Bakulwaizyigwa Kubelesya Bbaibbele

TUYANDA kugwasya bantu boonse ikubikkila maano ku Jwi lya Leza, Ibbaibbele. Mulumbe ngotukambauka uzwa mubbuku eeli lisalala, aboobo tuyanda kuti bantu bazyibe kuti mulumbe ngotwaamba tuuli wesu, pele kuti ngwa Leza. Bantu beelede kulisyoma Ibbaibbele.

Mumulimo Wamumuunda. Lyoonse nomulibambila kuunka mumulimo wamumuunda, amusale lugwalo lomwe naa kwiinda waawo ngomukonzya kubandika abantu bayanda kuswiilila. Noliba nomulibambila kumwaya buyo bbuku naa magazini yaamba zya Bbaibbele, cilagwasya kanji-kanji ikubala lugwalo mu Bbaibbele ilweendelana amakani. Majwi aamu Bbaibbele ali anguzu zyakusololela bantu bali mbuli mbelele kwiinda majwi ngotukonzya kwaamba lwesu. Aawo nocitakonzyeki ikubala Bbaibbele, ncibotu ikwiile kwaamba nzyomwali kuyanda kubala. Mumwaanda wamyaka wakusaanguna, imabbuku aakajisi Magwalo tanaakali kuvwula kujanika. Nokuba boobo, Jesu abaapostolo bakwe bunji bwaziindi bakali kwaazubulula Magwalo. Andiswe tweelede kwaabikka mumutwe magwalo akwaabelesya bweelede mumulimo wesu, zimwi ziindi ikwiile kwaazubulula.

Nomubala Bbaibbele, amulijate kabotu kutegwa awalo mwiniŋanda amutobelezye mukubala. Ikuti mwiniŋanda katobelezya mu Bbaibbele lyakwe, nzyabala zilakonzya kumunjila mumoyo.

Pele mweelede kuzyiba kuti, ibasanduluzi bama Bbaibbele bamwi bakalicinculula Ijwi lya Leza. Ibusanduluzi bwabo mumwi tabweendelani azyakalembedwe mu Bbaibbele mumyaambo yakusaanguna. Mubusanduluzi bunji bwamazuba aano izina lya Leza lyakagusyigwa, bulazibaanya ncowakali kwaamba mwaambo wakusaanguna kujatikizya ciimo cabantu bafwide. Alimwi bulazibaanya ncolyaamba Bbaibbele kumakanze Leza ngajisi kunyika. Ikutegwa mumutondezye muntu cakacitwa, mulakonzya kweezyanisya magwalo amwi muma Bbaibbele aasiyene-siyene naa mubusanduluzi bwakusaanguna mumwaambo nguwenya ooyo. Mubbuku lya Kukambitsirana za m’Malemba muli mitwe yamakani minji iitondezya busanduluzi busiyene-siyene mbobwaamba twaambo tuyandika kapati mutupango tubelesyegwa bunji bwaziindi. Kufwumbwa muntu uuyanda kumvwa kasimpe, uyoolumba ikujana luzibo lwamasimpe.

Kumiswaangano ya Mbungano. Kumiswaangano yambungano, boonse beelede kukulwaizyigwa kubelesya Bbaibbele. Kulagwasya munzila zinji. Kulabagwasya baswiilizi kuzumanana kubikkila maano kuli zyeezyo zibandikwa. Kupa kuti batubone twaambo itwaambwa amwaambi. Alimwi kulabagwasya bapya ikubona kuti ncobeni nzyotusyoma zizwa mu Bbaibbele.

Ikutegwa bamuswiilila bamutobelezye nomubala Magwalo mu Bbaibbele ciya mbuli mbomubakulwaizya kucita boobo. Ikubatamba kubala nenzila imwi iigwasya kapati.

Cili kulindinywe nobaambi ikusala magwalo ngomuyanda kukankaizya kwiinda mukutamba bamuswiilila kuti baalange. Ncibotu kubala magwalo ayoomugwasya kupandulula twaambo tupati-pati ntomujisi. Ikuti kaciciliko ciindi, amubikkilizye aambi magwalo aagwasya kumvwisya twaambo ntomwaamba.

Masimpe, ikwiile kwaamba lugwalo naa kwaambila bamuswiilila ikulanga lugwalo, kanji-kanji takugwasyi pe. Ikuti mwabala lugwalo lumwi mpoonya akutalika lumbi ibamuswiilila kabatana akulujana lugwalo ndomwasaanguna kubala, cilakonzya kubatyompya akucileka kumutobelezya nomubala Bbaibbele. Amulindile balujane. Mwabona kuti ibanji balujana, amulubale.

Amulibambilile limwi. Amwaambe lugwalo ndomuyanda kubala kakucili ciindi. Eeci ciyoomugwasya kutasowa ciindi kulindila bamuswiilila kuti bajane lugwalo. Nokuba kuti nzisyoonto ziyookananwa ikuti kamulindila bamuswiilila kuti bajane lugwalo, eeci ciyoobagwasya kapati.