Lugwalo Luzwa Kukabunga Keendelezya
Nomuyandwa Bakambonima ba Jehova:
Eelo kaka ziindi eezyi zilakkomanisya! Tulakkomana kapati kubeleka antoomwe “camoyo woonse” andinywe bakwesu abacizyi bayandwa mumulimo mupati wakupa bumboni kuli Taateesu wakujulu, Jehova.—Zef. 3:9; Joh. 14:12.
Lukkomano ndotujisi mukubelekela Jehova talwaambi kuti tatujisi mapenzi pe. Mumwaka wamulimo wainda, nobamwi mwakajisi mapenzi akaambo kamizuzumo yanyika, kupaya kwamaanzi, iguwo, alimwi azyintu zilicitikila zikonzya kubikka buumi bwabantu muntenda. (Mt. 24:7) Bantu banji balapenga buzuba abuzuba akaambo kakuciswa-ciswa alimwi akucembaala. Toonse tweelede kuliyumya kumapenzi “aali mbuli kumyongwa kwamukaintu uuyanda kutumbuka.” (Mt. 24:8) Muzisi zimwi, mbuli ku Armenia, Eritrea, alimwi a South Korea, bakwesu banji balaangidwe muntolongo akaambo kalusyomo lwabo.—Mt. 24:9.
Ncinzi catugwasya kuzumanana kuzilanga munzila iili kabotu zyintu nokuba kuti tujisi mapenzi? Lugwalo lwamwaka lwamu 2010 lwakatuyeezya cintu cimwi ciyandika: ‘Luyando lulaliyumya muzyintu zyoonse. Luyando talumani.’ (1 Ko. 13:7, 8) Ncobeni, luyando ndotujisi akati kesu—alimwi aluyando ndotujisi kuli Jehova—lulatuyumya.
Bantu banji ibalyaamba kuba Banakristo balagambwa kubona mbotwavwula alimwi ambotuubeleka mulimo wakukambauka. Nokuba kuti tabazizumini nzyotusyoma anzyotuyiisya, bamwi basika mpobaamba kuti, “Nywebo nobantu mucita mulimo ngotweelede kunoocita!” Nkaambo nzi komwe kapa kuti Bakamboni ba Jehova bazumanane kukambauka buzuba abuzuba? Bwiinguzi alimwi mbwakuti, nduyando. Mbuli Taateesu wakujulu, tatuyandi kuti bamwi bakanyonyoonwe pe. (2 Pe. 3:9) Kuyanda kwesu kwakuti bantu boonse beempwe kulalibonya mumweelwe mupya wabasikumwaya wakasika ku 7,508,050 mumwaka wamulimo wainda. Nimbunga nzi iimwi yacikombelo iijisi bakambausi banji boobu babeleka canguzu mumulimo ooyu waluyando, balyaaba kugwasya bamwi kumuuya?
Tulakulwaizyigwa kubona mbobuzuzikizyigwa businsimi bwakalembwa a Isaya bwakuti: “Kumamanino aaciindi cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela masi oonse anooya bukunka kulincico.” (Is. 2:2-4) Akati kabantu banji bakunkila kuŋanda ya Jehova mbantu basika ku 294,368 bakabbapatizyigwa mumwaka wamulimo wainda. Twabatambula camaanza obilo aaba mumbunga yesu. Luyando lwa Bunakristo ndotujisi aluzumanane kutukulwaizya kubagwasya kulwana sinkondoma Saatani Diabolosi.—1 Pe. 5:8, 9.
Mweelwe wabaabo bakajanika ku Ciibalusyo muli Bwabili, March 30, 2010 wakasika ku 18,706,895, utondezya kuti kucili tuulunzuma twabantu baciboola kutusangana mukukomba Jehova. Eelo kaka tulikkomene kuti Jehova tananyonyoona bweende bwazyintu oobu bubyaabi! Kwacino ciindi, luyando ndotujisi lulatugwasya kuzumanana kuliyumya.—2 Te. 3:5.
Miswaangano ya Cooko ya “Amuzumanane Kumvwana a Jehova,” yakacitwa nyika yoonse mu 2010, yakayumya cilongwe cesu a Taateesu wakujulu, Jehova. Ncobeni, majwi aasintembauzyo ngamasimpe aakuti: “Bali acoolwe bantu bajisi Jehova kuba Leza wabo!” (Int. 144:15) Kufwumbwa zyintu ziyoocitika kumbele, tulisinizyide kuti naa Jehova kali kulubazu lwesu, kunyina ncotweelede kuyoowa pe. (Int. 23:4) Lino-lino, Jehova kwiinda mu Mwanaakwe, uyoonyonyoona “milimo ya Diabolosi.” (1 Jo. 3:8) Ncobeni, tuliyandide kuti buzuba oobu buboole! Pele eecino ciindi, tujisi zyintu zinji zyakucita.—1 Ko. 15:58.
Amusyome kuti “lyoonse cakutaleka” tulamubikkilizya mumipailo yesu. (Lom. 1:9) “[A]muzumanane kukkala muluyando lwa Leza, eelyo nomulindila luse lwa Mwami wesu Jesu Kilisito ilusololela kubuumi butamani.”—Jud. 21.
Tulamuyanda nyoonse!
Tobanyoko,
Kabunga Keendelezya ka Bakamboni ba Jehova