Mwatambulwa ku Cikolo Camulimo Weendelezyegwa a Leza
INYIKA yoonse mumasi aayinda ku 200, tuulunzuma twabasikwiiya balagwasyigwa amvwiki alwiiyo lujanwa mu Cikolo Camulimo Weendelezyegwa a Leza. Ibamwi bakatalika ino-ino. Bamwi bali kujanika mucikolo eeci kwamyaka minji. Cikolo eeci cilacitwa mumasena manji kapati. Kufwumbwa nkomukkala, mulakonzya kutola lubazu mububambe oobu bwalwiiyo. Ibapati abana, bantu bamisyobo yoonse alimwi bazwa mubukkale busiyene-siyene balatambula malailile aapegwa a Leza kakunyina akubbadela.
Ciindi nokwakatalisyigwa cikolo eeci mumbungano zya Bakamboni ba Jehova mu 1943, makanze aancico akaambwa mumajwi aaya: “Ikutegwa ‘baalumi basyomeka’ boonse bagwasyigwe, aabo ibakamvwa Jwi lya Leza akulisyoma, ‘akucikonzya kuyiisya bamwi’ . . . amuzeezo wakugwasya umwi aumwi wabo . . . ikuba muntu uukonzya kukanana kubuleya kujatikizya lusyomo lwakwe.” (Course in Theocratic Ministry, p. 4) Asunu aaya ngamakanze acikolo.
Ino mbubotu nzi umwi aumwi wesu mbwakonzya kucita acipego ncotujisi cakukanana ncaakatupa Leza? Bbaibbele liingula kuti: “Kufumbwa zilenge ziyooya zitembaule Jehova!” (Int. 150:6) Ikuti naa twacita oobo, tukondezya moyo wa Taateesu wakujulu. Tumupa bumboni bwakuti myoyo yesu ilatukulwaizya kumulumba akaambo kabubotu bwakwe alimwi aluyando. Nkakaambo kaako Banakristo ncobakulwaizyigwa ‘kupaila kuli Leza lyoonse acipaizyo cakulumba, nkokuti micelo yamilomo iilumba izina lyakwe!’ (Heb. 13:15) Ikutegwa mugwasyigwe kuyaambele muluzibo lwakubelesya zipego nzyaakamupa Leza ikutembaula Jehova, twamutamba kuba basikwiiya mu Cikolo Camulimo Weendelezyegwa a Leza.
Nokuba kuti kubala kwaabuleya alimwi aluzibo lwakukanana akuyiisya nzyezikankaizyigwa kapati mucikolo, impindu yalwiiyo lwakuba mu Cikolo Camulimo Weendelezyegwa a Leza tazigoleli ali zyeezyi zilikke pe. Eelyo nomutola lubazu, muyoogwasyigwa ikuba aluzibo luyandika kapati mbuli kubala kwenu nobeni, ikuswiilila alimwi akwiibaluka, ikuvwuntauzya, ikulanga-langa twaambo alimwi akutweendelanya kabotu, kukanana abantu, kwiingula mibuzyo alimwi akulemba twaambo ntomujisi mumizeezo. Ibbaibbele kuligama alimwi amabbuku aapandulula Bbaibbele ngaanooyiigwa alimwi momunoozwa twaambo kubikkilizya amakani anookananwa mucikolo. Nomwiiya kasimpe kayandika kapati ikajanika mu Jwi lya Leza, muyoojana kuti muyooyiya kuba amiyeeyo ya Leza lyoonse. Elo kaka cilagwasya eeci mumbazu zyoonse zyabukkale bwesu! Kujatikizya mboliyandika Jwi lya Leza, mwiiyi waku yunivesiti wamumwaanda wamyaka wa 20 wazina lya William Lyon Phelps wakalemba kuti: “Kufwumbwa muntu uujisi luzibo lumaninide lwamu Bbaibbele ulakonzya kwaambwa kuti uliyiide kapati. . . . Ndisyoma kuti ikuba aluzibo lwamu Bbaibbele nokuba kuti taku nowakatola lwiiyo lwakukkoleji, ncintu ciyandika kapati kwiinda kuba alwiiyo lwakukkoleji pele kotajisi luzibo lwamu Bbaibbele.”
Mbomukonzya Kugwasyigwa Cakumaninina
Masimpe, ikuti kamuyanda kugwasyigwa cakumaninina alwiiyo lujanwa kwiinda mu Cikolo Camulimo Weendelezyegwa a Leza, nywebo lwanu mbomuli basikwiiya mweelede kubikkila maano kapati. Mwaapostolo Paulo wakakulwaizya Munakristonyina Timoteo kuti: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.” (1 Tim. 4:15) Ino muunzila zili buti zigwasya momunga mwabikkila maano?
