Kulumba Akaambo Kamulimo Ngotupedwe
1. Ino mwaapostolo Paulo wakaubona buti mulimo wakwe wakukambauka?
1 Mwaapostolo Paulo wakaubikkila maanu kapati mulimo wakwe wakukambauka; wakaulemeka alimwi wakalizyi kuti kupegwa mulimo ooyu cakali kutondezya luzyalo ndwajisi Leza. (1 Tim. 1:12, 13) Ino mbuti kulumba kuli mbuli kooku mbokukonzya kubagwasya bantu ba Jehova bapona mumyaka iitandila kuzyuulu zyobile kuzwa kuciindi eeco?
2. Ino ncinzi cinga catugwasya kuti katutola lubazu lyoonse mumulimo wakukambauka?
2 Kutola Lubazu Lyoonse Kulayandika: Nzila yomwe mbotukonzya kutondezya kulumba akaambo kamulimo wakukambauka nkwiinda mukutola lubazu mumulimo ooyu lyoonse amwezi. Cilagwasya ikuzyiba mbwaatulongezya Jehova. Tweelede kulumba zilongezyo zyoonse ziboola akaambo kakweenda aa Leza. Katucita oobo mbuli mbobakkomana basikweenda misinzo milamfwu mubusena bweebeka, nobabona mbwaakkede mabwe, maluba-luba mabotu, malundu mapati alimwi akkuti naba munyama wamusyokwe. Inzya, kuzyiba nzyatucitila Leza cilakonzya kutukulwaizya kuzumanana kuyeeya zyintu nzyotukonzya kubandika abantu zijatikizya Leza wesu Jehova.
3. Ino ncoolwe nzi cilibedelede ncobakajisi ba Paulo a Apolo, alimwi ncinzi ncotweelede kuzinzibala kuyeeya?
3 Paulo antoomwe a Apolo bakali kugwasyigwa aa Leza mumulimo ngobakabeleka canguzu wakuzikkila akutilila kumuuya. Andiswe tulaacoolwe cilibedelede cakubeleka katuli babelesinyina a Leza. (1 Kor. 3:9.) Mbotuli mumbungano ya Bunakristo tulakulwaizyigwa kuzinzibala kuyeeya milimo yoonse ya Leza alimwi abubotu bwakwe ikutegwa mulimo alimwi akulyaaba kwesu kazitondezya kulumba kuli Leza. Ikuti katuli bantu balumba camasimpe tatukonzyi kwiinzya mwezi kakunyina kwaambila bantu bubotu bwa Jehova.
4. (a) Ino majwi aali ku Intembauzyo 116:12 akazuzikizyigwa buti kuli Jesu ciindi naakali anyika? (b) Ino bubotu bwa Jehova bweelede kutujatikizya buti andiswe?
4 Intembauzyo 116:12 yaamba kuti: “Mpilusyenzi kuli Jehova nkaambo kazyoolwe zyoonse nzyandipa?” Majwi aaya ncibeela cimwi cantembauzyo zyakaimbwa a Jesu masiku katanafwa. (Mt. 26:30) Ino akamuyeezya nzi majwi aaya ngaakali kwiimba ciindi capobwe Lyakwiindilila lyaba Juda. Ambweni wakali kuyeeyela mubili uulondokede Jehova ngwaakamubambila; mubili ngwaakali kuyootuula kacili cipaizyo, kutondezya luyando lwakwe loonse. (Heb. 10:5). Mbubwenya buyo, andiswe twabulabila bubotu bwa Jehova muciindi eeci ncotwamubelekela. Lino tweelede kutondezya kuti tulamuyanda Jehova kwiinda mukubeleka canguzu mumulimo. Inzya kubelekela Leza kupa kuliimya zyintu zimwi. Pesi kuti mweelanya azilongezyo, ikuliimya ooku nkusyoonto.—Flp. 3:7, 8.
5. Ino mbuti mbotukonzya kutondezya kuti tulamulumba Jehova Taateesu alimwi mwaabi ‘wazyintu zyoonse’?
5 Ciindi Ncotubeleka: Cibeela cimwi ncotweelede kulanga-langa cijatikizya ciindi ncotubeleka mumulimo. Elo kaka Jehova Leza wesu mmwaabi! Mwaapostolo Paulo wakaamba kuti “[Jehova] mwini nguubapa boonse buumi, amuuya, azintu zyoonse.” (Inc. 17:25) Mubwini, Mulengi wesu tayandiki kugwasyigwa cintu cili coonse ncobajisi bantu naa ncobakonzya kupa. Pele Jehova ulatondezya kuti cilamukkomanisya iciindi bantu nobalyaaba camoyo woonse mubukombi bwakasimpe. (Heb. 10:7) Aboobo ncinzi ncotukonzya kucita kutegwa tuyungizye ciindi ncotubeleka mumulimo wakwe?
6. Kujatikizya mulimo wesu wakukambuka, ino nimbaakani nzi aumwi wesu njayelede kulibikkila?
6 Bapainiya bakugwasyilizya, baciindi coonse, baalubazu alimwi abamisyinali balijisi mweelwe wamawoola ngobeelede kukkwanya. Basikumwaya bamumbungano abalo balakulwaizigwa kulibikkila mbaakani zyamawoola ngobeelede kubeleka mumulimo wakukambauka amwezi. Kuli mulimo mupati uuyandika kucitwa muciindi cisyoonto eeci ciceede kaatanasika mamanino aabweende bwazyintu oobu. Myaka iili makumi obile yainda, Mulimo Wesu wa Bwami wakapa muzeezo wakuti: ‘Kuli bamwi eeci caamba kutola lubazu mumulimo wamumuunda mubuzuba bwamu Nsondo bwakusaanguna mwezi amwezi. Kuti bacikonzya kucita boobo, cilabaubila-ubila kuunka mumulimo muziindi zimwi mumwezi.’
7. Ino mubuzyo nzi ngotukozya kulibuzya kujatikizya ciindi ncotubeleka mumulimo wakukambuka, alimwi ino tweelede kuba amakanze nzi?
7 Masimpe ngakuti, kunyina weelede kutubikkila mbaakani kujatikizya ciindi ncotweelede kubeleka mumulimo wamumuunda. Pele mubuzyo ngwakuti: ‘Nokuba kuti kunyina mweelwe wamawoola ngotuyandika kubeleka, sena eeci citupa kaambo kakucesya ciindi ncotutola lubazu mukucita kuyanda kwa Jehova?’ Bantu boonse baleelede kulyaaba ku Mulengi wabo, awalo uyoobalongezya mbubwenya mbucakabede kubana Levi bansiku bakamubelekela mumulimo uusetekene mutente lyakubunganina mpoonya akutempele mu Jerusalemu. Aboobo, aabe makanze eesu kuzumanana kuyaambele mumulimo wesu kuli Jehova kwiinda mukutola lubazu mumulimo wamumuunda lyoonse mwezi amwezi, alimwi ikuti kacikonzyeka atuyungizye ciindi ncotubeleka kutegwa tutondezye kulumba kuli Jehova akaambo kamulimo ngwatupede.