Cibalo 26

Ncocikatazya Kucita Zintu Zibotu

INO nguni wakakkomana eelyo Saulo naakali kucita zintu zibyaabi?— Ngu Saatani Diabolosi. Pele abalo beendelezi bazikombelo zyaba Juda bakakkomana. Mpoonya eelyo Saulo naakaba sikwiiya wa Mwiiyi Mupati akutalika kwiitwa kuti Paulo, aabo beendelezi bazikombelo bakatalika kumusulaika. Aboobo, sena waciteelela cipa kuti kacikatazya kuli sikwiiya wa Jesu ikucita zintu zibotu?—

Cimwi ciindi imupaizi mupati wazina lyakuti Hananiya wakalailila baalumi bamwi kuti bamuume kumeso Paulo. Alimwi mane Hananiya wakasoleka kumubikka muntolongo Paulo. Paulo wakapenzyegwa kapati naakaba sikwiiya wa Jesu. Mucikozyanyo, bantu babyaabi bakamuuma Paulo akusola kumujaya kwiinda mukumuwaala mabwe mapati.—Incito 23:1, 2; 2 Ba-Korinto 11:24, 25.

Ibantu banji bayoosoleka kutupa kucita zintu zimupa kunyema Leza. Aboobo koziyeeya eezyi, Ino zintu zibotu uziyanda buti? Sena ulaziyanda kapati cakuti uyoozumanana kuzicita neliba leelyo bamwi nobakusula akaambo kakucita zintu eezyo zibotu? Tweelede kuba basicamba mukucita boobo, tee kayi?—

Ulakonzya kutelaika kuti, ‘Ino nkaambo nzi bantu ncobatusulide akaambo kakuti tucita zintu zibotu? Sena tabeelede kukkomana buya?’ Inzya mubwini beelede kukkomana. Ibunji bwaziindi, ibantu bakali kumuyanda Jesu akaambo kazintu zibotu nzyaakali kucita. Cimwi ciindi, bantu boonse bamumunzi bakabungana aamulyango waŋanda mpaakaswayide. Bakayoboloka akaambo kakuti Jesu wakali kuponya bantu baciswa.—Marko 1:33.

Pele zimwi ziindi bantu tiibakali kuziyanda zintu nzyaakali kuyiisya Jesu. Nokuba kuti lyoonse buyo wakali kuyiisya zintu ziluzi, tiibakali kumuyanda pe. Mubwini, ibamwi bakalitondezya kuti tabamuyandi akaambo kakuti wakali kukanana kasimpe. Eeci cakacitika bumwi buzuba ku Nazareta, imunzi mwaakakomenena Jesu. Wakaunka kutempele, ibusena ooko ba Juda nkobakali kuswaanganina nobakali kukomba Leza.

Ooko, Jesu wakabandika makani mabotu kuzwa mu Magwalo. Kumatalikilo, ibantu bakaakkomanina makani. Akabagambya majwi mabotu aaluzyalo ngaakali kubandika Jesu. Cakabayumina ikusyoma kuti ooyu wakali ngomwaalumi mwana-mwana wakakomenede mumunzi wabo.

Pele kuli acimbi Jesu ncaakaamba. Wakabandika makani aajatikizya ciindi cimwi Leza naakatondezya luzyalo lulibedelede kubantu batakali ba Juda. Eelyo Jesu naakaamba makani aaya, aabo ibakali mutempele bakanyema. Sena ulicizyi cakabapa kunyema?— Bakali kuyeeya kuti balikke mbabakajisi luzyalo lwa Leza lulibedelede. Bakali kuyeeya kuti bakalisumpukide kwiinda bantu bambi. Aboobo bakamusula Jesu akaambo kazyeezyo nzyaakaamba. Alimwi sena ulicizyi ncobakali kuyanda kucita kulinguwe?—

Ibbaibbele lyaamba kuti: ‘Bakakwelaanya Jesu akumutandila aanze aamunzi. Bakamutola aatala lyacilundu alimwi bakali kuyanda kumutonkela mujeleele akumujaya! Pele Jesu wakaandulula wabatija.’—Luka 4:16-30.

Ikuti naa cili boobo cakucitikila, sena inga wapiluka alimwi kuyoobandika abantu aabo kujatikizya Leza?— Inga wayandika kuba acamba, tee kayi?— Pele nokwakainda ciindi citandila kumwaka omwe, Jesu ncobeni wakapiluka alimwi ku Nazareta. Ibbaibbele lyaamba kuti: “Wakabaiisya mucikombelo cabo.” Jesu tanaakaleka kukanana makani aakasimpe akaambo kakuyoowa bantu batakali kumuyanda Leza.—Matayo 13:54.

Ibuzuba bumbi, mu nsabata, Jesu wakali mutempele oomo imwakali amwaalumi wakanyanide kwaanza naa iwakalemene. Jesu wakalijisi nguzu nzyaakamupede Leza izyakuponya mwaalumi ooyo. Pele bamwi akati kabaalumi ibakali mubusena oobo bakali kusoleka kumupenzya Jesu. Ino ncinzi ncaakacita Mwiiyi Mupati?— Kusaanguna wakabuzya kuti: ‘Ikuti kamujisi mbelele yawida mudindi mubuzuba bwa Sabata, sena inga mwaigusya oomo?’