Ikuti kacikonzyeka, amujanike mu Cikolo Camulimo Weendelezyegwa a Leza amvwiki. Amulibelesye kabotu bbuku eeli libelesyegwa mucikolo, Amugwasyigwe Alwiiyo Lujanwa mu Cikolo Camulimo Weendelezyegwa a Leza. Amulembe zina lyanu mubusena bubikkidwe apeeji lilembedwe mutwe wamakani wabbuku eeli. Lyoonse kamuliletelela kucikolo. Ibbuku ndimunya eeli lilijisi mibuzyo amasena aakulembela. Nomubala twaambo tuyandika kapati mulindilyo ooto ntomuyeeya kuti inga twamugwasya, mulaangulukide kutweenga naa kutuzila twaambo ooto. Amubelesye busena buli mumbali-mbali kulembela twaambo tugwasya ntomwaiya mumibandi yali kubandikwa mucikolo.
Kuli mulongo nsini uusimbidwe weelede kutobelwa mu Cikolo Camulimo Weendelezyegwa a Leza. Ooyu mulongo uyootondezya ambocinooyendelezyegwa cikolo. Mulongo ooyu mulakonzya kuubikka mubbuku eeli kutegwa kamutakatazyigwi kuujana nomuyanda kuubelesya.
Nomulibambila zibeela zyamucikolo amvwiki, amubone kuti Bbaibbele ndebbuku libelesyegwa kapati mulwiiyo oolu. Lyoonse amusaangune kubala cibeela cili coonse camu Bbaibbele cibikkidwe mvwiki eeyo. Ikuti kamukonzya kubalila limwi makani aazibeela zisiyene-siyene zyamucikolo, acalo eeci ciyoomugwasya kapati.
Ciindi cacikolo, zimwi ziindi kunooli zibeela zimwi ziyanda baswiilizi kutola lubazu. Amutole lubazu muzibeela eezyi. Ikutola lubazu mumibandi iili boobu ncintu cigwasya kapati mukwiibaluka zintu nzyomumvwa alimwi akuzibelesya mubukkale bwanu.
Inzya, basikwiiya boonse banooli acoolwe cakukanana makani naa kutola lubazu muzitondezyo kumbele lyabaswiilizi mumbungano. Amuzibelesye kabotu zyoolwe eezyo nzyomuyoopegwa. Amubikkile maano kapati kukuyaambele mucibeela cakukanana cili coonse ncomwaambilwa kubelekela. Muyoopegwa lulayo atwaambo twakumugwasya kuzumanana kuyaambele. Amulutambule lugwasyo oolo lumugaminide. Mubbuku lyanu, amulembe twaambo tugaminide tukonzya kumugwasya nywebo lwanu kuyaambele. Mbwaanga tacili cuuba-uba kumuntu aumwi kulibona mbuli mbobamubona bamwi, ilulayo lwamu Bbaibbele ilupegwa caluyando lulakonzya kumugwasya kapati kuyaambele. Eeci ncamasimpe nokuba kuti mwali kutola lubazu mucikolo kwamyaka minji.—Tus. 1:5.
Sena mulayanda kuyaambele mukuziba zintu cakufwambaana? Ikuti kamujisi luyando lwakulicitila zintu nobeni, eeco cilakonzya kucitika. Amulibambilile limwi kwiinda mukulibalila nobeni makani oonse aayookananwa asicikolo aumwi. Nokuyandika mwaambi wiiminina yooyo watajanika, munoolibambilide ikwaakanana makani, munzila eeyi muyooba aluzibo lunji. Ciindi bamwi nobakanana makani aabo, amuswiililisye mbobaabandika. Tulaiya kuli umwi aumwi wesu.
Kunze lyaboobo, ikuti kamujisi ciindi, mulakonzya kuyaambele muciindi cisyoonto kwiinda mukulibalila nobeni makani aali mubbuku eeli kaatanayiigwa. Mwamana kwiiya zyoonse zili muziiyo zili 15 zitobela, amuzumanane kulanga-langa “Ibubambe Bugwasya Ikuba a Luzibo Mbomuli Baambi Abaiyi,” kutalikila apeeji 78. Kusaanguna, amubale ciiyo acimwi mpoonya amwiinduluke twaambo tugwasya itupedwe muciiyo eeco. Amuzibelesye mumulimo wanu eezyo nzyomwiiya. Eeci ciyoomugwasya kapati kuyaambele kamuli baambi abaiyi ba Jwi lya Leza.
Lwiiyo ndomujana mu Cikolo Camulimo Weendelezyegwa a Leza luyoomugwasya ikuba muntu uulibambilide kujatikizya zintu ziyandika kapati mubuumi. Mbwaanga tulapona akaambo kakuyanda kwa Leza, ciindi notumutembaula tutondezya kuti tulizyi makanze meni-meni ngotuponena. Jehova Leza weelede kutembaulwa kapati kwiinda muntu uuli woonse. (Ciy. 4:11) Ilwiiyo ndotujana mucikolo ndolutugwasya kucita boobo ikutegwa katuyeeya kabotu, katucita zintu camaano alimwi akuti katwaambila bamwi kasimpe kakondelezya kajanika mu Jwi lya Leza lyakasololelwa amuuya.