Sena Eeci Ncaakakanzide Kucita Leza?

IKUTI mwabala muteende uuli woonse, ikuti mwalangilila cipekupeku naa kuswiilila wayilesi, muyoojana makani manji aamba micito yazigwebenga, inkondo alimwi amilandu! Amuyeeye zintu nzyomulibilika lwenu kumugama. Ambweni bulwazi naa kufwidwa muyandwa kwamupa kuusa kapati. Mulakonzya kulimvwa bwakalimvwa mwaalumi mubotu Jobu iwakati ‘wakaluuside kapati akaambo kamapenzi.’—Jobo 10:15, BT.

Amulibuzye kuti:

Sena oobu mbobukkale Leza mbwaakayanda kuti mebo abantu boonse katupona?
Ino nkuukuli nkondinga ndajana lugwasyo lwakusola kwaamanizya mapenzi ngondijisi?
Sena kuli bulangizi buli boonse bwakuti kuli notuyooba aluumuno alimwi anyika?

Ibbaibbele lilapa bwiinguzi bukkazyika moyo kujatikizya mibuzyo eeyi.

IBBAIBBELE LIYIISYA KUTI LEZA UYOOZIZUZIKIZYA ZINTU EEZYI ANYIKA.

“Uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.”—Ciyubunuzyo 21:4

“Cilema unooya busotauka mbuli insya.”—Isaya 35:6

“Meso aaboofu ayoobononona.”—Isaya 35:5

“Boonse abali muzyuumbwe, bayoozwa.”—Johane 5:28, 29

“Takukooyooba naba omwe akati kabantu banyika uuamba kuti, Ndaciswa.”—Isaya 33:24

‘Maila ayoovwula anyika.’—Intembauzyo 72:16

Nyika yacinca mbubwenya mbwaakakanzide Leza: Bacembeede bajoka kubwana, baciswa aboofwu baponesyegwa, bafwide babusyigwa, kuli cakulya cinji

AMUGWASYIGWE ANJIISYO NZYOLIYIISYA BBAIBBELE

Mutafwambaani kuzikaka izyaambwa mumapeeji aamusyule kuti nkulombozya buyo ikutakonzyi kuzwidilila. Leza wasyomezya kuzizuzikizya zyoonse eezyi alimwi Ibbaibbele lilapandulula mbwaya kuzizuzikizya.

Baalumi bobilo baiya Bbaibbele kubelesya bbuku lyakuti Ncoliyiisya Bbaibbele

Pele Ibbaibbele lilagwasya munzila azimbi zinji. Lilapa inzila iimusololela kukuba abuumi bubotu kapati ncobeni noliba lino. Amukkale ansi kuyeeya kwaciindi cisyoonto azintu zimupa kulibilika amapenzi ngomujisi. Zilakonzya kubikkilizya kubula mali, imapenzi aamumukwasyi, ikuciswa-ciswa naa kufwidwa muyandwa. Ibbaibbele lilakonzya kumugwasya kuliyumya mumapenzi aaliko sunu alimwi lilakonzya kumukatalusya kwiinda mukwiingula mibuzyo mbuli yeeyi:

Ino nkaambo nzi ncotupenga?
Mbuti mbotunga twasoleka kumanizya mapenzi aatupa kulibilika mubuumi?
Mbuti mbotunga twacita buumi bwesu bwamumukwasyi kuba bwalukkomano luyaambele?
Ncinzi cicitika kulindiswe twafwa?
Sena kuli notuya kubabona alimwi bayandwa besu bafwide?
Ino inga twasinizya buti kuti Leza uyoozizuzikizya nzyaakasyomezya kuti ziyoocitika kumbele?

Ikubala bbuku lino nkomucita kutondezya kuti mulayandisisya kuzyiba ncoliyiisya Bbaibbele. Ibbuku lino lilamugwasya. Amubone kuti imincali ilijisi mibuzyo yayo ansi apeeji. Ituulunzuma twabantu balaikkomanina nzila yakubuzya akwiingula nobabandika zili mu Bbaibbele a Bakamboni ba Jehova. Tusyoma kuti anywebo muyookukkomanina. Leza amulongezye mbomutalika kwiiya cini ncoliyiisya Bbaibbele munzila iikondelezya alimwi iikkazyika moyo!