitondezyo caluyando?
8 Ino Luyando Lwangu Kubantu Ndupati Buti?: Mulimo wabupainiya ncitondezyo caluyando. Nkaambo nzi? Nkaambo mulimo waciindi coonse uyanda muuya wakulyaaba. Mbomuli bapainiya, lyoonse mulaaba ciindi anguzu zyanu kutegwa mugwasye bamwi. Pele kutegwa muzumanane kucita boobu, mweelede kuti kamubikkila maanu kapati kuli nzyobayandika bamwi. Jesu naakali anyika, wakatondezya luyando lwamusyobo ooyu kubantu. Mucikozyanyo, ciindi cimwi walo abasikwiiya bakwe bakali mulweendo mubwaato kwiinka kubusena bwakanyina bantu kuti ‘bakalyookezye aaniini.’ Nokuba boobo, makamu aabantu akababeelela kusika. “Lino naakazwa wakabona makamu manji aabantu, elyo wakabafwida luzyalo, nkaambo bakabaanga nimbelele zitakwe mweembezi, nkabela wakatalika kubaiisya makani manji.”—Mk. 6:30-34.
9. Ino nkaambo nzi ncokuyandika kuba amakanze mabotu aakubeleka mulimo wabupainiya ?
9 Mbubwenya mbuli Jesu, mbotuli bapainiya tweelede kuba aluyando lwini-lwini kubantu. Luyando lwamusyobo ooyu lutukulwaizya kubeleka kusikila mpotugolela kutegwa tubagwasye. Mbubonya mbuli mulembi umwi ciindi cimwi mbwaakaambila Jesu kuti: “Kuyanda nguwe [Leza] amoyo woonse akukuyeeya koonse akunguzu zyoonse, akuyanda mweenzinyoko mboliyanda omwini, kulainda kutenta mutunta uuenzene wacipaizyo azituuzyo zyoonse.” (Mk. 12:33) Majwi aaya atugwasya kuziba kuti tazili buyo zeezyo nzyotucita mumulimo wesu iziyandika, pele alimwi akaambo ncotuucitila.
10, 11. Ino mbuti kuba aluyando mbuli lwakajisi Kristo kubantu mbokubagwasya bapainiya kuliyumya mumulimo?
10 Mbomuli bapainiya, mutola ciindi cinji mumulimo wakukambauka akugwasya bamwi kuba basikwiiya ikwiinda ncobatola bamwi. Pele alimwi mulaswaangana abantu banji. Ino mulimvwa buti kujatikizya mbabo? Umwi mupainiya wakaamba kuti: “Ndilizi kuti luyando mmucelo wamuuya wa Leza. Aboobo ikuti nondatali kulujisi, nentali mukasimpe nokuba kuzwidilila kandili mupainiya. Luyando lundipa kubabikkila maanu bantu, kuziba nzyobayandika, alimwi ndilalumba kuti bantu balalukkomanina luyando. Masimpe, kuli ziindi luyando ndotujisi kubantu noluyoosunkwa akaambo kabukkale bwabo. Eeci nceciindi nesolekesya kuswiilila alimwi akukkazika moyo.”
11 Sena oobo mbomulimvwa kujatikizya bantu bali mucilawo canu? Kutegwa muzwidilile kamuli mupainiya, mweelede kubayanda bantu. (1 Tes. 2:6-8) Nokuba boobo, kutegwa mucikonzye mumulimo wanu wabupainiya, muyandika kuba amulongo uuli kabotu. Aboobo, amulibuzye kuti:
12. Ino ncinzi ciyandika kutegwa mupainiya auzuzikizye kabotu mulimo wakwe?
12 Sena Ndijisi Mulongo Uuli Kabotu?: Kutegwa azumanane mumulimo waciindi coonse cakuzwidilila, mupainiya weelede kuti kalibambila kabotu. Ikuti kamutajisi mulongo mubotu, mulimo wabupainiya ulakonzya kumucima. Masimpe, kuba amulongo uumupa kutola ciindi cili mbocibede mumulimo wamumuunda tacili ncecintu cilikke cibikkilizidwe.
