Cibalo 1

Milumbe Kuzwa Kujulu

IBBAIBBELE lyoonse lizwide milumbe kuzwa kujulu yakapegwaa Taateesu wakujulu kuti tulaililwe. Nokuba boobo, myaka iitandila ku 2,000 eyi yainda, imilumbe yobile yaalubazu yakatolwaa mungelo “uuima kubusyu bwa-Leza.” Izina lyakwe ngu Gabriyeli. Atucilange-lange cakapa kuti nyendo ezi zyobile zyakuswaya nyika zicitwe.

Imwaka ngu 3 B.C.E. Mumalundu aaku Judaya, ikutali kulamfwu kapati kuzwa ku Jerusalemu kukkala mupaizi wa Jehova ulaa zina lya Zakariya. Wacembaala antoomwe amukaintu wakwe Elizabeta. Alimwi tabajisi bana pe. Zakariya ucita bulizi bwakwe bwamulimo wabupaizi mutempele lya Leza mu Jerusalemu. Mpoonya kwalibonya Gabriyeli kululyo lwacipaililo aatentelwa tununkilizyo.

Zakariya wayoowa kapati. Pele Gabriyeli wamutontomeka wati, “Utayoowi, Zakariya, ukukomba kwako kwamvwigwa, mukaintu wako Elizabeta uzookuzyalila mwana mulombe, ngozooulika zina lya-Johane.” Gabriyeli wazumanana akwaambilizya kuti Johane “unoozooli mupati mumeso aa-Jehova” alimwi akuti ‘uyoobambila Jehova bantu balulamikidwe.’

Nokuba boobo, camwaalila kusyoma Zakariya. Caboneka kuti tacikonzyeki pe kuti walo a Elizabeta balakonzya kubaa mwana aciimo cabo. Aboobo Gabriyeli wamwaambila kuti: “Ulaba cimuumu yebo, tokoonookonzya kwaambaula mane do kubuzuba mbwaayoocitwa makani aya, nkaambo tosyomede majwi aangu.”

Aciindi eci bantu anze baide kugambwa ncaatolela ciindi cilamfwu boobu Zakariya mutempele. Naazikuzwa, takonzyi kwaambaula pele buyo kutondaika amaanza aakwe nkabela baziba kuti wabona cilengaano.

Elyo nocamana ciindi camilimo yakwe mutempele Zakariya wapilukila kuŋanda. Bweende-bweende nceeco cacitika ncobeni—Elizabeta wamita! Nacilindila kuti mwanaakwe azyalwe, Elizabeta walivwundika muŋanda kwamyeezi iili musanu.

Mpoonya, Gabriyeli walibonya alimwi. Waambaula kuli ni? Nkuumusimbi uutakwetwe wazina lya Mariya uuzwa mumunzi uutegwa Nazareta. Mmulumbe nzi ngwaatola cino ciindi? Gabriyeli waambila Mariya kuti, teelela! “Wajana luzyalo kuli-Leza. Langa, ulamita, uzootumbuka mwana mulombe, ngozooulika zina lya-Jesu.” Gabriyeli wayungizya kuti: “Unoozooli mupati, uzootegwa Mwana a-Sijulu lyamajulu, . . . uyooendelezya ŋanda ya-Jakobo mane kukabe kutamani, ubwami bwakwe tabukooyoomana.”

Tulakonzya kuba masimpe kuti Gabriyeli ulimvwa kuba sicoolwe akaambo kakutola milumbe eyi. Alimwi mbotuyaabubala makani aambi kujatikizya Johane a Jesu, tulabona kabotu-kabotu ncoili mipati milumbe eyi iizwa kujulu. 2 Timoteo 3:16; Luka 1:5-33.

▪ Milumbe nzi mipati yobilo iizwa kujulu?

▪ Nguni wiitola milumbe, alimwi nkuli bani nkoyatolwa?

▪ Nkaambo nzi ncoikatazya kusyoma milumbe eyi?

Cibalo 2

Walemekwa Katana Zyalwa

IMUNGELO Gabriyeli naamana kwaambila musimbi Mariya kuti uyoozyala mwana mulombe walo uyooba mwami mane kukabe kutamani, Mariya wabuzya kuti: “Ino oku kuzooba buti neentazi amwaalumi pe?”

