Kubeleka Canguzu Kutalisya Ziiyo zya Bbaibbele
Kutalikila mu January 2009, mbungano zyakakulwaizyigwa kusala buzuba bomwe mumwezi, mu Mujibelo naa mu Nsondo kutegwa bube buzuba bwakutalisya ziiyo. Ino bubambe oobu bwagwasya buti? Bubambe oobu bwabagambya akubakkomanisya kapati basikumwaya banji—bwabagambya nkaambo ikutalisya ziiyo ncuubauba kwiinda mbobali kuyeeyela alimwi bwabakkomanisya kapati akaambo kakuti bantu basiyene-siyene bazumina kwiiya Bbaibbele ikubelesya bbuku lya Ino Ncinzi Cini Bbaibbele Ncoliyiisya? Ibalangizi beendeenda bakaamba kuti bantu mumbungano balikkomene abubambe oobu bupya alimwi bweenda kabotu. Mucikozyanyo, ku Italy, mumyezi yosanwe kwakatalisyigwa ziiyo ziinda ku 8,000.
Basikumwaya ibatakajisi ziiyo zya Bbaibbele, mazuba aano balacita nyendo zyakupilukila akutalisya ziiyo zya Bbaibbele. Ba Carolina, bakkala mucisi ca Peru, bakaamba kuti: “Oobu bubambe kabutanabikkwa tiindakajisi ziiyo zya Bbaibbele, pele bubambe oobu bwandigwasya kubona mbociyandika kusoleka canguzu kutalisya ziiyo zya Bbaibbele. Ndacikonzya kubatondezya beniŋanda kuti ikucita ciiyo ca Bbaibbele tacikatazyi alimwi tacitoli ciindi. Aalumbwe Jehova, akaambo kakuti kwiinda mukubelesya nzila nzyotwapegwa, zyintu zyandeendela kabotu, lino ndijisi ziiyo zya Bbaibbele zyobilo.”
Imulangizi wabbazu umwi uukkala mucisi ca Peru wakaamba kuti, “kuzwa kumatalikilo, bubambe oobu bwagwasya mbungano zinji kuba aziiyo zya Bbaibbele zinji.” Mumbungano imwi ku Chiclayo bakatalisya ziiyo izili 25 mumwezi omwe alimwi aku Chepén, kwakatalisyigwa izili 24.”
Basikumwaya bacili bana abalo bazwidilila mukutalisya ziiyo zya Bbaibbele. Giovanna uujisi myaka iili 11 yakuzyalwa waku São Paulo, ku Brazil wakaamba kuti: “Bumwi buzuba mu Mujibelo kumazuba, ndakali kukambauka kuŋanda aŋanda abamaama, kutalisya ziiyo zya Bbaibbele mubbuku lya Bbaibbele Ncoliyiisya. Aŋanda yakusaanguna, ndakababuzya mbotwakajana aŋanda, basimakwebo ikuti naa bakali kusyoma kuti Bbaibbele lyakasololelwa a Leza. Bakaamba kuti bakali kusyoma. Mpoonya ndakababalila lugwalo lwa 2 Timoteo 3:16. Bakaamba kuti bakakkomana kubona mwana muniini kabaambila zyintu zikkomanisya zili boobu alimwi bakalitambula bbuku.
“Nindakajokela kuli mbabo, ndakaunka abasyaneene akaambo kakuti bakali zyibene ambabo. Bakatunjizya muŋanda, kumane ndakabalomba kuti balange apeeji ijisi izili mukati mubbuku lya Bbaibbele Ncoliyiisya alimwi ndakabaambila kuti basale makani aakabakkomanisya kuti tubandike. Bakasala cibalo 11, caamba kuti ‘Nkaambo nzi Leza Ncalekelede Kupenga?’ Nibakamana kubala mincali yobilo yakusaanguna, balo abakaintu babo bakabuzya mibuzyo minji. Bakakkomana kubona bwiinguzi bwamu Bbaibbele alimwi bakazumina kuti katwiiya lyoonse. Eelo kaka ndakakkomana kutalisya ciiyo ca Bbaibbele aŋanda yakusaanguna!”
Masimpe ngakuti, tabali boonse ibayanda kwiiya Bbaibbele alimwi tabali boonse ibayiya, baya kuzumanana. Pele akaambo kakuti tuli babelesinyina Leza, tulazumanana kutalisya ziiyo zya Bbaibbele kubantu banji akaambo kakuti Jehova nguubakwela bantu bali mbuli mbelele mumbunga yakwe mamanino aabweende bwazyintu oobu bwa Saatani kabutanasika.—Joh. 6:44; 1 Kor. 3:9.