13. Ino kuli kwiindana kuli buti akati kamulongo alimwi amulongo uuli kabotu?
13 Mupainiya uyandika mulongo uuli kabotu. Sena kuli ngomujisi? Inga cabota kulibuzya kuti: Sena nditola ciindi ceelede muzibeela ziindene-indene zyamulimo? Sena inga ndaamba kuti ndilasolekesya kukambaukila bantu bali mucilawo? Sena ndilauncinca mulongo wangu kutegwa ndikonzye kuswaya bantu ciindi nobali aŋanda? Sena ndilazwidilila nepilukila? Jesu wakaamba kuti: “Nkaambo kaako kamuya mukabaiisye bantu . . . amubaiisye.” (Mt. 28:19, 20) Kukambauka alimwi akuyiisya nzibeela zyamulimo wesu ziyandika kapati. Sena mwaabila buyo mabbuku, naa mulapilukila kubantu boonse batondezya luyandisyo tacikwe makani naa batambula mabbuku aamba zyamu Bbaibbele naa pe? Mubufwaafwi, sena mucibelesya kabotu ciindi ncomujisi?
14, 15. Ino nduzibo luli buti bapainiya ndobeelede kubikkila maanu kuba aandulo, alimwi ino ncinzi cikonzya kubagwasya kucita boobo?
14 Sena Ndili Mwiiyi Uuya Ambele?: Ooyu mmubuzyo aumwi uuyandika kapati. Kuli 2 Timoteo 4:2, Paulo wakalemba kuti: ‘Kokambauka makani lyoonse, kowajatisya muciindi ceelede aciteelede, cakukkazikisya moyo loko acaluzibo mukuyiisya.’ Kutegwa bakambauke makani mumbungano naa mumuunda, bapainiya bazwidilila balasoleka kuba alimwi akusensemuna luzibo lwabo lwakuyiisya. Ino nkaambo nzi Paulo ncaamba kuti kuyiisya kweelede kucitwa caluzibo? Nkaambo kuyiisya kuyandika luzibo alimwi kweelede kucitwa cakwiinduluka-induluka
15 Ino mbuti mbomuyooyungizya luzibo lwanu lwabwiiyi? Mwaapostolo Paulo wiingula kuti: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.” (1 Tim. 4:15) Inzya, bapainiya beelede kwaaba ciindi kukucita ciiyo cabo ca Bbaibbele alimwi akutelaika. Eeci cilabikkilizya akubelesya nzila zigwasya zijanwa mumabbuku mbuli lya Kukambitsirana za m’Malemba, Amugwasyigwe Alwiiyo Lujanwa mu Cikolo Camulimo Weendelezyegwa a Leza alimwi amu Mulimo Wesu wa Bwami.
16. Amwaambe mubufwaafwi izintu zikonzya kugwasya kuzwidilila mumulimo wabupainiya.
16 Aboobo, kutegwa muzwidilile mumulimo wabupainiya, amuzumanane kuyumya cilongwe canu a Jehova Leza. Eeci ciyoomukulwaizya kuba alimwi akutondezya luyando lwini-lwini kubantu. Masimpe, kutondezya luyando oolu takujatikizyi buyo kubikkila maanu kubulamfwu bwaciindi ncomutola mumulimo, pele alimwi kweelede kuti kakuli mpindu muciindi ncomutola mumulimo. Munzila nzi? Kwiinda mukusolekesya kusikila mpomugolela kukambaukila bantu banji mulumbe wa Bwami. Camamanino, amuzumanane kuya ambele kuba bayi kwiinda mukwiiya nzila ziindene-indene zyakutalisya mubandi kubantu mumulimo alimwi akwiiya Bbaibbele cabunkutwe kamujisi makanze aakuya ambele muluzibo lwanu lwakuyiisya.