Inzya bakali kukonzya kwiigusya mbelele nomuba mubuzuba bwa Sabata eelyo nobakeelede kulyookezya. Aboobo Jesu wakati: ‘Cilainda awo kubota ikugwasya muntu mu Sabata, mbwaanga muntu ulayandika kapati kwiinda mbelele!’ Elo cakasalala kapati kaka kuti Jesu wakeelede kumugwasya mwaalumi ooyo kwiinda mukumuponya!

Jesu wakaambila mwaalumi ooyo ikuvwungulula janza lyakwe. Ndilyonya eelyo ijanza eelyo lyakaponesyegwa. Elo wakakkomana kapati kaka mwaalumi ooyo! Pele ino baalumi aabo bambi bakalimvwa buti? Sena abalo bakakkomana?— Peepe. Bakaindila buya kumusula Jesu. Bakaunka kuyoolivwiya-vwiya kuti bajane nzila mbobanga bamujaya!—Matayo 12:9-14.

Izintu zili buyo mbubwena oobo asunu. Kunyina makani anzyotucita, tatukonzyi kubakkomanisya bantu boonse. Aboobo tweelede kusala ooyo ngotuyanda kunookkomanisya lyoonse. Ikuti katuyanda kukkomanisya Jehova Leza alimwi a Mwanaakwe Jesu Kristo, tweelede kucita eezyo nzyobatuyiisya ciindi coonse. Pele ikuti naa twacita oobo, ino mbaani ibayootusula? Mbaani ibayoopa kuti cituyumine kucita zintu zibotu?—

Ngu Saatani Diabolosi. Pele ino mbaani bambi ibayootusula?— Mbaabo boonse ibeenedwe a Diabolosi kuti kabasyoma zintu zitaluzi. Jesu wakaambila basololi bazikombelo bakuciindi cakwe kuti: “Muzwa kuliuso Saatani, muyanda kucita iziyanda uso.”—Johane 8:44.

Kuli bantu banji mbayanda Diabolosi. Jesu ubaita kuti “inyika.” Ino uyeeya kuti ncinzi “inyika” eeyo Jesu njaamba?— Kutegwa tujane bwiinguzi, atubale Johane caandaano 15 kapango ka 19. Ooko tubala majwi aa Jesu aaya aakuti: “Nomwali bayeeyi inyika, inyika neyali kuyanda bayo, kwalo nkaambo tamuli bayeeyi nyika, pele ndakamusala kuzwa kunyika, nkakaambo ako inyika nciimusulide.”

Aboobo inyika iibasulide basikwiiya ba Jesu mbantu boonse ibatamutobeli. Ino nkaambo nzi nyika ncoyibasula basikwiiya ba Jesu?— Kociyeeyela buyo. Ino nguni uulela nyika?— Ibbaibbele lyaamba kuti: ‘Inyika yoonse ikkede munguzu zyamubi.’ Ooyo mubi ngu Saatani Diabolosi.—1 Johane 5:19.

Sena lino wakateelela kaambo ikapa kuti kacikatazya kucita zintu zibotu?— Nkaambo Saatani alimwi anyika yakwe bapa kuti ciyume kucita boobo. Pele kuli kaambo akambi. Sena ucikayeeyede?— Mu In Cibalo 23 cabbuku lino, twakaiya kuti toonse twakakona cibi. Sena tacinookkomanisyi kapati eelyo cibi, Diabolosi alimwi anyika yakwe nozitanoociliko?—

Ibbaibbele lisyomezya kuti: “Nyika ilamana.” Eeci caamba kuti bantu boonse batamutobeli Mwiiyi Mupati bayoonyonyoonwa. Tabakazumizyigwi pe kupona kukabe kutamani. Sena ulibazyi aabo ibayoopona kukabe kutamani?— Ibbaibbele lilazumanana kwaamba kuti: ‘Ooyo uucita ziyanda Leza, uyoopona kukabe kutamani.’ (1 Johane 2:17) Inzya, balikke ibacita zintu zibotu, ibacita ‘ziyanda Leza,’ mbabayoopona kukabe kutamani munyika ya Leza mpya. Aboobo nokuba kuti nciyumu, tuyanda kucita zintu zibotu, tee kayi?—

Atwaabale antoomwe magwalo aaya aatondezya ncocitali cuuba-uba kucita zintu zibotu: Matayo 7:13, 14; Luka 13:23, 24; alimwi a Incito 14:21, 22.

[Cifwanikiso icili apeeji 137]

Ino mmapenzi nzi ngaakajana Paulo eelyo naakali kucita zintu zibotu?

[Cifwanikiso icili apeeji 138]

Ino nkaambo nzi bantu aaba ncobayanda kumujaya Jesu?

[Cifwanikiso icili apeeji 141]

Ino ncinzi ciyoocitika kulibaabo ibacita zintu zibotu eelyo nyika eeyi yaakumana?