Luyando—Inzila Iipa Kuzwidilila Kapati Mumulimo
1 “Amuboole kulindime . . . ndime enti kamulemunune.” (Mt. 11:28) Majwi aakkomanisya aaya akatondezya luyando lupati ndwaakajisi Jesu kubantu. Mbotuli babelesi Banakristo, tukanzide kwiiya Jesu mukutondezya luyando ndotujisi kubantu bakatede kunyika iitakwe luyando. Ino mbuti mbotukonzya kucita boobo notutola lubazu mumulimo wesu wakukambauka?
2 Kwiinda Mukubandika Abantu: Luyando ndwaakajisi Jesu kubantu lwakamupa kubelesya coolwe cili coonse kukambauka makani mabotu. (Joh. 4:7-14) Luyando luyootugwasya kuleka kweenkeenka kucita bukambausi bwamukwiizya. Musimbi umwi wamyaka iili cisambomwe wakapa bukamboni kumukaintu umwi wakakkede kumbali lyakwe muŋanda yakulindilila kubona musilisi. Ino ncinzi cakamupa kucita boobo? Wakapandulula kuti, “Mukaintu ooyu wakali kulibonya kuti uyanda kuziba zijatikizya Jehova.”
3 Tulakonzya kutondezya kubabikkila maanu bantu kwiinda mukumwetamweta kwini-kwini alimwi akubandika ajwi lyabulongwe. Kuswiililisya nzyobaamba bamwi, kuziba nzyobabikkila maanu alimwi akubabikkila maanu kwini-kwini akwalo kutondezya luyando. (Tus. 15:23) Mukwiiya Jesu, tweelede kukankaizya mulumbe wa Bwami uukulwaizya alimwi aluzyalo ndwajisi Jehova kubantu.—Mt. 24:14; Lk. 4:18.
4 Kwiinda Mukucita Cintu Cimwi Kubantu: Jesu wakali kuzibikkila maanu nzyobakali kuyandika bantu munzila iigwasya alimwi yakumubili. (Mt. 15:32) Andiswe tulakonzya kuba acoolwe cakucita milimo yaluzyalo notuli mumulimo wakukambauka. Umwi mucizi wakabona mukaintu umwi kapengana kumvwisya mulumbe uuyandika ngwaakali kwaamba ngobakali kubandika limwi aluwaile. Mucizi wesu wakalyaaba kugwasya kwiinda mukusandulula majwi ngaakali kwaamba sikutuma luwaile. Ikutondezya luyando ooku kwakapa kuti cuube-ube kutalisya mubandi wamu Magwalo walo wakagwasya mukaintu ooyu kuzumina ciiyo ca Bbaibbele. Mucikozyanyo cimbi, mukwesu umwi wakali mukupilukila wakajana kuti uuli aŋanda ulicimidwe akaambo kakupengana kunjizya cuuno cipati alimwi cilemu amulyango. Naakamana kugwasya uuli aŋanda kunjizya cuuno, mukwesu ooyu wakakkala acuuno eeci kutalisya ciiyo ca Bbaibbele amulombwana ooyu wakalumba kapati.
5 Notutola lubazu mumulimo wakukambauka, tutondezya luyando ndotujisi kuli Leza akuli basimukoboma. (Mt. 22:36-40) Kutondezya luyando ooku kucitwa kwiinda mukubandika alimwi akucita cintu cimwi kubantu kulabagwasya babombe moyo kuziba kuti tujisi kasimpe.