Amube Cikozyanyo Cibotu Mukoonda Milimo Mibotu
1. Nkaambo nzi ncotweelede kubikkila maanu ikapati kukulilemeka kwesu amuswaangano wacooko?
1 Ikuti katuli banji notwaswaangana kumiswaangano yacooko, mbotulilemeka alimwi ambotubalanganya bantu kulabonwa ikapati abantu balangilila. Aboobo umwi aumwi wandiswe, weelede kubikkila maanu kapati kululayo lwamu Bbaibbele ilwaamba kuti: “[Sitikila] muziyanza zyoonse. Webo omwini weelede kuba citondezyo mukoonda milimo mibotu.” (Tit. 2:6, 7) Ikusolekesya kulayandika kutegwa ‘tutayeeyi buyo kuligwasya tobeni luzutu pe, pele umwi aumwi weelede kugwasya mweenzinyina.’ (Flp. 2:4) Aboobo atulange-lange mbazu zimwi mbotukonzya kubelesya makani aaya aakulwaizya ku Muswaangano Wacooko uuboola wakuti “Amusololelwe Amuuya wa Leza.”
2. Ino ncinzi ncotweelede kubikkila maanu kujatikizya makwebo kubusena bucitilwa muswaangano wacooko?
2 Milimo Yamakwebo: Ibamwi balizyi kuti basimuswaangano banji tabajisi makkamela, aboobo balacita makwebo kwiinda mukufwotola kumuswaangano wacooko alimwi amumiswaangano iimbi yabantu ba Jehova. Kunyina cintu cilubide kufwotolwa kumiswaangano eeyi iilibedelede. Nokuba boobo, ibunji bwabaabo bafwotola bayanda kujana mpindu, aboobo aaya mmakwebo. Ikutegwa eeci citakanyonganyi kuyanzana kubotu kwa Bunakristo kwakumuuya, tutakiikkomanini milimo yabo. Atukacite oobo akumilimo imwi yamakwebo. Ikaambo ncotuswaanganina nkukomba Jehova, ikulya kutafwule lyakwe lyakumuuya alimwi akuyumizyanya-yumizyanya.—Rom. 1:11, 12.
3, 4. Ino mbuti mbotukonzya “[kucitila] bantu boonse milimo mibotu” abusena bucitilwa muswaangano wacooko?
3 Ikubabikkila maanu bantu kweelede kubonwa kwiinda mukusalazya busena bwamuswaangano. Mwaka wakamana, cakali kukkomanisya kubona mikwasyi kiizumanana kutobela bubambe bwabulondo. Bana alimwi abapati bakatola lubazu mukubwezelela matombe, mapepa, mapulasitiki alimwi azyakulya zyalekwa akuzisowela muzingungulu alimwi amuzilindi. Masimpe, bantu bakunyika tababikkili maanu kumakani aabulondo, pele kubikkila maanu nkotucita kupa kuti masena mpotukombela abote, kupa bulemu kumiswaangano yesu alimwi kutondezya kuti twaswenenena kuli Leza uusalala, Jehova.—Lev. 19:2; 2 Kor. 7:1.
4 Sena mwakazibona kale zimbuzi zyakubuleya kanji-kanji mbozitalibonyi kabotu alimwi ambozitakonzyi kubelesyegwa akaambo kabuyamba akutabelesyegwa kabotu? Ikusalazya cimbuzi twamana kucibelesya citondezya kuti “[tucitila] bantu boonse milimo mibotu.” (Gal. 6:10) Imulawo wa Leza uujatikizya tubi mbotwakali kusoogwa wakaambwa cakusalazya alimwi wakali muuba-uba kutobela. Zyintu zyakali kuyandika mbusena busisikide, umwi aumwi wakeelede kubusalazya akusowa tubi munzila yeelede. (Dt. 23:12, 13) Mulawo wansiku ooyu ucizumanana kugwasya asunu alimwi banji tabaciswi-ciswi akaambo kakutobela njiisyo zyawo. Kusyomeka kuzyeelelo zya Jehova lyoonse kuletela zilongezyo alimwi kulatwaandanya abantu bakunyika.—Dt. 28:9, 10.
5, 6. Ino mbuti bana mbobakonzya kupa kuti Jehova atembaulwe, alimwi ino mukuli nzi ngobajisi bazyali?
5 Bazyali Alimwi Abana: Munyika eeyi muli bakubusi banji batajisi bulemu, ibana besu baliindene ambabo alimwi eeci citembaula Jehova ambunga yakwe. Nokuba boobo, muziindi zimwi mapenzi alacitika eelyo bana nobatalaigwi kabotu. (Tus. 29:15) Bazyali tabeelede kulekela bana kuti kabaile kweendeenda kakunyina uubalanganya abusena bwamuswaangano wacooko.
6 Muswaangano kautanasika, bazyali bamwi cabagwasya kulanga-langa abana babo kujatikizya mbobeelede kulilemeka. (Ef. 6:4) Balabagwasya bana ikuzyiba kuti luyando lwini-lwini lwa Bunakristo “talukwe cisapi” naa “talulilangilili cintu.” (1 Kor. 13:5) Muswaangano wacooko nciindi cibikkidwe cakuti tuyiisyigwe a Jehova, ibana abapati beelede kutondezya bulemu kububambe oobu kwiinda mukulilemeka kwabo amuswaangano alimwi akuli koonse nkobakonzya kuba.—Is. 54:13.
7. Ino kulilemeka kwesu kulakonzya kubajatikizya buti bantu?
7 Kulilemeka kwesu kulakonzya kupa kuti bantu baleke kutuyeeyela munzila mbyaabi alimwi akubakwelelezya kubukombi bwakasimpe. (Mt. 5:16; 1 Pet. 2:12) Boonse aabo mbotuyaanya kumuswaangano wacooko atubakambaukile kwiinda mumilimo yesu alimwi ambotubalanganya. Munzila eeyi tuyooba ‘zitondezyo mukoonda milimo mibotu’ alimwi tuyootondezya kuti tusololelwa aamuuya wa Leza.—Tit. 2:7.
[Kabbokesi kali apeeji 5]
Amubabikkile Maanu Bantu
◼ Mutaciti makwebo pe
◼ Amubusalazye lyoonse busena bwakuswaanganina alimwi azimbuzi
◼ Amubalaye bana banu