“Muuya Uusalala uzooza alinduwe,” mbwaapandulula Gabriyeli “enguzu zya-Sijulu lyamajulu zikuvunikile, ayooyo Uusalala uti tumbukwe uzooambwa kuti Mwana a-Leza.”

Ikugwasya Mariya kuti asyome mulumbe wakwe, Gabriyeli wazumanana ategwa: “Alimwi langa, Elizabeta musazinyoko, ulimisi mwana mulombe mubucembele bwakwe, umweezi uno ngwasanu muumwi kulinguwe uwakali kutegwa tazyali. Nkaambo taakwe ijwi ilizwa kuli-Leza ilibula nguzu.”

Mariya walisyoma jwi lya Gabriyeli. Ino waingula buti? Ulaamba, “Ndi muzike wa-Jehova mebo, akube kulindime mbubonya mbuli kwaamba kwako.”

Mbwaazwida buyo Gabriyeli, Mariya walibambila akuunka kuyooswaya Elizabeta uukkalaa mulumaakwe Zakariya kumalundu mumunzi waku Judaya. Ikuzwa kuŋanda ya Mariya ku Nazareta, olu lweendo ndulamfwu antela ndwamazuba otatwe naa one.

Naasika kuŋanda ya Zakariya, Mariya wanjila akwaanzya. Amvwe buyo boobo, Elizabeta wazula muuya uusalala, waambila Mariya ategwa: “Uli acoolwe yebo akati kabakaintu, awalo mwana uuli mwida lyako uli acoolwe. Ino caba buti kulindime kuti banyina Mwami wangu baboole kulindime? Nkaambo ijwi lyakwaanzya kwako licimvwigwa buyo mumatwi aangu, mwana wasamba mwida lyangu akubotelwa.”

Ikumvwa boobo, Mariya waingula akulumba camoyo woonse ategwa: “Moyo wangu ulamulemya Jehova, amuuya wangu ulabotelwa kuli-Leza, Mufutuli wangu, nkaambo wayeeya bucete bwamuzike wakwe. Kuzwida sunu mazyalani oonse anoondyaamba kuti nacoolwe. Nkaambo Singuzu wandicitila zintu zipati.” Pele nokuba kuti wacitilwa luzyalo, Mariya upa bulemu boonse kuli Leza. Ulaamba: “Lilasalala zina lyakwe. Uluzyalo lwakwe luli kumazyalani amazyalani, kulibaabo abamuyoowa.”

Mariya wazumanana kutembaula Leza mulwiimbo lwabusinsimi lusololelwa amuuya ategwa: “Wacita milimo yenguzu ejanza lyakwe. Wabamwaya abalisumpula mukuyeeya kwamyoyo yabo. Wagwisya bami azyuuno zyabo, wabasumpula balyeetezya. Basinzala wabakusya zilweela, abavubi wabatanda buyo. Wagwasya muzike wakwe Israyeli, kuti ayeeye luzyalo kuli-Abrahamu akubazukulu bakwe mane kukabe kutamani, (Mbubonya mbuli kwaamba kwakwe kumatateesu).”

Mariya wakkalaa Elizabeta kwamyezi iisika kwiitatu alimwi kunyina kudooneka kuti wagwasya kapati munsondo zyamamanino zyada lya Elizabeta. Masimpe ncibotu kuti aba bamakaintu bobile basyomeka bayumwide bana kwiinda mulugwasyo lwa Leza kabali antoomwe kuciindi eci cakulongezyegwa mubuumi bwabo!

Sena mwabubona bulemu mbwaakapegwa Jesu nociba ciindi naatakaninga zyalwa? Elizabeta wakamwiita kuti “Mwami wangu” alimwi mwanaakwe watakaninga zyalwa wakasamba akubotelwa ciindi Mariya naakabbuka. Kakuli bamwi teebakali kumulemeka kapati Mariya amwanaakwe wakali mwida mbuli mbotutiibone. Luka 1:26-56.

▪ Ncinzi ncaamba Gabriyeli ikugwasya Mariya kuti ateelele mbwatiikamite?

▪ Wakalemekwa buti Jesu katana zyalwa?

▪ Ncinzi ncaamba Mariya mulwiimbo lwabusinsimi ikutembaula Leza?

▪ Wakkala ciindi cilamfwu buti Mariya kuli Elizabeta alimwi nkaambo nzi ncoceelede kuti Mariya akkale a Elizabeta muciindi eci?